Read fon Nǔɖexlɛ́mɛ 16 Bible Online

Nǔɖexlɛ́mɛ 16 - fon bible

Nǔɖexlɛ́mɛ 16

¹Énɛ́ ɔ́ gúdo ɔ́, un se gbe ɖi lélé sín sinsɛnxɔ ɔ́ mɛ, bó ɖo ɖiɖɔ nú wɛnsagun tɛ́nwe lɛ́ɛ wɛ ɖɔ: “Mi yi húzú xomɛsin Mawu tɔn e ɖo sinnugannú tɛ́nwe mɛ lɛ́ɛ kɔn nyi ayǐkúngban jí!”

² Wɛnsagun nukɔntɔn ɔ́ yi, bó húzú sinnugannú éyɛ́ tɔn kɔn nyi ayǐkúngban jí. Énɛ́ ɔ́, agadá baɖabaɖa, agadá nyinyɔ ɖé tɔ́n gbɔn mɛ e wú wuntun kanlin ɔ́ tɔn ɖe, bɔ yě nɔ sɛn akpajlɛ́ tɔn lɛ́ɛ sín wútu.

³Wɛnsagun wegɔ́ ɔ́ húzú sinnugannú éyɛ́ tɔn kɔn nyi xu mɛ. Bɔ xu ɔ́ húzú, bó cí mɛkúkú sín kanjɔ ɖɔhun, bɔ nǔɖogbɛ e ɖo xu ɔ́ mɛ lɛ́ɛ bǐ kú.

⁴ Wɛnsagun atɔngɔ́ ɔ́ húzú sinnugannú éyɛ́ tɔn kɔn nyi tɔsisa lɛ́ɛ kpó tɔjɔtɛn lɛ́ɛ kpó mɛ, bɔ yě húzú kanjɔ.

⁵Énɛ́ ɔ́ gúdo ɔ́, un se wɛnsagun e ɖó acɛ dó sin lɛ́ɛ jí ɔ́ ɖɔ: “Hwi mɛ e nyí mǐmɛ́, hwi mɛ e tíin bo ko tíin ɖ'ayǐ ɔ́, hwɛjijɔnɔ wɛ a nyǐ, bó dó ɖɔ hwɛ gbɔn mɔ̌.

⁶Nǔgbó ɔ́, yě kɔn mɛɖeɖóvo Mawu tɔn lɛ́ɛ kpó gbeyíɖɔ lɛ́ɛ kpó sín hun nyi ayǐ, bɔ din ɔ́, a nǎ kanjɔ yě, bɔ yě nu. Nǔ e jɛ xá yě ɔ́ nɛ́!”

⁷Énɛ́ ɔ́ gúdo ɔ́, un se gbe ɖé gosín vɔ̌sákpe ɔ́ kɔn, bó ɖo ɖiɖɔ wɛ ɖɔ: “Nǔgbó wɛ Aklúnɔ Mawu Nǔbǐwúkpétɔ́, hwɛɖiɖɔ towe lɛ́ɛ nyí nǔgbó bó sɔgbe!”

⁸Wɛnsagun ɛnɛgɔ́ ɔ́ húzú sinnugannú éyɛ́ tɔn kɔn nyi hwe jí, bɔ è nǎ gbe hwe ɔ́ ɖɔ ní zé myɔ tɔn dó fyɔ́ gbɛtɔ́ lɛ́ɛ.

⁹Yǒzo ɖaxó ɖé fyɔ́ gbɛtɔ́ lɛ́ɛ, bɔ yě nylá nu dó Mawu e ɖó acɛ dó nǔ nyanya mɔ̌hunkɔtɔn lɛ́ɛ jí ɔ́ sín nyǐkɔ wú; yě lɛ́ kɔ sín hwɛ yětɔn lɛ́ɛ gúdo, bó ná kpa susu nú Mawu ǎ.

¹⁰ Wɛnsagun atɔ́ɔ́ngɔ́ ɔ́ húzú sinnugannú éyɛ́ tɔn kɔn nyi kanlin ɔ́ sín axɔ́súzinkpo jí, bɔ ablu ɖaxó ɖé cyɔ́n axɔ́súɖuto tɔn. Gbɛtɔ́ lɛ́ɛ ɖo wǔvɛ́ mɔ wɛ káká bó nɔ́ han aɖǔ ɖɛ̌ yě ɖésúnɔ tɔn.

¹¹Yě nylá nu dó Mawu sɛ́xwé tɔn wú, ɖó wǔvɛ́ e mɔ wɛ yě ɖe ɔ́ kpó agadá yětɔn lɛ́ɛ kpó wú. Yě lɛ́ kɔ sín nǔ nyanya e wa wɛ yě ɖe lɛ́ɛ gúdo ǎ.

¹² Wɛnsagun ayizɛ́ngɔ́ ɔ́ húzú sinnugannú éyɛ́ tɔn kɔn nyi tɔsisa ɖaxó e è nɔ ylɔ́ ɖɔ Efláti ɔ́ mɛ. Tɔ ɔ́ mɛ, bó ná ali axɔ́sú e jǎwe sín zǎnzǎnhwe jí lɛ́ɛ.

¹³Énɛ́ ɔ́ gúdo ɔ́, un mɔ yɛ nyanya atɔn bɔ yě cí aglǒběsé ɖɔhun; yě tɔ́n sín Dlagɔ́ɔn ɔ́ kpó kanlin ɔ́ kpó, kpódó gbeyíɖɔnyíjɛtɔ́ ɔ́ kpán sín nu mɛ.

¹⁴Awǒvi e ɖo nǔ jlɛ̌ wɛ lɛ́ɛ sín yɛ lɛ́ɛ wɛ. Yɛ atɔn énɛ́ lɛ́ɛ ɖidó axɔ́sú e ɖo ayǐkúngban ɔ́ bǐ jí lɛ́ɛ gɔ́n, bó ná kplé yě nú ahwan e è ná fun ɖo Mawu Nǔbǐwúkpétɔ́ ɔ́ sín azǎn ɖaxó ɔ́ gbe é.

¹⁵ “Đǒtó, un ná wá ajotɔ́ ɖɔhun! Nǔ nyɔ́ nú mɛ e ná ɖo wunzɛn, bó ná ɖo awu tɔn lɛ́ɛ mɛ é, bónú é ma zɔn mɛ̌ yi, nú è nǎ mɔ ɛ ɖo mɛ̌ nú winnyá ná hu i ó.”

¹⁶ Yɛ nyanya lɛ́ɛ kplé axɔ́sú lɛ́ɛ ɖó tɛn e mɛ è nɔ ylɔ́ ɖɔ Haamagedɔ́ni ɔ́ dó Ebléegbe mɛ é.

¹⁷Wɛnsagun tɛ́nwegɔ́ ɔ́ húzú sinnugannú éyɛ́ tɔn kɔn nyi jɔhɔn mɛ. È se gbe lélé ɖé sín sinsɛnxɔ ɔ́ mɛ; gbe ɔ́ gosín axɔ́súzinkpo ɔ́ kɔn, bó ɖo ɖiɖɔ wɛ ɖɔ: “É sɔgbe lo!”

¹⁸ Jǐkɛwun; è se gbe ɖé lɛ́ɛ; jǐ dó gbe; ayǐkúngban dán wǔ kpó hlɔ̌nhlɔ́n kpó. Ayǐkúngban ɔ́ ko dán wǔ mɔ̌hunkɔtɔn ɖě sín hwenu e è ko bló gbɛtɔ́ é ǎ; é syɛ́n ɖésú!

¹⁹ Toxo ɖaxó ɔ́ má ɖó atɔn, bɔ toxo e gbɔn to lɛ́ɛ bǐ mɛ lɛ́ɛ gba hánnyá. Mawu wɔn Babilɔ́nu ɖaxó ɔ́ ǎ; é ná ɛ xomɛsin tɔn ɖaxó ɔ́ sín vɛ̌ɛn e ɖo sinnugannú tɔn mɛ ɔ́, bɔ é nu.

²⁰ Tɔtɛ́ntin yíkúngban lɛ́ɛ bǐ bú, bɔ è sɔ́ mɔ só lɛ́ɛ ɖě ǎ.

²¹ Kɛ́njí ɖaxó ɖaxó ɖé lɛ́ɛ nɔ ja kɔn nyi gbɛtɔ́ lɛ́ɛ jí; kɛ́n énɛ́ lɛ́ɛ ɖokpó ɖokpó nɔ da káká yi kilóo kanɖé (40). Gbɛtɔ́ lɛ́ɛ nylá nu dó Mawu wú, ɖó nǔ nyanya e kɛ́njí ɔ́ dó sin ɔ́ wú; ɖó nǔ nyanya ɖé wɛ bó syɛ́n ɖésú.