Read fon Judi 1 Bible Online

Judi 1 - fon bible

Judi 1

¹ Nyɛ Judi mɛsɛntɔ́ Jezu Klísu tɔn, Jaki sín nɔví ɔ́ wɛ ɖo wěma élɔ́ wlán wɛ; nyɛ wɛ ɖo wěma élɔ́ wlán sɛ́ dó mɛ e Mawu Tɔ́ ɔ́ ylɔ́ bɔ yě ɖo gbɛ ɖo wǎn yíyí tɔn mɛ, bɔ Jezu Klísu ɖo yě hɛn wɛ lɛ́ɛ wɛ.

²Nǔbláwǔkúnúmɛ Mawu tɔn kpódó fífá tɔn kpó, kpódó wǎn yíyí tɔn kpán ní nɔ kpɔ́ xá mi bó túnflá.

³Mɛvívɛ́ná ce lɛ́ɛ mi, un ko ɖo lě e un ná wa gbɔn, bó ná wlán wěma sɛ́ dó mi dó hwlɛngán ɖokpó ɔ́ e mǐ ɖó ɔ́ wú ɔ́ ba wɛ syɛ́nsyɛ́n; énɛ́ ɔ́ lin wɛ un ɖe bó wá mɔ ɖɔ é ɖo dandan mɛ nú mì ɖɔ ma wlán sɛ́ dó mi, bó ná dó ná akɔ́nkpinkpan mi, bónú mi ná fun ahwan nú nǔɖiɖi e Mawu ná mɛɖeɖóvo tɔn lɛ́ɛ bǐ azɔn ɖokpó géé bɔ xó fó é.

⁴Nǔgbó ɔ́, mɛdídá ɖé lɛ́ɛ lun byɔ́ mi mɛ, bó nɔ́ kpé ta do nú wɛn e ɖɔ xó dó nyɔ̌ná Mawu mǐtɔn tɔn wú é; yě bló mɔ̌, bó ná dó ɖe xlɛ́ ɖɔ gbɛ kwíji kwíji e zán wɛ émí ɖe ɔ́ sɔgbe, bó nɔ́ gbɛ́ Jezu Klísu e nyí Mɛ̌si mǐtɔn ɖokpó géé, bó nyí Aklúnɔ mǐtɔn é. É ko lín din bɔ Mawuxówéma ɔ́ ko ɖɔ hwɛ e è ɖǒ nú yě ɔ́.

⁵ Nǔ élɔ́ lɛ́ɛ e ɖɔ nú mi gbé wɛ un ja din ɔ́, mi ko tunwun ganjí có un ka jló ná lɛ́ flín mi ɖɔ ée Aklúnɔ hwlɛ́n togun Izlayɛ́li tɔn ɔ́ gán, bó ɖe e sín Ejípu gúdo ɔ́, é wá hu mɛ e gbɛ́ ɖɔ émí kún ná ɖi nǔ n'i ó lɛ́ɛ bǐ.

⁶Mi flín wɛnsagun e wa nǔ zɛ acɛ e Mawu ná yě ɔ́ wú lɛ́ɛ; yě jó nɔtɛn yě ɖésúnɔ tɔn dó, bɔ Mawu dó wlɔ yě káká sɔ́yi mavɔ mavɔ, bó sɔ́ yě dó zǐnflú mɛ, ɖo do gɔngɔn mɛ nú azǎn ɖaxó ɔ́; azǎn énɛ́ gbe wɛ Mawu ná ɖó hwɛ nú yě.

⁷ Mi flín Sodɔ́mu kpó Gomɔ́ɔ kpó, kpódó to e sɛkpɔ́ yě lɛ́ɛ kpó; to énɛ́ mɛ nu lɛ́ɛ wa nǔ wɛnsagun énɛ́ lɛ́ɛ ɖɔhun; yě lɛ́ jó yěɖée dó nú agalilɛ kpódó hɛ̌nnú wiwa kpó; to énɛ́ mɛ nu lɛ́ɛ ɔ́, è sɔ́ zo mavɔ mavɔ dó ɖo tó dɔn nú yě wɛ; è ɖo tó énɛ́ ɔ́ dɔn nú yě wɛ, bó dó ɖo sɛ́n dó nú mɛ bǐ wɛ.

⁸Alɔkpa ɖokpó ɔ́ wɛ mɛdídá énɛ́ lɛ́ɛ nɔ wa nǔ gbɔn: dlɔ̌ e yě nɔ́ kú lɛ́ɛ nɔ́ dɔn yě bɔ yě nɔ dɔn agbaza yětɔn blí; yě sɔ́ acɛkpikpa Mawu tɔn dó mɔ nǔɖé ná ǎ, bó nɔ́ zun nǔɖíɖó susunɔ e ɖo sɛ́xwé lɛ́ɛ.

⁹ Lo ɔ́, hwenu e wɛnsagun ɖaxó Micɛ́li ɖo nǔ dɔn xá awǒvi wɛ, bó ɖo Mɔyízi cyɔ hwlɛ́n xá ɛ wɛ ɔ́, é glá sɔ́ zun dó ɖó hwɛ n'i ǎ; lo ɔ́, é ɖɔ n'i kpowun ɖɔ: “Aklúnɔ ní dɔn tó nú we.”

¹⁰Lo ɔ́, mɛdídá énɛ́ lɛ́ɛ ɔ́, yě nɔ lin tamɛ kpɔ́n cóbó nɔ wa nǔ ǎ. Yě cí gběkanlin ɖɔhun; nǔ e wú yě ma mɔ nukúnnú jɛ ǎ ɔ́ wɛ yě nɔ zun; nǔtunwuntunwun e kpó yě kpó jɔ lɛ́ɛ ɔ́, kú wɛ é nɔ nyí nú yě.

¹¹ Heelú yě, ɖó ali e Kanyɛ́ɛ gbɔn ɔ́ wɛ yě mlɛ́. Yě jó yěɖée dó nú nǔ wa nyi do, bó ná dó mɔ akwɛ́ Baláamu ɖɔhun. Yě dɔn, ɖó yě fɔ́n gǔ Kolée ɖɔhun.

¹²Kpɔ́nɔxámɛ yětɔn ɔ́, afɔklɛ́nnú wɛ é nyí ɖo nɔví nɔví nǔɖuɖu mitɔn kɔn, fí e yě nɔ ɖu agɔ̌ ɖe ma ɖó winnyá é. Yě ɖésúnɔ kɛ́ɖɛ́ wú jɛ́n yě nɔ kpé nukún dó. Yě cí akpɔ́kpɔ́ e jɔhɔn nɔ zé, bɔ é ma nɔ ná jǐ ǎ é ɖɔhun. Yě cí atín e hwenu yě ná ná sínsɛ́n dó é ná bó su ɔ́, yě ma nɔ ná sínsɛ́n ǎ lɛ́ɛ ɖɔhun. Yě cí atín e è hɔn dó ɖɔ, bɔ yě kú bǐ é ɖɔhun.

¹³Yě cí xu e ɖo xixo wɛ kpó adǎn kpó ɔ́ ɖɔhun, bɔ winnyánú wiwa yětɔn lɛ́ɛ nɔ cí fún e nyɛ wɛ xu ɔ́ ɖe é ɖɔhun. Yě cí sunví e ɖo flúflú wɛ lɛ́ɛ ɖɔhun, bɔ Mawu sɔ́ tɛnmɛ ɖokpó ɖ'ayǐ nú yě káká sɔ́yi, ɖo ablu gɔngɔn ɔ́ mɛ.

¹⁴ Henɔci e nyí jijimɛ tɛ́nwegɔ́ ɔ́ bɛ́ sín Adámu jí ɔ́, é ko lín xóxó din bɔ é dó wɛn élɔ́ e Mawu sɔ́ dó ayi mɛ n'i ɖɔ é ní dó e; é ɖɔ: “Mi kpɔ́n! Aklúnɔ kpó wɛnsagun mímɛ́ tɔn wɔ̌buwɔ́bú lɛ́ɛ kpó ja, bó ná ɖɔ hwɛ xá mɛ bǐ, bó ná ɖó hwɛ nú mɛdídá lɛ́ɛ bǐ; yě ná bló mɔ̌, ɖó nǔ nyanya e mɛdídá lɛ́ɛ wa hwenu e yě fɔ́n gǔ dó Mawu jí lɛ́ɛ bǐ, kpódó xó baɖabaɖa e hwɛhutɔ́ énɛ́ lɛ́ɛ e ma nɔ ɖó sísí nú Mawu ǎ lɛ́ɛ ɖɔ dó Mawu wú ɔ́ bǐ kpó wútu”. Mɛ énɛ́ lɛ́ɛ wú wɛ wɛn énɛ́ e é dó ɔ́ ɖɔ xó dó.

¹⁶Mɛ énɛ́ lɛ́ɛ ɔ́, nǔɖé nɔ jɛ yětɔn jí gbeɖé ǎ; vo sa wɛ jɛ́n yě nɔ ɖe; yě nɔ zán gbɛ yětɔn lě e é jló yě gbɔn é; yě nɔ yí nu go, bó nɔ klɔ́ mɛ, bó ná dó mɔ nǔɖé yí ɖo mɛ sí.

¹⁷Amɔ̌, mi mɛvívɛ́ná ce lɛ́ɛ mi, mi flín nǔ e mɛsɛ́dó Aklúnɔ mǐtɔn Jezu Klísu tɔn lɛ́ɛ ko ɖɔ nú mi ɖ'ayǐ é.

¹⁸ Nǔgbó ɔ́, yě ɖɔ nú mi ɖɔ: “Azǎn gǔdo gúdo tɔn lɛ́ɛ mɛ ɔ́, mɛɖé lɛ́ɛ ná tíin, bó ná nɔ ɖɔ slǎmɛ mi wú, bó ná zán gbɛ yětɔn lě e jlǒ nyanya yětɔn lɛ́ɛ zɔ́n yě gbɔn é.”

¹⁹Yě wɛ nɔ dɔn kínklán byɔ́ mɛ mɛ. Gbɛtɔ́ e yě nyí ɔ́ wɛ nɔ ɖu ɖo yě jǐ; é nyí Yɛsinsɛn wɛ nɔ ɖu ɖo yě jí ǎ.

²⁰Amɔ̌ mi mɛvívɛ́ná ce lɛ́ɛ ɔ́, mi ɖo dǒ lí wɛ ɖo nǔɖiɖi mímɛ́ titewungbe e mi ɖó ɔ́ mɛ; mi nɔ xo ɖɛ kpódó Yɛsinsɛn sín hlɔ̌nhlɔ́n kpó,

²¹ée mi ɖo te nú Aklúnɔ mǐtɔn Jezu Klísu ná ná gbɛ mavɔ mavɔ mi ɖo xomɛnyínyɔ́ tɔn mɛ ɔ́, mi hɛn miɖée ɖo wǎn yíyí Mawu tɔn mɛ.

²²Mɛ e nɔ ɖo nǔ xo kpɔ́n wɛ lɛ́ɛ sín nǔ ní nɔ blá wǔ nú mi.

²³Mi dɔn yě sín myɔ mɛ dó hwlɛ́n yě gán. Mi kú nǔbláwǔ nú mɛ ɖě lɛ́ɛ lɔmɔ̌; ayi mitɔn ní ka ɖo te; mi gbɛ́ wǎn nú hwɛhuhu sín ninɔmɛ e yě ɖó ɔ́ káká yi jɛ awu yětɔn e hwɛhuhu sín jlǒ ɖaxó e yě ɖǒ ɖo gbɛtɔ́ nyínyí yětɔn mɛ é nɔ́ hɛn blí é jí.

²⁴Mawu ɖokpó géé e nyí Mɛhwlɛ́ngántɔ́ mǐtɔn gbɔn Aklúnɔ mǐtɔn Jezu Klísu jí ɔ́, é mɛ e kpé wú bó ná cyɔ́n alɔ mi jí, bɔ mi ma ná jɛ ayǐ ǎ ɔ́, é mɛ e kpé wú bó ná ɖe mi xlɛ́ blɔ̌máɖowǔ, bɔ awǎjijɛ ná kpé mi ɖo kpɔ́nɔxámɛ tɔn sín susu mɛ ɔ́, susu, yɛ̌yi, hlɔ̌nhlɔ́n kpódó acɛkpikpa kpó nyí étɔn sín do, bó nyí din, bó lɛ́ nyí káká sɔ́yi. Amǐ.