Read fon 2 Timɔtée 2 Bible Online

2 Timɔtée 2 - fon bible

2 Timɔtée 2

¹Hǔn, hwi vǐ ce ɔ́, mɔ hlɔ̌nhlɔ́n ɖo fɛ́nú e mǐ ɖó, ɖo bǔ e mǐ ɖe xá Klísu Jezu ɔ́ mɛ.

²Nǔ e un ɖɔ, bɔ a se ɖo kúnnuɖetɔ́ gěgé nukɔn ɔ́, sɔ́ dó así nú mɛ e wú è ɖeji dó, bɔ yě lɔ ná sixú kplɔ́n mɛɖěvo lɛ́ɛ é.

³Ji ya e nyí towe ɔ́ ahwanfuntɔ́ ɖagbe Klísu Jezu tɔn ɖɔhun.

⁴Ényí ahwanfuntɔ́ e ɖo ahwangbénu ɔ́ ɖě jló na nyɔ́ ɖo gǎn tɔn sí ɔ́, é nɔ bɛ́ gbɛmɛ kpaa sín nǔ lɛ́ɛ dó hǔn mɛ ǎ.

⁵Wezunkántɔ́ e yi agbahwlɛ́nhwlɛ́n tɛnmɛ ɔ́ ma kán wezun lě e sɛ́n ɔ́ zɔ́n gbɔn ɔ́ ǎ ɔ́, é sixú mɔ ɖuɖéjígbákún yí ǎ.

⁶Glesi e wa azɔ̌, bó jɛ dɛ̌n ɔ́ wɛ ɖó ná nyí mɛ nukɔntɔn e ná yí nukún e nyí étɔn é.

⁷Lin tamɛ dó nǔ e ɖɔ wɛ un ɖe ɔ́ wú, ɖó Aklúnɔ ná nukúnnú-mɔjɛnǔmɛ we, bónú a nǎ sixú mɔ nukúnnú jɛ bǐ wú.

⁸Flín Klísu Jezu Davídi ví e Mawu fɔ́n sín kú, lě e Wɛn Ɖagbe e un jlá ɔ́ ɖɔ gbɔn é.

⁹Wɛn Ɖagbe énɛ́ wú wɛ un ɖo ya ji wɛ káká bɔ è dǒ wlɔ mì nǔ nyanya ɖé wɛ un wa ɖɔhun; Mawuxó ɔ́ ka ɖo wlɔ mɛ ǎ.

¹⁰Énɛ́ wú wɛ un nɔ dɛ ɖo nǔ bǐ nu, ɖó mɛ e Mawu cyán lɛ́ɛ wú, bónú yě lɔ ná sixú mɔ hwlɛngán e ɖo Klísu Jezu mɛ ɔ́ kpódó susu maɖókpodó kpó yí.

¹¹Xó nǔgbó ɖokpó ɖíe: “Ényí mǐ kú xá ɛ ɔ́, mǐ ná lɛ́ wá nɔ gbɛ xá ɛ.

¹² Ényí mǐ syɛ́nlǐn ɔ́, mǐ ná ɖu axɔ́sú xá ɛ. Ényí mǐ gbɛ́ ɖɔ mǐ kún tunwun i ó ɔ́, élɔ́ ná gbɛ́ ɖɔ émí kún tunwun mǐ ó.

¹³Ényí mǐ ma nɔ gbejí ǎ ɔ́, éyɛ́ ɖo gbejí tɛgbɛ; ɖó é sixú gbɛ́ ɖɔ émí kún nyí nǔ e émí nyí ɔ́ ó ǎ.”

¹⁴Flín nǔ énɛ́ ɔ́ bǐ, bó gbɛ́ nú yě ɖo Mawu nukɔn ɖɔ yě ní ma sɔ́ xógbe ɖé ɖó te, bó ɖo jlɛ ɖɔ ɖ'é kɔn wɛ ó. Jlɛ énɛ́ lɛ́ɛ nɔ wa nǔɖé zɛ yě ná dɔn mɛ e ɖo sise wɛ lɛ́ɛ yi bú wú ǎ.

¹⁵Dǒ gǎn bó sɔ́ hwiɖée jó nú Mawu, bó ná nyí mɛ e é jɛ xá ɖɔ Mawu ná sixú ɖe gbě ná é, bó ná nyí azɔ̌watɔ́ e winnyá ma ná hu dó azɔ̌ e é wa lɛ́ɛ wú ǎ é; azɔ̌watɔ́ e nɔ jlá nǔgbó wɛn ɔ́ ganjí é.

¹⁶Jǒ xógbló kpódó xó e ma sɔgbe xá Mawuxó ɔ́ ǎ lɛ́ɛ kpó dó; ɖó mɛ e nɔ ɖɔ xó énɛ́ lɛ́ɛ é fɔ́n tɛgbɛ ɔ́, yě ná nɔ ɖo zɔ sɛ yi nú Mawu wɛ;

¹⁷bɔ nǔ e kplɔ́n mɛ wɛ yě ɖe ɔ́ cí akpa e vó, bó ɖo nyinyɔ wɛ ɔ́ ɖɔhun. Imɛnɛ́ɛ kpódó Filetɔ́si kpó ɖo mɛ énɛ́ lɛ́ɛ mɛ.

¹⁸Yě lɛ́ kɔ sín nǔgbó ɔ́ gúdo, bó nɔ ɖɔ mɛkúkú lɛ́ɛ ko fɔ́n, bɔ xó énɛ́ ɔ́ ko wá yi. Nǔkplɔ́nmɛ yětɔn énɛ́ ɔ́ zɔ́n bɔ mɛɖé lɛ́ɛ sín nǔɖiɖi jɛ ayǐ.

¹⁹ Nǔ ɖo mɔ̌ có dodó syɛ́nsyɛ́n Mawu tɔn ɔ́ ɖo te ganjí, bɔ xó élɔ́ lɛ́ɛ nyí wuntun bó ɖ'é wú: “Aklúnɔ tunwun mɛ e nyí étɔn lɛ́ɛ é!” “Mɛ ɖěbǔ ɖɔ émí nyí Aklúnɔ tɔn ɔ́, mɛ ɔ́ ɖó ná lɛ́ kɔ sín nǔ nyanya wiwa gúdo.”

²⁰Agbǎn e è sɔ́ siká abǐ kpatágan dó bló ná lɛ́ɛ kɛ́ɖɛ́ wɛ è nɔ mɔ ɖo xwé ɖaxó ɖokpó gbe ǎ; è nɔ lɛ́ mɔ agbǎn e è sɔ́ atín dó bló ná ɔ́ kpódó ée è sɔ́ ko dó bló ná ɔ́ kpó. Agbǎn nukɔntɔn lɛ́ɛ ɔ́, hwenu e è ja nǔjɔnǔ ɖé wa gbé ɔ́ wɛ è nɔ ɖe yě tɔ́n; amɔ̌ ɖě lɛ́ɛ ɔ́, è nɔ zán yě nú nǔ yǎyá lɛ́ɛ.

²¹Ényí mɛɖé sixú ɖe nǔ nyanya e xó un ɖɔ ɔ́ sín gbɛzán tɔn mɛ ɔ́, nǔjɔnǔ wɛ è nǎ nɔ sɔ́ ɛ dó bló ná ɖó é ɖo gǎn tɔn sín acɛ mɛ bǐ sésé, bó jɛ alɔ n'i, bó ɖo gbesisɔ mɛ, bɔ é ná sɔ́ ɛ dó wa nǔ ɖagbe bǐ ná.

²²Hɔn nú jlǒ nyanya e mɛwínnyáwínnyá lɛ́ɛ nɔ ɖó lɛ́ɛ, bónú hwi kpódó mɛ e nɔ xomlá Aklúnɔ kpódó ayi mímɛ́ kpó lɛ́ɛ ní ba nǔjlɔ́jlɔ́wiwa, nǔɖiɖi, wǎn yíyí kpódó fífá kpó.

²³Nɔ zɔ nú nǔdindɔn e nyí taɖunɔ xó, bó nyí xlonɔ xó lɛ́ɛ; bo tunwun ɖɔ nǔdindɔn énɛ́ lɛ́ɛ ɔ́, jlɛ wɛ yě nɔ dɔn wá.

²⁴Aklúnɔ sín mɛsɛntɔ́ ka ɖó ná ɖɔ jlɛ ǎ; é nyɔ́ wa ɔ́, mɛ bǐ wɛ é ɖó ná dɔn dó wǔ; é ɖó ná nyí mɛɖé bó ná sixú kplɔ́n nǔ mɛ; é ɖó ná nɔ kú hǔn.

²⁵É ɖó ná nɔ sɔ́ xomɛ fífá dó kplɔ́n nǔ mɛ e ma ɖo xó ɖokpó ɔ́ ɖɔ xá ɛ wɛ ǎ lɛ́ɛ; afɔ nyɔ́ ɔ́, Mawu ná bló bɔ yě ná lɛ́ kɔ sín hwɛ yětɔn lɛ́ɛ gúdo, bó ná mɔ nukúnnú jɛ nǔgbó ɔ́ wú.

²⁶Énɛ́ ɔ́, yě ná wá mɔ yěɖée mɛ, bó ná ɖe yěɖée sín awǒvi e wlí yě, bó nɔ zɔ́n bɔ yě nɔ wa jlǒ tɔn ɔ́ sín mɔ mɛ.