Read fon Jaki 1 Bible Online

Jaki 1 - fon bible

Jaki 1

¹ Nyɛ Jaki e nyí azɔ̌watɔ́ Mawu tɔn, bó nyí azɔ̌watɔ́ Aklúnɔ Jezu Klísu tɔn ɔ́ wɛ wlán wěma élɔ́ sɛ́ dó Jwifu klísusɛntɔ́ e gba kpé gbɛ ɔ́ bǐ mɛ lɛ́ɛ é, bó ɖo gbe dó sɛ́ dó yě wɛ.

²Nɔví ce lɛ́ɛ mi, hwenu e è nǎ ɖo mi dó kpɔ́n wɛ gbɔn alɔkpa lɛ́ɛ bǐ mɛ ɔ́, ní nyí awǎjijɛnú nú mi;

³ɖó mi tunwun ɖɔ ényí nǔɖiɖi mitɔn lí dǒ ɖo mɛ dó kpɔ́n lɛ́ɛ mɛ ɔ́, é nɔ zɔ́n bɔ è nɔ ɖó suúlu.

⁴Amɔ̌, mi nɔ acéjí bónú suúlu e mi ɖó ɔ́ ní wa azɔ̌ kpíkpé, bónú mi ná zin, bó ná jɛ ayǐ ɖo nǔ ɖěbǔ mɛ ǎ.

⁵É ka ɖo mɔ̌ có, ényí nǔnywɛ́ hwedó mɛɖé ɖo mi mɛ hǔn, ní byɔ́ Mawu nú é ná ná ɛ; ɖó Mawu nɔ hun alɔ dó ná nǔ mɛ bǐ kpó xomɛhunhun kpó.

⁶Amɔ̌, mɛ ɔ́ ní byɔ́ kpó nǔɖiɖi kpó ma xo nǔ kpɔ́n; ɖó mɛ e nɔ xo nǔ kpɔ́n ɔ́ cí aslɔkɛ́ e sí te ɖo xu jí, bɔ jɔhɔn nɔ dó alɔ mɛ, bó nɔ xo dó ɖisí, bó nɔ xo dó amyɔ é ɖɔhun.

⁷Mɛ mɔ̌hunkɔtɔn ní ma lin ɖɔ émí ná mɔ nǔɖé yí ɖo Aklúnɔ sí ó;

⁸ɖó, ɖo nǔwiwa tɔn lɛ́ɛ mɛ ɔ́, ayi tɔn nɔ nɔ fí ɖokpó ǎ; é ka ɖó jiɖiɖe dó nǔ e wa wɛ é ɖe ɔ́ ɖě wú ǎ.

⁹Nɔví e nyí wamamɔnɔ ɔ́ ní tɛ afɔ ayǐ, ɖó Mawu ɖo sísɔ́ ɛ su wɛ;

¹⁰ nɔví e nyí dɔkunnɔ ɔ́ ní tɛ afɔ ayǐ ɖó Mawu ɖo sísɔ́ ɛ hwe wɛ. Nǔgbó ɔ́, dɔkunnɔ ɔ́ sín gbɛ ná wá yi gběhan sɛ́ ɖɔhun.

¹¹Hwe nɔ tɔ́n kpó zozo ɖaxó ɖé kpó, bó nɔ fyɔ́ gběhan ɔ́, bɔ sɛ́ ɔ́ nɔ jɛ ayǐ, bɔ ɖɛkpɛ tɔn nɔ bú. Mɔ̌ ɖokpó ɔ́, dɔkunnɔ ɔ́ ná jɛ ayǐ ɖo nǔ e é nɔ wa lɛ́ɛ mɛ.

¹²Nǔ nyɔ́ nú mɛ e nɔ syɛ́nlǐn ɖo mɛdókpɔ́n hwenu é; ɖó nú é ɖe lǐnsyɛ́nsyɛ́n tɔn xlɛ́ gúdo ɔ́, é ná mɔ gbɛ jɔ gbɛ yí; gbɛ jɔ gbɛ énɛ́ wɛ nyí ajɔ e sín akpá Mawu dó nú mɛ e yí wǎn n'i lɛ́ɛ é.

¹³Hwenu e mɛɖé ná jɛ tɛ́nkpɔ́n mɛ ɔ́, ní ma ɖɔ Mawu wɛ ɖo émí tɛ́nkpɔ́n wɛ ó. Đó nǔ nyanya sixú tɛ́n Mawu kpɔ́n ǎ; Mawu ɖésú ka nɔ tɛ́n mɛ ɖěbǔ kpɔ́n ǎ.

¹⁴Lo ɔ́, è nɔ jɛ tɛ́nkpɔ́n mɛ hwenu e jlǒ nyanya mɛ ɖésúnɔ tɔn dɔn mɛ, bɔ è jɛ mɔ mɛ é.

¹⁵Énɛ́ ɔ́ gúdo ɔ́, jlǒ nyanya ɔ́ nɔ ji hwɛhuhu, bɔ hwɛhuhu ɔ́ wá dó ɖɔ do bǐ ɔ́, é nɔ ji kú.

¹⁶Nɔví ce vívɛ́ná lɛ́ɛ mi, è ma blɛ́ mi ó.

¹⁷Nǔníná ɖagbe ɖagbe bǐ, kpó nǔnámɛ e nǔ vɔ ɖ'é wú ɔ́ bǐ kpó ɔ́, sɛ́xwé wɛ yě nɔ gosín; yě nɔ jɛ te sín Mawu e bló nǔ e ɖo jǐxwé bó nɔ ná wěziza lɛ́ɛ é gɔ́n; Mawu nɔ húzú ǎ; é ɖo ɖěbǔ ɔ́, é nɔ dó zǐnflú ǎ.

¹⁸Đo é ɖésúnɔ sín jlǒ mɛ ɔ́, é ná gbɛ jɔ gbɛ mǐ gbɔn xó tɔn e nyí nǔgbó ɔ́ gbla mɛ, bónú mǐ ná nyí mɛ nukɔn nukɔntɔn lɛ́ɛ ɖo nǔɖíɖó tɔn lɛ́ɛ bǐ mɛ.

¹⁹Nɔví vívɛ́ná lɛ́ɛ mi, mi flín xó élɔ́ ganjí: mɛ ɖokpó ɖokpó ɖó ná nɔ ɖo gbesisɔ mɛ, bó ná nɔ se Mawuxó ɔ́; amɔ̌ ní ma nɔ zɔn xó jí ó; ní ma ka nɔ yá wǔ sin xomɛ ó;

²⁰ɖó mɛ e sin xomɛ ɔ́ nɔ wa nǔ e sɔgbe ɖo Mawu nukún mɛ é ǎ.

²¹Énɛ́ ɔ́ wútu ɔ́, mi ní jó nǔ e ná hɛn mɛ kwíji é bǐ kpódó azɔ̌ nyanya bǐ kpán dó. Mi yí xó e Mawu sɔ́ dó ayi mitɔn mɛ ɔ́ kpó xomɛ fífá kpó; ɖó xó ɔ́ hɛn ɔ́, é ná hwlɛ́n mi gán.

²²Mi ma ɖo miɖée blɛ́ wɛ, bó ɖo Mawuxó ɔ́ ɖótó wɛ kpowun ó; azɔ̌ wɛ mi ná nɔ zé dó wa ná titewungbe.

²³Đó mɛ e nɔ se Mawuxó ɔ́, bó ma nɔ zé dó wa azɔ̌ ná ǎ ɔ́ cí mɛ e ɖo nǔkpɛ́n mɛ kpɔ́n wɛ, bó mɔ lě e é ɖésúnɔ ɖe gbɔn é ɖɔhun.

²⁴Ée é kpɔ́n éɖée gúdo ɔ́, é ɖidó, bó wɔn lě e é ɖe gbɔn ɔ́ tlóló.

²⁵Lo ɔ́, mɛ e nɔ gbéjé sɛ́n ma ɖó blɔ̌ e nɔ ɖe mǐ sín mɛ kannu ɔ́ kpɔ́n céɖécéɖé, bó nɔ ɖó kan d'é wú, lobo ma nɔ ɖótó kpowun, bó nɔ wɔn ǎ, bó nɔ bló ɖ'é jí ɔ́, Mawu ná xo ɖɛ dó mɛ énɛ́ ɔ́ jí, ɖo nǔ e é nɔ wa ɔ́ mɛ.

²⁶Ényí mɛɖé mɔ ɖɔ émí nyí sinsɛnnɔ, bó ma ka nɔ hɛn nu tɔn ǎ ɔ́, éɖée blɛ́ wɛ é ɖe; sinsɛn tɔn nyí nǔɖéwanú ǎ.

²⁷Sinsɛn e nyí sinsɛn mímɛ́, sinsɛn nǔgbó nǔgbó ɖo Mawu Tɔ́ ɔ́ nukɔn ɔ́ ɖíe: è nǐ kpé nukún dó tɔ́cyɔvǐ nɔcyɔvǐ lɛ́ɛ kpó asúkúsi lɛ́ɛ kpó wú ɖo wǔvɛ́ yětɔn lɛ́ɛ mɛ; è nǐ cɔ́ mɛɖée dó nǔ e wa wɛ mɛ e nyí gbɛ ɔ́ tɔn lɛ́ɛ ɖe lɛ́ɛ wú, bó ma hɛn mɛɖée blí ó.