Read fon Hwɛɖɔtɔ́ 4 Bible Online

Hwɛɖɔtɔ́ 4 - fon bible

Hwɛɖɔtɔ́ 4

¹Ée Ehúdi kú gúdo ɔ́, Izlayɛ́li ví lɛ́ɛ lɛ́ wa nǔ e ma nyɔ́ Mawu Mavɔmavɔ nukún mɛ ǎ é.

²Mawu Mavɔmavɔ ka jó yě nú Yavíni, Kanáa xɔ́sú lɛ́ɛ ɖokpó. Hasɔ́ɔ wɛ é nɔ nɔ; ahwangán tɔn nɔ nyí Sisela, bó nɔ́ nɔ Halocɛ́ti-Goyímu.

³Yavíni ɖó ahwankɛkɛ́ví gannɔ afɛnɛ kanwe ko (900), bó ɖo acɛ gannaganna kpa nú Izlayɛ́li ví lɛ́ɛ wɛ sín xwe ko ɖíe. Énɛ́ ɔ́, Izlayɛ́li ví lɛ́ɛ sú xó ylɔ́ Mawu Mavɔmavɔ ɖɔ é ní wá gɔ́ alɔ nú émí.

⁴Gbeyíɖɔ Mawu tɔn Debola, Lapidɔ́ti sín asi ɔ́, wɛ nyí hwɛɖɔtɔ́ hwenɛ́nu ɖo Izlayɛ́li.

⁵É nɔ́ jínjɔ́n hwɛɖiɖɔ yí ɖo dětín e è nɔ ylɔ́ ɖɔ Debola tɔn ɔ́ sá ɖo Hlama kpó Betɛ́li kpó tɛ́ntin, ɖo Eflayímu sókan ɔ́ mɛ; bɔ Izlayɛ́li ví lɛ́ɛ nɔ yi gɔ̌n tɔn nú é ná ɖɔ hwɛ nú yě.

⁶É wá su gbe ɖokpó, bɔ Debola sɛ́ mɛ dó ɖɔ è nǐ yi ylɔ́ Balaaki, Avinɔwamu Kedɛ́ci-Nɛfutalinu ɔ́ sín ví ɔ́ wá; éé Balaaki wá ɔ́, Debola ɖɔ n'i ɖɔ, xó e Mawu Mavɔmavɔ, Mawu Izlayɛ́li tɔn ɖɔ ɔ́ ɖíe, é ɖɔ “Cyán súnnu děgba we afɔwó (10.000) ɖo Nɛfutali kpó Zabulɔ́ɔn kpó sín akɔta lɛ́ɛ mɛ, bó kplá yě yi Tabɔ́ɔ só tá.

⁷Un ná bló bɔ Sisela ahwangán Yavíni tɔn ɔ́ ná bɛ́ ahwankɛkɛ́ví tɔn lɛ́ɛ bó ná kplá ahwanfuntɔ́ tɔn lɛ́ɛ, bɔ yě ná wǎ tɔsisa Kicɔ́ni tɔn ɔ́ tó, bó ná tɔ́n ahwan we. Un ka ná jó e nú we.”

⁸Balaaki ka yí gbe nú Debola ɖɔ: “Nú a nǎ xwedó mì ɔ́, un ná yi; amɔ̌, nú a ma ná xwedó mì ǎ ɔ́, un ná yi ǎ.”

⁹Ée é ɖɔ mɔ̌ ɔ́, Debola ɖɔ n'i ɖɔ: “Hǔn un ná xwedó we. Amɔ̌, ahwangbénu élɔ́ e a xwe ɔ́, é ná nyí susu ɖěbǔ nú we ǎ, ɖó nyɔ̌nu ɖé wɛ Mawu Mavɔmavɔ ná jó Sisela ná.” Bɔ Debola kpó Balaaki kpó yi Kedɛ́ci.

¹⁰Balaaki ylɔ́ Nɛfutali kpó Zabulɔ́ɔn kpó sín akɔta lɛ́ɛ kplé; súnnu děgba we afɔwó (10.000) yí gbe bó ná xwedó e yi ahwangbénu, bɔ Debola ɖésú xwedó e yi.

¹¹Hebɛ́ɛ Keni ví ɔ́ ɖo Kedɛ́ci kpá. Đ'ayǐ ɔ́, é kó klán xá nɔví tɔn Keni ví ɖě lɛ́ɛ. Mɔyízi sín asitɔ́ Hobabu wɛ ka dó kún yětɔn. Hebɛ́ɛ ɔ́ yi bló goxɔ tɔn nyi cɛ́nitín ɖé kpá ɖo Saanánimu.

¹²Sisela se ɖɔ Balaaki Avinɔwamu ví ɔ́ yi Tabɔ́ɔ só jí.

¹³Énɛ́ ɔ́, é sɛ ahwankɛkɛ́ví tɔn afɛnɛ kanwe ko (900) lɛ́ɛ kpó gbɛtɔ́ tɔn lɛ́ɛ kpó kplé ɖo Halocɛ́ti-Goyímu; énɛ́ ɔ́ gúdo ɔ́, yě gosín fínɛ́ bó yi tɔsisa Kicɔ́ni tɔn ɔ́ tó.

¹⁴Bɔ Debola ɖɔ nú Balaaki ɖɔ: “Jɛ ali! Égbé wɛ Mawu Mavɔmavɔ ná jó Sisela nú we. Mawu Mavɔmavɔ ɖésú ɖo nukɔn towe.” Balaaki jɛ te sín Tabɔ́ɔ só jí, bó ɖo nukɔn nú ahwanfuntɔ́ tɔn děgba we afɔwó (10.000) lɛ́ɛ.

¹⁵É tɔ́n ahwan Sisela bɔ Mawu Mavɔmavɔ bló bɔ Sisela hɔn ɖo nukɔn tɔn, é kpó ahwankɛkɛ́ví tɔn lɛ́ɛ bǐ kpó, kpódó ahwanfuntɔ́ tɔn lɛ́ɛ bǐ kpó. Sisela jó ahwankɛkɛ́ví tɔn dó, bó zɔn afɔ bó hɔn.

¹⁶Balaaki jɛ ahwankɛkɛ́ví lɛ́ɛ kpó ahwanfuntɔ́ kɛntɔ́ yětɔn lɛ́ɛ kpó gúdo káká yi Halocɛ́ti-Goyímu. È hu ahwanfuntɔ́ Sisela tɔn lɛ́ɛ; é sɔ́ kpo mɛ ɖokpó géé ǎ.

¹⁷Sisela ka zɔn afɔ bó hɔn, bó kán wezun káká yi Yaɛ́li ɖo Hebɛ́ɛ Keni ví ɔ́ sín asi sín goxɔ mɛ, ɖó Hebɛ́ɛ Keni ví ɔ́ sín xwédo kpó axɔ́sú Hasɔ́ɔ tɔn Yavíni sín xwédo kpó ɖo ganjí.

¹⁸Yaɛ́li tɔ́n bó wá Sisela nukɔn, bó ɖɔ n'i ɖɔ: “Gǎn ce, byɔ́ fí! Byɔ̌ xɔ mɛ. Ma ɖi xɛsi ó.” Bɔ Sisela byɔ́ xɔ ɔ́ mɛ, bɔ é sɔ́ ɛ hwlá ɖó avɔ ɖé glɔ́.

¹⁹Sisela ɖɔ nú Yaɛ́li ɖɔ: “Kɛnklɛ́n, nǎ sin kpɛɖé mì má nu ɖó kɔ xú mì.” Yaɛ́li ka hun anyǔglo e mɛ nyibúnɔ́sin ɖe ɔ́, bó ná ɛ bɔ é nu, bɔ é lɛ́ dɔn avɔ ɔ́ cyɔ́n n'i.

²⁰É lɛ́ ɖɔ n'i ɖɔ: “Nɔ goxɔ ɔ́ sín ali nu. Ényí è wǎ kanbyɔ́ we ɖɔ mɛ ɖé ɖo fí a jí ɔ́, a nǎ gbɛ̌”.

²¹Nǔ cikɔ nú Sisela, bɔ é dɔ́ amlɔ bǐ gbídígbídí. Yaɛ́li ka sɔ́ zǔn kpó goxɔ ɔ́ sín só ɖokpó kpó, bó wa dɛ̌dɛ̌ bó sɛ yá ɛ, bó xwe só ɔ́ dó ta tɔn mɛ bɔ goxɔ tín ɔ́ xo ta tɔn zlɛ́ byɔ́ ayǐkúngban lanmɛ. Bɔ Sisela kú.

²²Énɛ́ ɔ́ gúdo ɔ́, Balaaki e ɖo Sisela nya wɛ ɔ́ wá, Yaɛ́li ka tɔ́n wá kpé e, bó ɖɔ n'i ɖɔ: “Wǎ má xlɛ́ mɛ e ba wɛ a ɖe ɔ́ we.” Balaaki byɔ́ goxɔ ɔ́ mɛ, bó mɔ Sisela sín cyɔ ɖo kɔ́ mɛ, bɔ só ɔ́ xo ta tɔn zlɛ́.

²³Gbe énɛ́ ɔ́ gbe ɔ́, Mawu blǒ bɔ Izlayɛ́li ví lɛ́ɛ ɖu ɖo Yavíni Kanáa xɔ́sú ɔ́ jí.

²⁴Yě jɛ gǒ mɛ nú Yavíni káká bó wá sú kún tɔn dó.