Read fon Jaki 5 Bible Online

Jaki 5 - fon bible

Jaki 5

¹Din ɔ́, dɔkunnɔ lɛ́ɛ mi, mi ɖótó mì! Mi ya avǐ, bó só hehe, ɖó nǔ nyanya e ná jɛ dó mi jí lɛ́ɛ wú!

² Dɔkun mitɔn lɛ́ɛ nyɔ, bɔ nǔ ɖu avɔ mitɔn lɛ́ɛ.

³Siká mitɔn kpó kpatágan mitɔn kpó jɛ ko; ko énɛ́ e yě jɛ ɔ́ wɛ ná ɖe kúnnu nyanya nú mi bó ná ɖu lan mitɔn lɛ́ɛ myɔ ɖɔhun. Mi bɛ́ dɔkun kplé ɖo azǎn élɔ́ lɛ́ɛ e nyí azǎn gǔdo gúdo tɔn lɛ́ɛ é mɛ.

⁴ Mi sú axɔ́ azɔ̌watɔ́ e ɖo azɔ̌ wa wɛ ɖo gle mitɔn mɛ lɛ́ɛ ǎ. Mi ɖótó vo e sa wɛ yě ɖe ɔ́! Mɛ e ɖo jinukún mitɔn lɛ́ɛ bɛ́ yi xwé gbe nú mi wɛ lɛ́ɛ sín xósúsú hun káká wá jɛ Aklúnɔ Nǔbǐwúkpétɔ́ ɔ́ sín tómɛ.

⁵Acɔ́ mɛ wɛ mi nɔ, bó ɖu gbɛ ɖo ayǐkúngban ɔ́ jí; nǔ ɖagbe ɖagbe lɛ́ɛ wɛ mi ɖu, bó dó jǒ ɖ'ayǐ nú gbe e gbe è nǎ kplá mi yi lanhutɛn é.

⁶Mi ɖó hwɛ nú xomɛvɔ́nɔ lɛ́ɛ, bó hu yě; yě ka dɔn nǔ xá mi ǎ.

⁷Nɔví lɛ́ɛ mi, hǔn mi bo ɖó suúlu káká, nú Aklúnɔ ná wá. Mi kpɔ́n lě e glesi nɔ ɖó suúlu, bó nɔ nɔ te bɔ ayǐkúngban nɔ ná jinukún ɖagbe ɖagbe lɛ́ɛ gbɔn é; é nɔ ɖó suúlu káká bɔ xwejí kpó zǒjí kpó nɔ ja.

⁸Mi lɔmɔ̌ ɔ́, mi ɖó suúlu; akɔ́nkpinkpan ní kpé mi, ɖó Aklúnɔ sín wiwa ko sɛkpɔ́.

⁹Nɔví lɛ́ɛ mi, mi ma nɔ jɛ miɖée sín hwɛ, bónú Mawu wá ɖɔ hwɛ xá mi ó. Hwɛɖɔtɔ́ ɔ́ ko ɖo hɔnta, bó ɖo xwé gbe ná byɔ́ wɛ.

¹⁰Nɔví lɛ́ɛ mi, mi nɔ flín gbeyíɖɔ Mawu tɔn e ɖɔ xó dó Aklúnɔ nyǐkɔ mɛ lɛ́ɛ é; suúlu e yě ɖǒ ɖo wǔvɛ́ e yě mɔ lɛ́ɛ mɛ ɔ́, ní nyí kpɔ́n d'é wú nú mi.

¹¹ Mǐ nɔ ylɔ́ yě ɖɔ nǔnyɔ́nánɔ, ɖó yě dɛ ɖo ya e yě ji lɛ́ɛ nu. Suúlu e Jɔ̌bu ɖó ɔ́, mi se, bó tunwun nǔ e Aklúnɔ wá ná ɛ gbɔn gúdo ɔ́; ɖó Aklúnɔ nyɔ́ xomɛ ɖésú; mɛ nú nɔ blá wǔ n'i titewungbe.

¹² Nɔví ce lɛ́ɛ mi, ɖo tají ɔ́, mi ma xwlé nǔ ó; mi ma xwlé jǐnukúnsin ó, mi ma xwlé ayǐkúngban ó, mi ma ka xwlé nǔ gbɔn alɔkpa ɖěvo ɖěbǔ mɛ ó. Ényí xó mitɔn ɔ́, ɛɛn wɛ é nyí hǔn, mi ɖɔ “ɛɛn” kpowun; é ka nyí éeǒ wɛ é nyí hǔn, mi ɖɔ “éeǒ” kpowun, bónú Mawu ma wá ɖó hwɛ nú mi ó.

¹³Mɛ ɖé ɖo wǔvɛ́ mɔ wɛ ɖo mi mɛ a? Ní xo ɖɛ. Mɛ ɖé ɖo awǎjijɛ mɛ ɖo mi mɛ a? Ní ji han dó kpa susu nú Mawu.

¹⁴ Mɛ ɖé ɖo mi mɛ bó ɖo azɔn jɛ wɛ a? Ní ylɔ́ agunmɛxó lɛ́ɛ; yě ná xo ɖɛ n'i, bó ná kɔn ami dó ta n'i ɖo Aklúnɔ nyǐkɔ mɛ.

¹⁵Đɛ énɛ́ e è xo kpó nǔɖiɖi kpó ɔ́ ná hwlɛ́n azinzɔnnɔ ɔ́ gán. Aklúnɔ ná bló bɔ é ná jɛ te, bɔ ényí hwɛ ɖé ɖo kɔ tɔn ɔ́, Mawu ná sɔ́ kɛ ɛ.

¹⁶Hǔn, mi bo ɖɔ hwɛ e mi hu lɛ́ɛ nú miɖée, bó xo ɖɛ nú miɖée, bónú azɔn mitɔn ná gbɔ. Đɛ e hwɛjijɔnɔ nɔ xo ɔ́ nɔ ɖó hlɔ̌nhlɔ́n ɖésú.

¹⁷Elíi ɔ́, gbɛtɔ́ wɛ é nyí mǐ ɖɔhun: é xo ɖɛ kpó vǐvɛ́ dó nú nǔ kpó, bó byɔ́ Mawu ɖɔ jǐ ní ma ja ó, bɔ jǐ ka ja dó ayǐkúngban jí ǎ káká nú xwe atɔn adaɖé.

¹⁸ Énɛ́ ɔ́ gúdo ɔ́, é lɛ́ xo ɖɛ; énɛ́ ɔ́, jǐnukúnsin ná jǐ, bɔ ayǐkúngban ná jinukún tɔn lɛ́ɛ.

¹⁹Nɔví ce lɛ́ɛ mi, nú mɛɖé zɛ sín nǔgbó sín ali ɔ́ jí ɖo mi mɛ, lobo nú mɛɖé lɛ́ dɔn ɛ wá jí hǔn,

²⁰ mi flín xó élɔ́: mɛ e kplá hwɛhutɔ́ ɖé sín ali nyanya e jí é ɖe ɔ́ jí ɔ́, ná hwlɛ́n lǐndɔ̌n hwɛhutɔ́ énɛ́ ɔ́ tɔn sín kú. É ná bló bɔ Mawu ná bú nǔ dó hwɛhuhu gěgé.