Read fon Hwɛɖɔtɔ́ 1 Bible Online

Hwɛɖɔtɔ́ 1 - fon bible

Hwɛɖɔtɔ́ 1

¹Ée Jozuwée kú gúdo ɔ́, Izlayɛ́li ví lɛ́ɛ kan nǔ byɔ́ Mawu Mavɔmavɔ bɔ é ná ɖɔ akɔta e ɖó na yi tɔ́n ahwan Kanáanu lɛ́ɛ jɛ nukɔn ɖo akɔta yětɔn lɛ́ɛ mɛ ɔ́ nú yě.

²Mawu Mavɔmavɔ ka yí gbe nú yě ɖɔ: “Súnnu e ɖo Judáa sín akɔta mɛ lɛ́ɛ wɛ ná jɛ nukɔn; un ko jó to ɔ́ nú yě.”

³Énɛ́ ɔ́, súnnu e ɖo Judáa sín akɔta mɛ lɛ́ɛ ɖɔ nú akɔta Sinmɛnyɔ́ɔ tɔn nɔví yětɔn lɛ́ɛ ɖɔ: “Mi xwedó mǐ, nú mǐ na yi fun ahwan bó ná yí to e Mawu Mavɔmavɔ má nú mǐ é. Mǐ ní zɔn kpɔ́ bó tɔ́n ahwan Kanáanu lɛ́ɛ. Énɛ́ ɔ́ gúdo ɔ́, mǐ ná yi fun ahwan bó yí to mitɔn xá mi.” Bɔ akɔta Sinmɛnyɔ́ɔ tɔn ɔ́ sín mɛ lɛ́ɛ yi gɔ́ nú akɔta Judáa tɔn sín mɛ lɛ́ɛ,

⁴bɔ yě yi tɔ́n ahwan Kanáanu lɛ́ɛ. Mawu Mavɔmavɔ ka jó Kanáanu lɛ́ɛ kpó Pɛliziti lɛ́ɛ kpó nú yě, bɔ yě hu gbɛtɔ́ děgba we afɔwó (10.000) ɖo Bɛzɛ́ki.

⁵Nǔgbó ɔ́, yě mɔ axɔ́sú Adoni-Bɛzeki ɖo toxo énɛ́ ɔ́ mɛ; yě tɔ́n ahwan ɛ bó ɖu ɖo Kanáanu lɛ́ɛ kpó Pɛliziti lɛ́ɛ kpó jí.

⁶Axɔ́sú ɔ́ hɔn bɔ yě jɛ gǔdo tɔn, bó wlí i lobo sɛ́n alɔsú tɔn lɛ́ɛ kpó afɔsú tɔn lɛ́ɛ kpó.

⁷Énɛ́ ɔ́, Adoni-Bɛzeki ɖɔ: “Nú un ɖo nǔ ɖu wɛ ɔ́, axɔ́sú e è sɛ́n alɔsú kpó afɔsú kpó ná lɛ́ɛ kanɖé gban (70) wɛ nɔ cyán nǔɖuɖu e nɔ hlɛ́n kɔn nyi ayǐ lɛ́ɛ ɖu. Nǔ e un nɔ wa ɔ́ sín axɔ́ wɛ Mawu sú mì.” È kplá Adoni-Bɛzeki yi Jeluzalɛ́mu, bɔ é kú ɖo fínɛ́.

⁸Súnnu e ɖo Judáa sín akɔta mɛ lɛ́ɛ tɔ́n ahwan Jeluzalɛ́munu lɛ́ɛ bó yí toxo ɔ́. Yě hu mɛ e ɖo toxo ɔ́ mɛ lɛ́ɛ bó dó toxo ɔ́ zo.

⁹Énɛ́ ɔ́ gúdo ɔ́, yě yi tɔ́n ahwan Kanáanu e ɖo sókan mɛ lɛ́ɛ kpó éé ɖo tofɔligbé lɛ́ɛ kpó, kpódó éé ɖo ayǐkúngban wɛnjɛ jí lɛ́ɛ kpán.

¹⁰Yě tɔ́n ahwan Kanáanu e ɖo Eblɔ́n lɛ́ɛ, bó ɖu ɖo hɛ̌nnu Cecáyi tɔn, Aximani tɔn kpódó Talumayi tɔn kpán jí. Đ'ayǐ xóxó ɔ́, Eblɔ́n ɔ́, Kiliyati-Aaba wɛ é nɔ́ nyí.

¹¹Yě gosín fínɛ́ bó yi tɔ́n ahwan Devíinu lɛ́ɛ; ɖ'ayǐ xóxó ɔ́, Devíi ɔ́, Kiliyati-Sefɛ́ɛ wɛ é nɔ́ nyí.

¹²Kalɛ́bu ɖɔ émí ná sɔ́ vǐ émítɔn Akisa da nú mɛ e ná tɔ́n ahwan Kiliyati-Sefɛ́ɛ toxo ɔ́, bó ná yí é.

¹³Ɔtiniyɛ́li Kenázi ví e nyí Kalɛ́bu sín nɔví kpɛví ɔ́ yí toxo ɔ́ bɔ Kalɛ́bu sɔ́ vǐ tɔn da n'i.

¹⁴Ée Akisa wá ɔ́, é ɖɔ nú Ɔtiniyɛ́li ɖɔ é ní byɔ́ gle ɖokpó tɔ́ émítɔn. Énɛ́ ɔ́ gúdo ɔ́, Akisa jɛ te sín tócí tɔn jí bɔ tɔ́ tɔn kan nǔ e jló e ɔ́ byɔ́ ɛ.

¹⁵Bɔ é yí gbe n'i ɖɔ: “Kɛnklɛ́n ná fí e sin ɖe lɛ́ɛ mì, ɖó ayǐkúngban e a nǎ mì ɖo tofɔligbé ɔ́, axéko wɛ.” Bɔ Kalɛ́bu ná ɛ fí e sin ɖe ɖo só jí lɛ́ɛ kpó fí e sin ɖe ɖo dodomɛ lɛ́ɛ kpó.

¹⁶Asitɔ́ Mɔyízi tɔn Keni sín vǐ lɛ́ɛ gosín Jeliko, děkan toxo ɔ́ mɛ kpó Judáa sín súnnu lɛ́ɛ kpó, lobo yi jɛ agban ɖó ayǐkúngban Judáa tɔn ɔ́ sín afɔligbé ɖo Aladi sín afɔligbé. Yě yi nɔ Amalɛ́ki togun ɔ́ tɛ́ntin.

¹⁷Súnnu e ɖo Judáa sín akɔta mɛ lɛ́ɛ kpó akɔta Sinmɛnyɔ́ɔ tɔn nɔví yětɔn lɛ́ɛ kpó yi tɔ́n ahwan Kanáanu e ɖo Sefáti lɛ́ɛ, bó ɖu ɖo yě jí; yě gba toxo énɛ́ ɔ́ bǐ sésé; énɛ́ ɔ́ wú wɛ è sun nyǐ toxo énɛ́ ɔ́ ɖɔ Hɔ́ɔma; tínmɛ tɔn wɛ nyí “Nǔ gbigba.”

¹⁸Énɛ́ ɔ́ gúdo ɔ́, Judáa sín mɛ lɛ́ɛ yí Gaza toxo ɔ́ kpó Acikelɔ́ni toxo ɔ́ kpó, kpódó Eklɔ́ni toxo ɔ́ kpán; bó yí ayǐkúngban e lɛ́dó toxo atɔn énɛ́ lɛ́ɛ lɔmɔ̌.

¹⁹Mawu Mavɔmavɔ ɖésú ɖo kpɔ́ xá yě bɔ yě fun ahwan bó yí ayǐkúngban e ɖo sókan mɛ é. Nǔ ɖo mɔ̌ có, yě kpé wú bó nya mɛ e ɖo ayǐkúngban wɛnjɛ jí lɛ́ɛ ǎ, ɖó yědɛɛ lɛ́ɛ ɖó ahwankɛkɛ́ví gannɔ lɛ́ɛ.

²⁰È nǎ Eblɔ́n toxo ɔ́ Kalɛ́bu, lě e Mɔyízi ko ɖɔ gbɔn é; bɔ é nya Anáki sín hɛ̌nnu atɔn e ɖo toxo ɔ́ mɛ lɛ́ɛ.

²¹ Bɛnjamɛ́ɛ sín vǐ lɛ́ɛ kpé wú bó nya Jebuzinu e nɔ nɔ Jeluzalɛ́mu lɛ́ɛ ǎ; bɔ yě lɛ́ kpo ɖo Jeluzalɛ́mu fínɛ́ din kpó Bɛnjamɛ́ɛ ví lɛ́ɛ kpó.

²²Xwédo Jozɛ́fu tɔn ɔ́ lɔmɔ̌ tɔ́n ahwan mɛ e ɖo Betɛ́li lɛ́ɛ, bɔ Mawu Mavɔmavɔ nɔ kpɔ́ xá Jozɛ́fu xwédo ɔ́.

²³Yě sɛ́ mɛ dó bɔ yě to yi kpɔ́n lě e toxo ɔ́ ɖe ɔ́. Lǔzi wɛ toxo énɛ́ ɔ́ nyí ɖ'ayǐ.

²⁴Mɛ e è sɛ́ dó lɛ́ɛ mɔ nya ɖé ɖo toxo ɔ́ mɛ tɔ́n sín wɛ, bó ɖɔ n'i ɖɔ: “Xlɛ́ fí e mǐ ná gbɔn byɔ́ toxo ɔ́ mɛ ɔ́ mǐ, énɛ́ ɔ́, mǐ ná wa ɖagbe nú we.”

²⁵Nya ɔ́ ka xlɛ́ fí e yě ná sixú gbɔn ɔ́ yě, bɔ yě byɔ́ toxo ɔ́ mɛ bó hu mɛ e ɖ'é mɛ lɛ́ɛ; amɔ̌, yě jǒ nya e xlɛ́ ali yě ɔ́ kpó xwédo tɔn lɛ́ɛ bǐ kpó dó.

²⁶Nya ɔ́ ka yi Hitíti lɛ́ɛ sín to mɛ; é ɖó toxo ɖaxó ɖokpó ayǐ bó sun nyǐ toxo ɔ́ ɖɔ Lǔzi, bɔ nyǐkɔ énɛ́ ɔ́ ɖo te káká jɛ din.

²⁷ Manasée sín mɛ lɛ́ɛ kpé wú bó nya mɛ e ɖo Bɛti-Ceani lɛ́ɛ ǎ, yě ká kpé wú bó nya Tanakinu lɛ́ɛ, Dɔ́ɔnu lɛ́ɛ, Yivleámunu lɛ́ɛ kpó Mɛgidonu lɛ́ɛ kpó ǎ; yě ká kpé wú bó nya mɛ e ɖo toxo e ɖo to énɛ́ lɛ́ɛ kpá lɛ́ɛ mɛ lɛ́ɛ ǎ; bɔ Kanáanu lɛ́ɛ kpo ɖo gbě énɛ́ ɔ́ jí.

²⁸Hwenu e Izlayɛ́li ví lɛ́ɛ wá ɖó hlɔ̌nhlɔ́n d'é jí ɖésú lɔ ɔ́, yě tlɛ kpé wú bó nya Kanáanu lɛ́ɛ ǎ, amɔ̌, yě ɖǒ azɔ̌ ɖé lɛ́ɛ kɔ jí nú yě.

²⁹ Eflayímu sín mɛ lɛ́ɛ kpé wú bó nya Kanáanu e nɔ nɔ Gɛzɛ́ɛ lɛ́ɛ ǎ; bɔ Kanáanu lɛ́ɛ nɔ tɛ́ntin yětɔn.

³⁰Zabulɔ́ɔn sín mɛ lɛ́ɛ kpé wú bó nya Kanáanu e ɖo Kitlɔ́ni kpó éé ɖo Naxalɔlu lɛ́ɛ kpó ǎ; yě nɔ Zabulɔ́ɔn sín akɔta tɛ́ntin; amɔ̌, yě ɖǒ azɔ̌ ɖé lɛ́ɛ kɔ jí nú yě.

³¹Acɛ́ɛ sín mɛ lɛ́ɛ kpé wú bó nya Akonu lɛ́ɛ, Sidɔ́ɔnnu lɛ́ɛ, Axlavunu lɛ́ɛ kpó Akizívunu lɛ́ɛ kpó ǎ. Yě kpé wú bó nya Hɛlubanu lɛ́ɛ, Afíkinu lɛ́ɛ kpó Hlexɔ́vunu lɛ́ɛ kpó ǎ.

³²Énɛ́ ɔ́ wú wɛ yě gbɔ bó jɛ agban ɖó Kanáanu e ɖo to ɔ́ mɛ lɛ́ɛ tɛ́ntin.

³³Nɛfutali sín mɛ lɛ́ɛ kpé wú bó nya Kanáanu e ɖo Bɛti-Cɛmɛ́ci lɛ́ɛ kpó ée ɖo Bɛti-Anati lɛ́ɛ kpó ǎ; yě jɛ agban ɖó Kanáanu e ɖo to ɔ́ mɛ lɛ́ɛ tɛ́ntin lobo ká ɖó azɔ̌ ɖé lɛ́ɛ kɔ jí nú yě.

³⁴Amɔliti lɛ́ɛ nya Dan sín vǐ lɛ́ɛ yi sókan mɛ bó lɔn nú yě ná jɛ te wá ayǐkúngban wɛnjɛ jí ǎ.

³⁵Amɔliti lɛ́ɛ lɛ́ kpo ɖo Haa-Hɛlɛ́si, Ayalɔ́ni kpó Caaluvímu kpó; lo ɔ́ ée é wá yá ɔ́, Jozɛ́fu sín vǐ lɛ́ɛ kpa acɛ nú yě bó ɖó azɔ̌ ɖé lɛ́ɛ kɔ jí nú yě.

³⁶Dogbó Amɔliti lɛ́ɛ tɔn e ɖo tofɔligbé ɔ́, kplá dó ayǐkúngban Edɔ́munu lɛ́ɛ tɔn, bó gbɔn Aklabímu só ɔ́ sín zǎnzǎnhwe jí.