Read fon Eblée 12 Bible Online

Eblée 12 - fon bible

Eblée 12

¹Mǐ lɔmɔ̌ ɔ́, mɛ tobutóbú énɛ́ lɛ́ɛ e ɖe nǔɖiɖi yětɔn xlɛ́ lɛ́ɛ lɛ́ lɛ̌ dó mǐ; hǔn, mǐ ní jó nǔ e nɔ dó tagba nú mǐ ɖo Aklúnɔ lixo ɔ́ bǐ dǒ, bó jó hwɛhuhu e é ma vɛ́ wǔ ná ɖɔ é ní tɛ́ dó mǐ wú ǎ é dó. Mǐ ní dɛ ɖo wezun e è sɔ́ ɖó te nú mǐ bɔ mǐ ɖo kínkán wɛ ɔ́ nu.

²Mǐ ní sɔ́ nukún mǐtɔn ɖó Jezu jí; é wɛ jɛ nǔɖiɖi mǐtɔn jí; é wɛ ná lɛ́ fó. É yí gbe bɔ è hu i ɖó aklúzu jí; é kpɔ́n winnyá e è nɔ mɔ ɖo kú mɔ̌hunkɔtɔn mɛ ɔ́ ǎ, ɖó é ɖo awǎjijɛ e è sɔ́ ɖó te n'i ɔ́ flín wɛ, bɔ égbé din ɔ́, é ɖo ayǐjínjɔ́n ɖo axɔ́súzinkpo Mawu tɔn kpá ɖo ɖisíxwé.

³Mi flín lě e é dɛ ɖo gǔ mɔ̌hunkɔtɔn e hwɛhutɔ́ lɛ́ɛ fɔ́n dó jǐ tɔn ɔ́ nu gbɔn é, bónú awakanmɛ ma kú mi, nú nǔ ci kɔ nú mi ó;

⁴ɖó ahwan e fun xá hwɛhuhu wɛ mi ɖe ɔ́, mi ko fun káká yi kú ǎ.

⁵ Xó e Mawu ɖɔ nú mi bó dó dó wǔsyɛ́n lanmɛ nú mi vǐ ɖɔhun ɔ́, mi wɔn wɛ a? Mawu ɖɔ: “Vǐ ce, Aklúnɔ ɖo kplɔ́nkplɔ́n we wɛ hǔn, ma dó vɛ̌ ná ó. A wa nǔ nyi do bónú é ɖo gbǐgbɛ́ nú we wɛ hǔn, ma nú awakanmɛ kú we ó;

⁶ɖó mɛ e Aklúnɔ yí wǎn ná ɔ́ wɛ é nɔ kplɔ́n; mɛ e é sɔ́ dó ylɔ́ vǐ ɔ́ wɛ é nɔ dɔn tó ná.”

⁷Mi dɛ ɖo ya e ji wɛ mi ɖe lɛ́ɛ nu, tɔ́ wɛ ɖo vǐ kplɔ́n wɛ ɖɔhun; nǔgbó ɔ́, ya énɛ́ lɛ́ɛ ɖe xlɛ́ ɖɔ Mawu ɖo mǐ hɛn wɛ vǐ ɖɔhun; ɖó vǐ tɛ́ wɛ tɔ́ tɔn ma nɔ kplɔ́n ǎ?

⁸Ényí é ma kplɔ́n mi vǐ tɔn ɖě lɛ́ɛ bǐ ɖɔhun ǎ ɔ́, hǔn mi nyí vǐ jɔ vǐ ǎ, agaví wɛ mi nyí.

⁹Mi nú mǐ ná kpɔ́n nǔ dó tɔ́ mǐtɔn e ɖo ayǐkúngban jí fí lɛ́ɛ wú; yě nɔ kplɔ́n mǐ bɔ mǐ nɔ sí yě. Étɛ́ ka sɔ́ nyí Tɔ́ mǐtɔn e ɖo sɛ́xwé ɔ́ tɔn lo? Mǐ ɖó ná hwíhwɛ́ mǐɖée ɖo glɔ́ tɔn, bó ná sixú nɔ gbɛ.

¹⁰Tɔ́ mǐtɔn ayǐkúngban jí tɔn lɛ́ɛ nɔ kplɔ́n mǐ nú hwenu kpɛɖé, lě e yě mɔ ɖɔ é sɔgbe gbɔn é. Lo ɔ́, Mawu nɔ kplɔ́n mǐ ɖó ɖagbe mǐ ɖésúnɔ tɔn wú, bónú mǐ ná sixú ɖó ɖo mǐmá Mawu tɔn mɛ.

¹¹Hwenu e è nɔ ɖo mǐ kplɔ́n wɛ tlóló ɔ́, aluwɛ sín nǔ wɛ é nɔ nyí nú mǐ; é nɔ nyí awǎjijɛnú nú mǐ ǎ. É ka wá yá ɔ́, mɛ e è kplɔ́n gbɔn mɔ̌ lɛ́ɛ nɔ mɔ le e ɖ'é mɛ é; le ɔ́ wɛ nyí fífá e è nɔ mɔ ɖo gbɛ jlɔ́jlɔ́ zínzán mɛ é.

¹² Mi bo sɔ́ alɔ mitɔn e kúyɛ lɛ́ɛ d'aga; mi ná hlɔ̌nhlɔ́n koli mitɔn e ɖo sísɔ́sísɔ́ wɛ lɛ́ɛ é.

¹³ Mi ɖe ali jlɔ́jlɔ́ bó gbɔn jí, bónú afɔ e ɖó blɔ̌ ɔ́ ní ma lílɛ́ ó; lo ɔ́, afɔ énɛ́ ní jɛ afɔ tɛnmɛ.

¹⁴Mi dó gǎn, bó nɔ fífá mɛ xá mɛ bǐ, bó zán gbɛ mímɛ́; ɖó, nú mɛɖé ma wa nǔ gbɔn mɔ̌ ǎ ɔ́, é ná sixú mɔ Aklúnɔ ǎ.

¹⁵ Mi cɔ́ miɖée, bónú mɛɖé ma sú fɛ́nú Mawu tɔn sín ali dó éɖée ó. Mɛɖěbǔ ní ma cí atín aɖǐvɛ́nɔ e nɔ wú, bó nɔ gba kún kpé fí bǐ, lobɔ aɖǐvɛ́ tɔn nɔ dó azɔn gbɛtɔ́ gěgé ɔ́ ɖɔhun ó.

¹⁶ Mɛ ɖé ní ma nyí agalɛtɔ́ abǐ suɖunúmawutɔ́ Esawu ɖɔhun ó; Esawu e kpɔ́n dó nǔɖuɖu ká ɖokpó wú, bó sa vǐɖaxó sín acɛ e é ɖó é.

¹⁷ Énɛ́ ɔ́ gúdo ɔ́, lě e mi tunwun gbɔn é ɔ́, é jló ɖɔ tɔ́ émítɔn ní xo ɖɛ dó émí jí; lo ɔ́, è gbɛ́ ɛ, ɖó é sɔ́ mɔ ali ɖěbǔ, bó ná dó lɛ́ kɔ sín nǔ nyanya e é wa ɔ́ gúdo ǎ; é ba ná lɛ́ kɔ sín nǔ nyanya e é wa ɔ́ gúdo kpó avǐ kpó; é ka sɔ́ kpé wú ǎ.

¹⁸ Mi sɛkpɔ́ só e wú è hɛn ɔ́, è nǎ ɖ'alɔ ɔ́ Izlayɛ́li ví lɛ́ɛ ɖɔhun ǎ: só Sinayíi tɔn kpó myɔ hɛhɛ e ɖo jiji ɖ'é jí wɛ ɔ́ kpó; mi sɛkpɔ́ zǐnflú e dó ɖ'é jí ɔ́ ǎ; mi sɛkpɔ́ ablu e dó ɖ'é jí ɔ́ ǎ; mi sɛkpɔ́ jɔhɔn ɖaxó e ɖo nyinyi ɖ'é jí wɛ é ǎ.

¹⁹Mi sɛkpɔ́ kpɛn e ɖo nǔ ɖɔ ɖ'é jí wɛ ɔ́ ǎ; mi sɛkpɔ́ gbe e se wɛ è ɖe ɖ'é jí ɔ́ ǎ. Ée Izlayɛ́li ví lɛ́ɛ se gbe énɛ́ ɔ́, yě sa vo nú Mawu ɖɔ é ní ma sɔ́ ɖɔ xó ɖěbǔ nú émí d'é jí ó;

²⁰ ɖó sɛ́n e è dǒ nú yě ɔ́ hú gǎn yě; é wɛ nyí ɖɔ: “Nú mɛ ɖěbǔ ɖó alɔ só ɔ́ wú ɔ́, é ná bo nyí kanlin wɛ ɔ́, è nǎ nyi awǐnnya dó e káká bó ná hu i.”

²¹ Nǔ énɛ́ dó abaɖa káká bɔ Mɔyízi ɖɔ: “Xɛsi ɖi mì káká bɔ un ɖo sísɔ́sísɔ́ wɛ.”

²²Lo ɔ́, midɛɛ lɛ́ɛ ɔ́, mi sɛkpɔ́ Sinyɔ́ɔ só ɔ́; mi sɛkpɔ́ Jeluzalɛ́mu sɛ́xwé tɔn, ée nyí toxo Mawu gbɛɖe ɔ́ tɔn é, bó sɛkpɔ́ wɛnsagun wɔ̌buwɔ́bú lɛ́ɛ.

²³Mi sɛkpɔ́ Mawu ví nukɔn tɔn e kplé bó ɖo xwe ɖu wɛ, bɔ è wlǎn nyǐkɔ yětɔn ɖó sɛ́xwé lɛ́ɛ é. Mi sɛkpɔ́ Mawu e nɔ ɖɔ hwɛ xá mɛ bǐ e, bó sɛkpɔ́ yɛ mɛ e nyí hwɛjijɔnɔ bɔ Mawu zé yě dó húzú mɛ mímɛ́ bɔ nǔ bǐ vɔ ɖ'é wú lɛ́ɛ tɔn.

²⁴ Mi sɛkpɔ́ Jezu e nyí ɖɛ̌mɛnu nú akɔjijɛ yɔ̌yɔ́ ɔ́ é; bó sɛkpɔ́ hun tɔn e kɔn nyi ayǐ é, hun tɔn énɛ́ e ɖó acɛ hú hun Abɛ́li tɔn é.

²⁵ Mi cɔ́ miɖée bó ma gbɛ́ tó ɖó mɛ e ɖo xó ɖɔ nú mi wɛ é ó. Yě mɛ e gbɛ́ tó ɖó mɛ e ɖo Mawuxó ɖɔ nú yě wɛ ɖo ayǐkúngban jí fí ɔ́, yě gló tódɔnnúmɛ Mawu tɔn ǎ. Étɛ́ ka sɔ́ nyí mǐtɔn lo? Ényí mǐ ɖe kɔ dó mɛ e ɖo xó ɖɔ nú mǐ wɛ sín jǐxwé aga ɔ́, mǐ sixú gló tódɔnnúmɛ Mawu tɔn ǎ.

²⁶ Hwenu e Mawu ɖɔ xó ɔ́, gbe tɔn húnhún ayǐkúngban ɔ́. Amɔ̌ din ɔ́, é dó akpá nú mǐ ɖɔ: “Un ná lɛ́ húnhún ayǐkúngban ɔ́ azɔn ɖokpó d'é jí; é ka sɔ́ ná nyí ayǐkúngban ɔ́ kɛ́ɖɛ́ wɛ un ná húnhún ǎ; un ná húnhún jǐnukúnsin lɔmɔ̌.”

²⁷Xógbe “un ná lɛ́ húnhún” ɔ́ ɖe xlɛ́ ɖɔ nǔ e Mawu bló lɛ́ɛ ná húnhún, bó ná bú, bónú nǔ e ma sixú húnhún ǎ é ná nɔ ayǐ.

²⁸Hǔn, mi nú mǐ ná tunwun nǔ e Mawu wa nú mǐ ɔ́ n'i; ɖó é ɖo axɔ́súɖuto e ma sixú húnhún ǎ é ná mǐ wɛ. Mi nú mǐ ná sɛn ɛ lě e mǐ ná sɛn ɛ gbɔn, bɔ é ná nyɔ́ nukún tɔn mɛ é kpó sísí kpó, kpódó xɛsi kpó, bó ná dó ɖe xlɛ́ ɛ ɖɔ mǐ tunwun nǔ e é wa nú mǐ ɔ́ n'i.

²⁹Đó Mawu mǐtɔn ɔ́, myɔ e nɔ hɛn nǔ gblé ɔ́ wɛ é nyí.