Read fon Eblée 1 Bible Online

Eblée 1 - fon bible

Eblée 1

¹Đ'ayǐ xóxó ɔ́, Mawu gbɔn gbeyíɖɔ lɛ́ɛ jí, bó ɖɔ xó nú tɔ́gbó mǐtɔn lɛ́ɛ azɔn mɔ̌kpán gbɔn alɔ gěgé mɛ.

²Amɔ̌, ɖo azǎn élɔ́ lɛ́ɛ, éé ɖo azǎn gǔdo gúdo tɔn nyí wɛ lɛ́ɛ mɛ ɔ́, é ɖɔ xó nú mǐ gbɔn vǐ tɔn jí; é jí wɛ Mawu ɖó gbɛ ɔ́ gbɔn; é wɛ Mawu sɔ́, bó zé nǔ lɛ́ɛ bǐ dó así ná.

³É wɛ nyí susu Mawu tɔn sín wěziza sín xlɛ́, bó nyí Mawu sín xlɛ́ titewungbe tɔn. É sɔ́ xó tɔn hlɔ̌nhlɔ́nnɔ ɔ́ dó hɛn gbɛ ɔ́ ɖó te. Ée é lɛ gbɛtɔ́ lɛ́ɛ wé sín hwɛ yětɔn lɛ́ɛ mɛ gúdo ɔ́, é jínjɔ́n Mawu e nyí hlɔ̌nhlɔ́n bǐ nɔ ɔ́ sín ɖisíxwé ɖo sɛ́xwé.

⁴Vǐ ɔ́ wá hú gǎn wɛnsagun lɛ́ɛ lě e nyǐkɔ e Mawu ná ɛ ɔ́ ɖo tají hú wɛnsagun Mawu tɔn lɛ́ɛ tɔn gbɔn é.

⁵Đó Mawu ɖɔ nú wɛnsagun tɔn lɛ́ɛ ɖě gbeɖé ɖɔ: “Vǐ ce wɛ a nyǐ, bɔ égbé ɔ́, un ji we” ǎ. É ka ɖɔ dó wɛnsagun ɖé wú gbeɖé ɖɔ: “Un ná nyí tɔ́ n'i, bɔ éyɛ́ ná nyí vǐ nú mì” ǎ.

⁶ Lo ɔ́, hwenu e Mawu ná sɛ́ nukɔngbéví tɔn dó gbɛ ɔ́ mɛ ɔ́, é ɖɔ: “Wɛnsagun Mawu tɔn lɛ́ɛ bǐ ɖó ná ɖe kɔ́ n'i.”

⁷ Nǔ e Mawu ɖɔ dó wɛnsagun lɛ́ɛ wú ɔ́ ɖíe: “Mawu nɔ sɔ́ wɛnsagun tɔn lɛ́ɛ dó húzú jɔhɔn, bó nɔ́ sɔ́ mɛsɛntɔ́ tɔn lɛ́ɛ dó húzú myɔ.”

⁸ Lo ɔ́, Mawu ɖɔ dó vǐ ɔ́ wú ɖɔ: “Óo! Mawu, axɔ́súzinkpo towe ɖo te káká sɔ́yi. Hwɛjijɔ jí wɛ axɔ́súɖuɖu towe jínjɔ́n.

⁹A yǐ wǎn nú hwɛjijɔ, bó gbɛ́ wǎn nú nǔ nyanya; énɛ́ ɔ́ wú wɛ Mawu, Mawu towe kɔn awǎjijɛ sín ami dó ta nú we, bó dó sɔ́ we bɔ a hú gǎn hǎgbɛ́ towe lɛ́ɛ.”

¹⁰ É lɛ́ ɖɔ: “Aklúnɔ, hwi wɛ ɖó ayǐkúngban ɔ́ ayǐ sín do, bɔ jǐxwé ɔ́ nyí alɔ towe núwiwa.

¹¹Nǔ énɛ́ lɛ́ɛ bǐ ná vɔ; hwɛ ka ná ɖe tɛgbɛ; yě ná dóxó avɔ ɖɔhun.

¹²A nǎ mlá yě awu ɖaxó ɖɔhun, bɔ è nǎ ɖyɔ́ yě avɔ ɖɔhun. Amɔ̌ hwɛ ɔ́, nǔ ɖokpó ɔ́ wɛ a nyǐ tɛgbɛ, bɔ gbɛ towe ɖó vivɔ ǎ.”

¹³ Mawu ɖɔ nú wɛnsagun tɔn lɛ́ɛ ɖě gbeɖé ɖɔ: “Jǐnjɔ́n ɖisí ce xwé fí káká nú ma sɔ́ kɛntɔ́ towe lɛ́ɛ dó húzú afɔɖótɛn nú we” ǎ.

¹⁴Étɛ́ wɛnsagun lɛ́ɛ ka nyí lo? Yɛ wɛ yě bǐ nyí, bó ɖo azɔ̌ wa nú Mawu wɛ, bɔ Mawu sɛ́ yě dó nú yě ná wá dó alɔ mɛ e ɖó ná mɔ hwlɛngán lɛ́ɛ.