Read fon Jaki 2 Bible Online

Jaki 2 - fon bible

Jaki 2

¹Nɔví ce lɛ́ɛ mi, mi mɛ e nɔ zán gbɛ mitɔn ɖo nǔɖiɖi e mi ɖó nú Aklúnɔ mǐtɔn Jezu Klísu susunɔ ɔ́ mɛ lɛ́ɛ ɔ́, mi ɖó ná ɖe mɛɖé ɖó vo ɖo mɛɖé mɛ ǎ.

²È nǐ ɖɔ nya dɔkunnɔ ɖé dó sikálɔkɛ́, bó dó awu ɖagbe ɖagbe ɖé, lobo byɔ́ agun mitɔn mɛ; nya wamamɔnɔ ɖé lɔ byɔ́ agun mitɔn mɛ, bó ɖo awu kíjá ɖé mɛ.

³Ée yě byɔ́ agun ɔ́ mɛ ɔ́, mi ɖó sísí titewungbe ɖé nú nya e dó awu ɖagbe ɖagbe ɔ́, bó ɖɔ n'i ɖɔ: “Wǎ jínjɔ́n fí, ɖo susu sín tɛn élɔ́ mɛ;” bó ka ɖɔ nú wamamɔnɔ ɔ́ ɖɔ: “Hwɛ ɔ́, nɔ te ɖo fínɛ́”, abǐ “Jǐnjɔ́n kɔ́ mɛ, ɖo afɔ ce kpá.”

⁴Ényí mi nɔ wa nǔ gbɔn mɔ̌ hǔn, mɛ ɖě ɖe ɖó vo nú mɛ ɖě wɛ mi ɖe nɛ́; linlin nyanya e ayi mitɔn kplɔ́n mi ɔ́ wɛ mi nɔ dó wa nǔ ná.

⁵Nɔví ce vívɛ́ná lɛ́ɛ mi, mi ɖótó: Mawu cyán wamamɔnɔ gbɛ élɔ́ mɛ tɔn lɛ́ɛ, bónú yě ná nyí dɔkunnɔ ɖo nǔɖiɖi mɛ, bó ná nyí axɔ́súɖuto e sín akpá e é dó nú mɛ e yí wǎn n'i lɛ́ɛ ɔ́ sín vǐ.

⁶Lo ɔ́, midɛɛ lɛ́ɛ ɔ́, mi gbɛ́ wǎn nú wamamɔnɔ! È ma ka nyí dɔkunnɔ lɛ́ɛ wɛ nɔ ɖo mi táfú wɛ, bó nɔ ɖo mi dɔn yi hwɛ nukɔn wɛ ǎ cé?

⁷Yě wɛ nɔ nylá nu dó nyǐkɔ ɖagbe ɖagbe énɛ́ e Mawu ná mǐ ɔ́ wú ǎ cé?

⁸ Nǔgbó ɔ́, nú mi nɔ nyi axɔ́súɖuto Mawu tɔn sín sɛ́n ɔ́ lě e Mawuxówéma ɔ́ ɖɔ gbɔn ɔ́, nǔ ɖagbe wa wɛ mi ɖe; é wɛ nyí ɖɔ: “Yǐ wǎn nú nɔzo towe hwi ɖésúnɔ ɖɔhun”.

⁹Amɔ̌, nú mi nɔ ɖe mɛ ɖě ɖó vo nú mɛ ɖě hǔn, hwɛ hu wɛ mi ɖe, bɔ sɛ́n ɔ́ ɖo hwɛ ɖó nú mi wɛ, ɖó tóli vɛ́ nú sɛ́n ɔ́ wɛ mi ɖe.

¹⁰Đó nú mɛɖé vɛ́ tóli nú nǔ e sɛ́n ɔ́ zɔ́n lɛ́ɛ ɖokpó géé ɔ́, nǔ e sɛ́n ɔ́ zɔ́n lɛ́ɛ bǐ wɛ é vɛ́ tóli ná.

¹¹ Nǔgbó ɔ́, mɛ e ɖɔ: “Ma lɛ aga ó” ɔ́, é ɖokpó ɔ́ wɛ lɛ́ ɖɔ: “Ma hu mɛ ó.” Énɛ́ ɔ́ wú ɔ́, ényí a na bo ma lɛ aga ǎ, bó ka hu mɛ ɔ́, sɛ́n wɛ a gba.

¹²Mi nɔ ɖɔ xó, bó nɔ wa nǔ mɛ e è ɖǒ ná zé sɛ́n e nɔ ɖe mɛ sín mɛ kannu ɔ́ dó ɖɔ hwɛ xá é ɖɔhun.

¹³Đó mɛ e ma kú nǔbláwǔ nú mɛ ɖě lɛ́ɛ ǎ ɔ́, Mawu ná kú nǔbláwǔ n'i hwenu e è nǎ ɖɔ hwɛ xá ɛ ɔ́ ǎ; lo ɔ́, nǔbláwǔkúnúmɛ ná ɖu ɖo hwɛɖiɖɔ jí.

¹⁴Nɔví ce lɛ́ɛ mi, ényí mɛɖé ɖɔ: “Un ɖó nǔɖiɖi” bó ma nɔ ɖe xlɛ́ ɖo nǔwiwa tɔn lɛ́ɛ mɛ ǎ ɔ́, aniwanú wɛ nǔɖiɖi énɛ́ ká nyí? Nǔɖiɖi énɛ́ sixú hwlɛ́n ɛ gán a?

¹⁵È nǐ ɖɔ avɔ abǐ nǔɖuɖu hwedó nɔví súnnu abǐ nɔví nyɔ̌nu ɖé,

¹⁶nú mi ma ná nǔ e ɖo tají bɔ yě ná nɔ gbɛ ɔ́ yě ǎ, lobo ɖɔ nú yě ɖɔ: “Mi ná yi ɖo fífá mɛ; mi dó awu ganjí, bó ɖu nǔ ní kpé mi” ɔ́, ani wɛ é ná wa nú yě?

¹⁷Lě e é ɖe gbɔn nú nǔɖiɖi ɔ́ nɛ́: ényí é ma nɔ ɖe éɖée xlɛ́ gbɔn nǔwiwa lɛ́ɛ mɛ ǎ ɔ́, nǔɖiɖi kúkú wɛ é nyí ɖo éɖée mɛ.

¹⁸Amɔ̌, nú mɛɖé ɖɔ: “A ɖǒ nǔɖiɖi, bɔ nyɛ ɖó nǔwiwa lɛ́ɛ” ɔ́, nyɛ ná ɖɔ n'i ɖɔ: “Xlɛ́ lě e nǔɖiɖi towe sixú tíin nǔwiwa lɛ́ɛ mɛ vo gbɔn é mi; énɛ́ ɔ́, nyɛ ná xlɛ́ nǔɖiɖi ce we gbɔn nǔwiwa ce lɛ́ɛ mɛ.”

¹⁹A ɖi nǔ ɖɔ Mawu ɖokpó géé wɛ ɖe; é nyɔ́ ganjí! Yɛ nyanya lɛ́ɛ lɔ ɖi nǔ ɖɔ Mawu ɖokpó géé wɛ ɖe, bɔ xɛsi nɔ ɖi yě, bɔ yě nɔ sísɔ́.

²⁰Ayixamasɔgbenánɔ! A jlǒ ɖɔ è nǐ ɖe lě e nǔɖiɖi e ma nɔ wa nǔ ǎ ɔ́ nyí nǔ yǎyá gbɔn ɔ́ xlɛ́ we a?

²¹ Tɔ́gbó mǐtɔn Ablaxámu ɔ́, nɛ̌ Mawu ka mɔ ɛ dó mɔ hwɛjijɔnɔ ná gbɔn? Mawu mɔ ɛ dó mɔ hwɛjijɔnɔ ná ɖó nǔwiwa tɔn lɛ́ɛ wú; ɖó é sɔ́ vǐ tɔn Izáki xwlé Mawu ɖo vɔ̌sákpe jí.

²²A mɔ a? Nǔɖiɖi tɔn kpó nǔwiwa tɔn lɛ́ɛ kpó wa azɔ̌ ɖó kpɔ́, bɔ nǔɖiɖi tɔn húzú nǔɖiɖi titewungbe, ɖó nǔɖiɖi tɔn kpó nǔwiwa tɔn lɛ́ɛ kpó nɔ wa azɔ̌ ɖó kpɔ́.

²³ Énɛ́ ɔ́, nǔ e è wlǎn dó Mawuxówéma ɔ́ mɛ ɔ́ jɛ; é wɛ nyí ɖɔ: “Ablaxámu ɖi nǔ nú Mawu, bɔ Mawu kpɔ́n dó nǔɖiɖi tɔn wú, bó mɔ ɛ dó mɔ hwɛjijɔnɔ ná.” Énɛ́ ɔ́, è nɔ ylɔ́ ɛ ɖɔ Mawu xɔ́ntɔn.

²⁴Mi mɔ din ɖɔ Mawu nɔ sɔ́ gbɛtɔ́ dó mɔ hwɛjijɔnɔ ná ɖó nǔwiwa tɔn lɛ́ɛ wú; é nyí nǔɖiɖi e é ɖó ɔ́ kɛ́ɖɛ́ wú wɛ ǎ.

²⁵ Mɔ̌ ɖokpó ɔ́ wɛ é nyí nú Hlaxábu agalɛtɔ́ ɔ́. Mawu sɔ́ ɛ dó mɔ hwɛjijɔnɔ ná ɖó nǔwiwa tɔn lɛ́ɛ wú; é wɛ yí dobanúnǔtɔ́ lɛ́ɛ dó xwé gbe, lobo dó alɔ yě, bɔ yě gbɔn ali ɖěvo bo yi.

²⁶Nǔgbó ɔ́, lě e agbaza e mɛ lǐndɔ̌n ma ɖe ǎ ɔ́ nyí nǔkúkú gbɔn ɔ́, mɔ̌ ɖokpó ɔ́ wɛ nǔɖiɖi e ma nɔ ɖe éɖée xlɛ́ gbɔn nǔwiwa lɛ́ɛ mɛ ǎ ɔ́ nyí nǔkúkú gbɔn.