Read fon Hwɛɖɔtɔ́ 9 Bible Online

Hwɛɖɔtɔ́ 9 - fon bible

Hwɛɖɔtɔ́ 9

¹Abimɛlɛ́ki Yelubáalu e è nɔ lɛ́ ylɔ́ ɖɔ Jedenyɔ́ɔ ɔ́ sín vǐ ɔ́ yi Sikɛ́mu, bó ɖɔ xó nú nylɔ tɔn lɛ́ɛ kpó nɔ tɔn sín hɛ̌nnu ɔ́ bǐ kpó. É ɖɔ nú yě ɖɔ:

²“Mi yi kanbyɔ́ tonukún lɛ́ɛ ɖɔ yě ba ɖɔ Yelubáalu sín vǐ kanɖé gban (70) lɛ́ɛ ní kpa acɛ nú yě a jí, abǐ mɛ ɖokpó géé ní kpa acɛ nú yě? Mi ní ka flín ɖɔ hun mitɔn wɛ un nyí.”

³Nylɔ tɔn lɛ́ɛ ka wlí xó ɔ́ ɖɔ nú tonukún Sikɛ́mu tɔn lɛ́ɛ, bɔ yědɛɛ ɖe gbeta tɔ́n ɖɔ émí ná nɔ Abimɛlɛ́ki jí ɖó mɛ émítɔn wɛ é nyí.

⁴Yě ná ɛ gankwɛ́ kanɖé gban (70) e yě bɛ̌ tɔ́n sín Baalu-Bɛlíti sín xɔ mɛ lɛ́ɛ. Abimɛlɛ́ki zé akwɛ́ énɛ́ ɔ́ dó da nǔvɔ́nɔ lɛ́ɛ kpó gběvún lɛ́ɛ kpó, bónú yě ná xwedó e.

⁵Abimɛlɛ́ki yi tɔ́ tɔn xwé ɖo Ɔfla, bó hu nɔví tɔn kanɖé gban (70) e nyí vǐ súnnu Yelubáalu tɔn lɛ́ɛ, ɖo awǐnnya ɖokpó ɔ́ jí. Yotámu e nyí yɔkpɔ́vú bǐ ɖo yě mɛ ɔ́ kɛ́ɖɛ́ wɛ gán ɖ'é mɛ, ɖó é hɔn hwlá.

⁶Tonukún Sikɛ́mu tɔn lɛ́ɛ kpó mɛ e ɖo Bɛti-Milóo lɛ́ɛ bǐ kpó sɛ ta kplé. Yě yi cɛ́nitín e ɖo Sikɛ́mu ɔ́ kɔn, ɖo awǐnnya e é tun te ɔ́ kpá, bó sɔ́ Abimɛlɛ́ki axɔ́sú.

⁷È wǎ ɖɔ lě e Abimɛlɛ́ki nyí axɔ́sú gbɔn ɔ́ nú Yotámu. É ka yi Galizímu só ɔ́ ta aga bó sú xó lélé ɖɔ: “Sikɛ́munu lɛ́ɛ mi, ényí mi jló ɖɔ Mawu ní ɖótó émí hǔn, mi bo ɖótó nyɛ.

⁸“Gbe ɖokpó wɛ tíin, bɔ atín lɛ́ɛ ɖe gbeta tɔ́n ɖɔ émí na sɔ́ axɔ́sú ɖokpó. Yě ɖɔ nú olívutín ɖɔ é ní ɖu axɔ́sú ɖo émí nu.

⁹Lo ɔ́, olívutín ɖɔ nú yě ɖɔ: ‘Mi lin ɖɔ nyɛ ná jó ami e un nɔ ná, bɔ Mawu kpó gbɛtɔ́ kpó bǐ nɔ kpa ɔ́ dó, bó ná dó ya nú nyɛɖée bó ɖɔ un ɖo axɔ́sú ɖu wɛ ɖo atín ɖě lɛ́ɛ nu a?’

¹⁰Énɛ́ ɔ́, atín lɛ́ɛ ɖɔ nú fígitín ɖɔ éyɛ́ ní wá ɖu axɔ́sú ɖo émí nu.

¹¹Lo ɔ́, fígitín ɖɔ nú yě ɖɔ: ‘Mi lin ɖɔ nyɛ na jó sínsɛ́n víví e un nɔ ná ɔ́ dó, bó ná dó ya nú nyɛɖée, bó ɖɔ un ɖo axɔ́sú ɖu nú atín ɖě lɛ́ɛ wɛ a?’

¹²Yě wa ɖɔ nú vǐwuntín ɖɔ é ní wá ɖu axɔ́sú ɖo émí nu.

¹³Lo ɔ́, vǐwuntín ɖɔ nú yě ɖɔ: ‘Mi lin ɖɔ nyɛ ná jó vɛ̌ɛn e un nɔ ná, bɔ é nɔ dó xomɛhunhun nú Mawu kpó gbɛtɔ́ kpó ɔ́ dó, bó ná dó ya nú nyɛɖée ɖɔ un ɖo axɔ́sú ɖu nú atín lɛ́ɛ wɛ a?’

¹⁴Wǎgbɔ tɔn ɔ́, atín lɛ́ɛ ɖó gbe kpɔ́ bó ɖɔ nú wunkan ɖɔ é ní wá ɖu axɔ́sú ɖo émí nu.

¹⁵Bɔ wunkan ɖɔ nú yě ɖɔ: ‘Ényí mi jló ná sɔ́ mì axɔ́sú nǔgbó hǔn, mi wá bɛ yɛ ɖo glɔ̌ ce. É má nyí mɔ̌ ǎ ɔ́, myɔ ná tɔ́n sín wun ce lɛ́ɛ mɛ, bó ná fyɔ́ sɛ́dlutín Libáan tɔn lɛ́ɛ ɖésúnɔ.’ ”

¹⁶Yotámu lɛ́ ɖɔ: “Midɛɛ lɛ́ɛ ɔ́, ée mi sɔ́ axɔ́sú Abimɛlɛ́ki ɔ́, mi bló kpó ayijlɔ́jlɔ́ kpó a? Mi zán zǐnzán ɖagbe xá Yelubáalu kpó hɛ̌nnu tɔn kpó a? Nǔ ɖagbe e é wa nú mi lɛ́ɛ ɔ́, mi tunwun n'i a?

¹⁷Đó tɔ́ ce fun ahwan nú mi; é ɖibla kú bó dó hwlɛ́n mi sín Madiáani ví lɛ́ɛ sí.

¹⁸Din ɔ́ ɖíe mi ka fɔ́n gǔ dó hɛ̌nnu tɔn jí e; mi hu vǐ tɔn súnnu kanɖé gban (70) lɛ́ɛ ɖo awǐnnya ɖokpó ɔ́ jí, bó sɔ́ Abimɛlɛ́ki e é ji ɖo mɛsɛntɔ́ tɔn xomɛ ɔ́, bɔ é nyí Sikɛ́mu xɔ́sú, ɖó nɔví mitɔn e é nyí ɔ́ wú.

¹⁹Égbé din ɔ́, ényí kpó ayijlɔ́jlɔ́ kpó wɛ mi wa nǔ mɔ̌ nú Yelubáalu kpó hɛ̌nnu tɔn kpó hǔn, Abimɛlɛ́ki ní bó nyí awǎjijɛ mitɔn, bónú mi lɔmɔ̌ ní nyí awǎjijɛ éyɛ́ tɔn.

²⁰É má nyí mɔ̌ ǎ hǔn, myɔ ná tɔ́n sín Abimɛlɛ́ki mɛ, bó wá fyɔ́ Sikɛ́munu lɛ́ɛ kpó Bɛti-Milóonu lɛ́ɛ kpo; bó ná tɔ́n sín Sikɛ́munu lɛ́ɛ kpó Bɛti-Milóonu lɛ́ɛ kpó mɛ, bó ná fyɔ́ Abimɛlɛ́ki.”

²¹Énɛ́ ɔ́ gúdo ɔ́, Yotámu hɔn yi hwlá cí Bɛ̌, ɖó é ɖo xɛsi ɖi nú fofó tɔn Abimɛlɛ́ki wɛ.

²²Abimɛlɛ́ki ɖu axɔ́sú ɖo Izlayɛ́li xɔ xwe atɔn.

²³Énɛ́ ɔ́ gúdo ɔ́, Mawu sɛ́ yɛ nyanya ɖé dó bɔ é dɔn hunnyahunnya byɔ́ axɔ́sú Abimɛlɛ́ki kpó Sikɛ́munu lɛ́ɛ kpó tɛ́ntin, bɔ yě fɔ́n gǔ dó jǐ tɔn.

²⁴Énɛ́ ɔ́, adǎka e è xo Yelubáalu sín vǐ súnnu kanɖé gban (70) lɛ́ɛ wú ɔ́, yě bǐ ná sú axɔ́ tɔn; Abimɛlɛ́ki ná sú axɔ́ tɔn, ɖó é hu nɔví tɔn lɛ́ɛ, Sikɛ́munu lɛ́ɛ ná sú axɔ́ tɔn, ɖó yě wɛ dó alɔ ɛ, bɔ é hu nɔví tɔn lɛ́ɛ.

²⁵Sikɛ́munu lɛ́ɛ sɔ́ mɛ lɛ́ɛ ɖó só lɛ́ɛ ta bɔ yě tɔ wu nú Abimɛlɛ́ki; mɛ ɖěbǔ ɖo ali jí wá xweyǐgbe, bó gbɔn akpá yětɔn ɔ́, yě nɔ́ yí mɛ ɔ́ sín nǔ lɛ́ɛ bǐ. È yi ɖɔ nǔ e ɖo jijɛ wɛ nɛ́ lɛ́ɛ nú Abimɛlɛ́ki.

²⁶Gaali Evɛ́di ví ɔ́, wá Sikɛ́mu kpó nɔví tɔn lɛ́ɛ kpó gbe ɖokpó. Sikɛ́munu lɛ́ɛ ka ɖeji dó wǔtu tɔn.

²⁷Yě yi vǐwungbo yětɔn lɛ́ɛ mɛ, bó gbɛ vǐwun, bó li; énɛ́ ɔ́ gúdo ɔ́, yě ylɔ́ agɔ̌. Yě yi vodún yětɔn xwé, bó ɖu agɔ̌, lobo dó nu Abimɛlɛ́ki.

²⁸Gaali, Evɛ́di ví ɔ́ kanbyɔ́ yě ɖɔ: “Mɛ̌ wɛ nɔ nyí Abimɛlɛ́ki? Étɛ́ wɛ Sikɛ́mu toxo ɔ́ nyí bɔ mǐ na nɔ Abimɛlɛ́ki sín acɛ mɛ? Yelubáalu ví ɔ́ wɛ ǎ cé? Bɔ Zevúlu ka nyí azɔ̌gán tɔn ǎ cé? Mi nɔ Hamɔ́ɔ mɛ lɛ́ɛ sín acɛ mɛ; ɖó Hamɔ́ɔ wɛ ɖó Sikɛ́mu toxo ɔ́ ayǐ. Amɔ̌, mǐdɛɛ lɛ́ɛ ɔ́, aniwú mǐ ná nɔ Abimɛlɛ́ki sín acɛ mɛ?

²⁹Nyɛ ɔ́, nú alɔ ce mɛ wɛ Sikɛ́mu toxo ɔ́ ko ɖe ɔ́, un ná flí Abimɛlɛ́ki sín acɛkpikpa ɔ́ xwe.” Énɛ́ ɔ́ gúdo ɔ́, Gaali sú xó bó ɖɔ: “Abimɛlɛ́ki e, yǐ gbɛtɔ́ gɔ́ nú ahwangɔnu towe, bó wá fun ahwan xá mì.”

³⁰Ée Zevúlu, tokpɔngán e ɖo toxo ɔ́ mɛ ɔ́ se xó e Gaali, Evɛ́di ví ɔ́ ɖɔ lɛ́ɛ ɔ́, é sin xomɛ.

³¹É sɛ́ mɛ dó Abimɛlɛ́ki ɖo nǔglɔ́, bó ɖɔ yě ní yi ɖɔ n'i ɖɔ: “Gaali, Evɛ́di ví ɔ́ kpó nɔví tɔn lɛ́ɛ kpó wá Sikɛ́mu din bó ɖo to ɔ́ mɛ nu lɛ́ɛ fɔ́n dó jǐ towe wɛ.

³²Din ɔ́, hwi kpó ahwan towe lɛ́ɛ kpó ní tɔ́n zǎn mɛ din bó yi tɔ wu ɖo zunkan mɛ.

³³Sɔ zǎnzǎn hwenu e hwe ná tɔ́n ɔ́, a nǎ wá tɔ́n ahwan toxo ɔ́, bɔ hwenu e Gaali kpó ahwan tɔn lɛ́ɛ kpó ná tɔ́n wá kpé we ɔ́, a nǎ wa nǔ xá yě lě e hlɔ̌nhlɔ́n towe kpé wú gbɔn é.”

³⁴Ée é jɛ zǎn mɛ ɔ́, Abimɛlɛ́ki kpó ahwan tɔn lɛ́ɛ kpó má yěɖée ɖó gɔnu ɛnɛ, lobo yi tɔ wu ɖo Sikɛ́mu kpá.

³⁵Ée Gaali tɔ́n sín toxo ɔ́ mɛ, bó yi nɔ te ɖo hɔntogbó ɔ́ kpá ɔ́, Abimɛlɛ́ki kpó gbɛ̌ta tɔn bǐ kpó tɔ́n sín fí e yě tɔ wu ɖó é.

³⁶Bɔ Gaali mɔ yě, bó ɖɔ nú Zevúlu ɖɔ: “Vɛ̌ kpɔ́n! Mɛ ɖé lɛ́ɛ ɖo te jɛ sín só lɛ́ɛ jí wɛ.” Zevúlu ka ɖɔ: “Éeǒ mɛ! Só lɛ́ɛ sín yɛ dó mɔ gbɛtɔ́ ná wɛ a ɖe.”

³⁷Gaali lɛ́ yí xó, bó ɖɔ: “Kpɔ́n! Gbɛtɔ́ wɛ ɖo te jɛ sín só e ɖo to ɔ́ tɛ́ntin ɔ́ jí wɛ ganjí; bɔ gbɛ̌ta ɖěvo gbɔn nǔkantɔ́ lɛ́ɛ sín cɛ́nitín sín ali jǎwe.”

³⁸Zevúlu ka ɖɔ n'i ɖɔ: “Nu e flé wɛ a nɔ ɖe lɛ́ɛ lo? A ma ko ɖɔ mɛ̌ wɛ nɔ́ nyí Abimɛlɛ́ki ɔ́, bɔ mǐ ná jó mǐɖée dó, bɔ é ná kpa acɛ ná a jí a? Din ɔ́, énɛ́ é ja kpó mɛ e a gbɛ́ wǎn ná lɛ́ɛ kpó nɛ́; bo yi fun ahwan xá ɛ bo!”

³⁹Énɛ́ ɔ́, Gaali nɔ Sikɛ́munu lɛ́ɛ nu, bó yi tɔ́n ahwan Abimɛlɛ́ki.

⁴⁰Abimɛlɛ́ki hú gǎn ɛ bɔ é hɔn, bɔ Abimɛlɛ́ki jɛ gúdo tɔn; gbɛtɔ́ gěgé kú kɔn nyi ayǐ káká yi toxo ɔ́ sín hɔntogbó ta.

⁴¹Abimɛlɛ́ki yi jɛ agban ɖó Aluma, bɔ Zevúlu nya Gaali kpó nɔví tɔn lɛ́ɛ kpó sín Sikɛ́mu, lobo dó sɛ́n nú yě ɖɔ yě ní má lɛ́ kɔ wá toxo ɔ́ mɛ ó.

⁴²Ayǐhɔ́ngbe tɔn ɔ́, Sikɛ́munu lɛ́ɛ ɖo nǔ sɔ́ wɛ, bó ná yi gle mɛ, bɔ è wǎ ɖɔ nú Abimɛlɛ́ki.

⁴³Abimɛlɛ́ki ka kplá ahwan tɔn lɛ́ɛ, bó má yě ɖó gɔnu atɔn, lobo tɔ wu nú yě ɖo gle ɔ́ mɛ. Bɔ ée é mɔ Sikɛ́munu lɛ́ɛ tɔ́n sín toxo ɔ́ mɛ ɔ́, é kpó mɛ tɔn lɛ́ɛ kpó zun dó yě jí bó ná hu yě.

⁴⁴Abimɛlɛ́ki kpó gbɛ̌ta e nu é ɖe é kpó bɛ́ wezun bó yi sí ahwan te ɖo toxo ɔ́ sín hɔntogbó jí; bɔ gbɛ̌ta we ɖě lɛ́ɛ zɔn mɛ e ɖo gle ɔ́ mɛ lɛ́ɛ jí bó hu yě.

⁴⁵Abimɛlɛ́ki fun ahwan xá mɛ e ɖo toxo ɔ́ mɛ lɛ́ɛ ɖo kéze ɔ́ bǐ mɛ, bó yí toxo ɔ́; é hu to ɔ́ mɛ nu lɛ́ɛ, bó gba toxo ɔ́ bǐ sésé, lobo fúnfún jɛ do tɔn nu bó hɛn ayǐkúngban ɔ́ gblé bɔ mɛ ɖé sɔ́ sixú nɔ jí ǎ.

⁴⁶Ée Migidalu-Sikɛ́munu lɛ́ɛ se mɔ̌ ɔ́, yě bǐ yi byɔ́ do e è kun dó vodún Baalu-Bɛlíti xɔ glɔ́ ɔ́ mɛ.

⁴⁷È wǎ ɖɔ nú Abimɛlɛ́ki ɖɔ yě hɔn hwlá cí tɛn énɛ́ ɔ́ mɛ.

⁴⁸Énɛ́ ɔ́, é yi Salumɔ́ni só ta kpó ahwan tɔn lɛ́ɛ kpó. É zé asyɔ́ví, bó sɛ́n atínla ɖokpó, bó sɔ́ ɖó abɔ̌ta. É ɖe gbe nú ahwan tɔn lɛ́ɛ ɖɔ yě nǐ yá wǔ bló nǔ ɖokpó ɔ́.

⁴⁹Bɔ mɛ ɖokpó ɖokpó sɛ́n atínla ɖokpó ɖokpó, bó xwedó Abimɛlɛ́ki. Yě yi xo atínla lɛ́ɛ kplé ɖó do ɔ́ nu, bó dó zo kpó mɛ e ɖ'é mɛ lɛ́ɛ bǐ kpó. Lě e Migidalu-Sikɛ́munu lɛ́ɛ bǐ kú gbɔn é nɛ́; súnnu kpó nyɔ̌nu kpó e kú lɛ́ɛ yi afatɔ́n (1.000) mɔ̌.

⁵⁰Abimɛlɛ́ki gosín fínɛ́, bó yi Tevesi. É xá toxo ɔ́ bó yí.

⁵¹Tocɔ́xɔ ɖé ka ɖo toxo ɔ́ tɛ́ntin, bɔ è mɛ dǒ lɛ́ lɛ̌ dó. Fínɛ́ wɛ mɛ e ɖo toxo ɔ́ mɛ lɛ́ɛ, súnnu kpó nyɔ̌nu kpó, kpódó tonukún lɛ́ɛ kpó bǐ yi hɔn hwlá cí. Yě sú hɔn dó ta, bó yi cí xɔ ɔ́ ta aga.

⁵²Abimɛlɛ́ki wá ahohó ɔ́ kɔn, bó ná tɔ́n ahwan yě. É sɛ yi ahohó ɔ́ sín hɔnlinu, bó ná dó xɔ ɔ́ zo.

⁵³ Lo ɔ́, nǎwe ɖé nyi sé ɖaxó ɖé dó ta tɔn bó fɛ́n ahɔnká ɛ.

⁵⁴Tlóló ɔ́, Abimɛlɛ́ki ylɔ́ dɔ̌nkpɛvú e hɛn ahwanfunnú tɔn lɛ́ɛ ɔ́, bó ɖe gbe n'i ɖɔ: “Zě hwǐ towe bó hu mì kpé bónú è ma wá ɖɔ nyɔ̌nu wɛ hu mì ó.” Énɛ́ ɔ́, dɔ̌nkpɛvú ɔ́ lun hwǐ ɔ́ dó lan tɔn mɛ bɔ Abimɛlɛ́ki kú.

⁵⁵Ée Izlayɛ́li ví lɛ́ɛ mɔ ɖɔ é kú ɔ́, yě mɛ ɖokpó ɖokpó lɛ́ kɔ yi xwé yětɔn lɛ́ɛ gbe.

⁵⁶Énɛ́ ɔ́, Abimɛlɛ́ki ɔ́, nɔví tɔn kanɖé gban (70) e é hu, bó dó wa nǔ nyanya dó tɔ́ tɔn wú ɔ́, Mawu sú axɔ́ tɔn ɛ.

⁵⁷Nǔ nyanya e Sikɛ́munu lɛ́ɛ wa ɔ́ bǐ sín axɔ́ wɛ Mawu sú yě lɔmɔ̌. Nu e Yotámu Yelubáalu ví ɔ́ dó yě lɛ́ɛ bí wɛ ɖi yě wú.