Read fon Eblée 5 Bible Online

Eblée 5 - fon bible

Eblée 5

¹Vɔ̌sánú-xwlémawutɔ́ ɖaxó ɖěbǔ ɔ́, gbɛtɔ́ lɛ́ɛ mɛ wɛ è nɔ sɔ́ ɖe; è ɖe e nú é ná wa azɔ̌ nú Mawu nú ɖagbe yětɔn. É nɔ sɔ́ nǔníná lɛ́ɛ kpó vɔ̌sánú lɛ́ɛ kpó xwlé Mawu ɖó hwɛ e gbɛtɔ́ lɛ́ɛ hu lɛ́ɛ tamɛ.

²Ée é ɖésúnɔ lɔ nyí mɛ, bó ma ɖó gǎn ǎ gbɔn alɔkpa gěgé mɛ é ɔ́, é sixú kpɔ́n bó ɖɔ xá mɛ e ma tunwun nǔɖé ǎ lɛ́ɛ, kpó mɛ e nɔ wa nǔ nyi do lɛ́ɛ kpán.

³ Ée é ɖésúnɔ ma ka ɖó gǎn mɔ̌ ǎ é ɔ́, é nyí hwɛ e togun ɔ́ hu lɛ́ɛ kɛ́ɖɛ́ tamɛ wɛ é ná sá vɔ̌ dó ǎ; lo ɔ́, é ɖó ná sá vɔ̌ dó hwɛ e é ɖésúnɔ hu lɛ́ɛ lɔ tamɛ.

⁴ Mɛ ɖěbǔ nɔ na susu e ɖo vɔ̌sánú-xwlémawutɔ́ ɖaxó nyínyí mɛ ɔ́ éɖée ǎ; lo ɔ́, Mawu wɛ nɔ ylɔ́ mɛ lě e é ylɔ́ Aalɔ́ɔn gbɔn é.

⁵ Mɔ̌ ɖokpó ɔ́, Klísu ná susu e ɖo vɔ̌sánú-xwlémawutɔ́ ɖaxó nyínyí mɛ ɔ́ éɖée ǎ; é nyɔ́ wa ɔ́, Mawu wɛ ɖɔ n'i ɖɔ: “Vǐ ce wɛ a nyǐ, bɔ égbé ɔ́, un ji we.”

⁶ É lɛ́ ɖɔ ɖó fí ɖěvo ɖɔ: “A nǎ nyí vɔ̌sánú-xwlémawutɔ́ káká sɔ́yi, Mɛlukisedɛ́ki ɖɔhun.”

⁷ Hwenu e Jezu ɖo gbɛ ɖo ayǐkúngban jí fí ɔ́, é xo ɖɛ bó sa vo kpódó xósúsú kpó, kpódó ɖasin kpó, nú Mawu e kpé wú bó ná hwlɛ́n ɛ ɖo kú sí é. Mawu ka yí ɖɛ tɔn, ɖó é hwíhwɛ́ éɖée dó Mawu glɔ́ wútu.

⁸É kplɔ́n tónúsise gbɔn ya e é ji lɛ́ɛ gbla mɛ, có Mawu ví wɛ é ka nyí.

⁹Ée Mawu sɔ́ ɛ dó ɖó mɛ mímɛ́ bɔ nǔ bǐ vɔ ɖ'é wú ɔ́, é húzú hwlɛngán mavɔ mavɔ sín jɔtɛn nú mɛ e nɔ se tónú n'i lɛ́ɛ é bǐ,

¹⁰bɔ Mawu sɔ́ ɛ vɔ̌sánú-xwlémawutɔ́ ɖaxó Mɛlukisedɛ́ki ɖɔhun.

¹¹Mǐ ɖó nǔ gěgé bó ná ɖɔ nú mi dó xó énɛ́ ɔ́ wú; lo ɔ́, é ná vɛ́ wǔ ɖésú bɔ è nǎ tínmɛ nú mi, ɖó mi wá húzú mɛ e ma nɔ yá wǔ mɔ nukúnnú jɛ nǔ mɛ ǎ é.

¹² Mi mɛ e ná kó nyí mɛ̌si sín tɛgbɛ ɔ́, é lɛ́ byɔ́ ɖɔ è ní kplɔ́n nǔ nukɔn nukɔntɔn e ɖo Mawuxó ɔ́ mɛ lɛ́ɛ mi. Mi mɛ e ɖó ná ko ɖo nǔɖuɖu syɛ́nsyɛ́n ɖu wɛ ɔ́, é lɛ́ byɔ́ ɖɔ anɔ̌sin wɛ mi ná nu.

¹³Mɛ e ka ɖo anɔ̌nu ɔ́, vǐ yɛ̌yɛ́ wɛ é nyí; é ko ɖó nukúnnú-mɔjɛnǔmɛ ɖé bó ná tunwun nǔ e sɔgbe é, kpódó nǔ e ma sɔgbe ǎ é kpó ǎ.

¹⁴Lo ɔ́, nǔɖuɖu syɛ́nsyɛ́n ɔ́, mɛxó lɛ́ɛ tɔn wɛ; mɛxó énɛ́ lɛ́ɛ kó tunwun nǔ ɖagbe ɖo nǔ nyanya mɛ, gbɔn nǔwiwa yětɔn lɛ́ɛ gbla mɛ, bɔ é ko má yě.