Read fon Nǔɖexlɛ́mɛ 14 Bible Online

Nǔɖexlɛ́mɛ 14 - fon bible

Nǔɖexlɛ́mɛ 14

¹ Énɛ́ ɔ́ gúdo ɔ́, un kpɔ́n bó mɔ Lɛ̌ngbɔ́ví ɔ́ ɖo te ɖo Sinyɔ́ɔ sín só ɔ́ jí. Gbɛtɔ́ adɔ̌kpo tɛ́nwe děgba (144.000) e sín nukɔn è wlǎn nyǐkɔ tɔn kpó tɔ́ tɔn sín nyǐkɔ kpán ɖó lɛ́ɛ ɖo fínɛ́ xá ɛ.

²Un se gbe ɖé sín jǐxwé bɔ é ɖo nǔ ɖɔ wɛ sin ɖaxó ɖé wɛ ɖo ayǐ kɔn nyi wɛ ɖɔhun; jǐ ɖo gbe dó wɛ kpó hlɔ̌nhlɔ́n kpó ɖɔhun; gbe e un se ɔ́ cí agǐdigboxotɔ́ lɛ́ɛ ɖo agǐdigbo xo wɛ ɖɔhun.

³Gbɛtɔ́ adɔ̌kpo tɛ́nwe děgba (144.000) nɛ́ lɛ́ɛ ɖo te ɖo axɔ́súzinkpo ɔ́ nukɔn, ɖo nǔɖogbɛ ɛnɛ lɛ́ɛ kpó mɛxó lɛ́ɛ kpó nukɔn, bó ɖo han yɔ̌yɔ́ ɖé jí wɛ. Mɛɖěbǔ sixú kplɔ́n han énɛ́ zɛ gbɛtɔ́ adɔ̌kpo tɛ́nwe děgba (144.000) e è vɔ̌ xɔ sín ayǐkúngban jí lɛ́ɛ wú ǎ.

⁴Mɛ énɛ́ lɛ́ɛ hɛn yěɖée blí kpó nyɔ̌nu kpó ǎ; ɖó yě tunwun nyɔ̌nu kpɔ́n ǎ; yě hɛn yěɖée ɖó mǐmɛ́ jí; yě nɔ xwedó Lɛ̌ngbɔ́ví ɔ́ gbɔn fí e é xwe ɔ́ bǐ; é vɔ́ yě xɔ sín gbɛtɔ́ lɛ́ɛ mɛ, bónú yě ná nyí mɛ nukɔntɔn e è nǎ Mawu kpó Lɛ̌ngbɔ́ví ɔ́ kpó é.

⁵ È se yě ɖó adingban kpɔ́n gbeɖé ǎ; blɔ̌ ɖěbǔ ɖo yě wú ǎ.

⁶Énɛ́ ɔ́ gúdo ɔ́, un mɔ wɛnsagun ɖěvo, bɔ é ɖo zinzɔn wɛ gbɔn jɔhɔn mɛ aga; é ɖó Wɛn Ɖagbe mavɔ mavɔ ɖé bó ná dó mɛ e ɖo ayǐkúngban jí lɛ́ɛ; é ná dó wɛn ɔ́ to bǐ, akɔta bǐ, gbe bǐ kpódó togun bǐ kpó.

⁷Wɛnsagun ɔ́ zé gbe yi jǐ bó ɖɔ: “Mi ɖó sísí nú Mawu, bó kpa susu n'i! Đó hwenu e é ná ɖɔ hwɛ xá gbɛtɔ́ lɛ́ɛ dó ɔ́ su. Mi sɛn mɛ e bló jǐxwé, bó bló ayǐkúngban, bó bló xu kpó tɔjɔtɛn lɛ́ɛ kpó é!”

⁸ Wɛnsagun wegɔ́ ɔ́ jɛ nukɔntɔn ɔ́ gúdo, bó ɖɔ: “É jɛ ayǐ lóóo! Toxo ɖaxó e è nɔ ylɔ́ ɖɔ Babilɔ́nu[9] ɔ́ jɛ ayǐ lóóo. É ná vɛ̌ɛn tɔn to lɛ́ɛ bǐ. Aga e é lɛ ɔ́ sín vɛ̌ɛn baɖabaɖa ɔ́, é ná to lɛ́ɛ bǐ bɔ yě nu!”

⁹Wɛnsagun atɔngɔ́ ɔ́ jɛ we nukɔntɔn lɛ́ɛ gúdo, bó zé gbe yi jǐ bó ɖɔ: “Mɛ e ɖo kanlin ɔ́ kpó akpajlɛ́ tɔn kpó sɛn wɛ, lobo yí wuntun tɔn dó nukɔn, abǐ dó alɔ ɔ́,

¹⁰ mɛ énɛ́ ɖésú ná nu vɛ̌ɛn Mawu tɔn; adǎn tɔn sín vɛ̌ɛn e é kɔn akú tɔn dó xomɛsin tɔn sín kɔ́fu mɛ é! Yě mɛ e ɖo nǔ wa gbɔn mɔ̌ wɛ lɛ́ɛ bǐ ná ji ya ɖaxó, ɖo myɔ kpó hwemí kpó mɛ, ɖo wɛnsagun mímɛ́ lɛ́ɛ kpódó Lɛ̌ngbɔ́ví ɔ́ kpán nukɔn.

¹¹ Myɔ e ná dó ya ɖaxó nú yě ɔ́ sín azizɔ ná ɖo sisi wɛ káká sɔ́yi. Zǎn kpó kéze kpó ɔ́, gbɔjɛ́ ɖe nú yě mɛ e sɛn kanlin ɔ́ kpó akpajlɛ́ tɔn lɛ́ɛ kpó é ǎ; é ka ɖe nú mɛ e wú nyǐkɔ tɔn sín wuntun ɖe ɔ́ ɖěbǔ ǎ.”

¹²Nǔ e wú é byɔ́ ɖɔ mɛɖeɖóvo Mawu tɔn e nɔ xwedó Mawusɛ́n lɛ́ɛ, bó ɖó nǔɖiɖi nú Jezu lɛ́ɛ ɖó ná dɛ ɔ́ nɛ́.

¹³Un se gbe ɖé bɔ gbe ɔ́ ɖɔ nú mì sín jǐxwé ɖɔ: “Wlǎn nǔ élɔ́: ‘Mɛ e ɖo kúkú wɛ ɖo Aklúnɔ mɛ bɛ́ sín din lɛ́ɛ ɔ́, nǔ nyɔ́ nú yě!’ ” Yɛ ɔ́ ɖɔ: “Ɛɛn nǔgbó wɛ, yě hɛn ɔ́, yě ná gbɔjɛ́ ɖo azɔ̌ syɛ́nsyɛ́n e yě wa lɛ́ɛ mɛ, ɖó ɖagbe e yě wa lɛ́ɛ kpó yě kpo ɖo yiyi wɛ.”

¹⁴ Un lɛ́ ɖo kpínkpɔ́n wɛ bó mɔ akpɔ́kpɔ́ wěwé ɖé, bɔ nǔ gbɛtɔ́ ɖɔhun ɖé ɖo ayǐjínjɔ́n ɖ'é jí. Axɔ́súgbákún e è sɔ́ siká dó bló ná ɔ́ ɖokpó ɖo ta tɔn, bɔ é hɛn nǔkún-yanú ɖíɖá ɖokpó alɔ mɛ.

¹⁵Wɛnsagun ɖěvo tɔ́n sín sinsɛnxɔ ɔ́ mɛ, bó sú xó tlílí, bó ɖɔ sɛ́ dó mɛ e ɖo ayǐjínjɔ́n ɖo akpɔ́kpɔ́ ɔ́ jí ɔ́ ɖɔ: “Zě nǔkún-yanú towe dó ya nǔkún, ɖó nǔkún-yahwenu ko su; ɖó nǔkún e ɖo ayǐkúngban jí lɛ́ɛ ko myá.”

¹⁶Bɔ mɛ e ɖo ayǐjínjɔ́n ɖo akpɔ́kpɔ́ ɔ́ jí ɔ́ zé nǔkún-yanú tɔn dó kplɔ́ nǔkún lɛ́ɛ ná ɖo ayǐkúngban ɔ́ jí; bɔ nǔkún e ɖo ayǐkúngban jí lɛ́ɛ bǐ nyí yiya.

¹⁷Wɛnsagun ɖěvo lɛ́ tɔ́n sín sinsɛnxɔ e ɖo jǐxwé ɔ́ mɛ; élɔ́ hɛn nǔkún-yanú ɖíɖá ɖokpó.

¹⁸Bɔ wɛnsagun ɖěvo e ɖó acɛ dó myɔ ɔ́ jí ɔ́ gosín vɔ̌sákpe ɔ́ kɔn wá. É sú xó, bó ɖɔ sɛ́ dó wɛnsagun e hɛn nǔkún-yanú ɖíɖá ɔ́ ɖɔ: “Zě nǔkún-yanú towe dó gbo vǐwun sín hwǐn e ɖo ayǐkúngban jí lɛ́ɛ bǐ; ɖó sínsɛ́n yětɔn lɛ́ɛ ko myá.”

¹⁹Wɛnsagun ɔ́ nyi nǔkún-yanú tɔn dó kplɔ́ vǐwun sín hwǐn lɛ́ɛ ná ɖo ayǐkúngban ɔ́ jí, bɔ vǐwun sín hwǐn e ɖo ayǐkúngban jí lɛ́ɛ nyí gbigbo, bɔ è bɛ̌ nyi dó xomɛsin Mawu tɔn sín vǐwunfyɔ́nnú ɖaxó ɔ́ mɛ.

²⁰ È li vǐwun sínsɛ́n ɔ́ ɖo vǐwunto mɛ, ɖo toxo ɔ́ gúdo, bɔ hun nɔ sa sín vǐwunto ɔ́ mɛ hoho, bó gba kpé kɔ́ mɛ káká yi kilomɛ́tlu afɔɖé kanwe ko (300), bɔ do yiyi tɔn yi mɛ̌tlu ɖokpó adaɖé mɔ̌.