Read fon 1 Piyɛ́ɛ 3 Bible Online

1 Piyɛ́ɛ 3 - fon bible

1 Piyɛ́ɛ 3

¹ Nyɔ̌nu lɛ́ɛ mi, mɔ̌ ɖokpó ɔ́, mi hwíhwɛ́ miɖée dó asú mitɔn lɛ́ɛ glɔ́, bónú mɛɖé ɖo yě mɛ, bó má ɖi nǔ nú Mawuxó ɔ́ ǎ ɔ́, mi ná dɔn ɛ gbɔn walɔ mitɔn lɛ́ɛ gbla mɛ, bɔ é ná ɖi nǔ. É byɔ́ ɖɔ mi ní ɖɔ xó ɖé ǎ;

²ɖó yě ná mɔ lě e zǐnzán mitɔn mɛ́, bó ɖó sísí gbɔn é.

³ Mi ma nú acɔ́ɖónú wěxo tɔn lɛ́ɛ ɖi ɖablóbló, sikánú lɛ́ɛ, avɔ ɖagbe ɖagbe lɛ́ɛ wɛ mi ná nɔ́ dó ba acɔ́ ná ó.

⁴Lo ɔ́, acɔ́ xomɛ tɔn wɛ mi ná nɔ́ ba; acɔ́ énɛ́ nɔ cá ǎ; é wɛ nyí fífá kpó vivo ɖo ayi mɛ kpó; acɔ́ énɛ́ wɛ xɔ akwɛ́ ɖaxó ɖo Mawu gɔ̌n.

⁵Nyɔ̌nu xóxó hwenu tɔn e nɔ sí Mawu, bó nɔ́ ɖo nukún ɖó e wɛ lɛ́ɛ ɔ́, lě e yě nɔ́ bló yěɖée ɖó gbɔn ɔ́ ɖíe: yě nɔ hwíhwɛ́ yěɖée dó asú yětɔn lɛ́ɛ glɔ́.

⁶ Ninɔmɛ énɛ́ wɛ Sala ɖó; é nɔ se tónú nú asú tɔn Ablaxámu bó nɔ́ ylɔ́ ɛ ɖɔ: “Sɛ́ ce”. Din ɔ́, ényí mi nɔ wa nǔ ɖagbe, bó ma jó miɖée dó nú nǔ ɖěbǔ dó xɛsi nú mi ǎ ɔ́, vǐ tɔn wɛ mi nyí.

⁷ Asisúnɔ lɛ́ɛ mi, mɔ̌ ɖokpó ɔ́, mi tunwun ɖɔ asi mitɔn lɛ́ɛ kún ɖó gǎn ɖé sɔ mi ó, bónú mi ná nɔ kpɔ́n dó énɛ́ ɔ́ wú, bó ná nɔ zán gbɛ ɖagbe xá yě; mi nɔ wlí yɛ̌yi nú yě, ɖó yě kpó mi kpó wɛ Mawu ná ná gbɛ jɔ gbɛ. Mi nɔ wa nǔ gbɔn mɔ̌, bónú nǔ ɖěbǔ ma ɖó ɖɛ e mi nɔ xo lɛ́ɛ te ó.

⁸Bó ná dó fó ɔ́, mi bǐ ní ɖó linlin ɖokpó ɔ́, bó ɖó ayixa ɖokpó ɔ́; mi yí wǎn nú miɖée nɔví nɔví ɖɔhun; mi nɔ nyɔ́ xomɛ dó miɖée wú, bó nɔ sɔ́ miɖée hwe.

⁹Mi ma zé nyanya dó sú nyanya xɔ ná ó, abǐ mi ma zé zun dó sú zun xɔ ná ó; é nyɔ́ wa ɔ́, nyɔ̌ná wɛ mi ná nɔ byɔ́ ɖo Mawu gɔ́n dó sú axɔ́ ná; nǔ e Mawu ylɔ́ mi ná é nɛ́.

¹⁰Đó Mawuxówéma ɔ́ ɖɔ: “Mɛ e jló ná mɔ gbɛ sín vǐví, bó jló ɖɔ gbɛ ní nyɔ́ nú émí ɔ́ ɖó ná hɛn nu tɔn, bó ná nɔ́ ɖɔ xó nyanya ǎ, bó ná jó nǔvúɖíɖó dó.

¹¹É ɖó ná lɛ́ kɔ sín nǔ nyanya wiwa gúdo, bó ná nɔ wa nǔ ɖagbe; é ná nɔ́ jɛ hun dó fífá jí bó nɔ ba;

¹²ɖó Aklúnɔ sín nukún ɖo mɛ e nɔ wa nǔ jlɔ́jlɔ́ lɛ́ɛ jí, é ɖo gbesisɔ mɛ, bó ná ɖótó ɖɛ yětɔn. Amɔ̌, é nɔ ɖe kɔ dó nǔnyanyawatɔ́ lɛ́ɛ.”

¹³Ényí mi nɔ bí dó nǔ ɖagbe wiwa wú ɔ́, mɛ̌ ka ná wa nǔ nyanya dó mi wú?

¹⁴ Ényí é ná bó byɔ́ ɖɔ mi ná ji ya ɖó mi ɖo nǔ jlɔ́jlɔ́ wa wɛ wú hǔn, nǔ nyɔ́ nú mi. Mi ma ɖi xɛsi ɖěbǔ nú gbɛtɔ́ lɛ́ɛ ó; mi ma ka jó miɖée dó nú è gba ayi dó nú mi ó.

¹⁵Lo ɔ́, mi tunwun dó ayi mitɔn mɛ ɖɔ Klísu Aklúnɔ ɖokpónɔ géé jɛ́n nyí Mɛ mímɛ́. Mi ɖo gbesisɔ mɛ hwebǐnu, bónú mɛɖé byɔ́ mi ɖɔ mi ní tín nǔ mɛ nú émí dó nǔ e ɖó nukún wɛ mi ɖe ɔ́ wú ɔ́, mi ná ná sin tɔn mɛ ɔ́.

¹⁶Gbe fífá kpó mɛsísí kpó wɛ mi ka ná dó ná xósin yě. Mi ɖó ayixa mímɛ́, bónú jijɔ ɖagbe e Klísu sɔ́ dó ayi mɛ nú mi, bɔ mi ɖo zǐnzán wɛ ɔ́, hwenu e yě mɛ e nɔ ɖo xó nyanya ɖɔ d'é wú wɛ lɛ́ɛ ná dó hwɛ mi ɔ́, xó e yě nɔ ɖɔ lɛ́ɛ ní hu winnyá nú yě.

¹⁷Đó ényí jlǒ Mawu tɔn wɛ nyí ɖɔ è nǐ ji ya ɔ́, hǔn è ji ya ɖó ɖagbewiwa wú ɔ́, é nyɔ́ hú è nǐ ji ya ɖó nyanya wú.

¹⁸Nǔgbó ɔ́, Klísu ɔ́ ɖésú kú; é kú azɔn ɖokpó géé bɔ xó fó dó hwɛ e gbɛtɔ́ lɛ́ɛ hu lɛ́ɛ tamɛ; éyɛ́ mɛ e nɔ wa nǔ jlɔ́jlɔ́ ɔ́ kú dó mɛ e ma nɔ wa nǔ jlɔ́jlɔ́ ǎ lɛ́ɛ tamɛ, bó ná dó kplá mi wá Mawu gɔ̌n; ɖo agbaza sín alixo ɔ́, è hu i; lo ɔ́, ɖo Yɛ ɔ́ sín alixo ɔ́, è fɔ́n ɛ wá gbɛ.

¹⁹Yɛ énɛ́ mɛ wɛ é zɔn bó yi jlá Mawuxó yɛ e ɖo gan mɛ lɛ́ɛ.

²⁰ Mɛ e ko vɛ́ tóli nú Mawu ɖ'ayǐ xóxó ɖo hwenu e é ɖó suúlu bó nɔ te káká bɔ Nɔwée bló tɔjíhún ɔ́ fó lɛ́ɛ sín yɛ lɛ́ɛ xó ɖɔ wɛ è ɖe. Mɛ kwín we ɖé wɛ byɔ́ tɔjíhún ɔ́ mɛ: yě mɛ tántɔn wɛ nyí mɛ e byɔ́ mɛ bó gán ɖo sin xó ɔ́ mɛ é.

²¹Nǔ e sín akpajlɛ́ nyí wɛ sin ɔ́ ɖe ɔ́ wɛ nyí yɛhwesin e ɖo mi lɔ hwlɛngán wɛ din e. Yɛhwesin ɔ́, ɖixó agbaza tɔn lɛ́ɛ wɛ é nɔ ɖe síin ǎ, lo ɔ́ vo sa nú Mawu wɛ é ɖe ɖɔ é ní ná ayixa mímɛ́ mi. Fɔ́n e Jezu Klísu fɔ́n sín kú ɔ́ zɔ́n bɔ yɛhwesin hwlɛ́n mi gán.

²²Jezu Klísu ɔ́ wɛ yi sɛ́xwé bó jínjɔ́n ɖisíxwé nú Mawu; fínɛ́ wɛ é ɖu axɔ́sú nú wɛnsagun lɛ́ɛ bǐ kpó acɛkpikpa lɛ́ɛ bǐ kpó, kpódó hlɔ̌nhlɔ́n lɛ́ɛ bǐ kpán ɖe.