Read fon 1 Jǎan 2 Bible Online

1 Jǎan 2 - fon bible

1 Jǎan 2

¹Vǐ ce lɛ́ɛ mi, un ɖo nǔ énɛ́ lɛ́ɛ wlán sɛ́ dó mi wɛ, bónú mi ma hu hwɛ ó. Ényí mɛɖé ka hu hwɛ ɔ́, mǐ ɖǒ ɖɛ̌mɛnu ɖokpó ɖo Tɔ́ ɔ́ gɔ́n; é wɛ nyí Jezu Klísu hwɛjijɔnɔ ɔ́.

²É wɛ sɔ́ éɖée dó sá vɔ̌ ná, bónú Mawu ná sɔ́ hwɛ mǐtɔn lɛ́ɛ kɛ mǐ. É ká nyí hwɛ mǐdɛɛ lɛ́ɛ tɔn kɛ́ɖɛ́ wɛ Mawu ná sɔ́ kɛ mǐ ǎ; é ná lɛ́ sɔ́ gbɛtɔ́ bǐ sín hwɛ kɛ yě.

³Ényí mǐ nɔ nyi sɛ́n tɔn lɛ́ɛ ɔ́, mǐ hɛn ɔ́, mǐ nǎ ɖeji ɖɔ mǐ tunwun i.

⁴Nú mɛɖé ɖɔ: “Un tunwun i”, bó ka gbɛ́ sɛ́n tɔn lɛ́ɛ nyi hǔn, adingbannɔ wɛ nyí mɛ énɛ́, bɔ nǔgbó ɔ́ ɖo mɛ énɛ́ mɛ ǎ.

⁵Amɔ̌, mɛ e nɔ se tónú nú xó tɔn ɔ́, mɛ énɛ́ ɖó wǎn yíyí titewungbe bɔ nǔ bǐ vɔ ɖ'é wú. Lě e mǐ hɛn ɔ́, mǐ nǎ tunwun ɖɔ mǐ ɖo bǔ xá Jezu Klísu gbɔn ɔ́ ɖíe:

⁶mɛ e ɖɔ émí ɖo bǔ xá ɛ ɔ́ ɖó ná zán gbɛ tɔn lě e é ɖésúnɔ zán gbɛ tɔn gbɔn é.

⁷ Mɛvívɛ́ná ce lɛ́ɛ mi, sɛ́n yɔ̌yɔ́ ɖěvo wlán sɛ́ dó mi wɛ un ɖe ǎ; sɛ́n xóxó e mi ko ɖó sín hwenu e mi ɖi nǔ nú Klísu é wɛ. Sɛ́n xóxó énɛ́ ɔ́, xó e mi ko se é wɛ.

⁸É ka ɖo mɔ̌ có, sɛ́n yɔ̌yɔ́ wɛ é nyí, bɔ un ɖo wlǎnwlán sɛ́ dó mi wɛ, bɔ nǔgbó sɛ́n énɛ́ tɔn ɖe éɖée xlɛ́ gbɔn Klísu mɛ, bó ɖe éɖée xlɛ́ ɖo mǐ lɔmɔ̌ mɛ, ɖó zǐnflú ɔ́ ko ɖo yiyi wɛ, bɔ wěziza titewungbe ɔ́ ko ɖo hǐnhɔ́n wɛ.

⁹Mɛ e ɖɔ émí ɖo gbɛ zán wɛ ɖo wěziza mɛ, bó ka gbɛ́ wǎn nú nɔví tɔn ɔ́ kpo ɖo gbɛ zán wɛ ɖo zǐnflú mɛ.

¹⁰Mɛ e yí wǎn nú nɔví tɔn ɔ́ nɔ́ nɔ wěziza mɛ; énɛ́ ɔ́, nǔ ɖěbǔ ɖo wǔ tɔn bó ná dɔn mɛ ɖěvo dó hwɛ mɛ ǎ.

¹¹Mɛ e ka gbɛ́ wǎn nú nɔví tɔn ɔ́ ɖo zǐnflú mɛ; é ɖo zɔnlin ɖi wɛ ɖo zǐnflú mɛ; é tunwun fí e é xwe ɔ́ ǎ, ɖó zǐnflú ɔ́ zɔ́n bɔ é ɖo nǔ mɔ wɛ ǎ.

¹²Vǐ ce lɛ́ɛ mi, un ɖo wěma wlán sɛ́ dó mi wɛ, ɖó Mawu sɔ́ hwɛ mitɔn lɛ́ɛ kɛ mi ɖo Jezu Klísu nyíkɔ mɛ.

¹³Vǐtɔ́ lɛ́ɛ mi, un ɖo wěma wlán sɛ́ dó mi wɛ, ɖó mi tunwun mɛ e ko tíin sín bǐbɛ́mɛ é. Mɛwínnyáwínnyá lɛ́ɛ mi, un ɖo wěma wlán sɛ́ dó mi wɛ, ɖó mi ko ɖu ɖo mɛ nyanya ɔ́ jí.

¹⁴Vǐ ce lɛ́ɛ mi, un ɖo wěma wlán sɛ́ dó mi wɛ, ɖó mi tunwun Tɔ́ ɔ́. Vǐtɔ́ lɛ́ɛ mi, un ɖo wěma wlán sɛ́ dó mi wɛ, ɖó mi tunwun mɛ e ko tíin sín bǐbɛ́mɛ é. Mɛwínnyáwínnyá lɛ́ɛ mi, un ɖo wěma wlán sɛ́ dó mi wɛ ɖó mi ɖó hlɔ̌nhlɔ́n; Mawuxó ɔ́ ɖo ayi mɛ nú mi, bɔ mi ɖu ɖo mɛ nyanya ɔ́ jí.

¹⁵Mi ma yí wǎn nú gbɛ ɔ́ ó; mi ma ka yí wǎn nú nǔ e nyí gbɛ ɔ́ tɔn lɛ́ɛ ɖěbǔ ó. Ényí mɛɖé yí wǎn nú gbɛ ɔ́ hǔn, é ɖó wǎn yíyí nú Tɔ́ ɔ́ ǎ.

¹⁶Đó nǔ e nyí gbɛ ɔ́ tɔn ɔ́ ɖě gosín Tɔ́ ɔ́ gɔ́n ǎ; gbɛtɔ́ sín jlǒ nyanya lɛ́ɛ, nukún ɖo mɛ gban mɛ, kpó goyíyí e dɔkun jijɛ nɔ zɔ́n mɛ é kpán ɖě gosín Tɔ́ ɔ́ gɔ́n ǎ; gbɛmɛ fí núwiwa lɛ́ɛ wɛ.

¹⁷Gbɛ élɔ́ ɔ́, wǐwá yi wɛ é ɖe, bɔ mɛ e nɔ bló jlǒ gbɛ élɔ́ tɔn lɛ́ɛ lɔ ɖo wǐwá yi wɛ; mɛ e nɔ bló jlǒ Mawu tɔn ɔ́ ka nɔ́ nɔ gbɛ káká sɔ́yi.

¹⁸Vǐ ce lɛ́ɛ mi, hwenu gǔdo gúdo tɔn mɛ ɖíe mǐ ɖe e; mi ka ko se ɖɔ kɛntɔ́ Klísu tɔn ɔ́ ɖó ná wá; amɔ̌ din ɔ́, Klísu sín kɛntɔ́ gěgé ko wá[1]. Énɛ́ ɔ́ wɛ zɔ́n bɔ mǐ tunwun ɖɔ hwenu gǔdo gúdo tɔn ɔ́ mɛ ɖíe mǐ ɖe e.

¹⁹Mɛ énɛ́ lɛ́ɛ gosín mǐ mɛ, ɖó yě nyí mɛ mǐtɔn ɖě ɖ'ayǐ ǎ; ɖó nú yě ko nyí mɛ mǐtɔn wɛ ɔ́, yě ná ko nɔ mǐ mɛ; yě ka gosín mǐ mɛ, bónú è nǎ mɔ nukúnnú jɛ mɛ céɖécéɖé ɖɔ yě ɖěbǔ kún ko nyí mɛ mǐtɔn ɖ'ayǐ ó.

²⁰Midɛɛ lɛ́ɛ ɔ́, Klísu kɔn Yɛsinsɛn dó mi jí; énɛ́ ɔ́ wɛ zɔ́n bɔ mi bǐ tunwun nǔgbó ɔ́.

²¹Hǔn, ényí mi dán nǔgbó ɔ́ wú wɛ un ɖo nǔ élɔ́ wlán sɛ́ dó mi wɛ ǎ. Mi tunwun nǔ e nyí nǔgbó ɔ́ é, bó ka lɛ́ tunwun ɖɔ nǔvú ɖěbǔ kún nɔ tɔ́n sín nǔgbó ɔ́ mɛ ó.

²²Mɛ̌ ka ɖo nǔvúɖótɔ́ ɔ́ nyí wɛ? Mɛ e ɖɔ Jezu kún nyí Klísu ɔ́ ó é wɛ; mɛ énɛ́ wɛ nyí Klísu sín Kɛntɔ́ ɔ́. É gbɛ́ Tɔ́ ɔ́ kpó Vǐ ɔ́ kpó.

²³Nǔgbó ɔ́, mɛ e gbɛ́ Vǐ ɔ́ é ɔ́ gbɛ́ Tɔ́ ɔ́. Mɛ e ka yí gbe ɖɔ Jezu nyí Mawu ví é ɔ́, mɛ énɛ́ ɖo kɔnɖókpɔ́ mɛ xá Mawu Tɔ́ ɔ́ lɔmɔ̌.

²⁴Mi hɛn xó e mi se sín hwenu e mi ɖi nǔ nú Klísu ɔ́ dó ayi mitɔn mɛ. Ényí xó e mi se sín hwenu e mi ɖi nǔ nú Klísu é ɖo ayi mitɔn mɛ ɔ́, mi lɔ ná ɖo vǐ ɔ́ kpó Tɔ́ ɔ́ kpó mɛ.

²⁵Nǔ e sín akpá Klísu ka dó nú mǐ ɔ́ wɛ nyí gbɛ mavɔ mavɔ.

²⁶Un ɖo nǔ énɛ́ lɛ́ɛ wlán sɛ́ dó mi wɛ, bó dó ɖo xó ɖɔ dó mɛ e nɔ ba ná flú mi lɛ́ɛ wú wɛ.

²⁷Midɛɛ lɛ́ɛ ɔ́, Yɛsinsɛn e Klísu kɔn dó mi jí ɔ́ ɖo mi jí; hǔn, é sɔ́ byɔ́ ɖɔ mɛɖé ní kplɔ́n nǔ mi ǎ. Lo ɔ́, ée Yɛsinsɛn énɛ́ nɔ kplɔ́n nǔ bǐ mi ɔ́, bɔ nǔ e é nɔ kplɔ́n mi lɛ́ɛ ka nyí nǔgbó, bó ma nyí nǔvú ǎ é ɔ́, mi bǐ ní se tónú nú kplɔ́n e é nɔ ná mi lɛ́ɛ, ɖo bǔ e mi ɖe xá Jezu ɔ́ mɛ.

²⁸Din ɔ́, vǐ ce lɛ́ɛ mi, mi nɔ bǔ xá Klísu, bónú hwenu e é ná ɖe éɖée xlɛ́ ɔ́, mǐ ná ɖó gǎnjɛwú kpíkpé; hwenu e é ná lɛ́ kɔ wá ɔ́, winnyá ní ma hu mǐ ɖo nukɔn tɔn ó.

²⁹Ée mi tunwun ɖɔ nǔ jlɔ́jlɔ́ wɛ Klísu nɔ wa ɔ́, mi bo tunwun ɖɔ mɛ ɖěbǔ e nɔ wa nǔ jlɔ́jlɔ́ ɔ́, Klísu tɔn wɛ mɛ énɛ́ nyí.