Read fon 1 Jǎan 4 Bible Online

1 Jǎan 4 - fon bible

1 Jǎan 4

¹Mɛvívɛ́ná ce lɛ́ɛ mi, mi ma nɔ ɖi nǔ nú mɛ e ɖɔ émí ɖó Yɛ Mawu tɔn lɛ́ɛ é bǐ ó, mi nɔ to dó yě kpɔ́n hwɛ̌, bó ná kpɔ́n ɖɔ Yɛ Mawu tɔn ɔ́ jɛ́n ɖo yě mɛ nǔgbó ají; ɖó gbeyíɖɔmawutɔn-nyíjɛtɔ́ gěgé ko gba kpé gbɛ ɔ́ mɛ din.

²Lě e mi ná tunwun mɛ e ɖó Yɛ Mawu tɔn lɛ́ɛ gbɔn ɔ́ ɖíe: mɛ ɖěbǔ ɖɔ Jezu Klísu zɔn agbaza mɛ bo wá hǔn, mɛ énɛ́ ɖó Yɛ Mawu tɔn.

³Mɛ ɖěbǔ ma ka yí gbe ɖɔ Jezu Klísu zɔn agbaza mɛ wá ǎ hǔn, mɛ énɛ́ ɖó Yɛ Mawu tɔn ǎ; Kɛntɔ́ Mawu tɔn ɔ́ sín yɛ wɛ é ɖó. Mi ko se ɖɔ yɛ énɛ́ ná wá, bɔ é ka ko ɖo gbɛ ɔ́ mɛ din.

⁴Vǐ ce lɛ́ɛ mi, midɛɛ lɛ́ɛ ɔ́, Mawu tɔn wɛ mi nyí, bó ka ko ɖu ɖo gbeyíɖɔmawutɔn-nyíjɛtɔ́ lɛ́ɛ jí, ɖó Yɛ e ɖo midɛɛ lɛ́ɛ mɛ ɔ́ hú gǎn ée ɖo azɔ̌ wa wɛ ɖo mɛ e nyí gbɛ ɔ́ tɔn lɛ́ɛ mɛ é.

⁵Gbeyíɖɔmawutɔn-nyíjɛtɔ́ lɛ́ɛ ɔ́, gbɛ ɔ́ tɔn wɛ yě nyí, bó nɔ ɖɔ xó lě e mɛ e nyí gbɛ ɔ́ tɔn lɛ́ɛ nɔ ɖɔ xó gbɔn é, bɔ mɛ e nyí gbɛ ɔ́ tɔn lɛ́ɛ nɔ ɖótó yě.

⁶Amɔ̌, mǐdɛɛ lɛ́ɛ ɔ́, Mawu tɔn wɛ mǐ nyí, bɔ mɛ e tunwun Mawu ɔ́ nɔ ɖótó mǐ; mɛ e ma nyí Mawu tɔn ǎ ɔ́ nɔ ɖótó mǐ ǎ. Lě e mǐ nɔ sixú tunwun Yɛ nǔgbónɔ ɔ́, kpó yɛ adingbannɔ ɔ́ kpó gbɔn ɔ́ nɛ́.

⁷Mɛvívɛ́ná ce lɛ́ɛ mi, mi nú mǐ ná yí wǎn nú mǐɖée, ɖó wǎn yíyí ɔ́, Mawu gɔ́n wɛ é gosín. Mɛ ɖěbǔ ɖó wǎn yíyí nú mɛ hǔn, Mawu ví wɛ é nyí, bó tunwun Mawu.

⁸Mɛ e ma yí wǎn nú mɛ ǎ ɔ́ tunwun Mawu ǎ, ɖó Mawu ɔ́, wǎn yíyí wɛ é nyí.

⁹Lě e Mawu ɖe wǎn yíyí e é ɖó nú mǐ ɔ́ xlɛ́ mǐ gbɔn ɔ́ ɖíe: é sɛ́ vǐɖokpónɔ tɔn dó gbɛ ɔ́ mɛ, bónú mǐ ná nɔ gbɛ gbɔn jǐ tɔn.

¹⁰Wǎn yíyí énɛ́ ɔ́, nǔ e ɖ'é mɛ é ɖíe: ényí mǐdɛɛ lɛ́ɛ wɛ yí wǎn nú Mawu jɛ nukɔn ǎ; éyɛ́ wɛ yí wǎn nú mǐ jɛ nukɔn, bó sɛ́ vǐ tɔn dó, bɔ é sɔ́ éɖée dó sá vɔ̌, bónú Mawu ná sɔ́ hwɛ mǐtɔn lɛ́ɛ kɛ mǐ.

¹¹Mɛvívɛ́ná ce lɛ́ɛ mi, ée Mawu yí wǎn nú mǐ gbɔn mɔ̌ ɔ́, mǐ lɔ ɖó ná yí wǎn nú mǐɖée.

¹² Mɛ ɖé mɔ Mawu kpɔ́n gbeɖé ǎ; ényí mǐ yí wǎn nú mǐɖée ɔ́, Mawu ɖo ayi mǐtɔn mɛ, bɔ wǎn yíyí tɔn sɔgbe ɖo mǐ mɛ bɔ nǔ bǐ vɔ ɖ'é wú.

¹³Yɛsinsɛn é ɖésúnɔ tɔn e é ná mǐ ɔ́ wú wɛ mǐ tunwun ɖɔ mǐ ɖo éyɛ́ mɛ, bɔ éyɛ́ ɖo mǐ mɛ.

¹⁴Mǐdɛɛ lɛ́ɛ ɔ́, mǐ mɔ bó ɖe kúnnu ná ɖɔ Tɔ́ ɔ́ sɛ́ Vǐ tɔn dó, bɔ é nyí Mɛhwlɛ́ngántɔ́ gbɛ ɔ́ tɔn.

¹⁵Mɛ e ɖɔ Jezu nyí Mawu ví ɔ́, Mawu ɖo mɛ énɛ́ mɛ, bɔ mɛ ɔ́ lɔ ɖo Mawu mɛ.

¹⁶Mǐdɛɛ lɛ́ɛ ɔ́, mǐ tunwun wǎn yíyí e Mawu ɖó nú mǐ ɔ́, bó ɖi nǔ ná. Mawu ɔ́, wǎn yíyí wɛ é nyí; mɛ e ɖo wǎn yíyí mɛ ɔ́, mɛ ɔ́ ɖo Mawu mɛ, bɔ Mawu ɖo élɔ́ mɛ.

¹⁷Ényí wǎn yíyí ɔ́ sɔgbe ɖo ayi mǐtɔn mɛ bɔ nǔ bǐ vɔ ɖ'é wú ɔ́, mǐ ná ɖó gǎnjɛwú kpíkpé ɖo hwɛɖɔzán gbe, ɖó gbɛ e mǐ zán ɖo gbɛ élɔ́ mɛ ɔ́ cí Klísu tɔn ɖɔhun.

¹⁸Xɛsi ɖo wǎn yíyí mɛ ǎ; wǎn yíyí e sɔgbe bɔ nǔ bǐ vɔ ɖ'é wú ɔ́ nɔ nya xɛsi tɔ́n. Tódɔnnúmɛ wɛ nɔ dɔn xɛsi wá; ɖó mɛ e ɖo xɛsi ɖi wɛ ɔ́, mɛ énɛ́ ɔ́ ɖó wǎn yíyí bɔ nǔ bǐ vɔ ɖ'é wú ǎ.

¹⁹Mǐdɛɛ lɛ́ɛ ɔ́, mǐ yí wǎn nú Mawu, ɖó é wɛ yí wǎn nú mǐ jɛ nukɔn.

²⁰Ényí mɛɖé ka ɖɔ émí yí wǎn nú Mawu, bó ka gbɛ́ wǎn nú nɔví tɔn hǔn, adingbannɔ wɛ é nyí; ɖó mɛ e ma yí wǎn nú nɔví tɔn e mɔ wɛ é ɖe ɔ́ ǎ ɔ́, nɛ̌ é ka na sixú yí wǎn nú Mawu e mɔ wɛ é ma ɖe ǎ é gbɔn?

²¹Hǔn sɛ́n e Mawu ná mǐ ɔ́ ɖíe: mɛ e yí wǎn nú Mawu ɔ́ ɖó ná yí wǎn nú nɔví tɔn lɔmɔ̌.