Read fon Titu 1 Bible Online

Titu 1 - fon bible

Titu 1

¹Nyɛ Pɔ́lu, mɛsɛntɔ́ Mawu tɔn, mɛsɛ́dó Aklúnɔ Jezu Klísu tɔn wɛ wlán wěma élɔ́. Mawu zɔ́n mì ɖɔ ma ɖɔ xó nú mɛ e émí cyán lɛ́ɛ, bónú yě ní ɖi nǔ nú Aklúnɔ Jezu Klísu, lobo ka ɖe nǔgbó e ɖo sinsɛn mǐtɔn li jí ɔ́ xlɛ́ yě,

²bónú yě ná ɖo gbɛ mavɔ mavɔ sín nukúnɖíɖó mɛ. Mawu ko dó gbɛ mavɔ mavɔ ɔ́ sín akpá cóbɔ gbɛ ɔ́ wá tíin; é ka nɔ ɖó adingban ǎ.

³Ée hwe ɔ́ nu wá su ɔ́, é ɖe gbɛ mavɔ mavɔ ɔ́ xlɛ́ gbɔn xó tɔn gbla mɛ, ɖo wɛn e é sɔ́ dó así nú mì, bɔ un ɖo jlǎjlá wɛ, lě e Mawu Mɛhwlɛ́ngántɔ́ mǐtɔn ɔ́ zɔ́n gbɔn é mɛ.

⁴ Títu, vǐ ce nǔgbó nǔgbó tɔn wɛ a nyǐ ɖo nǔɖiɖi ɖokpó ɔ́ e mǐ ɖó ɔ́ mɛ. Mawu Tɔ́ ɔ́ kpó Mɛhwlɛ́ngántɔ́ mǐtɔn Klísu Jezu kpó ní ná fɛ́nú kpó fífá kpó we.

⁵Un jó we dó nyi Klɛ́ti, bónú a nǎ to nǔ e kpo bɔ è nǎ to lɛ́ɛ é; a nǎ xwedó lě e un ko ɖɔ hwi ní bló gbɔn ɔ́, bó ná sɔ́ agunmɛxó lɛ́ɛ ɖo toxo ɖokpó ɖokpó mɛ.

⁶ Agunmɛxó ɖó ná nyí mɛɖé, bɔ è nǎ mɔ nǔjɛdo ɖě ɖɔ dó wú tɔn ǎ; asi ɖokpó géé wɛ é ɖó ná ɖó; vǐ tɔn lɛ́ɛ ɖó ná ɖi nǔ nú Klísu; yě ɖó ná nyí mɛ, bɔ è nǎ tunwun yě dó tunwun gbɛnyanyazántɔ́ ǎ, yě ká ɖó ná tlí tó ǎ.

⁷Nǔgbó ɔ́, azɔ̌ e nyí agunnukɔntɔ́ tɔn ɔ́ wɛ nyí ɖɔ é ná nɔ kpé nukún dó nǔ e nyí Mawu tɔn lɛ́ɛ wú; énɛ́ ɔ́ wú ɔ́, è ɖǒ ná mɔ nǔjɛdo ɖěbǔ ɖɔ dó wǔ tɔn ǎ, é ɖó ná nyí gangannagansú ǎ; é ɖó ná nyí xomɛsinnɔ ǎ, é ɖó ná nyí ahannumúnɔ ǎ, é ɖó ná nɔ́ sí hun te ǎ, é ɖó ná nyí mɛxoɖutɔ́ ǎ.

⁸É ɖó ná nɔ yí mɛ e nɔ wá gɔ̌n tɔn lɛ́ɛ ganjí, bó ná yí wǎn nú ɖagbewiwa; é ɖó ná nɔ wa nǔ e sɔgbe é, é ɖó ná nɔ́ wa nǔ jlɔ́jlɔ́; é ɖó ná nyí mɛ mímɛ́; é ɖó ná nɔ wa nǔ ɖó jlɛ̌ jí.

⁹É ɖó ná hɛn xó jɔ xó, xó ɖeji d'é wú e sɔgbe xá ɖěe è kplɔ́n ɛ ɔ́ dó ayi mɛ syɛ́nsyɛ́n; énɛ́ ɔ́, é ná nyí mɛ, bó ná sixú zé nǔkplɔ́nmɛ titewungbe ɔ́ dó ná akɔ́nkpinkpan mɛ ɖě lɛ́ɛ, bó ná nɔ́ ɖe mɛ e nɔ kpé ta do nú xó ɔ́ lɛ́ɛ sín nǔwanyido xlɛ́ yě.

¹⁰Đó yě sukpɔ́, ɖo tají ɔ́, gǔfɔ́ntɔ́ e nɔ ɖɔ xó maɖótaɖé dó blɛ́ mɛ lɛ́ɛ ná ɔ́ sukpɔ́ ɖo Jwifu e húzú jɛ Klísu li jí lɛ́ɛ mɛ.

¹¹È ɖǒ ná xwe nu yětɔn dó xɔ, ɖó yě ɖo hunnyahunnya dó hɛ̌nnu lɛ́ɛ bǐ sésé mɛ wɛ, bɔ nǔ e è ma ɖó ná kplɔ́n mɛ ǎ ɔ́, yě nɔ kplɔ́n mɛ lɛ́ɛ, bó ná dó mɔ akwɛ́.

¹²Klɛ́tinu gbeyíɖɔ yě ɖésúnɔ tɔn ɖokpó ɖɔ dó yě wú ɖɔ: “Klɛ́tinu lɛ́ɛ ɔ́, adingbannɔ jɛ́n yě nyǐ tɛgbɛ; kanlin dídá wɛ yě nyí; yě ɖi fɔnlín, bó sɔ́ nɔ lin nǔɖé zɛ nǔɖuɖu wú ǎ.”

¹³Nǔ énɛ́ e gbeyíɖɔ ɔ́ ɖɔ dó yě wú ɔ́, nǔgbó ka wɛ; énɛ́ wú ɔ́, gbɛ̌ nǔ nú yě syɛ́nsyɛ́n, bónú yě ní ɖó nǔɖiɖi e sɔgbe é,

¹⁴bónú yě ní ma sɔ́ nɔ gán jɛ Jwifu lɛ́ɛ sín xɛxó kpó mɛ e lɛ́ kɔ sín nǔgbó ɔ́ gúdo lɛ́ɛ kpó sín sɛ́n wú ó.

¹⁵Mɛ mímɛ́ lɛ́ɛ ɔ́, nǔ bǐ wɛ nyí nǔ mímɛ́ nú yě. Lo ɔ́, mɛ e ma nyí mɛ mímɛ́ ǎ, bó ma ɖi nǔ nú Klísu ǎ lɛ́ɛ ɔ́, nǔɖé nyí nǔ mímɛ́ nú yě ǎ; ɖó nǔnywɛ́ yětɔn kpó ayixa yětɔn kpó bǐ wɛ nyí nǔblíblí.

¹⁶Yě tunwun Mawu bó ɖɔ; lo ɔ́, nǔwiwa yětɔn ɖe xlɛ́ ɖɔ yě kún tunwun Mawu ó. Mɛ e è nǎ gbɛ́ wǎn ná wɛ nú yě; yě nyí gǔfɔ́ntɔ́, bó nyí mɛ e ma sixú kpé nǔ ɖagbe ɖěbǔ wú bó wa ǎ lɛ́ɛ é.