Read fon Hwɛɖɔtɔ́ 12 Bible Online

Hwɛɖɔtɔ́ 12 - fon bible

Hwɛɖɔtɔ́ 12

¹Súnnu e jɔ ɖo akɔta Eflayímu tɔn mɛ lɛ́ɛ sɛ yěɖée kplé, bó dó asá Judɛ́ɛn tɔ ɔ́, bó yi Safɔ́ni. Yě ɖɔ nú Jɛfutée ɖɔ: “Étɛ́wú wɛ a xwe ahwan fun xá Amumɔ́ɔ ví lɛ́ɛ gbé bó má ká ylɔ́ mǐ bónú mǐ nǎ wá gɔ́ so nú we ǎ? Mǐ ná dó xwé towe zo, bó ná fyɔ́ hwi kpó xwé ɔ́ kpó.”

²Jɛfutée ka yí gbe nú yě ɖɔ: “Nyɛ kpó togun ce kpó ɔ́, mǐ li za ɖésú xá Amumɔ́ɔ ví lɛ́ɛ. Un sɛ́ wɛn dó mi; lo ɔ́, mi wá hwlɛ́n mì sín yě sí ǎ.

³Ée un mɔ ɖɔ mi kún ɖo wǐwá wɛ ó ɔ́, un gbɔ bo sɔ́ ta mɛ nyi gbě bó yi tɔ́n ahwan Amumɔ́ɔ ví lɛ́ɛ, lobɔ Mawu Mavɔmavɔ ka jó yě nú mì. Bɔ aniwú wɛ mi wá ɖo ahwan ná fun xá mì wɛ lo?”

⁴Jɛfutée kplé súnnu e ɖo Galadi gbé jí lɛ́ɛ bǐ, bó tɔ́n ahwan Eflayímu ví lɛ́ɛ, bó ɖu ɖo yě jí. Eflayímu ví lɛ́ɛ wɛ ko ɖɔ ɖ'ayǐ ɖɔ: “Mi mɛ e ɖo Galadi gbé jí lɛ́ɛ ɔ́, gbějɛtɔ́ akɔta Eflayímu tɔn lɛ́ɛ jɛ́n mi nyí; mi gosín akɔta Eflayímu tɔn ɔ́ mɛ, bó wá yi akɔta Manasée tɔn ɔ́ mɛ.”

⁵Énɛ́ ɔ́ gúdo ɔ́, Galadi sín mɛ lɛ́ɛ yi cí fí e è nɔ dó asá Judɛ́ɛn tɔ ɔ́ ɖe ɔ́, bó ná gbo ali nú Eflayímu ví lɛ́ɛ. Mɛ e ɖo hinhɔn wɛ lɛ́ɛ ɖě gbɔn fínɛ́ dín hweɖěbǔnu ɔ́, è nɔ kanbyɔ́ ɛ ɖɔ: “Eflayímu sín mɛ wɛ a nyǐ a?” Ényí é ɖɔ: “Éeǒ” ɔ́,

⁶è nɔ ɖɔ n'i ɖɔ é ní ɖɔ: “Cibolé”. Bɔ mɛ ɔ́ nɔ ɖɔ: “Sibolé”, ɖó é nɔ sixú ɖɔ xógbe ɔ́ ganjí ǎ. Énɛ́ ɔ́, è nɔ wlí i bó nɔ hu i ɖo fí e è nɔ dó asá Judɛ́ɛn tɔ ɔ́ ɖe ɔ́ kpá. Hwenɛ́nu ɔ́, Eflayímu sín mɛ adɔ̌kpo we afɔwó (42.000) wɛ kú.

⁷Jɛfutée, Galadinu ɔ́ ɖu gǎn ɖo Izlayɛ́li xɔ xwe ayizɛ́n; énɛ́ ɔ́ gúdo ɔ́, é kú bɔ è ɖi i ɖó Misipa, toxo tɔn mɛ ɖo Galadi.

⁸Ée Jɛfutée kú gúdo ɔ́, Ibusáni Bɛteleyɛ́munu ɔ́ wɛ húzú gǎn ɖo Izlayɛ́li.

⁹Vǐ súnnu gban (30) wɛ é ɖó, bó ɖó vǐ nyɔ̌nu gban (30). É fɔ vǐ nyɔ̌nu tɔn lɛ́ɛ ná asú dó akɔta ɖěvo lɛ́ɛ mɛ, bó da asi nú vǐ tɔn lɛ́ɛ ɖo akɔta ɖěvo lɛ́ɛ mɛ. É nɔ togun Izlayɛ́li tɔn ɔ́ nu xɔ xwe tɛ́nwe.

¹⁰Énɛ́ ɔ́ gúdo ɔ́, é kú bɔ è ɖi i ɖó Bɛteleyɛ́mu.

¹¹Ée Ibusáni kú gúdo ɔ́, Elɔ́ni e ɖo akɔta Zabulɔ́ɔn tɔn ɔ́ mɛ ɔ́, ɖu gǎn ɖo Izlayɛ́li xɔ xwe wǒ.

¹²Énɛ́ ɔ́ gúdo ɔ́, é kú bɔ è ɖi i ɖó Ayalɔ́ni, ɖo Zabulɔ́ɔn yíkúngban jí.

¹³Ée Elɔ́ni kú gúdo ɔ́, Avidɔni, Ilɛ́li Pileyatɔ́ni ɔ́ sín ví ɔ́ húzú gǎn ɖo Izlayɛ́li.

¹⁴Vǐ súnnu kanɖé (40) wɛ Avidɔni ɖó, bó ɖó vǐvú súnnu gban (30), bɔ yě bǐ nɔ xá tócí ɖokpó ɖokpó jí. Avidɔni nɔ Izlayɛ́li togun ɔ́ nu xɔ xwe tántɔn.

¹⁵Énɛ́ ɔ́ gúdo ɔ́, é kú bɔ è ɖi i ɖó Pileyatɔ́ni, ɖo ayǐkúngban Eflayímu tɔn jí, ɖo Amalɛ́ki sókan mɛ.