Read fon Eblée 4 Bible Online

Eblée 4 - fon bible

Eblée 4

¹Ée akpá e Mawu dó nú mǐ ɖɔ mǐ ná byɔ́ fí e émí ná ná gbɔjɛ́ mǐ ɖe ɔ́ lɛ́ kpo ɖo te ɔ́, hǔn mǐ ní bó cɔ́ mǐɖée, bónú mi mɛ ɖěbǔ ní ma gɔn gbɔjɛ́ énɛ́ ɔ́ mɛ byɔ́ ó.

²Đó mǐ se Wɛn Ɖagbe ɔ́ lě e mɛ e ɖo gbětótló mɛ ɖ'ayǐ lɛ́ɛ se gbɔn é. Yě se wɛn énɛ́ ɔ́; é ka wa ɖagbe ɖé nú yě ǎ; ɖó hwenu e yě se ɔ́, yě yí kpó nǔɖiɖi kpó ǎ.

³ Mǐ mɛ e ɖi nǔ lɛ́ɛ ɔ́, mǐ ná byɔ́ gbɔjɛ́ énɛ́ ɔ́ mɛ; gbɔjɛ́ énɛ́ e wú Mawu ɖɔ xó dó bó ɖɔ: “Đo xomɛsin ce mɛ ɔ́, un xwlé nǔ bó ɖɔ: ‘Yě ná byɔ́ to e mɛ un ná ná gbɔjɛ́ yě ɖe ɔ́ mɛ gbeɖé ǎ.’ ” Xó e Mawu ɖɔ é nɛ́; é ká kó wa azɔ̌ tɔn fó sín hwenu e é ko ɖó gbɛ ɔ́ dó é ɖokpóó.

⁴Đó è ko ɖɔ xó dó azǎn tɛ́nwegɔ́ ɔ́ wú, ɖo akpá ɖé xwé ɖo Mawuxówéma ɔ́ mɛ ɖɔ: “Ée Mawu bló nǔ lɛ́ɛ bǐ fó ɔ́, é gbɔjɛ́ azǎn tɛ́nwegɔ́ ɔ́ gbe.”

⁵ É lɛ́ ɖɔ ɖo aga ɖɔ: “Yě ná byɔ́ to e mɛ un bló gbɔjɛtɛn ɖ'ayǐ nú yě ɖe ɔ́ mɛ gbeɖé ǎ.”

⁶Énɛ́ ɔ́ wú ɔ́, mɛ ɖěvo lɛ́ɛ hɛn ɔ́, yě ná byɔ́ mɛ, ɖó mɛ nukɔntɔn e se Wɛn Ɖagbe ɔ́ lɛ́ɛ byɔ́ gbɔjɛ́ énɛ́ mɛ ǎ, ɖó yě tlí tó.

⁷ Énɛ́ ɔ́ wú wɛ Mawu lɛ́ ɖó azǎn ɖěvo; è nɔ ylɔ́ azǎn énɛ́ ɖɔ “Égbé din”. É lín káká, bɔ é lɛ́ wá ɖɔ azǎn énɛ́ sín xó gbɔn Davídi jí, ɖo Ɖɛhanwéma tɔn e mǐ ko mɔ wá yi é mɛ ɖɔ: “Ényí mi se Mawu sín gbe égbé din hǔn, mi ma tlí tó ó.”

⁸Đó ényí Jozuwée ko kplá togun ɔ́ byɔ́ gbɔjɛtɛn énɛ́ mɛ wɛ ɔ́, Mawu sɔ́ ná lɛ́ wá ɖɔ azǎn ɖěvo xó ǎ.

⁹Énɛ́ ɔ́, gbɔjɛ́ ɖé ɖo te nú togun Mawu tɔn, bó cí gbɔjɛ́ e Mawu gbɔjɛ́ azǎn tɛ́nwegɔ́ ɔ́ gbe ɔ́ ɖɔhun.

¹⁰Đó mɛ e byɔ́ fí e Mawu ná ná gbɔjɛ́ ɛ ɖe ɔ́, nɔ gbɔjɛ́ ɖo azɔ̌ é ɖésúnɔ tɔn lɛ́ɛ mɛ lě e Mawu gbɔjɛ́ azǎn tɛ́nwegɔ́ ɔ́ gbe hwenu e é bló nǔ lɛ́ɛ bǐ fó gúdo é ɖɔhun.

¹¹Hǔn, mi bo nú mǐ ná dó gǎn, bó ná byɔ́ gbɔjɛ́ énɛ́ ɔ́ mɛ; mǐ ní bló gbɔn alɔkpa ɖé bónú mǐ mɛ ɖěbǔ ní ma vɛ́ tóli bó gɔn gbɔjɛ́ énɛ́ ɔ́ mɛ byɔ́ lě e mɛ e nɔ gbětótló mɛ lɛ́ɛ vɛ́ tóli gbɔn é ó.

¹²Đó Mawuxó ɔ́ ɖo gbɛ, bó ɖó hlɔ̌nhlɔ́n; é ɖá hú jǐví nuwenɔ bǐ. É nɔ byɔ́ káká fí e lǐndɔ̌n kpó yɛ kpó kplé ɖe ɔ́, bó nɔ má yě ɖó vovo. É nɔ byɔ́ káká fí e gǒflɛ́mɛ lɛ́ɛ kpódó fɔn lɛ́ɛ kpó kplé ɖe ɔ́, bó nɔ má yě ɖó vovo. É nɔ ɖe ɖɛ jlǒ kpódó linlin e ɖo gbɛtɔ́ sín ayi mɛ lɛ́ɛ kpán ɖó vovo.

¹³Nǔ ɖěbǔ tíin bɔ è sixú sɔ́ hwlá dó Mawu ǎ. Nǔ e Mawu bló lɛ́ɛ ɖěbǔ ɖo hwlǎhwlá n'i ǎ; nǔ lɛ́ɛ bǐ wɛ é nɔ mɔ ɖo mɛ̌, bó nɔ mɔ yě ɖo wěxo; é wɛ mǐ bǐ ɖó ná ɖó gbe ná.

¹⁴Hǔn, mi bo nú mǐ ná hɛn nǔɖiɖixó e ɖɔ wɛ mǐ ɖe ɔ́ syɛ́nsyɛ́n. Nǔgbó ɔ́, mǐ ɖó vɔ̌sánú-xwlémawutɔ́gán ɖaxó ɖokpó; Jezu Mawu ví ɔ́ wɛ; é hun káká yi Mawu ɖésú nukɔn.

¹⁵Vɔ̌sánú-xwlémawutɔ́ ɖaxó e ma sixú kpé wú bó ji ya xá mǐ ɖo gǎnmaɖó mǐtɔn lɛ́ɛ mɛ ǎ ɔ́ wɛ mǐ ɖó ǎ. É nyɔ́ wa ɔ́, vɔ̌sánú-xwlémawutɔ́ ɖaxó mǐtɔn ɔ́, è tɛ́n ɛ kpɔ́n mǐ ɖɔhun ɖo nǔ bǐ mɛ; amɔ̌, é hu hwɛ ǎ.

¹⁶Hǔn, mi bo nú mǐ ná sɛkpɔ́ axɔ́súzinkpo Mawu tɔn, fí e fɛ́nú ɖe ɔ́, kpódó jiɖiɖe kpán; é ná sɔ́ hwɛ kɛ mǐ ɖo fínɛ́. Mǐ ná mɔ fɛ́nú ɖo fínɛ́, bónú é ná d'alɔ mǐ ɖo nǔ e hudó mǐ lɛ́ɛ mɛ, ɖo hwe tɔn nu.