Read fon 1 Piyɛ́ɛ 2 Bible Online

1 Piyɛ́ɛ 2 - fon bible

1 Piyɛ́ɛ 2

¹Hǔn, mi bo jó adǎnúwiwa alɔkpa alɔkpa bǐ dó; mi jó nǔvúɖíɖó bǐ dó; mi jó yɛmɛnúwiwa dó; mi jó wǔhwinhwan kpó xó nyanya ɖɔ dó mɛ wú bǐ kpó dó.

² Mi cí vǐ yɛ̌yɛ́ lɛ́ɛ ɖɔhun: lě e vǐ yɛ̌yɛ́ lɛ́ɛ nɔ ba ná nu anɔ̌sin hwɛhwɛ gbɔn ɔ́, mi ba Mawuxó e ná zɔ́n bɔ mi ná su ɖo nǔɖiɖi mɛ, bó ná mɔ hwlɛngán yí din e mi ɖɔ́ xomɛnyínyɔ́ Aklúnɔ tɔn kpɔ́n é.

⁴Mi sɛkpɔ́ Aklúnɔ, awǐnnya gbɛɖe e gbɛtɔ́ lɛ́ɛ xo nyi kɛ́n, bɔ Mawu ka mɔ dó mɔ awǐnnya xɔ akwɛ́ bó sɔ́ é,

⁵bónú mi lɔmɔ̌ ɔ́, ɖi awǐnnya gbɛɖe ɖɔhun ɔ́, è nǎ zé mi dó gbá sinsɛnxɔ Yɛsinsɛn tɔn ɔ́ ná. Mi ná nyí vɔ̌sánú-xwlémawutɔ́ mímɛ́ sín gbɛ̌ta, bó ná nɔ xwlé vɔ̌sánú Yɛsinsɛn tɔn ɔ́ Mawu; vɔ̌sánú Yɛsinsɛn tɔn e nɔ nyɔ́ Mawu nukún mɛ, gbɔn Jezu Klísu jí é.

⁶Đó nǔ e Mawuxówéma ɔ́ ɖɔ ɔ́ ɖíe: “Un sɔ́ awǐnnya xɔ akwɛ́ ɖokpó, bó ɖo do dó wɛ din ɖo Sinyɔ́ɔ, bɔ é nyí awǐnnya e ɖo zwe jí é, bɔ mɛ e ɖi nǔ n'i ɔ́ ná ɖu winnyá ǎ.”

⁷ Awǐnnya xɔ akwɛ́ ɖaxó ɖokpó wɛ nyí awǐnnya énɛ́ ɔ́ nú mi mɛ e ɖi nǔ lɛ́ɛ; amɔ̌ nú mɛ e ma ɖi nǔ ǎ lɛ́ɛ ɔ́, é nyí: “Awǐnnya e xɔmɛtɔ́ lɛ́ɛ ma dó mɔ nǔɖéwanú ǎ, bó xo nyi kɛ́n, bɔ é húzú awǐnnya e ɖo tají é”.

⁸ È lɛ́ ɖɔ ɖo akpá ɖěvo xwé ɖɔ: “Awǐnnya e wú gbɛtɔ́ lɛ́ɛ nɔ klɛ́n afɔ dó, bó nɔ́ fún sa ɔ́, só e nɔ zin yě dɛ́ ɔ́ wɛ.” Yě klɛ́n afɔ d'é wú, ɖó yě gbɛ́ ɖɔ émí kún ná ɖi nǔ nú xó ɔ́ ó; nǔ e è ko zé yě ɖó te ná é nɛ́.

⁹ Amɔ̌ midɛɛ lɛ́ɛ ɔ́, akɔta e è cyán ɔ́ wɛ mi nyí, bó nyí vɔ̌sánú-xwlémawutɔ́ axɔ́sú ɔ́ tɔn; akɔta ɖe ɖó vo wɛ mi nyí, bó nyí togun Mawu tɔn. Mawu e ylɔ́ mi nú mi ná gosín ablu mɛ, bó wá wěziza tɔn ɖagbe ɖagbe ɔ́ nu ɔ́ cyán mi bónú mi ná jlá azɔ̌ ɖagbe ɖagbe e é nɔ wa lɛ́ɛ.

¹⁰ Mi nyí togun Mawu tɔn ɖ'ayǐ ǎ; amɔ̌ din ɔ́, togun tɔn wɛ mi nyí; é kú nǔbláwǔ nú mi ɖ'ayǐ ǎ; amɔ̌ din ɔ́, é kú nǔbláwǔ nú mi.

¹¹Mɛvívɛ́ná ce lɛ́ɛ mi, mi mɛ e nyí jǒnɔ bó nyí aligbɔntɔ́ ɖo ayǐkúngban jí lɛ́ɛ ɔ́, un ɖo byɔ̌byɔ́ mi wɛ ɖɔ mi ma lɔn nú jlǒ gbɛtɔ́ tɔn e nɔ ɖo ahwan fun xá ayi wɛ lɛ́ɛ ní ɖu ɖo mi jí ó.

¹²Mi zán gbɛ ɖagbe ɖo mɛ e ma ɖi nǔ nú Mawu ǎ lɛ́ɛ tɛ́ntin; énɛ́ ɔ́, nú yě na bo ɖo hwɛ dó mi wɛ ɖɔ mi nyí nǔnyanyawatɔ́ ɔ́, yě ná wá mɔ nǔ jɛ azɔ̌ ɖagbe e mi nɔ wa lɛ́ɛ wú dandan, bó ná kpa susu nú Mawu ɖo azǎn e gbe é ná ba yě kpɔ́n é.

¹³Mi hwíhwɛ́ miɖée dó acɛkpikpa gbɛtɔ́ lɛ́ɛ tɔn bǐ glɔ́, ɖó Aklúnɔ wú: mi hwíhwɛ́ miɖée dó Dadá e kpa acɛ nú mɛ bǐ ɔ́ glɔ́,

¹⁴bó hwíhwɛ́ miɖée dó tokpɔngán lɛ́ɛ glɔ́; Dadá ɔ́ wɛ sɛ́ yě dó, bónú yě ná dɔn tó nú nǔnyanyawatɔ́ lɛ́ɛ, bó ná kpa mɛ e nɔ wa nǔ ɖagbe lɛ́ɛ é.

¹⁵Nǔgbó ɔ́, nǔ e Mawu jló ɔ́ wɛ nyí ɖɔ mi ní nɔ wa nǔ ɖagbe, bó ná dó xwe yě mɛ e ma tunwun nǔɖé ǎ lɛ́ɛ kpó xlonɔ lɛ́ɛ kpó sín nu dó xɔ.

¹⁶Mi zán gbɛ mitɔn mɛ e ɖo éɖée sí é ɖɔhun; amɔ̌ mi ɖésúnɔ sí e mi ɖe ɔ́ ní ma nyí avɔ bónú mi bú dó nǔ nyanya ó; lo ɔ́, mi wa nǔ mɛsɛntɔ́ Mawu tɔn ɖɔhun.

¹⁷Mi sí gbɛtɔ́ lɛ́ɛ bǐ; mi yí wǎn nú nɔví mitɔn ɖo nǔɖiɖi mɛ lɛ́ɛ; mi ɖi xɛsi nú Mawu; mi sí Dadá ɔ́.

¹⁸Mɛsɛntɔ́ lɛ́ɛ mi, mi hwíhwɛ́ miɖée dó gǎn mitɔn lɛ́ɛ glɔ́, bó ɖó sísí nú yě nú nǔ bǐ ní vɔ ɖ'é wú; é nyí gǎn e nyɔ́, bó fá lɛ́ɛ kɛ́ɖɛ́ wɛ mi ná ɖó sísí ná ǎ; lo ɔ́, mi ná ɖó sísí nú yě mɛ e nylá hun lɛ́ɛ lɔmɔ̌.

¹⁹Nǔgbó ɔ́, ényí è ɖo ya dó nú mi dó acɛ jí wɛ, bónú mi dɛ ɖ'é nu, ɖó mi jló ná se tónú nú Mawu wútu ɔ́, nǔ ɖagbe wɛ é nyí.

²⁰Đó ényí nǔ wɛ mi wa nyi do, bɔ è ɖo mi xo wɛ, bɔ mi dɛ ɖ'é nu ɔ́, le tɛ́ wɛ ɖ'é mɛ nú mi? Lo ɔ́, nú mi wa nǔ ɖagbe bɔ è dǒ ya nú mi, bɔ mi dɛ ɖ'é nu ɔ́, nǔ ɖagbe wɛ é nyí ɖo Mawu nukún mɛ.

²¹Nǔ e Mawu ylɔ́ mi na é nɛ́; ɖó Klísu ɖésúnɔ ji ya dó ta mitɔn mɛ, bó jó xlɛ́ tɔn nyi ayǐ nú mi, bónú mi ná zé afɔ dó afɔdo tɔn lɛ́ɛ mɛ.

²² É hu hwɛ ǎ, è ka se adingbanxó ɖé ɖo nu tɔn mɛ kpɔ́n gbeɖé ǎ.

²³ Ée è zun i ɔ́, é zun mɛ ǎ; ée é ji ya ɔ́, é gblɔ́n adǎn nú mɛ ǎ; lo ɔ́, é sɔ́ éɖée dó alɔ mɛ nú Mawu e nɔ ɖɔ hwɛ kpó hwɛjijɔ kpó é.

²⁴ É bɛ́ hwɛ mǐtɔn lɛ́ɛ dó éɖée jí ɖo aklúzu jí, bónú mi ma sɔ́ hu hwɛ ó, bónú mi ná zán gbɛ jlɔ́jlɔ́. Akpado tɔn lɛ́ɛ wɛ zɔ́n bɔ è gbɔ azɔn nú mi.

²⁵Đó lɛ̌ngbɔ́ e bú lɛ́ɛ ɖɔhun wɛ mi cí ɖ'ayǐ; amɔ̌ din ɔ́, è ko lɛ́ kplá mi wá mɛ e nyí lɛ̌ngbɔ́nyitɔ́ mitɔn, bó nɔ cɔ́ mi ɔ́ gɔ́n.