Read fon 1 Timɔtée 6 Bible Online

1 Timɔtée 6 - fon bible

1 Timɔtée 6

¹Mɛ e nyí kannumɔ lɛ́ɛ bǐ ɖó ná mɔ gǎn yětɔn lɛ́ɛ dó mɔ mɛ e è ɖó ná ɖó sísí bǐ ná é, bónú mɛɖé ma ɖɔ xó nyanya dó Mawu sín nyǐkɔ kpódó nǔ e kplɔ́n mɛ wɛ mǐ ɖe ɔ́ kpán wú ó.

²Kannumɔ e sín gǎn nyí nǔɖitɔ́ lɛ́ɛ ɖó ná gɔn gǎn yětɔn lɛ́ɛ sí, ɖó yě ko nyí nɔví nɔví ɖo nǔɖiɖi mɛ wútu ǎ; é nyɔ́ wa ɔ́, yě ɖó ná lɛ́ sɛn yě bɔ é ná hú lě e sɛn gbɔn wɛ yě ko ɖe ɖ'ayǐ ɔ́, ɖó mɛ e ɖo nǔ e wa wɛ yě ɖe ɔ́ sín le ɖu wɛ lɛ́ɛ ɔ́, nǔɖitɔ́ e yě yí wǎn ná lɛ́ɛ wɛ. Nǔ e a ná kplɔ́n yě ɔ́ kpódó Mawuxó e a ná ɖɔ nú yě ɔ́ kpán ɖíe:

³Ényí mɛɖé kplɔ́n nǔ ɖěvo mɛ, bó ma yí gbe nú xó nǔgbó Aklúnɔ mǐtɔn Jezu Klísu tɔn lɛ́ɛ kpódó nǔkplɔ́nmɛ e sɔgbe xá sinsɛn mǐtɔn ɔ́ kpó ǎ hǔn,

⁴go wɛ é yí; é tunwun nǔɖé ǎ; nǔdindɔn kpódó jlɛɖiɖɔ dó xógbe ɖé lɛ́ɛ wú kpó sín azɔn jɛ wɛ é ɖe; nǔ énɛ́ lɛ́ɛ wɛ nɔ hɛn wǔhwinhwan, adɔndindɔn, mɛzunzun, nǔnyanyavɛdómɛ,

⁵kpódó nǔdindɔn magbokɔ byɔ́ gbɛtɔ́ e sín tamɛ ma sɔgbe ǎ bɔ yě ma sɔ́ tunwun nǔgbó ɔ́ ǎ lɛ́ɛ kpó tɛ́ntin; yě nɔ vɛdó ɖɔ mawusinsɛn ɔ́, dɔkun jijɛ nú wɛ é nyí sín.

⁶Nǔgbó ɔ́, mawusinsɛn ɔ́, dɔkun ɖaxó ɖokpó wɛ é nyí nú mɛ e nǔ e é ɖó ɔ́ nɔ kpé é.

⁷Đó mǐ hɛn nǔɖé wá gbɛmɛ fí ǎ; mǐ ka sixú hɛn nǔɖé yi kú ǎ.

⁸Énɛ́ ɔ́ wú ɔ́, ényí mǐ kó sixú mɔ nǔ bó ɖu, bó mɔ avɔ bo dó ɔ́, é ɖó ná kpé mǐ.

⁹Amɔ̌, mɛ e nɔ jló ná jɛ dɔkun lɛ́ɛ nɔ jɛ tɛ́nkpɔ́n mɛ, bó nɔ jɛ jlǒ ma ɖó ta ɖé lɛ́ɛ, kpódó jlǒ e nɔ zɔ́n bɔ è nɔ mɔ wǔvɛ́ lɛ́ɛ kpó sín mɔ mɛ; jlǒ énɛ́ lɛ́ɛ wɛ nɔ dɔn gbɛtɔ́ yi bú, bɔ yě nɔ dɔn.

¹⁰Đó wǎn yí nú akwɛ́ mɛ wɛ nǔ nyanya tɛnmɛ tɛnmɛ lɛ́ɛ bǐ nɔ tɔ́n sín; mɛɖé lɛ́ɛ ɖo gbě tɔn mɛ káká bó yi bú, bó ɖo zɔ nú nǔɖiɖi ɔ́, bó dɔn nǔgbomɛ gěgé dó kɔ.

¹¹Amɔ̌ hwɛ mawuzɔ́watɔ́ ɔ́, ɖǒ wǔ zɔ nú nǔ énɛ́ lɛ́ɛ bǐ, bó xwedó hwɛjijɔ, bó nɔ sí Mawu, bó ɖó nǔɖiɖi, bó ɖó wǎn yíyí, bó ɖó hǔnkúkú kpódó xomɛfífá kpó.

¹²Fun nǔɖiɖi hwan ɖagbe ɔ́. Hɛn gbɛ mavɔ mavɔ ɔ́ wú syɛ́nsyɛ́n, gbɛ mavɔ mavɔ e Mawu ylɔ́ we ná é. Gbɛ mavɔ mavɔ énɛ́ wɛ a ɖe kúnnu ɖagbe ná ɖo gbɛtɔ́ gěgé nukɔn.

¹³ Un ɖo zinzɔn we wɛ ɖo Mawu e ná gbɛ nǔ bǐ ɔ́ nukɔn, bó ɖo zinzɔn we wɛ ɖo Klísu Jezu e ɖe kúnnu ɖagbe ɖo Pɔ́nsu Pilátu sá mɛ ɔ́ nukɔn ɖɔ

¹⁴hwi ní se tónú nú nǔ e un zɔ́n we ɔ́, bó hɛn dó mǐmɛ́ jí nú blɔ̌ ɖé ma nɔ wú ó, káká jɛ gbe e gbe Aklúnɔ mǐtɔn Jezu Klísu ná ɖe éɖée xlɛ́ dó é.

¹⁵Nú hwe ɔ́ nu wá su ɔ́, Mawu nyɔ̌nábǐnɔ ɔ́, Mawu ɖokpó géé e hú gǎn nǔ bǐ é, ée nyí Axɔ́sú axɔ́sú lɛ́ɛ tɔn, bó nyí Aklúnɔ aklúnɔ lɛ́ɛ tɔn ɔ́, ná ɖe hwenu e Jezu Klísu na lɛ́ kɔ wá ɔ́ xlɛ́.

¹⁶É ɖokpónɔ géé wɛ má nɔ kú ǎ, bó ɖo wěziza e mɛɖé ma sixú sɛkpɔ́ ǎ é mɛ; mɛɖé mɔ ɛ kpɔ́n gbeɖé ǎ; mɛɖé ka sixú mɔ ɛ lɔ bo gbɔ ǎ. Susu kpódó hlɔ̌nhlɔ́n mavɔ mavɔ kpó ní nyí étɔn; amǐ!

¹⁷Kplɔ́n nǔ mɛ e jɛ dɔkun ɖo gbɛmɛ fí lɛ́ɛ ɖɔ yě ma nɔ yí go ó; ɖɔ nú yě ɖɔ yě ma sɔ́ nukúnɖíɖó yětɔn ɖó dɔkun énɛ́ lɛ́ɛ jí ó; ɖó è sixú gán jɛ dɔkun énɛ́ lɛ́ɛ wú ǎ. Lo ɔ́, yě ní sɔ́ nukúnɖíɖó yětɔn ɖó Mawu jí; é wɛ nɔ ná nǔ bǐ mǐ, bɔ é nɔ túnflá, bónú mǐ ná ɖu gbɛ yětɔn.

¹⁸Kplɔ́n nǔ yě ɖɔ yě ní nɔ wa ɖagbe, bó kplɔ́n yě ɖɔ yě ní nɔ wa nǔ ɖagbe gěgé. Yě ní nɔ hun alɔ bó ná nǔ mɛ, bó nɔ gbesisɔ mɛ, bó ná má nǔ e yě ɖó ɔ́ xá mɛ ɖě lɛ́ɛ.

¹⁹Ényí yě ɖo mɔ̌ wa wɛ ɔ́, dɔkun ɖagbe, dɔkun e wú è hɛn ɔ́, è nǎ gán jɛ ɔ́ kplé ɖ'ayǐ nú yěɖée wɛ yě ɖe nú sɔ yí e ná wá hɔ́n é, bó ná dó mɔ gbɛ jɔ gbɛ ɔ́ yí.

²⁰Timɔtée, hɛn nǔ e è sɔ́ dó así nú we ɔ́ syɛ́nsyɛ́n. Nɔ hɔn nú xógbló, xó e ma sɔgbe xá nǔɖiɖi ɔ́ ǎ lɛ́ɛ, bó hɔn nú nǔnywɛ́ ma nyí nǔnywɛ́ e mɛ lɛ́ɛ nɔ ylɔ́ ɖɔ nǔnywɛ́, bó nɔ ɖo nǔ dɔn ɖ'é kɔn wɛ é.

²¹Nǔgbó ɔ́, mɛɖé lɛ́ɛ nɔ ɖɔ émí ɖó nǔnywɛ́ énɛ́ ɔ́, bó xo nǔɖiɖi ɔ́ kpo. Fɛ́nú Mawu tɔn ní nɔ kpɔ́ xá mi.