Read fon Hwɛɖɔtɔ́ 2 Bible Online

Hwɛɖɔtɔ́ 2 - fon bible

Hwɛɖɔtɔ́ 2

¹Wɛnsagun Mawu Mavɔmavɔ tɔn gosín Gilugalu wá Bokímu, bó ɖɔ nú Izlayɛ́li ví lɛ́ɛ ɖɔ: “Un ɖe mi tɔ́n sín Ejípu bó kplá mi wá ayǐkúngban e un dó akpá tɔn nú tɔ́gbó mitɔn lɛ́ɛ ɔ́ jí. Un ɖɔ un kún ná hɛn akɔ e un jɛ xá mi ɔ́ gblé gbeɖé ó.

² Lo ɔ́, un ɖɔ nú mi ɖɔ mi ní ma jɛ akɔ xá to énɛ́ ɔ́ mɛ nu lɛ́ɛ ó; mi ní gba vɔ̌sákpe yětɔn lɛ́ɛ. Mi ka se tónú nú mì ǎ. Étɛ́wú wɛ mi wa mɔ̌?

³Un ɖɔ din ɔ́, un sɔ́ ná nya to ɔ́ mɛ nu lɛ́ɛ sín nukɔn mitɔn ǎ. Lo ɔ́, yě ná dɔn mi dó mɔ mɛ, bɔ mi ná jɛ vodún yětɔn lɛ́ɛ sɛn jí.”

⁴Ée wɛnsagun Mawu Mavɔmavɔ tɔn ɖɔ xó énɛ́ lɛ́ɛ nú Izlayɛ́li ví lɛ́ɛ ɔ́, yě bǐ jɛ avǐ ya jí.

⁵Yě ylɔ́ fí énɛ́ ɔ́ ɖɔ Bokímu; Bokímu ɔ́ sín tínmɛ wɛ nyí avǐyatɔ́ lɛ́ɛ; bɔ yě sá vɔ̌ nú Mawu Mavɔmavɔ ɖo fínɛ́.

⁶Ée Jozuwée nyi togun ɔ́ fó ɔ́, Izlayɛ́li ví lɛ́ɛ ɖokpó ɖokpó yi ayǐkúngban e nyí étɔn ɔ́ jí, bɔ yě jɛ agban ɖó to ɔ́ mɛ.

⁷Togun ɔ́ sɛn Mawu Mavɔmavɔ ɖo Jozuwée hwenu, bó sɛn ɛ ɖo mɛxó e dɔ́ ji hú Jozuwée lɛ́ɛ hwenu; mɛxó énɛ́ lɛ́ɛ e mɔ azɔ̌ ɖaxó ɖaxó e Mawu Mavɔmavɔ ko wa nú Izlayɛ́li ví lɛ́ɛ é.

⁸Jozuwée Nuni ví, mɛsɛntɔ́ Mawu Mavɔmavɔ tɔn ɔ́, xwe kanwe gban (110) wɛ é ɖó bó kú.

⁹ Ayǐkúngban e è nǎ ɛ ɖo Timunati-Xɛlɛsi ɔ́ jí wɛ è ɖi i dó ɖo sókan Eflayímu tɔn mɛ, ɖo Gaaci só ɔ́ sín taligbé.

¹⁰Énɛ́ ɔ́ gúdo ɔ́, mɛ e jɔ Jozuwée hwe nu lɛ́ɛ wá kú. Mɛ e jɛ fínɛ́ lɛ́ɛ tunwun Mawu Mavɔmavɔ ǎ; yě ká tunwun azɔ̌ e é wa nú Izlayɛ́li ví lɛ́ɛ ɔ́ ǎ.

¹¹Izlayɛ́li togun ɔ́ jɛ nǔ e má nyɔ́ Mawu Mavɔmavɔ nukún mɛ ǎ lɛ́ɛ wa jí; yě jɛ vodún Baalu lɛ́ɛ sɛn jí.

¹²Yě jǒ Mawu Mavɔmavɔ, Mawu tɔ́gbó yětɔn lɛ́ɛ tɔn e ɖe yě tɔ́n sín Ejípu ɔ́ dó, bó ɖo vodún lɛ́ɛ sɛn wɛ; yě nɔ́ sɛn vodún e togun e lɛ́ dó yě lɛ́ɛ nɔ sɛn lɛ́ɛ é. Yě nɔ́ jɛ kpo bó nɔ ɖe kɔ́ nú yě, bó nɔ dó xomɛsin nú Mawu Mavɔmavɔ.

¹³Yě jǒ Mawu Mavɔmavɔ dó, bó nɔ sɛn vodún Baalu lɛ́ɛ kpó vodún Asitaatée lɛ́ɛ kpó.

¹⁴Mawu Mavɔmavɔ sin xomɛ dó Izlayɛ́li ví lɛ́ɛ. É jó yě dó nyi ajotɔ́ axánsúnxó lɛ́ɛ sín alɔ mɛ bɔ yě fin nǔ yětɔn lɛ́ɛ; é sa yě nú kɛntɔ́ yětɔn e lɛ́ dó yě lɛ́ɛ, bɔ yě sɔ́ sixú nɔ te ɖo nukɔn yětɔn ǎ.

¹⁵Yě yi ahwan fun gbé ɖo fí ɖěbǔ ɔ́, Mawu Mavɔmavɔ nɔ zɔ́n bɔ yě nɔ́ cí ahwan, lě e é ko zin alɔ dó akɔ́n bó ɖɔ gbɔn é. Bɔ yě jɛ lele ɖaxó ɖé mɛ.

¹⁶Énɛ́ ɔ́, Mawu Mavɔmavɔ fɔ hwɛɖɔtɔ́ ɖó nu yětɔn bɔ yě hwlɛ́n yě ɖo ajotɔ́ axánsúnxó énɛ́ lɛ́ɛ sí.

¹⁷Lo ɔ́, Izlayɛ́li ví lɛ́ɛ se tónú nú hwɛɖɔtɔ́ yětɔn lɛ́ɛ ǎ, ɖó yě lɛ́ kɔ yi vodún lɛ́ɛ kɔn, bó nɔ jɛ kpo bó nɔ ɖe kɔ́ nú yě. Yě yá wǔ lɛ́ kɔ sín ali e tɔ́gbó yětɔn lɛ́ɛ kó xwedó ɔ́ jí, bó sɔ́ nɔ́ nyi sɛ́n e Mawu Mavɔmavɔ dó lɛ́ɛ tɔ́gbó yětɔn lɛ́ɛ ɖɔhun ǎ.

¹⁸Nú Mawu Mavɔmavɔ sɛ́ hwɛɖɔtɔ́ ɖé dó Izlayɛ́li ví lɛ́ɛ hweɖěbǔnu ɔ́, é ɖésúnɔ nɔ́ nɔ gǔdo tɔn, bó nɔ́ hwlɛ́n yě ɖo kɛntɔ́ yětɔn lɛ́ɛ sí, nú hwenu e hwɛɖɔtɔ́ énɛ́ ɔ́ ná nɔ gbɛ xɔ é bǐ. Nǔgbó ɔ́, hwenu e yě nɔ́ ɖo aɖǔkún ɖu wɛ ɖo mɛ e nɔ ɖo ya dó nú yě wɛ lɛ́ɛ lɔ mɛ ɔ́, nǔ yětɔn nɔ blá wǔ nú Mawu Mavɔmavɔ.

¹⁹Lo ɔ́, nú hwɛɖɔtɔ́ ɔ́ kú ɔ́, gbɛ e yě nɔ́ zán ɔ́, nɔ lɛ́ nylá hú ée tɔ́gbó yětɔn lɛ́ɛ kó zán ɖ'ayǐ é; yě nɔ́ sɛn vodún lɛ́ɛ, bó nɔ́ jɛ kpo lobo nɔ ɖe kɔ́ nú yě. Yě jó tó e tlí wɛ yě ɖe ɔ́ dó ǎ.

²⁰Mawu Mavɔmavɔ sin xomɛ dó Izlayɛ́li ví lɛ́ɛ. É ɖɔ: “Mɛ e ɖo togun élɔ́ mɛ lɛ́ɛ gba akɔ e un jɛ bó ɖe gbeta tɔ́n nú tɔ́gbó yětɔn lɛ́ɛ ɖɔ yě ní ɖó sísí ná lɛ́ɛ; yě se tónú nú mì ǎ.

²¹É nyɔ́! Nyɛ ɔ́, un sɔ́ na nya mɛ ɖokpó géé lě ɖo nukɔn mitɔn ɖo togun e Jozuwée ma ko nya, cóbó kú ǎ lɛ́ɛ mɛ ǎ.

²²Togun énɛ́ lɛ́ɛ wɛ un ná dó wa azɔ̌ ná, bó ná kpɔ́n ɖɔ Izlayɛ́li ví lɛ́ɛ jló ná xwedó jlǒ ce, bó se tónú nú mì, lě e tɔ́gbó yětɔn lɛ́ɛ ko bló gbɔn ɔ́ a jí.”

²³Énɛ́ ɔ́ wɛ zɔ́n bɔ Mawu Mavɔmavɔ jó togun e é ma jó nú Jozuwée ǎ lɛ́ɛ dó nyi to ɔ́ mɛ. É yá wǔ nya yě ǎ.