Read fon 2 Timɔtée 3 Bible Online

2 Timɔtée 3 - fon bible

2 Timɔtée 3

¹Ka lɛ́ nywɛ́ ɖɔ hwenu vɛ́ wǔ lɛ́ɛ ná tíin ɖo azǎn gǔdo gúdo tɔn lɛ́ɛ mɛ.

²Hwe énɛ́ nu ɔ́, gbɛtɔ́ lɛ́ɛ ná nɔ ba ɖɔ émítɔn jɛ́n ná nyɔ́; yě ná nɔ yí wǎn nú akwɛ́; yě ná nɔ mɔ yěɖée; yě ná nɔ́ yí go; yě ná nɔ́ nylá nu dó Mawu wú; yě ná nɔ́ vɛ́ tóli nú mɛjitɔ́ yětɔn lɛ́ɛ; yě ná nɔ dó alɔgúdokpɛ́ nú mɛ; yě ná nɔ ɖó sísí nú nǔ e nyí Mawu tɔn lɛ́ɛ ɖě ǎ.

³Yě ná ɖó wǎn yíyí ɖěbǔ ǎ; yě ná nɔ kú nǔbláwǔ nú mɛ ǎ; yě ná nɔ́ ɖɔ mɛ nú; yě nɔ sixú ɖu ɖo yěɖée jí ǎ, bó ná nɔ nylá hun; yě ná nɔ́ gbɛ́ wǎn nú ɖagbewiwa.

⁴Yě ná nɔ́ sa mɛ ɖu; yě ná nɔ́ lin tamɛ kpɔ́n cóbó ná nɔ́ wa nǔ ǎ; yě ná nɔ́ yí go zɛ xwé wú; yě ná nɔ́ yí wǎn nú gbɛɖuɖu hú yě ná yí wǎn nú Mawu.

⁵Yě ná nyí mawusɛntɔ́ ɖo nukúnta, bó ka ná gbɛ́ nǔ e nyí hlɔ̌nhlɔ́n titewungbe nú sinsɛn ɔ́ é; lɛ̌ kɔ sín gbɛtɔ́ mɔ̌hun lɛ́ɛ gúdo.

⁶Mɛ ɖé lɛ́ɛ ɖo yě mɛ, bó nɔ lun byɔ́ xwé lɛ́ɛ gbe, lobo nɔ ɖɔ xó dó blɛ́ nyɔ̌nu e ma ɖó gǎn ɖě ǎ, bɔ hwɛgban ɖo kɔ ná lɛ́ɛ, káká bó nɔ́ xwe yě dó acɛ yětɔn mɛ.

⁷Nyɔ̌nu énɛ́ lɛ́ɛ nɔ ɖo nǔ kplɔ́n wɛ tɛgbɛ, yě ka nɔ sixú kpé nǔgbó ɔ́ wú bó nɔ tunwun ǎ.

⁸ Lě e Janɛ́si kpódó Janblɛ́si kpó[1] gbɛ́ Mɔyízi sín xó gbɔn ɔ́, mɔ̌ ɖokpó ɔ́ wɛ gbɛtɔ́ ayiblúblúnɔ e sín nǔɖiɖi ma nyí nǔɖé wa nú ǎ nɛ́ lɛ́ɛ lɔmɔ̌ gbɛ́ nǔgbó ɔ́ gbɔn é nɛ́.

⁹Yě ka xwe fí línlín ɖé ǎ; ɖó mɛ bǐ ná mɔ ɖɔ taɖunɔxó ɖɔ wɛ yě ɖe, lě e é nyí gbɔn nú Janɛ́si kpódó Janblɛ́si kpó é ɖɔhun.

¹⁰Amɔ̌ hwɛ ɔ́, a ka tunwun nǔ e un kplɔ́n mɛ ɔ́ bǐ; a tunwun lě e un zán gbɛ ce gbɔn ɔ́ bǐ, bó tunwun linlin ce lɛ́ɛ, bó tunwun nǔɖiɖi e un ɖó ɔ́, bó tunwun suúlu e un ɖó ɔ́ kpódó wǎn yíyí e un ɖó ɔ́ kpán. A tunwun lě e un nɔ syɛ́nlǐn gbɔn é.

¹¹ A tunwun ya e è dǒ nú mì lɛ́ɛ é, bó tunwun wǔvɛ́ e un mɔ lɛ́ɛ. A tunwun nǔ e gbo mì ɖo Antyɔ́ci kpódó Ikoniyɔ́mu kpó, kpódó Lisitli kpán é, bó tunwun wǔvɛ́ e un mɔ lɛ́ɛ. Aklúnɔ ka hwlɛ́n mì gán ɖo nǔ énɛ́ lɛ́ɛ bǐ mɛ.

¹²Mɛ e jló ná zán gbɛ yětɔn nú Mawu kpó sísí kpó, ɖo bǔ e yě ɖe xá Klísu Jezu é mɛ ɔ́ bǐ wɛ è nǎ tlɛ dó ya ná lɔ.

¹³Amɔ̌ gbɛtɔ́ dídá awoxotɔ́ lɛ́ɛ fɔ́n tɛgbɛ ɔ́, yě na ɖo nǔ nyanya wa d'é jí wɛ; yě ná flú mɛ ɖě lɛ́ɛ, bɔ è nǎ flú yě ɖésú.

¹⁴Hwɛ ɔ́, syɛ́nlǐn ɖo nǔ e a kplɔ́n, bó mɔ ɖɔ nǔgbó wɛ é nyí ɔ́ mɛ; ɖó a tunwun mɛ e kplɔ́n nǔ énɛ́ we lɛ́ɛ.

¹⁵Sín hwenu e a ɖo vǔ ɔ́ wɛ a ko tunwun nǔwlánwlán mímɛ́ lɛ́ɛ; yě hɛn ɔ́, yě nǎ ná nǔnywɛ́ e nɔ kplá mɛ, bɔ è nɔ mɔ hwlɛngán gbɔn nǔ ɖi nú Klísu Jezu gbla mɛ ɔ́ we.

¹⁶Nǔ e è wlán dó Mawuxówéma ɔ́ mɛ ɔ́, Mawu wɛ sɔ́ bǐ dó ayi mɛ nú mɛ lɛ́ɛ; é nyɔ́ nú è nǎ sɔ́ dó kplɔ́n nǔ mɛ, bó ná dó ɖe mɛ dó ali jí, bó ná dó ɖe nǔwanyido lɛ́ɛ xlɛ́, lobo ná dó kplɔ́n lě e è nǎ zǎn gbɛ ɖagbe gbɔn ɔ́ mɛ,

¹⁷bónú mɛ e nyí Mawu tɔn ɔ́ ná ɖo gbesisɔ mɛ titewungbe, bɔ nǔ e é ná dó wa nǔ ɖagbe bǐ na ɔ́ bǐ ná ɖo así tɔn.