Read fon Hwɛɖɔtɔ́ 11 Bible Online

Hwɛɖɔtɔ́ 11 - fon bible

Hwɛɖɔtɔ́ 11

¹Ahwanfuntɔ́ syɛ́nsyɛ́n ɖé ɖo Galadi, bɔ è nɔ ylɔ́ ɛ ɖɔ Jɛfutée; nyɔ̌nu agalɛtɔ́ ɖé sín vǐ wɛ bɔ tɔ́ tɔn nɔ́ nyí Galadi.

²Galadi sín asi tawun ɔ́ lɔ ji vǐ súnnu n'i. Ée vǐ lɛ́ɛ wá su ɔ́, yě nya Jɛfutée bó ɖɔ n'i ɖɔ: “A nǎ ɖu nǔ e tɔ́ mǐtɔn jó dó nú mǐ lɛ́ɛ ɖě sín gǔ ǎ, ɖó nyɔ̌nu ɖěvo sín vǐ wɛ a nyǐ.”

³Énɛ́ ɔ́, Jɛfutée hɔn bó nɔ zɔ nú nɔví tɔn lɛ́ɛ; é yi nɔ Tɔ́vu tomɛ. Gběvún ɖé lɛ́ɛ ká gɔ́ n'i bó xwédo e gbɔn fí e é gbɔn lɛ́ɛ.

⁴É wá su hwe ɖé nu bɔ Amumɔ́ɔ ví lɛ́ɛ tɔ́n ahwan Izlayɛ́li ví lɛ́ɛ.

⁵Ée Amumɔ́ɔ ví lɛ́ɛ ɖo ahwan fun wɛ mɔ̌ ɖo Izlayɛ́li ɔ́, tomɛxó Galadi tɔn lɛ́ɛ yi Jɛfutée gbé mɛ ɖo Tɔ́vu to mɛ.

⁶Yě yi ɖɔ n'i ɖɔ: “Wǎ nɔ ahwangɔnu mǐtɔn lɛ́ɛ nu, bónú mǐ ná sixú fun ahwan xá Amumɔ́ɔ ví lɛ́ɛ.”

⁷Jɛfutée ka ɖɔ nú yě ɖɔ: “Wǎn wɛ mi gbɛ́ nú mì, bó nya mì sín daá ce xwé ǎ cé? Din e adǎn ɖo mi gbo wɛ ɔ́, mi wá ɖo biba mì wɛ!”

⁸Tomɛxó lɛ́ɛ yí xó bó ɖɔ: “Hɔn wɛ mǐ hɔn wá su we din, bónú a nǎ wá fun ahwan xá Amumɔ́ɔ ví lɛ́ɛ xá mǐ, nú a nǎ nyǐ gǎn mǐtɔn, gǎn Galadinu lɛ́ɛ bǐ tɔn.”

⁹Énɛ́ ɔ́, Jɛfutée ɖɔ nú yě ɖɔ: “Ényí mi wá kplá mì, bɔ un yi fun ahwan xá Amumɔ́ɔ ví lɛ́ɛ, bɔ Mawu Mavɔmavɔ jó yě nú mi ɔ́, un ná nyí gǎn mitɔn.”

¹⁰Ée é ɖɔ mɔ̌ ɔ́, tomɛxó Galadi tɔn lɛ́ɛ ɖɔ n'i ɖɔ: “Mǐ dó akpá ɖɔ mǐ ná blǒ nǔ e a ɖɔ ɔ́; Mawu Mavɔmavɔ nyí kúnnuɖetɔ́ mǐtɔn.”

¹¹Énɛ́ ɔ́, Jɛfutée xwedó tomɛxó Galadi tɔn lɛ́ɛ yi; togun ɔ́ zé e gǎn, yě sɔ́ ɛ ɖó ahwangɔnu lɛ́ɛ nu. Bɔ é vɔ́ xó e é ɖɔ nú tomɛxó lɛ́ɛ ɔ́ ɖɔ ɖo Misipa, ɖo Mawu Mavɔmavɔ nukɔn.

¹²Jɛfutée sɛ́ mɛ dó axɔ́sú Amumɔ́ɔ ví lɛ́ɛ tɔn, nú è nǐ yi kanbyɔ́ ɛ ɖɔ: “Xó tɛ́ wɛ ɖo nyɛ kpó hwi kpó tɛ́ntin, bɔ a wǎ tɔ́n ahwan to ce?”

¹³Axɔ́sú Amumɔ́ɔ ví lɛ́ɛ tɔn ɔ́ ká yí gbe sɛ́ dó Jɛfutée ɖɔ: “Hwenu e Izlayɛ́li ví lɛ́ɛ gosín Ejípu ɔ́, yě yǐ to ce, sín Aanɔ́ni tɔdo mɛ káká yi tɔsisa Yabɔ́ku tɔn ɔ́ kɔn, bó lɛ́ yí Judɛ́ɛn tɔdo ɔ́. Hǔn, bo jó ayǐkúngban énɛ́ lɛ́ɛ dó nú mǐ kpó jlǒ towe kpó xwɛ́lɛ́ɛ́.”

¹⁴Jɛfutée lɛ́ sɛ́ mɛ dó axɔ́sú Amumɔ́ɔ ví lɛ́ɛ tɔn,

¹⁵bónú è nǐ yi ɖɔ n'i ɖɔ: “Izlayɛ́li ví lɛ́ɛ yí ayǐkúngban Mɔwabunu lɛ́ɛ tɔn ǎ, yě ká yí Amumɔ́ɔ ví lɛ́ɛ tɔn ǎ.

¹⁶Đó hwenu e yě gosín Ejípu ɔ́, yě gbɔn gbětótló mɛ káká yi Xu Vɔvɔ ɔ́ kɔn, bó yi Kadɛ́ci.

¹⁷ Ée yě jɛ fínɛ́ ɔ́, yě sɛ́ mɛ dó axɔ́sú Edɔ́mu tɔn ɔ́ bó byɔ́ ɛ gbe ɖɔ émí ná gbɔn ayǐkúngban tɔn jí dín. Lo ɔ́, axɔ́sú ɔ́ ná gbe tɔn yě ǎ. Izlayɛ́li ví lɛ́ɛ byɔ́ nǔ ɖokpó ɔ́ axɔ́sú Mɔwabu tɔn ɔ́, bɔ é lɔmɔ̌ gbɛ́. Bɔ yě gbɔ bó cí Kadɛ́ci.

¹⁸ Énɛ́ ɔ́ gúdo ɔ́, Izlayɛ́li ví lɛ́ɛ lɛ́ vɔ́ sɔ́ ali gbɔn gbětótló mɛ, bó kpa kɛ́n nú ayǐkúngban Edɔ́mu tɔn ɔ́ kpó Mɔwabu tɔn ɔ́ kpó, bó wá jɛ Mɔwabu sín zǎnzǎnhwe jí. Yě ɖǒ gɔnu ɖó tɔsisa Aanɔ́ni tɔn ɔ́ sín akpá ɖě ɔ́ xwé; yě ká yi ayǐkúngban Mɔwabu tɔn ɔ́ jí ǎ, ɖó Aanɔ́ni ɔ́ wɛ nyí Mɔwabu sín dogbó.

¹⁹ Ée yě jɛ fínɛ́ ɔ́, yě sɛ́ mɛ dó axɔ́sú Amɔliti tɔn Sihɔ́ni e ɖo axɔ́sú ɖu wɛ ɖo Hɛcibɔ́ni ɔ́ é, bó byɔ́ ɛ ɖɔ é ní ná gbe émí bónú émí ná dín gbɔn ayǐkúngban tɔn jí yi to e è nǎ émí ɔ́ mɛ.

²⁰Lo ɔ́, Sihɔ́ni ko ɖeji dó Izlayɛ́li ví lɛ́ɛ wú káká bó ná jó yě dó bɔ yě ná gbɔn ayǐkúngban tɔn jí ǎ; é sɛ ahwangɔnu tɔn lɛ́ɛ bǐ kplé bó sí ahwan te ɖo Yaxisa lobo tɔ́n ahwan Izlayɛ́li ví lɛ́ɛ.

²¹Mawu Mavɔmavɔ, Mawu Izlayɛ́li tɔn ɔ́ jó Sihɔ́ni kpó ahwangɔnu tɔn lɛ́ɛ kpó nú Izlayɛ́li ví lɛ́ɛ, bɔ yě ɖuɖéjí. Izlayɛ́li ví lɛ́ɛ yí ayǐkúngban e jí Amɔliti lɛ́ɛ ɖe ɔ́ bǐ,

²²bɛ́ sín Aanɔ́ni sín tɔdo mɛ káká wá yi tɔsisa Yabɔ́ku tɔn ɔ́ kɔn; bó bɛ́ sín gbětótló zǎnzǎnhwe jí tɔn ɔ́ kɔn káká yi Judɛ́ɛn tɔ ɔ́ kɔn.

²³Mawu Mavɔmavɔ, Mawu Izlayɛ́li tɔn ɔ́ wɛ wa nǔ bɔ mǐ togun tɔn ɔ́ kpé wú bó yí ayǐkúngban Amɔliti lɛ́ɛ tɔn, bɔ hwɛ ɔ́, a nǎ lɛ́ yí sín mǐ sí wɛ a?

²⁴Ayǐkúngban e vodún towe Kemɔci ná we ɔ́, ɖo así towe ǎ cé? Hǔn mǐ lɔmɔ̌ ɔ́, ayǐkúngban e Mawu Mavɔmavɔ wa nǔ bɔ mǐ kpé wú bó yí ɔ́, mǐ ɖó acɛ d'é nu.

²⁵ A vɛdó ɖɔ émí dó hlɔ̌nhlɔ́n hú Balaki, Sipɔ́ɔ ví axɔ́sú Mɔwabu tɔn ɔ́ wɛ sín a? Có éyɛ́ ba nǔɖɔ Izlayɛ́li ví lɛ́ɛ ǎ, é ká tɔ́n ahwan yě ǎ.

²⁶Sín xwe afɔɖé kanwe ko (300) ɖíe wɛ Izlayɛ́li ví lɛ́ɛ ɖo Hɛcibɔ́ni kpó Alowɛ́ɛ kpó, kpó toxo e yá fí énɛ́ lɛ́ɛ kpó, kpódó toxo ɖaxó ɖaxó e ɖo Aanɔ́ni tɔ ɔ́ tó lɛ́ɛ bǐ kpó; aniwú wɛ mi ma ka yí ayǐkúngban énɛ́ ɔ́ sín yě sí sín hwenɛ́nu ǎ?

²⁷Nyɛ ɔ́, un wa nǔɖé nyi do nú we ǎ; hwi wɛ tɔ́n ahwan mì, bó dó wa nǔ nyanya dó mì. Mawu Mavɔmavɔ Hwɛɖɔtɔ́ gbɛtɔ́ lɛ́ɛ tɔn ɔ́, ní gbo hwɛ ɔ́ nú Izlayɛ́li ví lɛ́ɛ kpó Amumɔ́ɔ ví lɛ́ɛ kpó égbé.”

²⁸Lo ɔ́, axɔ́sú Amumɔ́ɔ ví lɛ́ɛ tɔn ɔ́, ké ya nú xó e Jɛfutée ɖɔ ɔ́ ǎ.

²⁹Yɛ Mawu Mavɔmavɔ tɔn wá ta nú Jɛfutée. Bɔ Jɛfutée gbɔn Galadi gbé jí, bó gbɔn ayǐkúngban Manasée tɔn jí. Énɛ́ ɔ́ gúdo ɔ́, é yi Misipa ɖo Galadi, bó ná gbɔn Amumɔ́ɔ ví lɛ́ɛ sín ayǐkúngban jí.

³⁰É dó akpá élɔ́ nú Mawu Mavɔmavɔ ɖɔ: “Ényí a zě Amumɔ́ɔ ví lɛ́ɛ ɖó acɛ ce mɛ ɔ́,

³¹hwenu e un ná ɖu ɖo yě jí, bó ná lɛ́ kɔ jǎwe xwé ɔ́, nǔ funfún ɖo xo mɛ nukɔntɔn e ná tɔ́n sín xwé ce gbe, bó ná wá kpé mì ɔ́, un ná sɔ́ dó sá vɔ̌ e è nɔ dó zo ɔ́ nú we.”

³²Jɛfutée dó asá dogbó ɔ́, bó yí tɔ́n ahwan Amumɔ́ɔ ví lɛ́ɛ, bɔ Mawu Mavɔmavɔ jó yě n'i.

³³Jɛfutée ɖu ɖo yě jí tawun, bó yí toxo e ɖo Alowɛ́ɛ tɛ́ntin lɛ́ɛ, bó yí toxo e lɛ́ lɛ̌ dó Mɛniti kpó Avɛ́li-Kelamimu kpó lɛ́ɛ; toxo ko wɛ é yí; Amumɔ́ɔ ví lɛ́ɛ gbɔ bo jó ta nú Izlayɛ́li ví lɛ́ɛ.

³⁴Ée Jɛfutée lɛ́ kɔ wá xwé ɖo Misipa ɔ́, vǐ tɔn nyɔ̌nu ɔ́ wɛ tɔ́n bó wá kpé e, bɔ hǔn ɖo gbe jɛ wɛ bɔ é ɖo we ɖú wɛ. Vǐ ɖokpó géé e é ká ɖó ɔ́ nɛ́, é sɔ́ ɖó vǐ ɖěvo ǎ.

³⁵ Ée Jɛfutée mɔ ɛ lě tlóló ɔ́, é vún awu dó kɔ nú éɖée bó dó ɖe xlɛ́ ɖɔ ayi émítɔn gba dó, lobo ɖɔ: “Áo vǐ ce! A dǒ mì lele mɛ. A ɖo mɛ e ɖo ayixa gba dó nú mì wɛ lɛ́ɛ mɛ; un ko dó akpá nú Mawu Mavɔmavɔ hǔn, un ma ka sixú gɔn ɖiɖe nɛ́!”

³⁶Vǐ ɔ́ ka ɖɔ n'i ɖɔ: “Daá, ényí a ko dó akpá nú Mawu Mavɔmavɔ hǔn, wa nǔ xá mì lě e hwi ɖésúnɔ kó ɖɔ gbɔn sín nu towe mɛ é; ɖó Mawu Mavɔmavɔ wɛ bló din bɔ nǔ e kɛntɔ́ towe lɛ́ɛ wa xá we ɔ́, a ba hlɔn tɔn.

³⁷Lo ɔ́, un ɖo byɔ̌byɔ́ we wɛ ɖɔ a nǐ nɔ te kpɔ́n mì nú sun we; nyɛ kpó ɖyɔ̌vǐ hǎgbɛ́ ce lɛ́ɛ kpó ná yi sókan mɛ, bɔ mǐ ná yi ya avǐ, ɖó asú e un ma da cóbó ɖo nǎ kú wɛ ǎ ɔ́ wútu.”

³⁸Jɛfutée ka ná gbe e ɖɔ é ní bó yi nú sun we; bɔ é yi sókan mɛ é kpó ɖyɔ̌vǐ hǎgbɛ́ tɔn lɛ́ɛ kpó, bɔ yě ya avǐ ɖó asú e é má da ǎ é wútu.

³⁹Ée sun we lɛ́ɛ wá yi ɔ́, é lɛ́ kɔ yi tɔ́ tɔn gɔ́n, bɔ tɔ́ tɔn zé e dó ɖe akpá e é dó é; énɛ́ ɔ́, é ɖo alɔ jí bó kú. Bɛ́ sín hwenɛ́nu ɔ́, è ɖǒ walɔ énɛ́ ɔ́ ayǐ ɖo Izlayɛ́li.

⁴⁰Bɔ xwewú xwewú tɛgbɛ ɔ́, Izlayɛ́li nyɔ̌nu lɛ́ɛ nɔ́ yi ya avǐ xɔ azǎn ɛnɛ dó vǐ nyɔ̌nu Jɛfutée, Galadinu ɔ́ tɔn tamɛ.