Read fon 2 Timɔtée 4 Bible Online

2 Timɔtée 4 - fon bible

2 Timɔtée 4

¹Un ɖo zǐnzɔ́n we wɛ syɛ́nsyɛ́n ɖo Mawu nukɔn, bó ɖo zǐnzɔ́n we wɛ ɖo Klísu Jezu e ná ɖɔ hwɛ xá mɛ e ɖo gbɛ lɛ́ɛ kpódó mɛ e ɖo kú lɛ́ɛ kpán ɔ́ nukɔn, bó ɖo byɔ̌byɔ́ we wɛ ɖo Jezu Klísu sín wǐwá kpódó axɔ́súɖuɖu tɔn kpán sín nyǐkɔ mɛ ɖɔ:

²Jlǎ Mawuxó; nɔ tɛ ɖɛ̌ jí, bó nɔ ɖɔ hwebǐnu; hwe ɔ́ nu nyɔ́ kpó é ma nyɔ́ kpó ɔ́, a nǎ nɔ́ jlá; a nǎ nɔ́ sɔ́ xomɛfífá dó kɛ nu dó nǔ wú nú mɛ, dó gbɛ́ nǔ nú mɛ, bó dó ná akɔ́nkpinkpan mɛ ɖo nǔkplɔ́nmɛ towe lɛ́ɛ mɛ.

³Đó hweɖénu ná wá su, bɔ nǔkplɔ́nmɛ titewungbe ɔ́ sɔ́ ná nyɔ́ se nú gbɛtɔ́ lɛ́ɛ ǎ; lo ɔ́, yě ná xwedó jlǒ yě ɖésúnɔ tɔn, bó ná kplé nǔkplɔ́nmɛtɔ́ wɔ̌buwɔ́bú ɖé lɛ́ɛ nú yěɖée, bɔ yě ná nɔ́ ɖɔ nǔ e nyɔ́ se nú yě lɛ́ɛ nú yě.

⁴Yě ná nɔ́ dó tókúse nǔgbó ɔ́ mɛ, bó ná nɔ́ ɖótó xɛxó lɛ́ɛ.

⁵Amɔ̌ hwɛ ɔ́, nɔ wa nǔ bǐ dó jlɛ̌ jí; dɛ ɖo yajiji nu; wa Wɛn Ɖagbejlátɔ́ sín azɔ̌, bó wa mɛsɛntɔ́ Mawu tɔn sín azɔ̌ towe ganjí.

⁶Nyɛ ɔ́, hwenu e è nǎ sɔ́ mì dó sá vɔ̌ ná ɔ́ su; hwenu e un ná gosín gbɛ élɔ́ mɛ ɔ́ su.

⁷Un fun ahwan ɖagbe ɔ́; un dó wezun ɔ́ káká yi vivɔnu; un kpo ɖo nǔ ɖi nú Klísu Jezu wɛ.

⁸Bɔ din ɔ́, ajɔ e è nǎ ná mɛ e ɖu ɖ'é jí lɛ́ɛ ɖo te nú mì; é wɛ nyí hwɛjijɔ sín ɖuɖéjígbákún e Aklúnɔ e nɔ́ ɖɔ hwɛjijɔ ɔ́ ná ná mì azǎn énɛ́ gbe é. É ka nyí nyɛ ɖokpónɔ wɛ é ná ná ǎ, lo ɔ́, mɛ e yí wǎn n'i, bó ɖo te kpɔ́n wǐwá tɔn lɛ́ɛ bǐ wɛ é ná ná.

⁹Dǒ gǎn bó wá mɔ mì ɖo malín málín mɛ.

¹⁰Đó Demási jó mì dó, bó yi Tɛsaloniki, ɖó é yí wǎn nú gbɛ din tɔn ɔ́ dín. Klɛsáan yi Galati, bɔ Títu ka yi Dalumati.

¹¹ Luki kɛ́ɖɛ́ wɛ kpo ɖo gɔ̌n ce; kplá Maki bónú hwi kpó e kpó ní zɔn wá; ɖó é hɛn ɔ́, é ná d'alɔ mì ɖo azɔ̌ ce lɛ́ɛ mɛ.

¹² Un sɛ́ Ticíku dó Efɛ́zi.

¹³ A ja hǔn, sɔ́ awu ce ɖaxó e un jó dó nyi Kaapɔ́si xwé, ɖo Tlowasi é wá nú mì; bɛ̌ wěma lɛ́ɛ lɔmɔ̌ wá nú mì; ɖo tají ɔ́, anyǔwéma lɛ́ɛ[2].

¹⁴ Alɛsándlu fletuntɔ́ ɔ́ wa nǔ nyanya gěgé dó wútu ce; Aklúnɔ ná sú nǔ e é wa ɔ́ sín axɔ́ ɛ.

¹⁵Hwi lɔ ka cɔ́ hwiɖée dó wǔ tɔn, ɖó xó e mǐ ɖɔ ɔ́ bǐ xwíí wɛ é fɔ́n gǔ bó gbɛ́.

¹⁶Nukɔn nukɔntɔn e un yi hwɛ nukɔn bó ná ɖɔ xó dó hwlɛ́n nyɛɖée ɔ́, un mɔ mɛɖé ɖo gǔdo ǎ; yě bǐ wɛ hɔn jó mì dó; Mawu ní ma lɛ́n hwɛ tɔn dó kɔ nú yě ó.

¹⁷Aklúnɔ ka nɔ gǔdo ce, bó ná hlɔ̌nhlɔ́n mì, bɔ un jlá wɛn Mawu tɔn ɔ́ ganjí, bónú mɛ e ma nyí Jwifu ǎ lɛ́ɛ bǐ ná se. Aklúnɔ hwlɛ́n mì sín kinnikínní nu mɛ.

¹⁸Aklúnɔ ná ɖe mì sín nǔ nyanya bǐ mɛ; é ná hwlɛ́n mì, bó ná kplá mì byɔ́ axɔ́súɖuɖu tɔn mɛ ɖo sɛ́xwé wǔyɛ́yɛ́ afɔyɛ́yɛ́. È ní kpa susu n'i káká sɔ́yi. Amǐ.

¹⁹ Dǒ gbe Plisílu kpódó Akilási kpán, kpódó hɛ̌nnu Onɛzifɔ́ɔ tɔn kpán nú mì.

²⁰ Elasíti cí Kɔlɛ́nti. Un ka jó Tlofímu dó nyi Milɛ, ɖó é ɖo azɔn jɛ wɛ.

²¹Dǒ gǎn bó wá cóbónú avivɔ hwenu su. Ebúlu kpódó Pudɛ́nsi kpó, kpódó Linu kpó, kpódó Klódiya kpó, kpódó nɔví ɖě lɛ́ɛ bǐ kpán dó gbe sɛ́ dó we.

²²Aklúnɔ ní nɔ kpɔ́ xá we. Fɛ́nú Mawu tɔn ní nɔ kpɔ́ xá mi.