Read fon Hwɛɖɔtɔ́ 3 Bible Online

Hwɛɖɔtɔ́ 3 - fon bible

Hwɛɖɔtɔ́ 3

¹Mawu Mavɔmavɔ jó togun énɛ́ lɛ́ɛ dó nyi to ɔ́ mɛ, bó ná dó tɛ́n Izlayɛ́li e má fun ahwan xá Kanáanu lɛ́ɛ bó yí ayǐkúngban yětɔn ǎ lɛ́ɛ kpɔ́n.

²É jló ɖɔ Izlayɛ́linu e ji gbɔn gǔdo wɛ è ɖe bɔ yě má kó fun ahwan kpɔ́n ǎ lɛ́ɛ ní kplɔ́n ahwanfunfun.

³Yě mɛ e é jó dó nyi to ɔ́ mɛ lɛ́ɛ wɛ nyí mɛ e ɖo Filisitɛ́ɛn lɛ́ɛ sín axɔ́súɖuto atɔ́ɔ́n lɛ́ɛ mɛ lɛ́ɛ, Kanáanu lɛ́ɛ bǐ, Sidɔ́ɔnnu lɛ́ɛ kpódó Hivíti e nɔ́ nɔ Libáan sókan mɛ lɛ́ɛ kpó, sín Baalu-Ɛmɔ́ni só ɔ́ kɔn káká yi Lɛbo-Hamáti lɛ́ɛ.

⁴Mawu Mavɔmavɔ jló ná zé togun énɛ́ lɛ́ɛ dó wa azɔ̌ ná, bó ná kpɔ́n ɖɔ Izlayɛ́li ví lɛ́ɛ ná nyi sɛ́n e émí dó nú tɔ́gbó yětɔn lɛ́ɛ gbɔn Mɔyízi jí ɔ́ a jí.

⁵Énɛ́ ɔ́ wú wɛ Izlayɛ́li ví lɛ́ɛ nɔ Kanáanu lɛ́ɛ, Hitíti lɛ́ɛ, Amɔliti lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó tɛ́ntin.

⁶Yě nɔ́ da asi ɖo togun énɛ́ lɛ́ɛ mɛ; yě nɔ́ sɔ́ vǐ yětɔn lɛ́ɛ da nú yě, lobo nɔ sɛn vodún yětɔn lɛ́ɛ.

⁷Izlayɛ́li ví lɛ́ɛ wa nǔ e ma nyɔ́ Mawu Mavɔmavɔ nukún mɛ ǎ é; yě wɔn Mawu Mavɔmavɔ, Mawu yětɔn bó nɔ́ sɛn vodún Baalu lɛ́ɛ kpó vodún Acela lɛ́ɛ kpó.

⁸Mawu Mavɔmavɔ sin xomɛ dó yě bó jó yě nú axɔ́sú Mɛzopotamíi tɔn Kucáni-Hliceatayímu, bɔ yě nɔ acɛ tɔn mɛ xɔ xwe tántɔn.

⁹Énɛ́ ɔ́, yě sú xó ylɔ́ Mawu Mavɔmavɔ ɖɔ é ní wá gɔ́ alɔ nú émí, bɔ Mawu Mavɔmavɔ sɛ́ Ɔtiniyɛ́li dó nú é na yi hwlɛ́n yě; Ɔtiniyɛ́li ɔ́, Kenázi ví wɛ, bó nyí Kalɛ́bu sín nɔví kpɛví.

¹⁰Yɛ Mawu Mavɔmavɔ tɔn wá ta nú Ɔtiniyɛ́li bɔ é húzú togun Izlayɛ́li tɔn sín gǎn. É yi ahwan fun gbé bɔ Mawu Mavɔmavɔ bló bɔ é ɖu ɖo axɔ́sú Mɛzopotamíi tɔn Kucáni-Hliceatayímu jí.

¹¹Énɛ́ ɔ́, to ɔ́ mɔ vivo xɔ xwe kanɖé. Énɛ́ ɔ́ gúdo ɔ́, Ɔtiniyɛ́li Kenázi ví ɔ́ kú.

¹²Izlayɛ́li ví lɛ́ɛ lɛ́ wa nǔ e ma nyɔ́ Mawu Mavɔmavɔ nukún mɛ ǎ é. Énɛ́ ɔ́ wú wɛ Mawu Mavɔmavɔ dɔn axɔ́sú Mɔwabu tɔn Eglɔ́ni dó yě jí.

¹³Eglɔ́ni ɖó gbě kpɔ́ xá Amumɔ́ɔ ví lɛ́ɛ kpó Amalɛ́ki ví lɛ́ɛ kpó, bó ná yi tɔ́n ahwan Izlayɛ́li ví lɛ́ɛ. Yě yǐ Jeliko, děkan toxo ɔ́.

¹⁴Izlayɛ́li ví lɛ́ɛ nɔ axɔ́sú Eglɔ́ni sín acɛ mɛ xɔ xwe afɔtɔn-nukún-atɔn.

¹⁵Yě wá sú xó ylɔ́ Mawu Mavɔmavɔ ɖɔ é ní wá gɔ́ alɔ nú émí, bɔ é sɛ́ Ehúdi dó nú é ná yi hwlɛ́n yě; Ehúdi ɔ́, amyɔnɔ wɛ; Gela ví wɛ, bó jɔ ɖo akɔta Bɛnjamɛ́ɛ tɔn mɛ. Izlayɛ́li ví lɛ́ɛ sɛ́ Ehúdi dó axɔ́sú Mɔwabu tɔn Eglɔ́ni gɔ́n, nú é ná yi zé kuzú n'i.

¹⁶Ehúdi bló hwǐ ɖíɖá nuwenɔ ɖokpó, bó sɔ́ hwlá dó avɔ glɔ́ ɖo ɖisíxwé; hwǐ ɔ́ ga tɔn ná yi mɛ̌tlu vlɔ́ mɔ̌.

¹⁷Énɛ́ ɔ́, é zé kuzú ɔ́ yi jó nú Eglɔ́ni; Eglɔ́ni ɔ́, nya ɖé wɛ, bó kló ɖésú.

¹⁸Ée é zé kuzú ɔ́ jó ɔ́, é kpó mɛ e hɛn kuzú ɔ́ lɛ́ɛ kpó ɖidó.

¹⁹Ée yě jɛ vodún e è sɔ awǐnnya dó lí ná lɛ́ɛ kɔn, ɖo Gilugalu kpá ɔ́, Ehúdi lɛ́ kɔ bó wá yi ɖɔ nú axɔ́sú ɔ́ ɖɔ: “Sɛ́mɛɖó, un ɖó wɛn ɖé bó ná dó we ɖo kpá.” Bɔ axɔ́sú ɔ́ ɖɔ nú mɛsɛntɔ́ tɔn lɛ́ɛ ɖɔ yě ní ná tɛn émí, bɔ yě bǐ tɔ́n.

²⁰Xɔ tɔn fífá e è sɔ́ ɖó vo n'i ɖo xɔ ta ɔ́ mɛ wɛ é ɖe, ɖo ayǐjínjɔ́n; Ehúdi ka sɛ yi gɔ̌n tɔn bó ɖɔ n'i ɖɔ: “Mawu wɛ dó wɛn mì ɖɔ má wá dó we”. Bɔ axɔ́sú ɔ́ sí te sín zinkpo tɔn jí.

²¹Énɛ́ ɔ́, Ehúdi zé amyɔlɔ tɔn dó dɔn hwǐ e é sɔ́ dó avɔ glɔ́ ɖo ɖisí tɔn xwé ɔ́ ná, bó lun dó adɔ mɛ nú axɔ́sú ɔ́.

²²Hwǐ ɔ́ kpó ta tɔn kpó byɔ́ lan tɔn mɛ bó bú bǐ bɔ jǒ nyɛ sú i ɖó Ehúdi jó dó nyi lan tɔn mɛ.

²³Énɛ́ ɔ́ gúdo ɔ́, Ehúdi dó gan hɔn lɛ́ɛ mɛ lobo tɔ́n gbɔn xɔ gúdo.

²⁴Ée é yi ɔ́, mɛsɛntɔ́ lɛ́ɛ wá, bó wá mɔ ɖɔ hɔn lɛ́ɛ ɖo súsú. Ée yě mɔ mɔ̌ ɔ́, yě lin ɖɔ afɔjí yi wɛ axɔ́sú ɔ́ ná kó ɖe ɖo xɔ ɔ́ mɛ.

²⁵Yě nɔ te káká bɔ agbɔ̌ kpé yě; lo ɔ́, axɔ́sú ɔ́ ɖo hɔn lɛ́ɛ hun wɛ ǎ jɛ́n wɛ. Énɛ́ ɔ́, yě zě cávi ɔ́, bó hun hɔn lɛ́ɛ yě ɖésúnɔ, lobo mɔ ɖɔ axɔ́sú yětɔn kó kú, bó ɖo dlɛ̌ndlɛ́n ɖo kɔ́ mɛ.

²⁶Hwenu e yě ɖo te nɔ kpɔ́n gǎn yětɔn wɛ ɔ́, Ehúdi ko hɔn yi; é zɛ vodún e è zě awǐnnya dó lí ná lɛ́ɛ wú, bó hɔn wá cí Seyíla wǔyɛ́yɛ́ afɔyɛ́yɛ́.

²⁷Ée é jɛ tɛn énɛ́ ɔ́ mɛ tlóló ɔ́, é kún lanzo ɖo Eflayímu sókan ɔ́ mɛ, bó ná sɛ Izlayɛ́li ví lɛ́ɛ kplé; ée yě wá ɔ́, é nɔ nukɔn nú yě bɔ yě jɛ te sín só ɔ́ jí.

²⁸É ɖɔ nú yě ɖɔ: “Mi xwedó mì, ɖó Mawu Mavɔmavɔ ko jó kɛntɔ́ mitɔn Mɔwabunu lɛ́ɛ nú mi.” Izlayɛ́li ví lɛ́ɛ ká xwedó Ehúdi, bó yí fí e è nɔ dó asá Judɛ́ɛn tɔ ɔ́ ɖe ɔ́ sín Mɔwabunu lɛ́ɛ sí, lobo lɔn bɔ mɛ ɖěbǔ gbɔn tɔ ɔ́ mɛ dín ǎ.

²⁹Hwenɛ́nu ɔ́, Mɔwabunu e yě hu lɛ́ɛ yi děgba we afɔwó (10.000) mɔ̌. Yě mɛ e yě hu lɛ́ɛ bǐ wɛ nyí súnnu glegbenu bó kpan akɔ́n. É sɔ́ kpo mɛ ɖěbǔ ɖo gbɛ ǎ.

³⁰Bɛ́ sín hwenɛ́nu ɔ́, Mɔwabunu lɛ́ɛ gbɔ bó hwíhwɛ́ yěɖée dó Izlayɛ́li ví lɛ́ɛ glɔ́, bɔ to ɔ́ mɔ vivo xɔ xwe kanwe (80).

³¹Camugáa, Anáti ví ɔ́ wɛ ɖyɔ́ Ehúdi. É zé kpo nu xwíɖíxwíɖí ɖé dó hu Filisitɛ́ɛn nǔwɔntɔn (600) ná, bɔ é lɔmɔ̌ hwlɛ́n togun Izlayɛ́li tɔn ɔ́.