Read fon Nǔɖexlɛ́mɛ 18 Bible Online

Nǔɖexlɛ́mɛ 18 - fon bible

Nǔɖexlɛ́mɛ 18

¹Énɛ́ ɔ́ gúdo ɔ́, un mɔ wɛnsagun ɖěvo ɖo te jɛ sín jǐxwé wɛ. É ɖó acɛ ɖaxó ɖé; susu tɔn hɔ́n dó ayǐkúngban ɔ́ bǐ jǐ.

² Wɛnsagun ɔ́ sú xó tlílí bó ɖɔ: “É jɛ ayǐ lóóo, Babilɔ́nu toxo ɖaxó ɔ́ jɛ ayǐ lóóo! Awǒvi lɛ́ɛ sín nɔtɛn wɛ é nyí din, bó nyí bibɛtɛn nú yɛ nyanya alɔkpa alɔkpa lɛ́ɛ bǐ; xɛ blíblí, xɛ gbɛ́ hɛn tɛnmɛ tɛnmɛ lɛ́ɛ bǐ nɔ́ nɔ fínɛ́.

³Đó é ná aga e é lɛ ɔ́ sín vɛ̌ɛn baɖabaɖa ɔ́ to lɛ́ɛ bǐ, bɔ yě nu. Axɔ́sú ayǐkúngban jí tɔn lɛ́ɛ lɛ aga xá ɛ, bɔ ajɔ̌tɔ́ ayǐkúngban jí tɔn lɛ́ɛ jɛ dɔkun gbɔn gbɛɖunú e é ɖó zɛ jlɛ̌ wú lɛ́ɛ gbla mɛ.”

⁴ Énɛ́ ɔ́ gúdo ɔ́, un se gbe ɖěvo gosín jǐxwé, bó ɖo ɖiɖɔ wɛ ɖɔ: “Togun ce, mi tɔ́n sín tɛ́ntin tɔn, bó ma hu hwɛ e hu wɛ é ɖe lɛ́ɛ xá ɛ ó, mi ma ɖó mǐmá ɖo awě e ná xo e lɛ́ɛ mɛ ó.

⁵Đó hwɛ tɔn lɛ́ɛ kplé káká yi jǐnukúnsin; Mawu wɔn nǔ nyanya e é wa lɛ́ɛ ǎ.

⁶ Mi wa nǔ xá ɛ lě e é wa nǔ xá mi gbɔn é. Kɔ́fu e mɛ é cá ahan dó nú mi ɔ́, mi cáká mɔ̌hunkɔtɔn donu we d'é mɛ n'i.

⁷ Lě e é nɔ sɔ́ éɖée su, bó nɔ ba acɔ́ sɔ ɔ́, mɔ̌ wɛ mi ná dó ya n'i sɔ, mɔ̌ wɛ mi ná dó e aluwɛ mɛ sɔ; ɖó é nɔ ɖɔ dó ayi mɛ ɖɔ: ‘Un ɖo ayǐjínjɔ́n fí, axɔ́sú nyɔ̌nu ɖɔhun; un nyí asúkúsi ǎ; un ka ná nɔ aluwɛ mɛ gbeɖé ǎ.’

⁸Énɛ́ ɔ́ wú wɛ awě e è sɔ́ ɖó ayǐ n'i lɛ́ɛ ná xo e ɖo kéze ɖokpó géé mɛ; awě énɛ́ lɛ́ɛ wɛ nyí: kúzɔ́n, aluwɛ kpódó adɔ kpó; è nǎ zě myɔ dó fyɔ́ ɛ ná. Đó Aklúnɔ Mawu e ɖo hwɛ ɖɔ xá ɛ wɛ ɔ́ ɖó hlɔ̌nhlɔ́n.”

⁹ Hwenu e axɔ́sú ayǐkúngban jí tɔn e lɛ aga xá ɛ, bó ɖu gbɛ xá ɛ lɛ́ɛ ná mɔ myɔ e ɖo fyɔ́fyɔ́ ɛ wɛ ɔ́ sín azizɔ ɔ́, yě ná ya avǐ, bó ná ná alě ɖó toxo ɖaxó ɔ́ wú.

¹⁰Yě ná ɖo xɛsi ɖi nú wǔvɛ́ e é ná mɔ lɛ́ɛ wɛ, bó ná nɔ zɔ, bó ná nɔ ɖɔ: “Awo! Awo! Babilɔ́nu toxo ɖaxó, toxo hlɔ̌nhlɔ́nnɔ! È sɔ́ ganxixo ɖokpó géé ɖó te, bó dó ɖó hwɛ nú we!”

¹¹ Ajɔ̌tɔ́ ayǐkúngban jí tɔn lɛ́ɛ lɔmɔ̌ ɖo avǐ ya wɛ, bó ɖo alě ná wɛ ɖó éyɛ́ wú, ɖó mɛ ɖěbǔ sɔ́ nɔ xɔ ajɔ̌nú yětɔn lɛ́ɛ ǎ.

¹² Ajɔ̌nú énɛ́ lɛ́ɛ wɛ nyí: siká, kpatágan, awǐnnya xɔ akwɛ́ lɛ́ɛ kpó jɛ̌ lɛ́ɛ kpó; akwɛ́núvɔ vɔvɔ kwélesinnɔ lɛ́ɛ, avɔ vɔvɔ cɛ́cɛ́ lɛ́ɛ, sɛ́da, atín tɛnmɛ tɛnmɛ e è ma nɔ mɔ gbɔn mɔ̌ ǎ lɛ́ɛ, nǔ tɛnmɛ tɛnmɛ e è sɔ́ ajinakú sín aɖǔ dó bló ná lɛ́ɛ, ée è sɔ́ atín xɔ akwɛ́ dó bló ná lɛ́ɛ, ée è sɔ́ ganvɔ dó bló ná lɛ́ɛ, ée è sɔ́ gan kpó awǐnnya ɖagbe ɖagbe e è nɔ ylɔ́ ɖɔ mǎblu ɔ́ kpó dó bló ná lɛ́ɛ.

¹³Nǔhwɛ́nkún e è nɔ ylɔ́ ɖɔ kanɛ́lu ɔ́, kpó nǔhwɛ́nkún ɖěvo ɖěvo lɛ́ɛ kpó; nǔsáwǔ, mǐla kpó zǎlínkpɔ́n kpó; vɛ̌ɛn, ami, linfín, kpó blěe kpó; nyibú kpó lɛ̌ngbɔ́ kpó, sɔ́ kpó kɛkɛ́ví kpó, kannumɔ lɛ́ɛ kpó gbɛtɔ́ ɖěvo lɛ́ɛ kpó.

¹⁴Ajɔ̌tɔ́ énɛ́ lɛ́ɛ nɔ ɖɔ nú toxo ɔ́ ɖɔ: “Sínsɛ́n e ba ná mɔ wɛ a ɖe lɛ́ɛ bǐ bú sín gɔ̌n towe; dɔkun towe kpó gbɛɖunú towe lɛ́ɛ bǐ kpó bú, bɔ a sɔ́ ná lɛ́ mɔ yě gbeɖé ǎ.”

¹⁵ Ajɔ̌tɔ́ e wa ajɔ̌ ɖo toxo énɛ́ mɛ bó jɛ dɔkun lɛ́ɛ ná ɖo xɛsi ɖi nú wǔvɛ́ e é ná mɔ lɛ́ɛ wɛ bó ná nɔ zɔ. Yě ná ya avǐ bó ná ná alě.

¹⁶Yě ná ɖɔ: “Awo! Awo! Étɛ́ ɖíe gbo toxo ɖaxó ɔ́ e! Akwɛ́núvɔ vɔvɔ kwélesinnɔ ɖé wɛ é dó ɖ'ayǐ, bó dó avɔ vɔvɔ cɛ́cɛ́ ɖagbe ɖagbe; é bɛ́ sikánú lɛ́ɛ, awǐnnya xɔ akwɛ́ lɛ́ɛ kpó jɛ̌ lɛ́ɛ kpó dó ba acɔ́ ná.

¹⁷ Dɔkun énɛ́ lɛ́ɛ bǐ ka vɔ ɖo ganxixo ɖokpó géé mɛ!” Gǎn e kpa acɛ nú tɔjíhún lɛ́ɛ bǐ, kpó mɛ e dó tɔjíhún lɛ́ɛ kpó, kpó mɛ e nɔ wa azɔ̌ ɖo tɔjíhún mɛ lɛ́ɛ kpó, kpó mɛ e nɔ wa ajɔ̌ gbɔn xu jí xu jí lɛ́ɛ bǐ kpó nɔ zɔ.

¹⁸ Ée yě mɔ myɔ e ɖo fyɔ́fyɔ́ ɛ wɛ ɔ́ sín azizɔ ɔ́, yě jɛ xó sú jí ɖɔ: “Toxo e cí toxo ɖaxó élɔ́ ɖɔhun ɔ́ ɖě tíin kpɔ́n gbeɖé ǎ!”

¹⁹ Yě nɔ nyi kɔ́ dó ta; yě nɔ ɖo avǐ ya wɛ, bó nɔ ɖo alě ná wɛ, bó nɔ ɖo xó sú wɛ ɖɔ: “Awo! Awo! Étɛ́ ɖíe gbo toxo ɖaxó ɔ́ e! Dɔkun tɔn wɛ nɔ dó dɔkun nú mɛ e ɖó tɔjíhún ɖo xu jí lɛ́ɛ bǐ. È ka sɔ́ ganxixo ɖokpó géé ɖó te bó dó vívá ɛ ná.”

²⁰ Jǐnukúnsin! Jɛ awǎ ɖó gba e é gba ɔ́ wú! Mɛɖeɖóvo Mawu tɔn lɛ́ɛ, mɛsɛ́dó lɛ́ɛ kpó gbeyíɖɔ lɛ́ɛ kpó e, mi lɔmɔ̌ ní jɛ awǎ! Đó Mawu ko ɖó nǔ nyanya e é wa nú mi ɔ́ sín hwɛ n'i.

²¹ Hwenɛ́nu ɔ́, wɛnsagun hlɔ̌nhlɔ́nnɔ ɖé zé awǐnnya sé ɖaxó ɖɔhun ɖé nyi dó xu mɛ bó ɖɔ: “Lě e è nǎ zé toxo ɖaxó Babilɔ́nu ɔ́ nyi dó do, kpó hlɔ̌nhlɔ́n kpó gbɔn ɔ́ nɛ́, bɔ è sɔ́ ná mɔ ɛ gbeɖé ǎ.

²² È sɔ́ ná se agǐdigboxotɔ́ lɛ́ɛ kpó hanjitɔ́ lɛ́ɛ kpó sín nǔxixo gbeɖé ɖo agblo towe mɛ ǎ; è ka sɔ́ ná se kpetekúntɔ́ lɛ́ɛ kpó kpɛnkúntɔ́ lɛ́ɛ kpó sín nǔxixo gbeɖé ɖo agblo towe mɛ ǎ; è sɔ́ ná mɔ azɔ̌ ɖěbǔ watɔ́ ɖo agblo towe mɛ ǎ; è sɔ́ ná se sé sín gbe ɖě ɖo agblo towe mɛ ǎ.

²³Zogbɛ́n sín wěziza sɔ́ ná hɔ́n ɖo agblo towe mɛ gbeɖé ǎ; è sɔ́ ná se asú kpó asi kpó e da yěɖée tlóló ɔ́ sín gbe ɖě ɖo agblo towe mɛ ǎ, ɖó ajɔ̌tɔ́ towe lɛ́ɛ ko nyí nǔsúɖaxó gbɛ ɔ́ tɔn ɖ'ayǐ, bɔ a zě majíki sín nǔwiwa towe lɛ́ɛ dó flú to lɛ́ɛ bǐ ná.”

²⁴ È dɔn tó nú Babilɔ́nu, ɖó è mɔ gbeyíɖɔ lɛ́ɛ kpó mɛɖeɖóvo Mawu tɔn lɛ́ɛ kpó, kpódó mɛ e è hu ɖo ayǐkúngban jí lɛ́ɛ bǐ kpán sín hun ɖo agblo tɔn mɛ.