Read fon 1 Timɔtée 5 Bible Online

1 Timɔtée 5 - fon bible

1 Timɔtée 5

¹Ma sɔ́ gbe syɛ́nsyɛ́n dó gbɛ́ nǔ nú súnnu e ko nyí mɛxó é ó; lo ɔ́, ɖɔ xó n'i lě e a ɖǒ ná ɖɔ xó nú tɔ́ towe gbɔn é. Nɔ xá dɔ̌nkpɛvú lɛ́ɛ lě e a ɖǒ ná nɔ́ xá nɔví towe gbɔn é.

²Nɔ xá nyɔ̌nu e ko nyí mɛxó lɛ́ɛ lě e a nǎ nɔ xá nɔ towe gbɔn é. Nɔ xá ɖyɔ̌vǐ lɛ́ɛ nɔví towe nyɔ̌nu ɖɔhun kpódó ayixa mímɛ́ kpó.

³Kpé nukún dó asúkúsi e nyí asúkúsi nǔgbó nǔgbó lɛ́ɛ wú kpódó sísí kpó.

⁴Ényí asúkúsi ɖé ka ɖó vǐ abǐ vǐvú ɔ́, vǐ énɛ́ lɛ́ɛ ɖó ná kplɔ́n lě e yě nǎ zé nǔɖiɖi yětɔn dó wa azɔ̌ ná gbɔn ɖo hɛ̌nnu yě ɖésúnɔ tɔn mɛ ɔ́ hwɛ̌, énɛ́ ɔ́, yě ná sú nǔ e sín axɔ́ yě ɖu dó mɛjitɔ́ yětɔn lɛ́ɛ ɔ́ yě, ɖó nǔ e nyɔ́ Mawu nukún mɛ é nɛ́.

⁵Asúkúsi nǔgbó nǔgbó e ma ɖó mɛɖé bɔ é ná kpé nukún dó wútu tɔn ǎ ɔ́ nɔ sɔ́ nukúnɖíɖó tɔn bǐ ɖó Mawu jí. É nɔ gɔn ɖɛ xo ǎ, é nɔ gɔn vo sa nú Mawu ǎ.

⁶Lo ɔ́, asúkúsi e jó éɖée dó nú gbɛɖuɖu ɔ́ ɖo gbɛ cóbó ká kó kú.

⁷A ɖǒ ná nɔ ɖɔ nú yě ɖɔ yě ní nɔ wa nǔ gbɔn mɔ̌, bónú è ma wá mɔ nǔɖé ɖɔ dó yě wú ó.

⁸Ényí mɛɖé ma nɔ kpé nukún dó mɛ tɔn lɛ́ɛ wú ǎ ɔ́, ɖo tají ɔ́, mɛ e ɖo hɛ̌n tɔn nu lɛ́ɛ wú ǎ ɔ́, mɛ énɛ́ ɔ́ gbɛ́ nǔɖiɖi, lobo nylá hú nǔmaɖitɔ́.

⁹Asúkúsi ɖé ma ɖó xwe kanɖé ko (60) jɛjí ǎ hǔn, ma lɛ́n ɛ dó asúkúsi lɛ́ɛ mɛ ó. É ka ná nyí mɛɖé, bɔ súnnu ɖokpó géé jɛ́n é ná da kpɔ́n.

¹⁰È ka ɖó ná tunwun i ɖó nǔ ɖagbe e é nɔ wa ɔ́ wú; é ná nyí mɛɖé, bó ko kplɔ́n vǐ kpɔ́n, é ná nyí mɛɖé, bó nɔ yí mɛ ganjí; é ná nyí mɛɖé, bó nɔ klɔ́ afɔ nú klísusɛntɔ́ lɛ́ɛ[4]; é ná nyí mɛɖé, bó nɔ gɔ́ alɔ nú gbɛ̌dónánɔ lɛ́ɛ, bó ná nɔ wa ɖagbe hwebǐnu.

¹¹Ma xa asúkúsi e ma ko nyí mɛxó ǎ lɛ́ɛ dó asúkúsi lɛ́ɛ mɛ ó; ɖó hwenu e asúdida nɔ jɛ yě jló jí ɔ́, yě nɔ lɛ́ kɔ sín Klísu gúdo.

¹²Énɛ́ ɔ́, yě sɔ́ nɔ nɔ gbejí nú akpá nukɔn tɔn e yě dó nú Klísu ɔ́ ǎ, bɔ è nɔ ɖó hwɛ nú yě.

¹³Énɛ́ ɔ́ kɛ́ɖɛ́ ka wɛ ǎ; yě nɔ́ gú hwenu yětɔn, bó nɔ ɖo xwé xá ɖó afɔ wú wɛ, bɔ é húzú jijɔ nú yě. Ée tlɛ nylá hú bǐ ɔ́ wɛ nyí ɖɔ yě nɔ húzú xóɖɔ́xóɖɔ́, bó nɔ hɛn xó ɖé xomɛ ǎ, bó nɔ ɖo xó e yě ma ɖó ná ɖɔ ǎ lɛ́ɛ ɖɔ wɛ.

¹⁴Énɛ́ ɔ́ wú wɛ un jló ɖɔ asúkúsi e ma ko nyí mɛxó ǎ lɛ́ɛ ní lɛ́ vɔ́ asú da, bó ji vǐ; yě ní kpé nukún dó xwé yětɔn wú, bó ma ná ali ɖěbǔ kɛntɔ́ mǐtɔn lɛ́ɛ, bónú yě mɔ nǔ nyanya ɖé ɖɔ dó mǐ wú ó.

¹⁵Đó asúkúsi ɖé lɛ́ɛ kó gosín ali jlɔ́jlɔ́ ɔ́ jí, bó xwedó Satáan.

¹⁶Amɔ̌ ényí agunví nyɔ̌nu ɖé ɖó asúkúsi ɖo hɛ̌n tɔn nu hǔn, ní kpé nukún dó wú tɔn; ní ma jó é dó nyi kɔ jí nú agun ɔ́ ó; bónú agun ɔ́ na sixú kpé nukún dó asúkúsi nǔgbó nǔgbó lɛ́ɛ wú.

¹⁷Agunmɛxó e nɔ xlɛ́ ali agun ɔ́ ganjí lɛ́ɛ ɔ́, è ɖó ná mɔ yě dó mɔ mɛ e jɛ xá bɔ è nǎ sú axɔ́ we ɖo bǔ é; ɖo tají ɔ́, mɛ e nɔ ɖó kan dó Mawuxó ɖiɖɔ kpódó Mawuxó kplɔ́n mɛ kpó wú lɛ́ɛ.

¹⁸Đó Mawuxówéma ɔ́ ko ɖɔ: “Ma dó aja nu nú nyibúsú e ɖo nǔkún só ɖó afɔ wú wɛ ɔ́ ó.” Mawuxówéma ɔ́ ka lɛ́ ɖɔ: “É jɛ xá ɖɔ azɔ̌watɔ́ ní yí azɔ̌kwɛ́ tɔn.”

¹⁹ È wǎ jɛ agunmɛxó ɖé sín hwɛ nú we hǔn, ma yí gbe ná ó, afi nú mɛ we abǐ mɛ atɔn ɖe kúnnu ná.

²⁰Ényí mɛɖé tíin bó fɔ́n ɔ́, é nɔ ɖo hwɛ hu wɛ hǔn, gbɛ̌ n'i ɖo agbawungba, bónú mɛ e kpo lɛ́ɛ ná ɖi xɛsi.

²¹Un ɖo byɔ̌byɔ́ we wɛ syɛ́nsyɛ́n ɖo Mawu nukɔn, ɖo Klísu Jezu nukɔn, ɖo wɛnsagun mímɛ́ Mawu tɔn lɛ́ɛ nukɔn ɖɔ hwi ní se tónú nú sɛ́n énɛ́ lɛ́ɛ. Ma nɔ mɛɖé jí ó; ma ka lɔn nú mɛɖé sín nǔ nyɔ́ nukún towe mɛ hú mɛɖé ɖo nǔwiwa towe lɛ́ɛ mɛ ó.

²²Ma hwlɛ́n dó, bó ɖ'alɔ mɛɖé jí ó; mɛɖé hu hwɛ hǔn, ma ɖó alɔ ɖ'é mɛ ó, bó hɛn hwiɖée dó mímɛ́ jí.

²³Đó xomɛzɔn e a nɔ jɛ hwɛhwɛ ɔ́ wú ɔ́, ma sɔ́ nɔ nu sin kɛ́ɖɛ́ ó; nɔ nu vɛ̌ɛn kpɛɖé kpɛɖé, ɖó xomɛzɔn towe wú, ɖó a nɔ jɛ azɔn hwɛhwɛ.

²⁴Mɛ ɖé lɛ́ɛ tíin, bɔ nǔ e yě wa nyi do ɔ́, è nɔ ko mɔ gannaganna cóbó nɔ ɖɔ hwɛ xá yě; mɛɖé lɛ́ɛ ka tíin, bɔ gǔdo gúdo bǐ wɛ nǔ e yě wa nyí do lɛ́ɛ nɔ wá jɛ wěxo.

²⁵Mɔ̌ ɖokpó ɔ́, nǔ ɖagbe e mɛɖé lɛ́ɛ nɔ wa lɛ́ɛ ɔ́, è nɔ mɔ yě gannaganna; ée è ma tlɛ ko ɖo mimɔ wɛ tlóló ǎ lɛ́ɛ ɔ́, nɔ sixú nɔ hwlǎhwlá sɔ́yi ǎ.