Read fon Eblée 10 Bible Online

Eblée 10 - fon bible

Eblée 10

¹Sɛ́n Jwifu lɛ́ɛ tɔn nyí nǔ ɖagbe e jǎwe lɛ́ɛ sín ninɔmɛ pɛ́pɛ́pɛ́ ǎ; yɛ nǔ lɛ́ɛ tɔn kpowun wɛ. Sɛ́n ɔ́ sixú zɔ́n bɔ mɛ e nɔ sɛkpɔ́ Mawu lɛ́ɛ ná nyí mɛ mímɛ́ bɔ nǔ vɔ ɖ'é wú ǎ; é sixú zɔ́n nú yě ná nyí mɛ mímɛ́ gbɔn vɔ̌ ɖokpó e sá wɛ è nɔ ɖe ayǐhɔ́ngbe ayǐhɔ́ngbe ɖo xwewú xwewú tɛgbɛ ɔ́ gbla mɛ gbeɖé ǎ.

²Mɛ e nɔ sɛn Mawu gbɔn mɔ̌ lɛ́ɛ ɔ́, ényí è ko slá wǔ titewungbe ɔ́ nú yě azɔn ɖokpó bɔ xó fó wɛ ɔ́, yě sɔ́ ná lɛ́ kpo ɖo linlin wɛ ɖɔ hwɛ émítɔn lɛ́ɛ kpo ɖo kɔ nú émí ǎ, bó ná jó vɔ̌sísá tɛnmɛ tɛnmɛ bǐ dó.

³Nǔgbó ɔ́, hwɛ e mɛ lɛ́ɛ hu ɔ́ wɛ vɔ̌sísá énɛ́ lɛ́ɛ nɔ flín yě xwewú xwewú.

⁴Đó nyibúsú sín hun kpó gbǎgbá sín hun kpó sixú súnsún hwɛ mɛtɔn lɛ́ɛ gbeɖé ǎ.

⁵ Énɛ́ ɔ́ wú wɛ hwenu e Klísu ɖo gbɛ ɔ́ mɛ ná byɔ́ wɛ ɔ́, é ɖɔ nú Mawu ɖɔ: “A ba vɔ̌sísá ǎ, a ka ba nǔníná ǎ; lo ɔ́, a nǎ agbaza ɖokpó mì.

⁶Kanlin e dó zo wɛ è nɔ ɖe ɖo vɔ̌sákpe jí lɛ́ɛ nɔ dó xomɛhunhun nú we ǎ; vɔ̌sísá e nɔ súnsún hwɛ mɛtɔn lɛ́ɛ ka nɔ dó xomɛhunhun nú we ǎ.

⁷Bɔ un ɖɔ: ‘Mawu e, nyɛ ɖíe, un ja bó ná wa jlǒ towe lě e è ko wlán gbɔn dó wǔ ce, ɖo sɛ́nwéma ɔ́ mɛ é.’ ”

⁸É tó ɖɔ: “A ba vɔ̌sísá ǎ; a ka ba nǔníná ǎ; a ba kanlin e è dǒ zo ɖo vɔ̌sákpe jí é abǐ vɔ̌sísá e nɔ súnsún hwɛ mɛtɔn lɛ́ɛ é ɖě ǎ; nǔ énɛ́ lɛ́ɛ ɖě nɔ hun xomɛ nú we ǎ; có lě e sɛ́n ɔ́ zɔ́n gbɔn ɔ́ wɛ è nɔ sá vɔ̌ énɛ́ lɛ́ɛ gbɔn.”

⁹Énɛ́ ɔ́ gúdo ɔ́, é lɛ́ ɖɔ: “Mawu e, nyɛ ɖíe, un ja, bó ná wa jlǒ towe.” Énɛ́ ɔ́, é ɖe vɔ̌sísá xóxó lɛ́ɛ bǐ síin, bó ɖó yɔ̌yɔ́ ɔ́ ayǐ.

¹⁰Đó Jezu Klísu bló nǔ e Mawu jló ɖɔ ní bló é wú ɔ́, è slá wǔ nú mǐ gbɔn agbaza é ɖésúnɔ tɔn e é sɔ́ dó sá vɔ̌ ná azɔn ɖokpó bɔ xó fó ɔ́ gbla mɛ.

¹¹ Vɔ̌sánú-xwlémawutɔ́ ɖé fɔ́n ɔ́, é nɔ ɖo azɔ̌ tɔn wa wɛ; é nɔ ɖo vɔ̌ ɖokpó ɔ́ sá wɛ hwɛhwɛ, có vɔ̌sísá énɛ́ lɛ́ɛ nɔ sixú súnsún hwɛ mɛtɔn lɛ́ɛ síin gbeɖé ǎ.

¹² Klísu éyɛ́ ɔ́, vɔ̌ ɖokpó géé wɛ é ka sá dó hwɛ lɛ́ɛ tamɛ, bó yi jínjɔ́n ɖisíxwé nú Mawu, bɔ vɔ̌ énɛ́ e é sá ɔ́ ná ɖo azɔ̌ wa wɛ káká sɔ́yi.

¹³Fínɛ́ wɛ é ɖe din, bó ɖo te nú Mawu ná sɔ́ kɛntɔ́ tɔn lɛ́ɛ dó bló afɔɖótɛn tɔn.

¹⁴Đó, gbɔn vɔ̌ ɖokpó géé e Klísu sá ɔ́ gblá mɛ ɔ́, é bló bɔ mɛ e è slá wǔ ná lɛ́ɛ húzú mɛɖeɖóvo, bɔ nǔ bǐ vɔ ɖ'é wú káká sɔ́yi.

¹⁵Bɔ Yɛsinsɛn lɔ ɖe kúnnu tɔn nú mǐ. Nǔgbó ɔ́, é to ɖɔ hwɛ̌ ɖɔ:

¹⁶ “Aklúnɔ ɖɔ: ‘Akɔ e ná jɛ xá yě wɛ un ɖe ɖo azǎn énɛ́ lɛ́ɛ gúdo ɔ́ ɖíe: un ná sɔ́ sɛ́n ce lɛ́ɛ dó ayi mɛ nú yě; un ná wlán yě dó ta yětɔn mɛ.’ ”

¹⁷ É lɛ́ ɖɔ: “Un sɔ́ ná flín hwɛ e yě hu lɛ́ɛ ǎ; un ka sɔ́ ná flín nǔ e yě wa nyi do lɛ́ɛ ǎ.”

¹⁸Hǔn, nú è sɔ́ hwɛ kɛ mɛ ɔ́, é sɔ́ byɔ́ ɖɔ è nǐ sá vɔ̌, bó dó mɔ hwɛsɔ́kɛ yí ǎ.

¹⁹Énɛ́ hǔn nɔví ce lɛ́ɛ mi, mǐ ɖó jiɖiɖe kpíkpé ɖɔ mǐ ná yi Tɛn mímɛ́ bǐ ɔ́ mɛ gbɔn hun Jezu tɔn gbla mɛ.

²⁰É hun ali yɔ̌yɔ́ gbɛɖe ɖé nú mǐ gbɔn xɔmɛgbovɔ e è dǒ gbo goxɔ ɔ́ mɛ ná ɔ́ mɛ; é wɛ nyí ɖɔ gbɔn agbaza é ɖésúnɔ tɔn ɔ́ mɛ.

²¹Mǐ ɖó vɔ̌sánú-xwlémawutɔ́ ɖaxó ɖokpó bɔ é kpa acɛ dó Mawu xwé ɔ́ nu.

²² Hǔn, mi nú mǐ ná sɛkpɔ́ Mawu kpódó ayijlɔ́jlɔ́ kpó, kpódó gǎnjɛwú kpíkpé e nǔɖiɖi nɔ ná mɛ ɔ́ kpó, kpódó ayi e è slá wǔ ná bɔ nǔ nyanya ɖěbǔ ma ɖ'é mɛ ǎ é kpó, kpódó agbaza e è zě sin mímɛ́ dó lɛ ná é kpó.

²³Mi nú mǐ ná hɛn nukúnɖíɖó e sín xó jlá wɛ mǐ ɖe ɔ́ syɛ́nsyɛ́n, ɖó Mawu e dó akpá nú mǐ ɔ́ ɖo gbejí.

²⁴Mi nú mǐ ná kpé nukún dó mǐɖée wú, bó ná flɔ́ wǎn yíyí sín zo dó lanmɛ nú mǐɖée, bó ná ɖó wǎn yíyí, bó ná nɔ flɔ́ ɖagbewiwa sín zo dó lanmɛ nú mǐɖée, bó ná wa ɖagbe.

²⁵Mǐ ma jó agun e mɛ mǐ nɔ yi é dó, mɛ e ko nɔ bló mɔ̌, bɔ é ko má yě lɛ́ɛ ɖɔhun ó. Lo ɔ́, mǐ ní nɔ ná kanmɛsyɛ́n mǐɖée, ɖó Aklúnɔ sín azǎn ɔ́ ko ɖo sisɛkpɔ́ wɛ lě e mɔ gbɔn wɛ mi ɖe din é.

²⁶Đó ée mǐ mɔ nukúnnú jɛ nǔ e nyí nǔgbó ɔ́ wú ɔ́, nú mǐ lɛ́ jló bó kpo ɖo hwɛ hu wɛ hǔn, vɔ̌sísá ɖěbǔ sɔ́ tíin bó ná ɖe hwɛ sín kɔ nú mǐ ǎ.

²⁷ É sɔ́ kpo nǔɖé nú mǐ hú mǐ ná ɖo adohu adohu jí, bó ná ɖo te kpɔ́n nǔ e ɖo nǎ jɛ wɛ ɔ́ ǎ. Nǔ énɛ́ wɛ nyí hwɛɖiɖɔ Mawu tɔn kpódó myɔ hɛhɛ e ná sú kún dó nú Mawu sín kɛntɔ́ lɛ́ɛ é kpó.

²⁸ Mɛɖěbǔ gba Mɔyízisɛ́n ɔ́ bónú mɛ we abǐ mɛ atɔn ɖe kúnnu ná ɔ́, è nɔ kú nǔbláwǔ n'i ǎ, è nɔ hu i.

²⁹ Énɛ́ ɔ́, nɛ̌ é ka ná nyí gbɔn nú mɛ e gbɛ́ wǎn nú Mawu ví ɔ́ é lo? Mɛ e sɔ́ akɔjijɛ Mawu tɔn sín hun e gbla mɛ è slá wǔ n'i gbɔn ɔ́ dó mɔ nǔ yǎyá, bó zun Yɛ nǔbláwǔkúnúmɛtɔ́ ɔ́, nɛ̌ é ka ná nyí gbɔn n'i? Mi ɖésúnɔ ɔ́, mi ná ko tunwun ɖɔ tó e è nǎ dɔn nú mɛ énɛ́ ɔ́ ná nylá hú mɛ e gba Mɔyízisɛ́n ɔ́ é tɔn.

³⁰Đó mǐ tunwun mɛ e ɖɔ: “Nyɛ wɛ nɔ ba hlɔn; nyɛ wɛ ná sú nǔ e è wa ɔ́ sín axɔ́ mɛ” é; mɛ ɖokpó énɛ́ ɔ́ wɛ lɛ́ ɖɔ: “Aklúnɔ ná ɖɔ hwɛ xá togun tɔn.”

³¹É hu ado ɖésú ɖɔ è nǐ jɛ Mawu gbɛɖe ɔ́ sín alɔ mɛ.

³²Mi ní flín nǔ e ko gbo mi ɖ'ayǐ hwenu e mi mɔ wěziza Mawu tɔn é; mi ji ya hwenɛ́nu ɖésú, có bó ka syɛ́nlǐn ɖo ahwan nukɔn.

³³Hwe ɖé lɛ́ɛ nu ɔ́, è nɔ ɖo mi zun wɛ, bó nɔ ɖo tagba dó nú mi wɛ ɖo agbawungba. Hwe ɖé lɛ́ɛ nu ɔ́, mi nɔ ɖo gbesisɔ mɛ, bó nɔ ji ya xá mɛ e dó ya ná wɛ è ɖe mi ɖɔhun lɛ́ɛ é.

³⁴Nǔgbó ɔ́, mi kú nǔbláwǔ nú mɛ e è wlǐ dó gankpá mɛ lɛ́ɛ, bɔ hwenu e è wǎ bɛ́ nǔ mitɔn lɛ́ɛ ɔ́, mi yí gbe ná kpódó xomɛhunhun kpó, ɖó mi tunwun ɖɔ dɔkun e nyɔ́ hú dɔkun énɛ́ lɛ́ɛ, bó nɔ́ nɔ ayǐ káká sɔ́yi ɔ́ ɖo émí sí.

³⁵Hǔn mi bo ma jó jiɖiɖe e mi ɖó dó Mawu wú ɔ́ dó ó; ɖó ajɔ ɖaxó ɖé ɖ'é mɛ.

³⁶Nǔ e hu dó mi ɔ́ wɛ nyí ɖɔ mi ná dɛ, bó ná wa jlǒ Mawu tɔn, bó ná mɔ akpá e é dó ɔ́ yí.

³⁷ Nǔgbó ɔ́, lě e Mawuxówéma ɖɔ gbɔn ɔ́: “É lɛ́ kpo hwenu kpɛɖé, kpɛví títí ɖé bɔ mɛ e ɖó ná wá ɔ́ ná wá; é ná lín có bo wá ǎ.

³⁸Nǔ ɖo mɔ̌ có, mɛ e un mɔ dó mɔ hwɛjijɔnɔ ɖó nǔɖiɖi tɔn wú ɔ́ ná nɔ gbɛ. Amɔ̌ mɛ ɔ́ lɛ́ kɔ ɔ́, nǔ tɔn sɔ́ ná nyɔ́ nukún ce mɛ ǎ.”

³⁹Mǐ ɖo mɛ e nɔ jó agɔ dó gúdo, bó nɔ yi dɔn lɛ́ɛ mɛ ǎ; lo ɔ́, mǐ ɖó nǔɖiɖi, bó ɖo hwlɛngán sín ali ɔ́ jí.