Read fon Nǔɖexlɛ́mɛ 17 Bible Online

Nǔɖexlɛ́mɛ 17 - fon bible

Nǔɖexlɛ́mɛ 17

¹ Énɛ́ ɔ́ gúdo ɔ́, wɛnsagun tɛ́nwe e hɛn sinnugannú tɛ́nwe lɛ́ɛ ɖokpó wá ɖɔ nú mì ɖɔ: “Wǎ, bónú ma xlɛ́ we lě e è ɖǒ ná dɔn tó nú agalɛtɔ́ ɖaxó e nyí toxo ɖaxó e è gbǎ ɖó tɔsisa gěgé tó ɔ́ gbɔn é.

² Axɔ́sú e ɖo ayǐkúngban jí lɛ́ɛ lɛ aga xá ɛ, bɔ mɛ e ɖo ayǐkúngban jí lɛ́ɛ nu nǔblíblí tɔn sín vɛ̌ɛn mú.”

³ Yɛ ɔ́ wá jǐ ce, bɔ wɛnsagun ɔ́ zé mì yi gbětótló mɛ. Un mɔ nyɔ̌nu ɖé ɖo fínɛ́, bɔ é ɖo ayǐjínjɔ́n ɖo kanlin vɔvɔ cɛ́cɛ́ ɖé jí; nu nylá dó Mawu wǔ sín nyǐkɔ kpé kanlin ɔ́ wú; kanlin énɛ́ ɖó ta tɛ́nwe, zo wǒ.

⁴ Nyɔ̌nu ɔ́ dó akwɛ́núvɔ vɔvɔ kwélesinnɔ kpó avɔ vɔvɔ cɛ́cɛ́ kpó; é bɛ́ sikánú lɛ́ɛ kpódó awǐnnya xɔ akwɛ́ lɛ́ɛ kpó, kpódó jɛ̌ lɛ́ɛ kpán dó ba acɔ́ ná; é hɛn kɔ́fu e è sɔ́ siká dó bló ná ɔ́ ɖokpó alɔ mɛ, bɔ suɖunú lɛ́ɛ kpó aga tɔn sín nǔ kwíji kwíji lɛ́ɛ kpó gɔ́ kɔ́fu ɔ́.

⁵È wlǎn nyǐkɔ ɖé dó nukɔn tɔn; nyǐkɔ ɔ́ búdo. È wlǎn ɖɔ: “Babilɔ́nu ɖaxó ɔ́, agalɛtɔ́ lɛ́ɛ kpó suɖunú gbɛ ɔ́ tɔn lɛ́ɛ kpó sín nɔ.”

⁶Un mɔ ɖɔ mɛɖeɖóvo Mawu tɔn lɛ́ɛ kpódó kúnnuɖetɔ́ Jezu tɔn e è hu lɛ́ɛ kpó sín hun mú nyɔ̌nu ɔ́. Ée un mɔ nyɔ̌nu ɔ́, é kpácá mì ɖésú.

⁷Énɛ́ ɔ́, wɛnsagun ɔ́ ɖɔ nú mì ɖɔ: “Nɛ̌ ka gbɔn bɔ é kpácá we? Nǔ e nyɔ̌nu ɔ́ kpó kanlin e jí é jínjɔ́n, bɔ é ɖó ta tɛ́nwe, zo wǒ ɔ́ kpó nyí ɔ́, un ná tín nǔbúdo e ɖ'é mɛ ɔ́ mɛ nú we.

⁸ Kanlin e a mɔ ɔ́ nɔ gbɛ ɖ'ayǐ; é ka sɔ́ ɖo gbɛ din ǎ; é ɖó ná tɔ́n sín do gɔngɔn ɔ́ mɛ, bó ka ná yi dɔn. Mɛ e ɖo ayǐkúngban jí bɔ è ma wlán nyǐkɔ yětɔn dó gbɛwéma ɔ́ mɛ sín bǐbɛ́mɛ gbɛ ɔ́ tɔn ǎ lɛ́ɛ wá mɔ kanlin ɔ́, é ná kpácá yě: nǔgbó ɔ́, kanlin ɔ́ ɖo gbɛ ɖ'ayǐ; é ka sɔ́ ɖo gbɛ din ǎ, é ná lɛ́ vɔ́ ɖe éɖée xlɛ́.

⁹“Nǔ énɛ́ ɔ́ byɔ́ ɖɔ è ɖǒ ná ɖó nukúnnú mɔ jɛ nǔ mɛ kpó nǔnywɛ́ kpó. Ta tɛ́nwe lɛ́ɛ ɔ́, só tɛ́nwe wɛ; yě jí wɛ nyɔ̌nu ɔ́ ɖo ayǐjínjɔ́n ɖe; yě lɛ́ nyí axɔ́sú tɛ́nwe.

¹⁰Mɛ atɔ́ɔ́n jɛ ayǐ ɖo yě mɛ; mɛ ɖokpó ɖo axɔ́sú ɖu wɛ din; mɛ tɛ́nwegɔ́ ɔ́ ka ko wá ǎ; hwenu e é ná wá ɔ́, hwenu kpɛɖé jɛ́n é ná nɔ ayǐ ná.

¹¹Kanlin e nɔ gbɛ ɖ'ayǐ, bó ma sɔ́ ɖo gbɛ din ǎ ɔ́, axɔ́sú tántɔngɔ́ ɔ́ wɛ é ɖésú nyí, bó lɛ́ ɖo mɛ tɛ́nwe nukɔntɔn lɛ́ɛ mɛ, lobo ná yi dɔn.

¹² “Zo wǒ e a mɔ lɛ́ɛ ɔ́, axɔ́sú wǒ wɛ yě nyí; yě ka ko jɛ axɔ́sú ɖu jí ǎ. Amɔ̌ è nǎ sɔ́ acɛkpikpa ɔ́ dó así nú yě, bɔ yě ná ɖu axɔ́sú xá kanlin ɔ́ nú ganxixo ɖokpó.

¹³Linlin ɖokpó ɔ́ wɛ yě mɛ wǒ lɛ́ɛ bǐ ɖó; linlin yětɔn wɛ nyí ɖɔ yě ná zé hlɔ̌nhlɔ́n yětɔn kpó acɛkpikpa yětɔn kpó jó nú kanlin ɔ́.

¹⁴Yě ná fun ahwan xá Lɛ̌ngbɔ́ví ɔ́. Lɛ̌ngbɔ́ví ɔ́ ka ná ɖu ɖo yě jǐ; ɖó é wɛ nyí Aklúnɔ aklúnɔ lɛ́ɛ tɔn; Axɔ́sú axɔ́sú lɛ́ɛ tɔn; é ná ɖu ɖo yě jǐ, é kpó mɛ e ɖo kpɔ́ xá ɛ lɛ́ɛ kpó; mɛ e è ylɔ̌ bó cyán bɔ yě nɔ gbejí n'i lɛ́ɛ.”

¹⁵Wɛnsagun ɔ́ lɛ́ ɖɔ nú mì ɖɔ: “Tɔsisa e a mɔ ɖo fí e agalɛtɔ́ ɔ́ ɖe lɛ́ɛ ɔ́, togun lɛ́ɛ wɛ; ahwan lɛ́ɛ wɛ; to lɛ́ɛ kpó gbe lɛ́ɛ kpó wɛ.

¹⁶Zo wǒ e a mɔ lɛ́ɛ kpó kanlin ɔ́ kpó ná gbɛ́ wǎn nú agalɛtɔ́ ɔ́; yě ná fɔ nǔ e é ɖó lɛ́ɛ bǐ; yě ná ɖe e nyi mɛ̌; yě ná ɖu lan tɔn, bó ná zé myɔ dó fyɔ́ ɛ.

¹⁷Đó Mawu sɔ́ jlǒ e nɔ wa linlin tɔn ɔ́ dó ayi mɛ nú yě; yě ná ɖó gbe kpɔ́, bó wa nǔ, bó ná sɔ́ axɔ́súɖuɖu yětɔn dó así nú kanlin ɔ́ káká yi jɛ hwenu e xó e Mawu ɖɔ lɛ́ɛ ná jɛ dó é.

¹⁸“Bó ná dó fó ɔ́, nyɔ̌nu e a mɔ ɔ́, toxo ɖaxó e kpa acɛ dó axɔ́sú ayǐkúngban jí tɔn lɛ́ɛ nu ɔ́ wɛ.”