Read fon Nǔɖexlɛ́mɛ 1 Bible Online

Nǔɖexlɛ́mɛ 1 - fon bible

Nǔɖexlɛ́mɛ 1

¹Nǔ e ɖo hwlǎhwlá, bɔ Jezu Klísu ɖe xlɛ́ céɖécéɖé lɛ́ɛ wɛ ɖo wěma élɔ́ mɛ. Mawu ɖe nǔ énɛ́ lɛ́ɛ xlɛ́ ɛ, bónú é ná xlɛ́ nǔ e ná jɛ ɖo malín málín mɛ lɛ́ɛ mɛsɛntɔ́ tɔn lɛ́ɛ. Jezu Klísu sɛ́ wɛnsagun tɔn dó mɛsɛntɔ́ tɔn Jǎan, bó ɖe nǔ lɛ́ɛ xlɛ́ ɛ.

²Jǎan ɖe kúnnu nú nǔ e é mɔ lɛ́ɛ bǐ. Wɛn e Mawu dó ɔ́, kpó nǔgbó e Jezu Klísu ɖe xlɛ́ ɔ́ kpó sín xó wɛ é ɖɔ ɖo fí.

³Nǔ nyɔ́ nú mɛ e ɖo wěma élɔ́ xa wɛ ɔ́, bó nyɔ́ nú mɛ e ɖo tó ɖó wɛn élɔ́ lɛ́ɛ e Mawu dó gbɔn gbeyíɖɔ tɔn lɛ́ɛ jí, bó nɔ́ bló ɖ'é jí lɛ́ɛ wɛ. Đó hwenu e Mawu ɖó bɔ nǔ énɛ́ lɛ́ɛ bǐ ná jɛ dó ɔ́ kó sɛ yá.

⁴ Nyɛ Jǎan wɛ sɛ́ wěma élɔ́ dó agun Klísu tɔn tɛ́nwe e ɖo tokpɔn Azíi tɔn mɛ lɛ́ɛ: Mawu e tíin din, bó ka kó tíin ɖ'ayǐ, bó ná wá ɔ́ ní ná fɛ́nú kpó fífá kpó mi; yɛ tɛ́nwe e ɖo axɔ́súzinkpo tɔn nukɔn lɛ́ɛ ní ná fɛ́nú kpó fífá kpó mi; Jezu Klísu e nyí kúnnuɖetɔ́ gbejínɔtɔ́, bó nyí mɛ nukɔntɔn e Mawu fɔ́n sín kú é, bó hú gǎn axɔ́sú e ɖo ayǐkúngban jí lɛ́ɛ é ní ná fɛ́nú kpódó fífá kpó mi. Jezu Klísu yí wǎn nú mǐ; é hwlɛ́n mǐ sín hwɛ e mǐ hu lɛ́ɛ mɛ, gbɔn kanjɔ tɔn gbla mɛ;

⁶bó zé mǐ dó bló vɔ̌sánú-xwlémawutɔ́ lɛ́ɛ sín axɔ́súɖuto ná, bónú mǐ ná nɔ wa azɔ̌ nú Tɔ́ tɔn Mawu. Susu kpó hlɔ̌nhlɔ́n kpó ní nyí étɔn káká sɔ́yi mavɔ mavɔ! Amǐ.

⁷ Mi kpɔ́n! É jǎwe ɖo akpɔ́kpɔ́ mɛ! Mɛ bǐ ná mɔ ɛ; mɛ e sɔ́ hwǎn ɛ lɛ́ɛ lɔ ná mɔ ɛ. Akɔta e ɖo ayǐkúngban jí lɛ́ɛ bǐ ná ná alě ɖó éyɛ́ wú. Nǔgbó wɛ, é ná nyí mɔ̌! Amǐ.

⁸ Aklúnɔ Mawu Nǔbǐwúkpétɔ́ e tíin din, bó ka kó tíin ɖ'ayǐ, bó ná wá ɔ́ ɖɔ: “Un nyí Alufa, bó nyí Omɛga; un nyí bǐbɛ́, bó nyí vivɔ.”

⁹Un nɔ nyí Jǎan; nɔví mitɔn wɛ un nyí; ɖo bǔ e mǐ ɖe xá Jezu é mɛ ɔ́, un ɖo ya ji xá mi wɛ, bó ɖo axɔ́súɖuɖu ɔ́ mɛ xá mi; un ɖo te kpódó suúlu kpó xá mi. Un ɖo tɔtɛ́ntin-yíkúngban e è nɔ ylɔ́ ɖɔ Patimɔ́si ɔ́ jí, ɖó un jlá Mawuxó ɔ́ bó ɖe kúnnu nú Jezu wútu.

¹⁰Aklúnɔzán gbe ɔ́[1], Yɛsinsɛn wá jǐ ce, bɔ un nɔ se gbe syɛ́nsyɛ́n ɖé ɖo gǔdo ce, bɔ gbe ɔ́ nɔ́ ɖɔ nǔ kpɛn ɖaxó ɖé ɖɔhun,

¹¹bó nɔ́ ɖɔ: “Wlǎn nǔ e mɔ wɛ a ɖe lɛ́ɛ dó wěma mɛ, bó sɛ́ wěma ɔ́ dó agun Klísu tɔn tɛ́nwe élɔ́ lɛ́ɛ: agun Efɛ́zi tɔn, Simíini tɔn, Pɛɛgamu tɔn, Tiatíi tɔn, Saadu tɔn, Filadɛlufíi tɔn kpó Lawodisée tɔn kpó.”

¹²Un lílɛ́, bó ná kpɔ́n mɛ e ɖo xó ɖɔ nú mì wɛ é; énɛ́ ɔ́, un mɔ sikázogbɛ́nhɛnnú tɛ́nwe.

¹³ Nǔ gbɛtɔ́ ɖɔhun ɖé ɖo tɛ́ntin yětɔn; é dó awu gaga ɖé, bɔ awu ɔ́ ɖi ga káká wá afɔ tɔn lɛ́ɛ jí; é zé akɔ́ntablánú e è zé siká dó bló ná ɔ́ sin dó akɔ́ngónu.

¹⁴ Ta tɔn kpó ɖa tɔn lɛ́ɛ kpó wé avɔkanfún abǐ lawé ɖɔhun; nukún tɔn lɛ́ɛ nɔ́ kán zo myɔ ɖɔhun.

¹⁵ Afɔ tɔn lɛ́ɛ nɔ kɔ́n ganvɔ e è sínsín ɖo zo mɛ, bó ɖíɖí wǔ ná ɔ́ ɖɔhun; gbe tɔn nɔ ɖɔ nǔ sin ɖaxó ɖo ayǐ kɔn nyi wɛ ɖɔhun.

¹⁶É hɛn sunví tɛ́nwe dó alɔ tɔn ɖisí ɔ́ mɛ, bɔ hwǐ ɖíɖá nu we nɔ ɖé nɔ tɔ́n sín nu tɔn mɛ; nukún tɔn mɛ nɔ kɔ́n lě e hwe nɔ kɔ́n gbɔn ɖo hwemɛ cíɖíɖí é ɖɔhun.

¹⁷ Ée un mɔ ɛ ɔ́, un jɛ ayǐ ɖo asá tɔn mɛ, bó cí mɛkúkú ɖɔhun. É ɖó alɔ tɔn ɖisí ɔ́ jǐ ce, bó ɖɔ: “Ma ɖi xɛsi ó! Nyɛ wɛ nyí mɛ e jɛ nukɔn ɔ́, bó nyí mɛ e gbɔn gǔdo é.

¹⁸Nyɛ wɛ nyí mɛ gbɛɖe ɔ́. Un ko kú ɖ'ayǐ; amɔ̌ din ɔ́, un ɖo gbɛ hwebǐnu; kú kpódó kútomɛ kpán sín cávi ɖo así ce.

¹⁹Hǔn, bo wlán nǔ e a mɔ lɛ́ɛ: ée ɖo jijɛ wɛ din lɛ́ɛ kpódó ée ná wá jɛ dó énɛ́ lɛ́ɛ gúdo lɛ́ɛ kpán.

²⁰Sunví tɛ́nwe e mɔ wɛ a ɖe ɖo alɔ ce ɖisí ɔ́ mɛ lɛ́ɛ kpó sikázogbɛ́nhɛnnú tɛ́nwe lɛ́ɛ kpó ɔ́, nǔbúdo e ɖe xlɛ́ wɛ yě ɖe ɔ́ ɖíe: sunví tɛ́nwe lɛ́ɛ ɔ́, agun Klísu tɔn tɛ́nwe lɛ́ɛ sín wɛnsagun lɛ́ɛ wɛ; bɔ zogbɛ́nhɛnnú tɛ́nwe lɛ́ɛ nyí agun Klísu tɔn tɛ́nwe lɛ́ɛ.”