Read fon Hwɛɖɔtɔ́ 8 Bible Online

Hwɛɖɔtɔ́ 8 - fon bible

Hwɛɖɔtɔ́ 8

¹Súnnu e ɖo akɔta Eflayímu tɔn mɛ lɛ́ɛ ɖɔ nú Jedenyɔ́ɔ ɖɔ: “Étɛ́wú wɛ a wa mɔ̌ xá mǐ? Hwenu e a xwe ahwan fun xá Madiáani ví lɛ́ɛ gbé ɔ́, étɛ́wú a ma ylɔ́ mǐ bónú mǐ ná wá gɔ́ so nú we ǎ?” Bɔ yě ɖú zǐngídi xá ɛ ɖésú.

²Jedenyɔ́ɔ ka yí gbe nú yě ɖɔ: “Eflayímu sín mɛ lɛ́ɛ mi, étɛ́ wɛ un wa bɔ è sixú jlɛ̌ dó mitɔn wú? Kpɛ e mi bló ɔ́, é ma lɛ́ xɔ akwɛ́ hú ɖu e hɛ̌nnu ce e nyí Aviɛzɛ́ɛ tɔn ɔ́ ɖuɖéjí ɔ́ a?

³ Midɛɛ lɛ́ɛ wɛ Mawu jǒ Madiáani ví lɛ́ɛ sín axɔ́sú Olɛ́vu kpó Zéɛvu kpó ná. Un wa nǔ ɖěbǔ bɔ è sixú jlɛ́ d'é wú ǎ.” Xósin énɛ́ ɔ́ e Jedenyɔ́ɔ ná ɔ́ fá xomɛ nú Eflayímu sín mɛ lɛ́ɛ.

⁴Jedenyɔ́ɔ kpó mɛ tɔn afɔɖé kanwe ko (300) lɛ́ɛ kpó wá jɛ Judɛ́ɛn tɔ ɔ́ tó, bó dó asá tɔ ɔ́. Nǔ cikɔ nú yě có, yě ɖo kɛntɔ́ yětɔn lɛ́ɛ gúdo.

⁵Yě wǎ jɛ toxo e è nɔ ylɔ́ ɖɔ Sukɔ́tu ɔ́ mɛ, bɔ Jedenyɔ́ɔ ɖɔ nú to ɔ́ mɛ nu lɛ́ɛ ɖɔ: “Mi kɛnklɛ́n bó má wɔ̌xúxú nú mɛ e xwedó mì lɛ́ɛ, ɖó nǔ cikɔ nú yě. Madiáani ví lɛ́ɛ sín axɔ́sú Zɛváxi kpó Salumúna kpó gbé mɛ wɛ un ɖe.”

⁶Gǎn e ɖo toxo ɔ́ mɛ lɛ́ɛ ka ɖɔ n'i ɖɔ: “Étɛ́wú mǐdɛɛ lɛ́ɛ wɛ ɖó ná ná nǔɖuɖu ahwangɔnu towe? Axɔ́sú Zɛváxi kpó Salumúna kpó kó ɖo acɛ towe mɛ nɛ́ a?”

⁷Jedenyɔ́ɔ ka ɖɔ nú yě ɖɔ: “É nyɔ́! Nú Mawu Mavɔmavɔ ko wa jó Zɛváxi kpó Salumúna kpó nú mì ɔ́, un ná zé wun gbětótló mɛ tɔn lɛ́ɛ kpó vɛ̌wunkan lɛ́ɛ kpó dó tlɛ́n wǔtu mitɔn lɛ́ɛ.”

⁸Jedenyɔ́ɔ ka gosín fínɛ́, bó wá yi Pɛnuwɛ́li, bó byɔ́ nǔ ɖokpó ɔ́ to ɔ́ mɛ nu lɛ́ɛ. Lě e Sukɔ́tunu lɛ́ɛ ɖɔ xó gbɔn ɔ́ wɛ mɛ énɛ́ lɛ́ɛ lɔmɔ̌ ɖɔ gbɔn.

⁹Jedenyɔ́ɔ ka ɖɔ nú yě ɖɔ: “Hwenu e un ná ɖuɖéjí bó ná lɛ́ kɔ wá ɔ́, un ná mu ahohó e ɖo toxo mitɔn mɛ é.”

¹⁰Zɛváxi kpó Salumúna kpó, kpódó ahwangɔnu yětɔn e hú gbɛtɔ́ děgba atɔn afɔwó-afatɔ́n (15.000) ɔ́ kpó ko ɖo Kaakɔ́ɔ. Mɛ e kpo ɖo ahwangɔnu mɛ e gosín zǎnzǎnhwe jí tɔn ɔ́ mɛ lɛ́ɛ bǐ nɛ́, ɖó ahwanfuntɔ́ děgba atɔn (120.000) wɛ è hu ɖo yě mɛ.

¹¹Jedenyɔ́ɔ wlí ali e yě mɛ e ma nɔ nɔ fí ɖokpó ǎ lɛ́ɛ mlɛ́ é, ɖo Nɔváxi kpó Yogibóxa kpó; é tɔ́n ahwan kɛntɔ́ lɛ́ɛ sín ahwangɔnu e lin ɖɔ émí ɖo vivo mɛ lɛ́ɛ é.

¹²Madiáani ví lɛ́ɛ sín axɔ́sú we lɛ́ɛ, Zɛváxi kpó Salumúna kpó hɔn; lo ɔ́, Jedenyɔ́ɔ jɛ gǔdo yětɔn, bó wlí yě bɔ ahwangɔnu ɔ́ bǐ gba dó.

¹³Ée Jedenyɔ́ɔ lɛ́ kɔ sín ahwangbénu bó gbɔn Ɛlɛ́si sín kpó ɔ́ ta ɔ́,

¹⁴é wlí dɔ̌nkpɛvú Sukɔ́tu tɔn ɖokpó, bó kan nǔ byɔ́ ɛ; dɔ̌nkpɛvú ɔ́ ka wlán togán lɛ́ɛ kpó tomɛxó lɛ́ɛ kpó sín nyǐkɔ n'i; yě bǐ bló gbɛtɔ́ kanɖé gbantɔ́n-nukún-we (77).

¹⁵Énɛ́ ɔ́ gúdo ɔ́, Jedenyɔ́ɔ wá yi Sukɔ́tunu lɛ́ɛ gɔ́n, bó ɖɔ nú yě ɖɔ: “Mi ma flín ɖɔ mi zun mì, bó ɖɔ nú mì ɖɔ étɛ́wú émí ɖó ná ná nǔɖuɖu mɛ nyɛtɔn e nǔ cikɔ ná lɛ́ɛ é jí a? Đɔ Zɛváxi kpó Salumúna kpó kó ɖo acɛ nyɛtɔn mɛ wɛ a jí a? É nyɔ́! Zɛváxi kpó Salumúna ɔ́ kpó ɖíe un kplá wá nú mi e.”

¹⁶Énɛ́ ɔ́, Jedenyɔ́ɔ zé wun kpó vɛ̌wunkan gbětótló mɛ tɔn lɛ́ɛ kpó dó dɔn tó nú tomɛxó Sukɔ́tu tɔn lɛ́ɛ.

¹⁷É lɛ́ mu ahohó Pɛnuwɛ́li tɔn ɔ́, bó hu to ɔ́ mɛ nu lɛ́ɛ.

¹⁸Énɛ́ ɔ́ gúdo ɔ́, é kanbyɔ́ Zɛváxi kpó Salumúna kpó ɖɔ: “Nɛ̌ wɛ mɛ e mi hu ɖo Tabɔ́ɔ lɛ́ɛ cí?” Yě yí gbe ɖɔ: “Yě ɖi we. Yě mɛ ɖokpó ɖokpó ɖi axɔ́ví.”

¹⁹Jedenyɔ́ɔ ka sú xó ɖɔ: “Nɔví ce tɔ́jinɔji lɛ́ɛ wɛ. Un xwlé Mawu nú mi ɖɔ: Mawu Mavɔmavɔ ɖo gbɛ! Nú é má nyí ɖɔ mi hu yě wɛ din ǎ ɔ́, nyɛ lɔmɔ̌ ɖo mi ná hu wɛ ǎ.”

²⁰Énɛ́ ɔ́, é ɖɔ nú Yɛtɛ́ɛ, vǐ súnnu tɔn ɖaxó ɔ́ ɖɔ: “Sí te bó hu yě.” Lo ɔ́, é glá bó ɖe hwǐ tɔn tɔ́n ǎ, ɖó é kpo ɖo kpɛví, bó ɖo xɛsi ɖi wɛ.

²¹Zɛváxi kpó Salumúna kpó ka ɖɔ nú Jedenyɔ́ɔ ɖɔ: “Hwi ɖésúnɔ ní gbɔ bó hu mǐ, ɖó súnnu glegbenu wɛ hɛn ɔ́, é ná bló nǔ énɛ́!” Bɔ Jedenyɔ́ɔ hu axɔ́sú we lɛ́ɛ, bó bɛ́ acɔ́nú e ɖo lǎkúnmí yětɔn sín kɔ lɛ́ɛ.

²²Énɛ́ ɔ́ gúdo ɔ́, Izlayɛ́li ví lɛ́ɛ ɖɔ nú Jedenyɔ́ɔ ɖɔ: “Nyǐ gǎn nú mǐ, bɔ vǐ towe kpó vǐvú towe kpó ná jɛ tɛn towe mɛ; ɖó a hwlɛ̌n mǐ sín Madiáani ví lɛ́ɛ sí.”

²³Jedenyɔ́ɔ ka ɖɔ nú yě ɖɔ: “Éeǒ! Un ná nyí gǎn mitɔn ǎ, vǐ ce lɔmɔ̌ ɖo gǎn mitɔn ná nyí wɛ ǎ. Mawu Mavɔmavɔ wɛ ná nyí gǎn mitɔn.”

²⁴É lɛ́ ɖɔ: “Un ka jló ná byɔ́ nǔɖé mi: mi mɛ ɖokpó ɖokpó ní ná mì ganví e mi sɔ́ ɖo nǔ e mi hɛn wá sín ahwangbénu lɛ́ɛ mɛ lɛ́ɛ ɖokpó ɖokpó.” Nǔgbó ɔ́, Madiáani ví lɛ́ɛ nɔ dó siká ganví súnnu e nɔ́ nɔ gbětótló mɛ lɛ́ɛ bǐ ɖɔhun.

²⁵Izlayɛ́li ví lɛ́ɛ ɖɔ: “Mǐ ná ná we kpó jlǒ ɖagbe kpó.” Ée yě ɖɔ mɔ̌ ɔ́, yě tɛ́ awu ɖaxó ɖokpó nyi kɔ́ mɛ, bɔ mɛ ɖokpó ɖokpó nɔ sɔ́ ganví e ɖo nǔ e é hɛn wá sín ahwangbénu lɛ́ɛ mɛ lɛ́ɛ ɖokpó nyi jí.

²⁶Siká ganví e Jedenyɔ́ɔ byɔ́ bɔ è nǎ ɛ lɛ́ɛ bǐ ɖibla da kilóo ko. É lɛ́ yí acɔ́nú lɛ́ɛ, tógbé lɛ́ɛ kpó awu vɔvɔ ɖagbe ɖagbe e axɔ́sú Madiáani ví lɛ́ɛ nɔ́ dó lɛ́ɛ kpó. Mɔ̌ ɖokpó ɔ́, é yí wlɔ e yě sɔ́ dó lǎkúnmí yětɔn lɛ́ɛ sín kɔ, bó dó ɖó acɔ́ nú yě lɛ́ɛ é.

²⁷Jedenyɔ́ɔ zé siká ɔ́ dó bló bǒcyɔ ɖokpó ná, bó sɔ́ ɖó gletoxo tɔn e è nɔ ylɔ́ ɖɔ Ɔfla ɔ́ mɛ. Izlayɛ́li ví lɛ́ɛ jɛ vodún énɛ́ ɔ́ sɛn jí, bɔ é húzú afɔklɛ́nnú nú Jedenyɔ́ɔ kpó hɛ̌nnu tɔn kpó.

²⁸Sín hwenu e Jedenyɔ́ɔ ɖu ɖo Madiáani ví lɛ́ɛ jí ɔ́, yě nɔ acɛkpikpa Izlayɛ́li ví lɛ́ɛ tɔn glɔ́; Madiáani ví lɛ́ɛ sɔ́ zé ta gbeɖé ǎ. To ɔ́ nɔ vivo mɛ xɔ xwe kanɖé, xwe nabí e Jedenyɔ́ɔ nɔ gbɛ xɔ é.

²⁹Jedenyɔ́ɔ Yoaci ví e è nɔ lɛ́ ylɔ́ ɖɔ Yelubáalu ɔ́ lɛ́ kɔ yi xwé tɔn gbe.

³⁰É ɖó vǐ súnnu kanɖé gban (70), ɖó asi gěgé wɛ é ɖó.

³¹Asi tɔn e nɔ Sikɛ́mu ɔ́ lɔ ji vǐ súnnu ɖokpó n'i, bɔ é sun nyǐ vǐ ɔ́ ɖɔ Abimɛlɛ́ki.

³²Kpikpoxɔmɛ nyɔ́ nú Jedenyɔ́ɔ ganjí, cóbɔ é wá kú, bɔ è yi ɖi ɖó Ɔfla, hɛ̌nnu Aviɛzɛ́ɛ tɔn ɔ́ sín toxo mɛ, ɖo tɔ́ tɔn Yoaci ɔ́ sín yɔdo mɛ.

³³Ée Jedenyɔ́ɔ kú ɔ́, Izlayɛ́li ví lɛ́ɛ lɛ́ jɛ vodún Baalu sɛn jí. Baalu-Bɛlíti wɛ yě sɔ́ dó ɖó vodún ná.

³⁴Yě wɔn Mawu Mavɔmavɔ, Mawu yětɔn e hwlɛ́n yě sín kɛntɔ́ e lɛ́dó yě lɛ́ɛ bǐ sí é.

³⁵Nǔ ɖagbe e Jedenyɔ́ɔ e nɔ lɛ́ nyí Yelubáalu ɔ́ wa nú Izlayɛ́li ví lɛ́ɛ ɔ́, yě wa nǔ ɖěbǔ dó tunwun nú hɛ̌nnu tɔn ǎ.