Read fon 1 Timɔtée 3 Bible Online

1 Timɔtée 3 - fon bible

1 Timɔtée 3

¹Xó nǔgbó ɖokpó ɖíe: ényí mɛɖé jló ná nyí agunjíkpɔ́ntɔ́ ɔ́, azɔ̌ ɖagbe ba wɛ é ɖe.

² Agunjíkpɔ́ntɔ́ ka ɖó ná nyí mɛɖé, bɔ è nǎ mɔ nǔɖé ɖɔ dó wú tɔn ǎ. Asi ɖokpó wɛ é ɖó ná ɖó; é ná nɔ wa nǔ ɖó jlɛ̌ jí; é ɖó ná nɔ ɖu ɖo éɖée jí; é ɖó ná ɖó walɔ ɖagbe; é ɖó ná nɔ yí mɛ ganjí; é ná nyí mɛɖé bó ná sixú kplɔ́n nǔ mɛ.

³É ɖó ná nyí ahannumúnɔ ǎ; é ka ná nyí tagbanɔ ǎ, é nyɔ́ wa ɔ́, é ná nyɔ́ xomɛ, bó ná nyí mɛfífá, bɔ akwɛ́ ná nɔ gbo vɛ̌ ɛ ǎ.

⁴É ɖó ná kpé nukún dó xwé tɔn wú ganjí, bó ɖó gbe ɖo vǐ tɔn lɛ́ɛ jí, bɔ yě ná nɔ́ se tónú kpó sísí ɖaxó kpó.

⁵Đó mɛ e ma sixú kpé nukún dó xwé tɔn wú ǎ ɔ́, nɛ̌ é ka ná sixú kpé nukún dó agun Mawu tɔn wú gbɔn?

⁶É ɖó ná nyí mɛ e ɖi nǔ nú Klísu yɔ̌yɔ́ ɔ́ ǎ; é ma nyí mɔ̌ ǎ ɔ́, goyíyí táá wá byɔ́ lanmɛ n'i, bɔ Mawu ná ɖó hwɛ n'i lě e é ɖó hwɛ nú awǒvi gbɔn é.

⁷É ɖó ná nyí mɛɖé bɔ mɛ e ma ɖo agun Klísu tɔn mɛ ǎ lɛ́ɛ lɔmɔ̌ ná nɔ ɖe kúnnu ɖagbe n'i, bónú é ma wá ɖu hɛ̌n ó, bónú é ma wá jɛ mɔ e awǒvi nɔ ɖó nú mɛ lɛ́ɛ mɛ ó.

⁸Mɛ e nɔ kpé nukún dó agunví lɛ́ɛ[2] wú ɔ́ lɔmɔ̌ ɖó ná nyí gbɛtɔ́ ɖagbe, nǔgbóɖɔtɔ́; yě ɖó ná nɔ nu ahan dín ǎ; yě ka ɖó ná nɔ zé ayi hízíhízí dó ba akwɛ́ ná ǎ.

⁹Yě ɖó ná tɛ́ dó nǔgbó e ɖo nǔɖiɖi ɔ́ mɛ é wú syɛ́nsyɛ́n, kpódó ayixa mímɛ́ kpó.

¹⁰È nǐ tó tɛ́n yě kpɔ́n hwɛ̌; ényí è ma mɔ nǔ jɛ dó ɖé ɖo yě wú ǎ ɔ́, yě hɛn ɔ́, yě ná wa agunvíwú-kpénukúndótɔ́ sín azɔ̌.

¹¹Asi yětɔn lɛ́ɛ lɔ ɖó ná nyí mɛ ɖagbe; yě ɖó ná nɔ ɖɔ mɛ nú ǎ; yě ná nɔ wa nǔ bǐ dó jlɛ̌ jí, bó ná nɔ gbejí ɖo nǔ bǐ mɛ.

¹²Agunvíwú-kpénukúndótɔ́ ɔ́, así ɖokpó géé wɛ é ɖó ná ɖó; é ɖó ná hɛn vǐ tɔn lɛ́ɛ kpódó xwé tɔn kpó ganjí.

¹³Agunvíwú-kpénukúndótɔ́ e nɔ wa azɔ̌ yětɔn ganjí lɛ́ɛ ɔ́, tɛn ɖagbe wɛ yě nɔ mɔ; yě hɛn ɔ́, yě ná ɖɔ nǔɖiɖi e mǐ ɖó ɖo bǔ e mǐ ɖe xá Klísu Jezu ɔ́ mɛ ɔ́ sín xó kpódó jiɖiɖe kpó.

¹⁴Un ɖo wěma élɔ́ wlán sɛ́ dó we wɛ, bó ka ɖo linlin wɛ ɖɔ un ná wá gɔ̌n towe ɖo malín málín mɛ.

¹⁵È ka nɔ tunwun ǎ; ényí wǐwá ce wá ɖo lǐnlín wɛ ɔ́, wěma élɔ́ ná zɔ́n bɔ a nǎ tunwun lě e a nǎ wa nǔ gbɔn ɖo xwédo Mawu tɔn mɛ é; xwédo e nyí agun Mawu gbɛɖe ɔ́ tɔn, bó nyí dotín kpódó sósyɛ́n kpó nú nǔgbó ɔ́ é.

¹⁶Nǔgbó wɛ, mɛ ɖěbǔ sixú gbɛ́ ǎ; nǔbúdo e ɖo mawusinsɛn mɛ ɔ́ d'agba. “É wá gbɛtɔ́ ɖɔhun; Yɛsinsɛn ɖe e xlɛ́ ɖɔ é nyí hwɛjijɔnɔ; wɛnsagun Mawu tɔn lɛ́ɛ mɔ ɛ. È ɖɔ xó tɔn nú akɔta lɛ́ɛ bǐ; è ɖi nǔ n'i gbɔn gbɛ ɔ́ bǐ mɛ; Mawu sɔ́ ɛ yi jǐxwé ɖo susu mɛ.”