Read fon 1 Piyɛ́ɛ 5 Bible Online

1 Piyɛ́ɛ 5 - fon bible

1 Piyɛ́ɛ 5

¹Din ɔ́, mɛ e nyí agunmɛxó ɖo mi mɛ lɛ́ɛ ɖɔ xó ná wɛ un ɖe. Nyɛ lɔ ɔ́, agunmɛxó wɛ un nyí; un nyí kúnnuɖetɔ́ wǔvɛ́ e Klísu mɔ lɛ́ɛ tɔn, bó ɖó mǐmá ɖo susu e è nǎ wá ɖe xlɛ́ ɔ́ mɛ. Nǔ e ɖɔ nú yě wɛ un ɖe ɔ́ ɖíe:

² mi kpé nukún dó mɛ e Mawu sɔ́ dó así nú mi lɛ́ɛ wú, lě e lɛ̌ngbɔ́nyitɔ́ lɛ́ɛ nɔ kpé nukún dó lɛ̌ngbɔ́ e è sɔ́ dó así nú yě lɛ́ɛ wú gbɔn é; mi sɔ́ jlǒ ɖagbe dó kpé nukún dó yě wú lě e Mawu jló gbɔn é; ní ma nyí gǎn wɛ é hú mi bɔ mi bló ó. Mi wa azɔ̌ mitɔn kpódó bǐbí ɖó dó nǔ wǔ kpán; ní ma nyí akwɛ́ wɛ mi xwedó ó.

³Mi ma nɔ ba ná kpa acɛ gannaganna nú mɛ e è sɔ́ dó así nú mi ɖɔ mi ní kpé nukún dó yě wú lɛ́ɛ ó; lo ɔ́, mi ní nyí kpɔ́ndéwú nú lɛ̌ngbɔ́ lɛ́ɛ.

⁴Énɛ́ ɔ́, hwenu e lɛ̌ngbɔ́nyitɔ́ lɛ́ɛ sín gǎn ná ɖe éɖée xlɛ́ ɔ́, mi ná yí axɔ́súgbákún susunɔ e ma ná cá gbeɖé ǎ é.

⁵ Mɔ̌ ɖokpó ɔ́, mi mɛwínnyáwínnyá lɛ́ɛ mi, mi ɖó ná nɔ́ hwíhwɛ́ miɖée dó mɛ e nyí mɛxó nú mi lɛ́ɛ glɔ́; mi bǐ ní nɔ sɔ́ miɖée hwe, bó ná nɔ wa azɔ̌ nú miɖée, ɖó Mawuxówéma ɔ́ ɖɔ: “Mawu nɔ ɖe kɔ dó goyítɔ́ lɛ́ɛ; lo ɔ́, é nɔ nyɔ́ xomɛ dó mɛ e nɔ sɔ́ yěɖée hwe lɛ́ɛ wú.”

⁶ Hǔn mi bo hwíhwɛ́ miɖée dó Mawu sín alɔ hlɔ̌nhlɔ́nnɔ ɔ́ glɔ́, bónú é ná sɔ́ mi su hwenu e é ɖó dó é.

⁷Mi zlɔ́n nǔ e ɖo linkpɔ́n nyí nú mi wɛ lɛ́ɛ bǐ sín agban ɖó jǐ tɔn, ɖó é ɖo nukún kpé dó mi wú wɛ.

⁸Ayixa mitɔn ní ɖo te; mi cɔ́ miɖée, ɖó kɛntɔ́ mitɔn awǒvi ɔ́ ɖo lɛ̌ lɛ́ dó mi wɛ kinnikínní e ɖo adǎn jí é ɖɔhun, bó ɖo mɛ e é ná vún ɖu ɔ́ ba wɛ.

⁹Mi lí dǒ ɖo nǔɖiɖi mɛ, bó syɛ́nlǐn ɖo awǒvi nukɔn, ɖó mi tunwun ɖɔ nɔví mitɔn e gba kpé gbɛ ɔ́ bǐ mɛ lɛ́ɛ ɔ́, wǔvɛ́ ɖokpó ɔ́ mɔ wɛ yě lɔmɔ̌ ɖe.

¹⁰Lo ɔ́, ényí mi ji ya nú hwenu kpɛɖé gúdo ɔ́, Mawu fɛ́nú bǐ nɔ e ylɔ́ mi nú mi ná ɖó mǐmá ɖo susu tɔn mavɔ mavɔ ɔ́ mɛ, ɖo bǔ e mi ɖe xá Klísu ɔ́ mɛ ɔ́, é ɖésúnɔ ná wa azɔ̌ ɖo mi wú, bɔ mi ná nyɔ́ yí fó; é ná bló bɔ mi ná syɛ́nlǐn; é ná ná hlɔ̌nhlɔ́n mi; é ná dó mi do nyi dodó syɛ́nsyɛ́n lɛ́ɛ jí.

¹¹Hlɔ̌nhlɔ́n ní nyí étɔn káká sɔ́yi! Amǐ.

¹² Silási e un nɔ mɔ dó mɔ nɔví gbejínɔtɔ́ ɔ́ wɛ dó alɔ mì bɔ un wlán wěma kpɛví élɔ́ sɛ́ dó mi, bó dó ná akɔ́nkpinkpan mi, bó ná dó ná gǎnjɛwú mi ɖɔ fɛ́nú Mawu tɔn titewungbe ɔ́ nɛ́. Mi bo syɛ́nlǐn ɖ'é mɛ.

¹³ Agun e ɖo Babilɔ́nu bɔ Mawu cyán lě e é cyán mi lɔmɔ̌ gbɔn ɔ́ dó gbe sɛ́ dó mi; vǐ ce Maki lɔmɔ̌ dó gbe sɛ́ dó mi.

¹⁴Mi kí wǎn yí nú nɔví sín si nú miɖée, bó dó dó gbe miɖée ná. Fífá ní nɔ kpɔ́ xá mi mɛ e nyí Klísu tɔn lɛ́ɛ é bǐ.