Read fon Eblée 8 Bible Online

Eblée 8 - fon bible

Eblée 8

¹ Nǔ e ɖo tají hú ɖě lɛ́ɛ bǐ ɖo nǔ e ɖɔ wɛ mǐ ɖe ɔ́ mɛ ɔ́ ɖíe: Vɔ̌sánú-xwlémawutɔ́ ɖaxó mɔ̌hun wɛ mǐ ɖó, bɔ é jínjɔ́n ɖisíxwé nú axɔ́súzinkpo Mawu susu bǐ nɔ ɔ́ tɔn ɖo sɛ́xwé.

²É ɖo vɔ̌sánú-xwlémawutɔ́ ɖaxó sín azɔ̌ wa wɛ ɖo Tɛn mímɛ́ bǐ ɔ́ mɛ; Tɛn mímɛ́ bǐ e nyí goxɔ titewungbe e gbɛtɔ́ ma gbá ǎ, bɔ Aklúnɔ gbá é.

³Vɔ̌sánú-xwlémawutɔ́ ɖaxó ɖěbǔ ɔ́, è nɔ sɔ́ ɛ nú é ná xwlé nǔníná kpó vɔ̌sánú kpó Mawu. Hǔn é ɖo dandan mɛ ɖɔ vɔ̌sánú-xwlémawutɔ́ ɖaxó mǐ lɔ tɔn ní ɖó nǔɖé bó ná xwlé Mawu.

⁴Nú ayǐkúngban jí wɛ é ko ɖe ɔ́, é tlɛ ná nyí vɔ̌sánú-xwlémawutɔ́ ǎ, ɖó vɔ̌sánú-xwlémawutɔ́ lɛ́ɛ ɖe, bó nɔ xwlé nǔníná lɛ́ɛ Mawu, lě e Jwifu lɛ́ɛ sín sɛ́n zɔ́n gbɔn é.

⁵ Azɔ̌ e wa wɛ vɔ̌sánú-xwlémawutɔ́ énɛ́ lɛ́ɛ ɖe ɔ́ nyí xlɛ̌, bó nyí yɛ nǔ e ɖo sɛ́xwé ɔ́ tɔn. É sɔgbe xá nǔ e jɔ dó Mɔyízi ji ɔ́. Hwenu e é ɖo goxɔ ɔ́ na gbá wɛ ɔ́, Mawu ɖɔ n'i ɖɔ: “Ayi towe ní nɔ ée un xlɛ́ we ɖo só jí ɔ́ jí, bó bló bǐ nú é sɔgbe xá.”

⁶Amɔ̌ din ɔ́, azɔ̌ e è zɔ̌n Jezu ɔ́ hú gǎn yětɔn tawun, ɖó é wɛ nyí ɖɛ̌mɛnu nú akɔ e Mawu jɛ xá togun tɔn bɔ é nyɔ́ hú nukɔntɔn é; ɖó akɔjijɛ énɛ́ ɔ́ jínjɔ́n akpá e Mawu dó bɔ é nyɔ́ hú ɖě lɛ́ɛ bǐ lɛ́ɛ é jí.

⁷Ényí akɔjijɛ nukɔntɔn ɔ́ ma ko ɖó blɔ̌ ǎ ɔ́, é sɔ́ ná byɔ́ ɖɔ è nǎ sɔ́ akɔjijɛ wegɔ́ ɔ́ dó ɖyɔ́ ná ǎ.

⁸ Lo ɔ́, Mawu mɔ nǔjɛdo ɖo togun tɔn wú, bó ná kɛ nu d'é wú hwenu e é ɖɔ ɖo Mawuxówéma ɔ́ mɛ ɖɔ: “Azǎn ɖé lɛ́ɛ ná wá, bɔ un ná jɛ akɔ yɔ̌yɔ́ ɖé xá Izlayɛ́li kpódó Judáa kpó sín togun.

⁹É ná cí akɔ e un jɛ xá tɔ́gbó yětɔn lɛ́ɛ, gbe e gbe un hɛn alɔ yětɔn, bó kplá yě tɔ́n sín Ejípu é ɖɔhun ǎ; yě nɔ gbejí nú akɔjijɛ énɛ́ ɔ́ ǎ. Énɛ́ ɔ́ wú ɔ́, un sɔ́ flín yě ǎ.

¹⁰Azǎn énɛ́ lɛ́ɛ gúdo ɔ́, nǔ e sín akɔ un ná jɛ xá Izlayɛ́li ví lɛ́ɛ é ɖíe: Un ná bló bɔ sɛ́n ce lɛ́ɛ ná nɔ ta yětɔn mɛ; un ná wlán yě dó ayi yětɔn mɛ; un ná nyí Mawu yětɔn, bɔ yě ná nyí togun ce.

¹¹É sɔ́ ná byɔ́ ɖɔ mɛɖé ná ɖo yě mɛ, bó ná kplɔ́n nǔ mɛ e kpó é kpó nyí to ɖokpó ɔ́ mɛ nu é, abǐ mɛ e nyí nɔví tɔn é, bó ná ɖɔ n'i ɖɔ: ‘Tunwun Aklúnɔ’ ǎ. Đó mɛ bǐ ná tunwun mì, bɛ́ sín mɛ e nyí yɔkpɔ́vú bǐ é jí, káká yi jɛ mɛ e nyí mɛxó bǐ ɔ́ jí.

¹²Un ná sɔ́ nǔ e yě wa nyi do lɛ́ɛ kɛ yě; un sɔ́ ná flín hwɛ e yě hu lɛ́ɛ ǎ.” Xó e Aklúnɔ ɖɔ ɔ́ nɛ́.

¹³Ée Mawu ɖɔ akɔjijɛ yɔ̌yɔ́ ɔ́ xó ɔ́, é bló bɔ akɔ nukɔntɔn ɔ́ húzú nǔ xóxó; nǔ e ka húzú nǔ xóxó, bó lɛ́ fɔ́n bó ɖo xó dó d'é jí wɛ ɔ́ kó ɖo nǎ bú wɛ.