Read fon Titu 2 Bible Online

Titu 2 - fon bible

Titu 2

¹Amɔ̌ hwɛ ɔ́, nǔ e sɔgbe xá nǔkplɔ́nmɛ ɖagbe ɔ́ wɛ a nǎ kplɔ́n mɛ lɛ́ɛ;

²ɖɔ nú súnnu e ko kpo lɛ́ɛ ɖɔ yě ní nɔ wa nǔ ɖó jlɛ̌ jí; yě ní nyí mɛsísí; yě ní nɔ wa nǔ e sɔgbe é; yě ní lí dǒ ɖo nǔɖiɖi mɛ, bó lí dǒ ɖo wǎn yíyí kpó suúluɖíɖó kpó mɛ.

³Mɔ̌ ɖokpó ɔ́, ɖɔ nú nyɔ̌nu e sín xwe ko sɛ yi lɛ́ɛ ɖɔ yě ní zán gbɛ yětɔn mɛ e nɔ zán gbɛ mímɛ́ lɛ́ɛ ɖɔhun. Yě ná nɔ́ ɖɔ mɛ nu ǎ; yě ná nyí ahannumúnɔ ǎ; yě ɖó ná nɔ́ kplɔ́n nǔ ɖagbe mɛ,

⁴bó ná dó sixú kplɔ́n nyɔ̌nu e ma ko nyí mɛxó ǎ lɛ́ɛ ɖɔ yě ní yí wǎn nú asú yětɔn kpó vǐ yětɔn lɛ́ɛ kpó.

⁵Yě ná nɔ kplɔ́n yě ɖɔ yě ní nɔ wa nǔ e sɔgbe é, lobo nyí mɛ mímɛ́; yě ní nɔ́ kpé nukún dó xwégbezɔ́ yětɔn lɛ́ɛ wú, bó ná nyí nyɔ̌nu ɖagbe e nɔ se tónú nú asú yětɔn lɛ́ɛ é; yě ní wa nǔ gbɔn mɔ̌, bónú mɛɖé ma ɖɔ xó nyanya ɖé dó Mawuxó ɔ́ wú ó.

⁶Mɔ̌ ɖokpó ɔ́, a nǎ ɖɔ nú dɔ̌nkpɛvú lɛ́ɛ ɖɔ yě ní nɔ wa nǔ e sɔgbe é.

⁷Hwi ɖésúnɔ ɔ́, a ɖǒ ná nɔ́ wa nǔ ɖagbe ɖo nǔ bǐ mɛ, bó ná nyí kpɔ́n d'é wú nú yě; a nǎ sɔ́ nǔ e kplɔ́n mɛ wɛ a ɖe lɛ́ɛ dó ɖó nǔjɔnǔ, lobo kpé nukún d'é wú.

⁸A nǎ nɔ zán xógbe e sɔgbe bɔ mɛɖé ma ná sixú mɔ xó ɖé ɖɔ d'é wú ǎ lɛ́ɛ, bónú kɛntɔ́ towe lɛ́ɛ ná ɖu winnyá, ɖó yě ná mɔ xó nyanya ɖé ɖɔ dó mǐ wú ǎ.

⁹Kannumɔ lɛ́ɛ ɖó ná se tónú nú gǎn yětɔn lɛ́ɛ, bó ná nyɔ́ nú yě ɖo nǔ bǐ mɛ; yě ɖó ná nɔ vɛ́ tóli nú gǎn yětɔn lɛ́ɛ sín xó ǎ.

¹⁰Yě ɖó ná nɔ́ hízí gǎn yětɔn sín nǔ ɖěbǔ ǎ; é nyɔ́ wa ɔ́, yě ná nɔ́ ɖe xlɛ́ hwebǐnu ɖɔ émí nyí mɛ ɖagbe; émí ɖo gbejí, bónú mɛ lɛ́ɛ ná dó sixú ɖó sísí nú nǔkplɔ́nmɛ e ɖɔ xó dó Mawu Mɛhwlɛ́ngántɔ́ mǐtɔn wú ɔ́ ɖo nǔ bǐ mɛ.

¹¹Đó Mawu ɖe fɛ́nú tɔn e jí hwlɛngán gbɛtɔ́ lɛ́ɛ bǐ tɔn jínjɔ́n ɔ́ xlɛ́.

¹²Fɛ́nú énɛ́ ɔ́ kplɔ́n mǐ ɖɔ mǐ ní jó gbɛ nyanya zínzán kpó jlǒ gbɛmɛ fí tɔn lɛ́ɛ kpó dó, bó ná nɔ́ wa nǔ e sɔgbe é, bó ná nɔ́ zán gbɛ jlɔ́jlɔ́, lobo ná nɔ́ gbejí nú Mawu.

¹³Lě e mǐ ɖó ná nɔ te kpɔ́n azǎn ɖagbe e ɖó nukún wɛ mǐ ɖe ɔ́ gbɔn ɔ́ nɛ́; azǎn énɛ́ gbe wɛ Mawu ɖaxó, Mɛhwlɛ́ngántɔ́ Klísu Jezu ná ɖe susu tɔn xlɛ́.

¹⁴ É sɔ́ éɖée jó dó ta mǐtɔn mɛ, bó ná xɔ mǐ ɖo nǔ nyanya bǐ mɛ, bó ná sɔ́ mǐ dó bló togun mímɛ́ e nyí é ɖokpónɔ géé tɔn ɔ́ ná, bɔ mǐ ná nɔ́ ɖó kan dó nǔ ɖagbe wiwa wú.

¹⁵Nǔ e a nǎ zé acɛkpikpa towe bǐ dó kplɔ́n mɛ e ɖo tó ɖó we wɛ lɛ́ɛ ná ɔ́ nɛ́, bó ná nɔ́ sɔ́ dó ná akɔ́nkpinkpan yě, abǐ bó ná nɔ́ dó gbɛ́ nǔ nú yě. Ma ka lɔn nú mɛɖé hu tɛ́ nú we ó.