Read fon Jaki 3 Bible Online

Jaki 3 - fon bible

Jaki 3

¹Nɔví ce lɛ́ɛ mi, mi mɛ gěgé ní ma ba ná nyí nǔkplɔ́nmɛtɔ́ ó; ɖó mi tunwun ɖɔ mǐ mɛ nǔkplɔ́nmɛtɔ́ lɛ́ɛ ɔ́, Mawu na ɖɔ hwɛ xá mǐ, bɔ é ná syɛ́n hú mɛ ɖě lɛ́ɛ tɔn ɖésú.

²Mǐ mɛ bǐ wɛ nɔ wa nǔ nyi do gbɔn alɔkpa gěgé mɛ. Ényí mɛɖé ma wa nǔ nyi do gbeɖé ɖo xó ɖiɖɔ tɔn lɛ́ɛ mɛ ǎ ɔ́, mɛ ma ɖó blɔ̌ ɖo wǔ wɛ nyí mɛ énɛ́; mɛ énɛ́ hɛn ɔ́, é ná lɛ́ ɖu ɖo agbaza éɖée tɔn bǐ jǐ.

³Mǐ nɔ dó gan nu nú sɔ́ lɛ́ɛ, bónú yě na sixú se tónú nú mǐ; énɛ́ ɔ́, mǐ ná dɔn yě yi fí e jló mǐ é.

⁴Abǐ mi kpɔ́n nǔ dó tɔjíhún lɛ́ɛ wú; yě d'agba sɔ mɔ̌, bɔ jɔhɔn ɖaxó nɔ ɖo yě sísɛ́ wɛ có, nǔ e è nɔ dó jlɔ́ ali nú yě ɔ́, nǔ kpɛví títí ɖé wɛ, bɔ tɔjíhúnkuntɔ́ ɔ́ nɔ dó jlɔ́ ali nú yě ɖidó fí e jló e é.

⁵Mɔ̌ ɖokpó ɔ́, ɖɛ̌ ɔ́, agbaza sín wǔjɔnú kpɛví ɖé wɛ é nyí; lo ɔ́, é hɛn ɔ́, é ná zé nǔ ɖaxó ɖaxó dó jlá ajɔ̌ nú éɖée. Mi kpɔ́n lě e myɔ kpɛví títí ɖé ko kpé bó ná dó zunkan ɖaxó zo gbɔn é!

⁶Đɛ̌ lɔmɔ̌ ɔ́, myɔ wɛ é nyí. É cí gbɛ e nǔ nyanya kpa acɛ ná ɔ́ ɖɔhun, bó ɖó tɛnmɛ tɔn ɖo agbaza mǐtɔn mɛ; é nɔ hɛn mǐ ɖésúnɔ ɔ́ bǐ blí; é nɔ zé jeyɛ́nu sín myɔ e ɖo é ɖésúnɔ ji wɛ ɔ́ dó fyɔ́ gbɛzán mǐtɔn ɔ́ bǐ ná.

⁷Gbɛtɔ́ hɛn ɔ́, é ná dé gběkanlin alɔkpa alɔkpa lɛ́ɛ, xɛ alɔkpa alɔkpa lɛ́ɛ, kanlin alɔkpa alɔkpa e è nɔ sá lɛ́ɛ, kpó hweví alɔkpa alɔkpa lɛ́ɛ kpó, lobo ka dé yě nǔgbó.

⁸Lo ɔ́, gbɛtɔ́ ɖěbǔ kpé wú, bó dé ɖɛ̌ tɔn gbeɖé ǎ; nǔ nyanya wɛ é nyí bó ɖo azɔ̌ wa wɛ hwebǐnu; aɖǐ e nɔ hu mɛ ɔ́ wɛ gɔ́.

⁹ É wɛ mǐ nɔ zé dó dó kú nú Aklúnɔ Tɔ́ mǐtɔn; é wɛ mǐ ka nɔ lɛ́ zé dó dó nu gbɛtɔ́ e Mawu bló, bɔ é nyí akpajlɛ́ tɔn ɔ́ ná.

¹⁰Kúdónúmɛ sín xó kpó nudómɛ sín xó kpó nɔ tɔ́n sín nu ɖokpó ɔ́ mɛ. Nɔví ce lɛ́ɛ mi, é ɖó ná nyí mɔ̌ ǎ.

¹¹Tɔjɔtɛn ɖé nɔ tɔ́n sin e víví é kpó sin e vɛ́ ɔ́ kpó gbɔn ali ɖokpó ɔ́ nu ǎ.

¹²Nɔví ce lɛ́ɛ mi, fígitín ɖé sixú sɛ́n olívu ǎ; vǐwuntín ɖé sixú sɛ́n fígi ǎ; mɔ̌ ɖokpó ɔ́, tɔjɔtɛn e sín sin nɔ vɛ́ jɛ ɔ́ sixú ná sin víví ǎ.

¹³Mɛ ɖé ɖo mi mɛ, bó tunwun nǔ, bó lɛ́ ɖó nǔnywɛ́ a? Ní bó ɖe xlɛ́ gbɔn gbɛ ɖagbe e é nɔ zán ɔ́ gbla mɛ, bó ɖe xlɛ́ gbɔn nǔ e é nɔ wa ɖo mɛɖée sɔ́ hwe kpó nǔnywɛ́ kpó mɛ lɛ́ɛ gbla mɛ.

¹⁴Lo ɔ́, ényí wǔhwinhwan baɖabaɖa kpó agbahwlɛ́nxámɛ sín ayixa kpó ɖo xomɛ nú mi hǔn, mi ma jlá ajɔ̌ nú miɖée ó; mi ma gbɛ́ nǔgbó ɖɔ, lobo ɖó nǔvú ó.

¹⁵Nǔnywɛ́ mɔ̌hunkɔtɔn gosín Mawu gɔn ǎ; gbɛ élɔ́ kpó gbɛtɔ́ nyínyí kpó tɔn wɛ é nyí; awǒvi gɔ́n wɛ é gosín.

¹⁶Đó fí e wǔhwinhwan ɖe, bɔ agbahwlɛ́nxámɛ sín ayixa ɖe ɔ́, nǔ hannyahannya wiwa kpó nǔ nyanya wiwa tɛnmɛ tɛnmɛ bǐ kpó lɔ ɖo fínɛ́.

¹⁷Lo ɔ́, nǔnywɛ́ e gosín Mawu gɔ́n ɔ́, nǔ mímɛ́ wɛ é to nyí hwɛ̌; énɛ́ ɔ́ gúdo ɔ́, é nɔ ba tagba ǎ; é fá bó nɔ lɛ́ hun xomɛ dó wa nǔ nú mɛ; é nyɔ́ xomɛ ɖésú, bó nɔ wa nǔ ɖagbe lɛ́ɛ; é nɔ nɔ mɛɖé jí ǎ; é ka nɔ wa yɛmɛnú ǎ.

¹⁸Mɛ e nɔ ɖe fífá sín ali lɛ́ lɛ̌ dó yěɖée lɛ́ɛ ɔ́, fífá mɛ wɛ yě nɔ dó nǔ dó, bɔ jinukún e yě nɔ ya ɔ́ nyí gbɛ jlɔ́jlɔ́.