Read fon Nǔɖexlɛ́mɛ 15 Bible Online

Nǔɖexlɛ́mɛ 15 - fon bible

Nǔɖexlɛ́mɛ 15

¹Énɛ́ ɔ́ gúdo ɔ́, un mɔ xlɛ́ ɖěvo ɖo jǐxwé; xlɛ́ énɛ́ ɔ́ d'agba bó nyɔ́ kpɔ́n: wɛnsagun tɛ́nwe ɖé lɛ́ɛ wɛ, bɔ yě hɛn nǔ nyanya tɛ́nwe. Nǔ nyanya tɛ́nwe énɛ́ lɛ́ɛ ɔ́, nǔ nyanya gǔdo gúdo tɔn lɛ́ɛ wɛ; ɖó yě jí wɛ xomɛsin Mawu tɔn ná vɔ gbɔn.

²Un mɔ nǔ xu wěkpɛ́n ɖɔhun ɖé cáká kpó myɔ kpó; un lɛ́ mɔ yě mɛ e ɖu ɖo kanlin ɔ́ jí, bó ɖu ɖo akpajlɛ́ tɔn jí, bó ɖu ɖo xixa nabí e nyǐkɔ tɔn nyí ɔ́ jí lɛ́ɛ. Yě ɖo te ɖo xu wěkpɛ́n ɖɔhun ɔ́ jí, bó hɛn agǐdigbo e Mawu sɔ́ nú yě lɛ́ɛ.

³ Yě ɖo mɛsɛntɔ́ Mawu tɔn Mɔyízi sín han ji wɛ, bó ɖo Lɛ̌ngbɔ́ví ɔ́ sín han ji wɛ ɖɔ: “Aklúnɔ Mawu Nǔbǐwúkpétɔ́, azɔ̌ towe lɛ́ɛ d'agba bó nyɔ́ kpɔ́n. Axɔ́sú to lɛ́ɛ tɔn, tito towe lɛ́ɛ jlɔ́ bó nyí nǔgbó.

⁴ Aklúnɔ, mɛ̌ ma ká ná ɖó sísí nú we ǎ? Mɛ̌ ka ná gbɛ́ ɖɔ émí kún ná kpa susu nú we ó? Đó hwi ɖokpónɔ géé wɛ nyí mǐmɛ́; to lɛ́ɛ bǐ ná wá sɛn we. Đó nǔ jlɔ́jlɔ́ e a nɔ wa lɛ́ɛ ɖe yěɖée xlɛ́ céɖécéɖé.”

⁵ Un mɔ sinsɛnxɔ e mɛ akɔjijɛ Mawu tɔn sín goxɔ ɖe ɔ́ hun ɖo jǐxwé.

⁶Wɛnsagun tɛ́nwe e hɛn nǔ nyanya tɛ́nwe lɛ́ɛ tɔ́n sín sinsɛnxɔ ɔ́ mɛ; yě dǒ akwɛ́núvɔ wěwé, bɔ é nɔ kɔ́n, bó sin akɔ́ntablánú e è sɔ́ siká dó bló ná ɔ́ dó akɔ́nnu.

⁷Nǔɖogbɛ ɛnɛ lɛ́ɛ ɖokpó bɛ́ sinnugannú e è sɔ́ siká dó bló ná ɔ́ tɛ́nwe nú wɛnsagun tɛ́nwe lɛ́ɛ; Mawu e ɖo gbɛ káká sɔ́yi ɔ́ sín xomɛsin gɔ́ sinnugannú énɛ́ lɛ́ɛ mɛ.

⁸ Azizɔ gɔ́ sinsɛnxɔ ɔ́ mɛ, ɖó susu Mawu tɔn kpó hlɔ̌nhlɔ́n tɔn kpó wú, bɔ mɛ ɖěbǔ sixú byɔ́ sinsɛnxɔ ɔ́ mɛ káká jɛ hwenu e nǔ nyanya tɛ́nwe e wɛnsagun lɛ́ɛ hɛn ɔ́ ná jɛ dó é ǎ.