Read fon Filemɔ́ɔ 1 Bible Online

Filemɔ́ɔ 1 - fon bible

Filemɔ́ɔ 1

¹Nyɛ Pɔ́lu e ɖo ganxó ɖó Klísu Jezu wútu ɔ́, kpódó nɔví mǐtɔn Timɔtée kpán wɛ ɖo wěma élɔ́ wlán sɛ́ dó we wɛ Filemɔ́ɔ, hwi mɛ e nyí wǎnyínámɔ mǐtɔn, bó lɛ́ nyí azɔ̌gbɛ́ mǐtɔn é.

² Hwi kpódó agun e nɔ kplé ɖo xwé towe gbe ɔ́ kpó, kpó nɔví mǐtɔn nyɔ̌nu Afya kpán, kpódó ahwanfungbɛ́ mǐtɔn Aacípu kpán wɛ mǐ sɛ́ wěma ɔ́ dó.

³Mawu Tɔ́ mǐtɔn kpódó Aklúnɔ mǐtɔn Jezu Klísu kpó ní ná fɛ́nú kpódó fífá kpó mi.

⁴Un ɖo ɖɛ xo wɛ hweɖěbǔnu ɔ́, un nɔ flín we, bó nɔ dó kú nú Mawu,

⁵ɖó un se wǎn yíyí e a ɖǒ nú mɛɖeɖóvo Mawu tɔn lɛ́ɛ kpódó nǔɖiɖi e a ɖǒ nú Aklúnɔ Jezu ɔ́ kpán.

⁶Un nɔ byɔ́ Mawu ɖɔ kɔnɖókpɔ́ e a ɖǒ xá mǐ ɖo nǔɖiɖi mɛ ɔ́ ní bló bónú è nǎ tunwun ɖagbe e mǐ nɔ mɔ ɖo Klísu mɛ lɛ́ɛ bǐ céɖécéɖé.

⁷Nɔví ce, wǎn yíyí e a ɖǒ ɔ́ hun xomɛ nú mì tlala, bó dó gbɔ nú mì ɖésú, ɖó a blǒ bɔ mɛɖeɖóvo Mawu tɔn lɛ́ɛ sín ayi jɛ ayǐ.

⁸Wǎn yíyí e a ɖǒ ɔ́ wú wɛ un ɖo nǔ élɔ́ byɔ́ we wɛ. Un hɛn ɔ́, un ná ɖɔ nǔ e a nǎ bló ɔ́ nú we, ɖó Klísu ná acɛ tɔn mì;

⁹un ka jló ná bló gbɔn mɔ̌ ǎ. Nyɛ Pɔ́lu ɔ́, un ko kpo, bó ka lɛ́ ɖo gankpá mɛ din ɖó Klísu Jezu wútu.

¹⁰ Un ɖo vo sa nú we wɛ dó Onɛzímu tamɛ. Un ɖɔ Klísu Jezu xó n'i, bɔ é ɖi nǔ, lobo húzú vǐ ce ɖo Klísu mɛ ɖo gankpá mɛ fí.

¹¹Đ'ayǐ xóxó ɔ́, é nyí le ɖě nú we ǎ; amɔ̌ din ɔ́, é nyí le nú we, bó nyí le nú nyi lɔmɔ̌.

¹²Din ɔ́, un lɛ́ kɔ n'i sɛ́ dó we; éyɛ́ mɛ e nyí xo ce mɛ ví é.

¹³É jló mì ganjí ɖɔ ní nɔ gɔ̌n ce ɖo gankpá mɛ fí e un ɖe ɖó Wɛn Ɖagbe ɔ́ wútu é, bónú é ná dó alɔ mì ɖó tɛn towe mɛ.

¹⁴Lo ɔ́, un jló ná bló nǔɖé hwi mɛvo ǎ; un jló ná fán asú we nú a nǎ wa ɖagbe nú mì ǎ; lo ɔ́, a nǐ bló kpó jlǒ hwi ɖésúnɔ tɔn kpó.

¹⁵É sixú ko nyí ɖɔ Onɛzímu ɔ́ gosín gɔ̌n towe nú hwenu kpɛɖé, bó ná lɛ́ kɔ wá nɔ gɔ̌n towe káká sɔ́yi wɛ.

¹⁶Din ɔ́, é sɔ́ nyí kannumɔ kpowun nú we ǎ; é hú gǎn kannumɔ. Nɔví mǐtɔn vívɛ́ná wɛ é húzú. Nyɛ ɔ́, mɛvívɛ́ ɖé wɛ é nyí nú mì. É ka ɖó ná lɛ́ nyí mɛvívɛ́ nú hwɛ hú mɔ̌; kannumɔ towe wɛ é nyí, bó ka lɛ́ nyí nɔví towe ɖo Aklúnɔ mɛ.

¹⁷Ényí azɔ̌gbɛ́ towe jɛ́n un nyí nǔgbó hǔn, yí i lě e a nǎ yí nyɛ ɖésúnɔ gbɔn ɔ́.

¹⁸Ényí é wa nǔɖé nyi do nú we, abǐ é ɖu axɔ́ ɖé dó we hǔn, lɛ̌n bǐ dó kɔ nú mì.

¹⁹Nyɛ Pɔ́lu ɖésú wɛ wlán xó élɔ́ dó alɔ ce wú: nyɛ Pɔ́lu ná sú axɔ́ tɔn we; un jló ná flín we ɖɔ a ɖu gbɛ hwi ɖésúnɔ tɔn sín axɔ́ dó mì ǎ.

²⁰Nɔví ce! Kɛnklɛ́n bó kpɔ́n dó Aklúnɔ wú, bó wa ɖagbe énɛ́ nú mì; blǒ bónú ayi ce ní j'ayǐ, nɔví ɖo Klísu mɛ ɖɔhun.

²¹Hwenu e un ɖo wěma élɔ́ wlán sɛ́ dó we wɛ ɔ́, un ɖeji ɖɔ a nǎ bló nǔ e byɔ́ we wɛ un ɖe é, bó ná lɛ́ bló hú mɔ̌.

²²Un ka lɛ́ ɖo byɔ̌byɔ́ we wɛ azɔn ɖokpó ɖɔ hwi ní bló xɔ ɖokpó mɛ ɖó ɖ'ayǐ nú mì; ɖó un ɖo nukún ɖó wɛ ɖɔ Mawu ná yí ɖɛ mitɔn bó ná bló bɔ un ná wá mɔ mi.

²³ Epaflasi e kpó nyi kpó ɖo gan sɛn wɛ ɖó Klísu Jezu wútu ɔ́ dó gbe sɛ́ dó we.

²⁴ Mɔ̌ ɖokpó ɔ́, azɔ̌gbɛ́ ce Maki kpódó Alisitáki kpó, kpó Demási kpó, kpódó Luki kpán dó gbe sɛ́ dó we.

²⁵Fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi.