Read fon Hwɛɖɔtɔ́ 18 Bible Online

Hwɛɖɔtɔ́ 18 - fon bible

Hwɛɖɔtɔ́ 18

¹Axɔ́sú ɖé ɖo Izlayɛ́li hwenɛ́nu ǎ, bɔ akɔta Dan tɔn ɔ́ ɖo ayǐkúngban e jí é ná yi nɔ ɔ́ ba wɛ; ɖó káká wá jɛ din ɔ́, è ko ná ayǐkúngban ɖěbǔ yědɛɛ lɛ́ɛ Izlayɛ́li ví ɖě lɛ́ɛ ɖɔhun ǎ.

²Énɛ́ ɔ́, Dan sín vǐ lɛ́ɛ kpɔ́n súnnu e kpan akɔ́n ganjí ɖo yě mɛ lɛ́ɛ atɔ́ɔ́n bó sɔ́, bó sɛ́ yě dó sín gletoxo Soléa tɔn kpó Ɛcitawɔ́lu tɔn kpó mɛ, bó ɖɔ nú yě ɖɔ yě ní yi ba do nú to ɔ́ xéɖéxéɖé. Nya énɛ́ lɛ́ɛ wá jɛ Eflayímu sín ayǐkúngban jí ɖo sókan mɛ, bó nɔ te ɖo Mika sín xwé kpá.

³Hwenu e yě ɖo fínɛ́ ɔ́, yě se lě e dɔ̌nkpɛvú Levíi ví ɔ́ ɖo xó ɖɔ gbɔn wɛ ɔ́ bó tunwun ɖɔ é kún nyí fínɛ́ nu ó. Énɛ́ ɔ́, yě yi kanbyɔ́ ɛ ɖɔ: “Mɛ̌ wɛ ɖɔ nú we ɖɔ hwi ní wá fí? Ani wa wɛ a ɖe ɖo fí? Nǔ towe tɛ́ ɖo fí?”

⁴Bɔ é yí gbe nú yě ɖɔ: “Mika wɛ mɔ azɔ̌ nú mì; é nɔ sú axɔ́ mì bɔ un nyí sinsɛngán tɔn.”

⁵Yě ká ɖɔ n'i ɖɔ: “É nyɔ́! Bo kan nǔ byɔ́ Mawu nú mǐ, mǐ jlǒ ná tunwun nú to mɛ e yi wɛ mǐ ɖe ɔ́ ná nyɔ́ nú mǐ a jí.”

⁶Sinsɛngán ɔ́ ka ɖɔ nú yě ɖɔ: “Mi ma ɖi xɛsi ó. Mawu Mavɔmavɔ kpó mi kpó wɛ ɖo yiyi wɛ.”

⁷Nya atɔ́ɔ́n lɛ́ɛ ka lɛ́ wlí ali ɖidó, bó hun káká yi Layici. Ée yě jɛ fínɛ́ ɔ́, mɛ e yě mɔ lɛ́ɛ ɖo vivo mɛ; ayi yětɔn j'ayǐ, nǔɖé ɖo ado hu nú yě wɛ ǎ Sidɔ́ɔnnu lɛ́ɛ ɖɔhun. Mɛ ɖěbǔ mɔ nǔɖé ná ɖɔ dó mɛ e ɖo gǎn ɖu wɛ ɖo gbě ɔ́ jí ɔ́ wú ǎ. Fí e mɛ énɛ́ lɛ́ɛ ɖe ɔ́ lín dó Sidɔ́ɔnnu lɛ́ɛ; yě ká ɖo mɛ ɖěbǔ sín acɛ mɛ ǎ.

⁸Nya énɛ́ lɛ́ɛ lɛ́ kɔ wá mɔ nɔví yětɔn lɛ́ɛ ɖo Soléa kpó Ɛcitawɔ́lu kpó, bɔ mɛ yětɔn lɛ́ɛ kanbyɔ́ yě ɖɔ étɛ́ wɛ yě mɔ ɖo dɔ̌n a jí.

⁹Bɔ yě ɖɔ nú yě ɖɔ: “Mi wá mǐ ní yi! Mi nú mǐ ná yi tɔ́n ahwan Layicinu lɛ́ɛ. Mǐ mɔ ɖɔ to ɔ́ nyɔ́ ganjí. Mi ma cí fí nǔɖé ma wa ó; mi yá wǔ hwlɛ́ndó to ɔ́ yí gbé.

¹⁰Ényí mi jɛ to ɔ́ mɛ ɔ́, mi ná mɔ ɖɔ mɛ e ɖo to ɔ́ mɛ lɛ́ɛ sín ayi j'ayǐ, bɔ ayǐkúngban yětɔn ka lɛ́ d'agba; Mawu ná jó to énɛ́ ɔ́ nú mi; nǔ e è nɔ mɔ ɖo ayǐkúngban jí lɛ́ɛ ɖě hán ɖo to énɛ́ ɔ́ mɛ ǎ.”

¹¹Énɛ́ ɔ́, súnnu e ɖo akɔta Dan tɔn ɔ́ mɛ lɛ́ɛ nǔwɔntɔn (600) sɔ́ ahwannú, bó gosín Soléa kpó Ɛcitawɔ́lu kpó.

¹²Yě yi ɖó gɔnu ɖó Kiliyati-Yealimu sín gbada hwe jí, ɖo Judáa. Nǔ e wú è ɖǒ nyǐkɔ nú fí énɛ́ ɔ́ ɖɔ Maxanɛ́ɛ-Dan ɔ́ nɛ́; nyǐkɔ énɛ́ ɔ́ sín tínmɛ wɛ nyí “Ahwankpá Dan tɔn”; nyǐkɔ énɛ́ ɔ́ lɛ́ kpo ɖo te káká wá jɛ din.

¹³Yě gosín fínɛ́, bó ɖidó Eflayímu sókan mɛ, bó wá jɛ Mika sín xwé kpá.

¹⁴Énɛ́ ɔ́, mɛ atɔ́ɔ́n e wá ba do nú Layici to ɔ́ ɖ'ayǐ lɛ́ɛ ɖɔ nú nɔví yětɔn lɛ́ɛ ɖɔ: “Mi tunwun ɖɔ vodún ɖé kpó bǒcyɔ ɖé lɛ́ɛ kpó, kpódó vodún ɖěvo e wú è kɔn gan dó ɔ́ kpán ɖo xwé élɔ́ lɛ́ɛ ɖokpó gbe a? Din ɔ́, nǔ e mi ná wa ɔ́, mi sí wɛ é ɖe.”

¹⁵Mɛ atɔ́ɔ́n lɛ́ɛ ɖɔ mɔ̌ bó ɖidó Mika xwé; ée yě jɛ fínɛ́ ɔ́, yě byɔ́ xwé ɔ́ gbe, bó yi dɔ̌nkpɛvú Levíi ví ɔ́ sín xɔ mɛ bó kanbyɔ́ ɛ ɖɔ nɛ̌ wɛ é ɖe gbɔn a jí.

¹⁶Hwenɛ́nu ɔ́, súnnu e ɖo akɔta Dan tɔn ɔ́ mɛ lɛ́ɛ nǔwɔntɔn (600) e ko sɔ́ ahwannú lɛ́ɛ ɔ́ ɖo te ɖo hɔntogbó jí.

¹⁷Ée mɛ atɔ́ɔ́n e ba do nú to ɔ́ ɖ'ayǐ lɛ́ɛ byɔ́ xwé ɔ́ gbe ɔ́, yě bɛ̌ vodún tɛnmɛ tɛnmɛ e ɖo fínɛ́ lɛ́ɛ, bǒcyɔ lɛ́ɛ, kpódó vodún e wú è kɔn gan dó ɔ́ lɔmɔ̌ kpán. Sinsɛngán ɔ́ ka ɖo te ɖo hɔnto é kpó súnnu nǔwɔntɔn (600) e sɔ́ ahwannú lɛ́ɛ kpó.

¹⁸Ée sinsɛngán ɔ́ mɔ mɛ ɖé lɛ́ɛ ɖo Mika sín xwé gbe byɔ́ wɛ, bó ɖo vodún lɛ́ɛ bǐ bɛ́ wɛ ɔ́, é kanbyɔ́ yě ɖɔ: “Étɛ́ wa wɛ mi ɖe ɖo fínɛ́?”

¹⁹Bɔ yě yí gbe n'i ɖɔ: “Nɔ abwɛ̌! Ma ɖɔ xó ɖé ó. Xwedó mǐ, bó húzú akɔta mǐtɔn sín sinsɛngán. Nú a nyǐ sinsɛngán nú xwédo gbɛtɔ́ ɖokpó ɖé tɔn kpó a nyǐ sinsɛngán nú akɔta Izlayɛ́li tɔn ɔ́ bǐ kpó ɔ́, ɖě tɛ́ wɛ jló we hú ɖě?”

²⁰Ée sinsɛngán ɔ́ se mɔ̌ ɔ́, é víví n'i ɖésú, bɔ é fɔ vodún lɛ́ɛ kpó bǒcyɔ lɛ́ɛ kpó, lobo xwedó yě.

²¹Énɛ́ ɔ́, Dan ví lɛ́ɛ lɛ́ wlí ali ɖidó, bó ɖe yɔkpɔ́vú lɛ́ɛ, kanlin lɛ́ɛ kpó agban lɛ́ɛ kpó ɖó nukɔn.

²²Hwenu e Mika kpó mɛ e ɖo xwé tɔn kpá lɛ́ɛ kpó wá sɛ ta kplé bó jɛ gǔdo yětɔn ɔ́, yě kó lín dó xwé tɔn.

²³Xó e sú ylɔ́ Dan ví lɛ́ɛ wɛ yě ɖe ɔ́ zɔ́n bɔ Dan ví lɛ́ɛ lɛ́ kɔ bó kanbyɔ́ Mika ɖɔ: “Étɛ́ wɛ ɖo wiwa we wɛ? Nɛ̌ gbɔn bɔ ahwan kplé lě?”

²⁴É ka yí gbe nú yě ɖɔ: “Mi bɛ́ vodún ce e un bló lɛ́ɛ, bó kplá sinsɛngán ce. É sɔ́ kpo nǔ ɖěbǔ nú mì ǎ, bɔ mi lɛ́ glá bó kanbyɔ́ mì ɖɔ étɛ́ wɛ ɖo wiwa mì wɛ a jí?”

²⁵Yě ká ɖɔ n'i ɖɔ: “Ma nú mǐ sɔ́ se gbe towe ɖě ó; é má nyí mɔ̌ ǎ ɔ́, mɛ lɛ́ɛ sin xomɛ ɔ́, yě ná zɔn mi jí, bɔ é ná sín hwɛ wú bɔ hwi kpó xwédo towe kpó ná dɔn.”

²⁶Énɛ́ ɔ́ gúdo ɔ́, yě lɛ́ wlí ali yětɔn ɖidó. Ée Mika mɔ ɖɔ yě hú gǎn émí ɔ́, é lɛ́ kɔ bo wá yi xwé.

²⁷Dan ví lɛ́ɛ bɛ́ nǔ e Mika bló lɛ́ɛ sɔ́ yi, bó kplá sinsɛngán e ɖo azɔ̌ wa n'i wɛ é. Yě yi tɔ́n ahwan Layici, bó hu mɛ e ɖo to ɔ́ mɛ bó ɖo vivo mɛ, bɔ nǔɖé ma ɖo adohu ná wɛ ǎ lɛ́ɛ, lobo dó toxo ɔ́ zo.

²⁸Layici ɔ́, Bɛti-Hlehovu sín tɔdo mɛ wɛ é ɖe, bo lín dó Sidɔ́ɔn, bɔ mɛ e ɖo to ɔ́ mɛ lɛ́ɛ ɖo mɛ ɖěbǔ sín acɛ mɛ ǎ. Nǔ e wútu mɛ ɖěbǔ ma wá gɔ́ alɔ nú yě ǎ ɔ́ nɛ́. Dan ví lɛ́ɛ vɔ́ toxo ɔ́ gbá, bó ɖó gɔnu ɖó fínɛ́.

²⁹Layici wɛ è nɔ ylɔ́ toxo énɛ́ ɔ́ ɖɔ ɖ'ayǐ; yě ká ɖyɔ́ bó nɔ ylɔ́ ɖɔ Dan. Dan ɔ́, tɔ́gbó yětɔn wɛ, tɔ́gbó yětɔn Jakɔ́bu ví ɔ́ wɛ.

³⁰Yě lí vodún Mika tɔn ɔ́, bó nɔ sɛn; bɔ Yexonatáni e nyí Gɛɛcɔ́mu ví, bó nyí Mɔyízi sín vǐvú ɔ́ kpódó vǐ tɔn lɛ́ɛ kpó húzú sinsɛngán nú akɔta Dan tɔn ɔ́ káká yi jɛ hwenu e è wlí yě yi kannumɔgbénu é.

³¹Mika sín vodún ɔ́ nɔ yě sí nú hwenu e Mawu xwé ɔ́ nɔ Silóo xɔ ɔ́ bǐ.