Read fon Hwɛɖɔtɔ́ 10 Bible Online

Hwɛɖɔtɔ́ 10 - fon bible

Hwɛɖɔtɔ́ 10

¹Ée Abimɛlɛ́ki kú gúdo ɔ́, Tola e nyǐ Púwa vǐ, bó nyí Dódo sín vǐvú ɔ́, wá hwlɛ́n togun Izlayɛ́li tɔn ɔ́. Isakáa sín akɔta mɛ wɛ é jɔ ɖe; Camíi wɛ é nɔ́ nɔ ɖo Eflayímu sókan mɛ.

²É ɖu gǎn ɖo Izlayɛ́li xɔ xwe ko-nukún-atɔn; énɛ́ ɔ́ gúdo ɔ́, é kú, bɔ è ɖi i ɖó Camíi.

³Yayíi Galadinu ɔ́ jɛ tɛn tɔn mɛ bó ɖu gǎn ɖo Izlayɛ́li xɔ xwe ko-nukún-we.

⁴Vǐ súnnu gban (30) wɛ é ɖó, bɔ yě nɔ́ xá tócí gban (30) jí lobo ɖó gletoxo gban (30) ɖo Galadi yíkúngban jí. Káká jɛ din ɔ́, è nɔ lɛ́ ylɔ́ toxo énɛ́ lɛ́ɛ ɖɔ gletoxo Yayíi tɔn.

⁵Ée Yayíi wá kú ɔ́, è ɖi i ɖó Kamɔ́ni.

⁶Izlayɛ́li ví lɛ́ɛ lɛ́ wa nǔ e ma nyɔ́ Mawu Mavɔmavɔ nukún mɛ ǎ é: Yě sɛn vodún Baalu lɛ́ɛ kpó Asitaatée lɛ́ɛ kpó; yě sɛn vodún Silíi tɔn lɛ́ɛ, Sidɔ́ɔnnu lɛ́ɛ tɔn lɛ́ɛ, Mɔwabunu lɛ́ɛ tɔn lɛ́ɛ, Amumɔ́ɔ ví lɛ́ɛ tɔn lɛ́ɛ kpó Filisitɛ́ɛn lɛ́ɛ tɔn lɛ́ɛ kpo. Yě jó Mawu Mavɔmavɔ dó bó sɔ́ nɔ sɛn ɛ ǎ.

⁷Énɛ́ ɔ́, Mawu Mavɔmavɔ sin xomɛ dó Izlayɛ́li ví lɛ́ɛ bó jó yě nú Filisitɛ́ɛn lɛ́ɛ kpó Amumɔ́ɔ ví lɛ́ɛ kpó.

⁸Bɛ́ sín hwenɛ́nu ɔ́, mɛ énɛ́ lɛ́ɛ kpa acɛ gannaganna nú Izlayɛ́li ví e nɔ nɔ Galadi, ɖo fí e Amɔliti lɛ́ɛ nɔ ɖ'ayǐ, ɖo Judɛ́ɛn tɔ ɔ́ sín zǎnzǎnhwe jí lɛ́ɛ; yě dó ya nú yě káká nú xwe afɔtɔn-nukún-atɔn.

⁹Amumɔ́ɔ ví lɛ́ɛ tlɛ́ dó asá Judɛ́ɛn tɔ ɔ́, bó yi fun ahwan xá akɔta Judáa tɔn ɔ́, Bɛnjamɛ́ɛ tɔn ɔ́, kpódó Eflayímu tɔn ɔ́ kpó. Bɔ Izlayɛ́li ví lɛ́ɛ jɛ lele ɖaxó ɖé mɛ.

¹⁰Énɛ́ ɔ́, yě sú xó ylɔ́ Mawu Mavɔmavɔ ɖɔ é ní wá gɔ́ alɔ nú émí; yě ɖɔ n'i ɖɔ: “Mǐ hu hwɛ dó we, ɖó mǐ jǒ hwi mɛ e nyí Mawu mǐtɔn ɔ́ dó, bó sɛn vodún Baalu lɛ́ɛ.”

¹¹Mawu Mavɔmavɔ ɖɔ nú yě ɖɔ: “Hwenu e Ejípunu lɛ́ɛ, Amumɔ́ɔ ví lɛ́ɛ, Amɔliti lɛ́ɛ, Filisitɛ́ɛn lɛ́ɛ,

¹²Sidɔ́ɔnnu lɛ́ɛ, Amalɛ́ki ví lɛ́ɛ kpó Mawɔ́ninu lɛ́ɛ kpó ɖo acɛ gannaganna kpa nú mi wɛ, bɔ mi sú xó ylɔ́ mì ɖɔ ma wá gɔ́ alɔ nú émí ɔ́, un hwlɛ́n mi sín alɔ yětɔn mɛ ǎ cé?

¹³Lo ɔ́, midɛɛ lɛ́ɛ ɔ́, mi jó nyɛ dó, bó sɛn vodún lɛ́ɛ. Énɛ́ ɔ́ wú wɛ un gbɛ́ ɖɔ un kún sɔ́ ná lɛ́ hwlɛ́n mi ɖě ó.

¹⁴Hǔn mi bó sú xó ylɔ́ vodún e mi kpɔ́n bó sɔ́ lɛ́ɛ, ɖɔ yě ní wá gɔ́ alɔ nú émí. Yědɛɛ lɛ́ɛ ní bó wá hwlɛ́n mi hwenu e mi ɖo lele mɛ din é bó.”

¹⁵Bɔ Izlayɛ́li ví lɛ́ɛ lɛ́ yí xó, bó ɖɔ: “Mawu Mavɔmavɔ, hwɛ wɛ mǐ hu. Wa nǔ xá mǐ lě e é jló we gbɔn ɔ́, amɔ̌, hwlɛ̌n mǐ gán égbé.”

¹⁶Énɛ́ ɔ́ gúdo ɔ́, yě bɛ̌ vodún lɛ́ɛ kɔn nyi gbě, bó lɛ́ jɛ Mawu Mavɔmavɔ sɛn jí. Bɔ ya e ji wɛ yě ɖe ɔ́ blá wǔ nú Mawu Mavɔmavɔ.

¹⁷Amumɔ́ɔ ví lɛ́ɛ sɛ́ yěɖée kplé, bó ɖó gɔnu ɖó Galadi yíkúngban jí, bɔ Izlayɛ́li ví lɛ́ɛ lɔmɔ̌ sɛ yěɖée kplé, bó ɖó gɔnu ɖó Misipa.

¹⁸Énɛ́ ɔ́, Izlayɛ́li ví e ɖo Galadi lɛ́ɛ kpó gǎn yětɔn lɛ́ɛ kpó nɔ ɖo ɖiɖɔ nú yěɖée wɛ ɖɔ: “Mɛ̌ wɛ ná jɛ nukɔn bó tɔ́n ahwan Amumɔ́ɔ ví lɛ́ɛ? Mɛ e ná jɛ nukɔn bó tɔ́n ahwan yě ɔ́ ná ɖu gǎn ɖo mɛ e ɖo Galadi lɛ́ɛ bǐ nu.”