Read fon Nǔɖexlɛ́mɛ 19 Bible Online

Nǔɖexlɛ́mɛ 19 - fon bible

Nǔɖexlɛ́mɛ 19

¹Énɛ́ ɔ́ gúdo ɔ́, un se gbe ɖaxó ɖé ɖo jǐnukúnsin, mɛ wɔ̌buwɔ́bú ɖé wɛ ɖo xó ɖɔ wɛ ɖɔhun, bɔ gbe ɔ́ ɖo ɖiɖɔ wɛ ɖɔ: “Alelúya Aklúnɔ! Mawu mǐtɔn tɔn wɛ nyí hwlɛngán, susu, kpó hlɔ̌nhlɔ́n kpó!

² Hwɛɖiɖɔ tɔn lɛ́ɛ nyí nǔgbó, bó sɔgbe! Đó é ɖó hwɛ nú agalɛtɔ́ ɖaxó e sɔ́ aga tɔn dó ɖo ayǐkúngban ɔ́ hɛn gblé wɛ é. Mawu sɔ́ ɛ dó ba hlɔn, ɖó é hu mɛsɛntɔ́ tɔn lɛ́ɛ.”

³ Yě lɛ́ ɖɔ: “Alelúya! Myɔ e ɖo toxo ɖaxó ɔ́ fyɔ́ wɛ ɔ́ sín azizɔ ɖo sisi wɛ káká sɔ́yi.”

⁴Mɛxó ko-nukún-ɛnɛ (24) lɛ́ɛ kpó nǔɖogbɛ ɛnɛ lɛ́ɛ kpó jɛ kpo bó ɖe kɔ́ nú Mawu e ɖo ayǐjínjɔ́n ɖo axɔ́súzinkpo ɔ́ jí é, bó ɖɔ: “Amǐ! Alelúya!”

⁵ È se gbe ɖé sín axɔ́súzinkpo ɔ́ kɔn, bɔ é ɖo ɖiɖɔ wɛ ɖɔ: “Mi mɛsɛntɔ́ Mawu tɔn lɛ́ɛ bǐ; mi mɛ e nɔ sí i lɛ́ɛ, mɛxó kpó yɔkpɔ́vú kpó, mi kpa Mawu mǐtɔn.”

⁶ Énɛ́ ɔ́ gúdo ɔ́, un se gbe ɖé mɛ wɔ̌buwɔ́bú ɖé sín gbe ɖɔhun; gbe ɔ́ cí sin wɛ ɖo ayǐ kɔn nyi wɛ hoho ɖɔhun; é cí jǐ wɛ ɖo gbe dó wɛ kpó hlɔ̌nhlɔ́n kpó ɖɔhun; un se yě ɖo ɖiɖɔ wɛ ɖɔ: “Alelúya! Đó Aklúnɔ Mawu mǐtɔn Nǔbǐwúkpétɔ́ ɔ́ jɛ axɔ́sú ɖu jí!

⁷Mi wá mǐ jɛ awǎ, bó hun xomɛ, bó sɔ́ ɛ su! Đó alɔwlíwlí Lɛ̌ngbɔ́ví ɔ́ tɔn sín hwenu su, bɔ yawó tɔn ko sɔ́ nǔ.

⁸È nǎ acɛ asi tɔn ɖɔ ní dó akwɛ́núvɔ fɛ́ɖɛ́fɛ́ɖɛ́ ɖagbe ɖagbe e nɔ kɔ́n, bó mɛ́ é.” Đó mɛɖeɖóvo Mawu tɔn lɛ́ɛ sín azɔ̌ jlɔ́jlɔ́ lɛ́ɛ wɛ nyí akwɛ́núvɔ fɛ́ɖɛ́fɛ́ɖɛ́ ɖagbe ɖagbe ɔ́.

⁹ Wɛnsagun ɔ́ ɖɔ nú mì ɖɔ: “Wlǎn: nǔ nyɔ́ nú mɛ e è ylɔ̌ wá alɔwlíwlínúɖuɖu Lɛ̌ngbɔ́ví ɔ́ tɔn ɖu gbé lɛ́ɛ é.” É lɛ́ ɖɔ nú mì ɖɔ: “Mawu sín xó nǔgbó lɛ́ɛ nɛ́.”

¹⁰Bɔ un jɛ kpo ɖo afɔ tɔn lɛ́ɛ kɔn, bó ná ɖe kɔ́ n'i, bɔ é ka ɖɔ nú mì ɖɔ: “Gbɔ! Ma bló mɔ̌ ó! Mɛsɛntɔ́ wɛ un nyí hwi kpó nɔví towe lɛ́ɛ kpó ɖɔhun; nɔví towe e hɛn kúnnuɖiɖe Jezu tɔn lɛ́ɛ é. Mawu wɛ a nǎ ɖe kɔ́ ná!” Kúnnuɖiɖe Jezu tɔn ɔ́ wɛ nɔ sɔ́ xó e gbeyíɖɔ lɛ́ɛ ná ɖɔ ɔ́ dó ayi mɛ nú yě.

¹¹ Énɛ́ ɔ́ gúdo ɔ́, un mɔ jǐnukúnsin ɖo nuvo, bɔ sɔ́ wěwé ɖé tɔ́n. Mɛ e ɖo sɔ́ ɔ́ jí ɔ́, nyǐkɔ tɔn nɔ nyí Gbejínɔtɔ́, bó nɔ nyí Titewungbe; é nɔ́ ɖɔ hwɛ bó nɔ́ fun ahwan kpó hwɛjijɔ kpó.

¹² Nukún tɔn lɛ́ɛ nɔ kán zo myɔ ɖɔhun, bɔ axɔ́súgbákún gěgé ɖo ta tɔn. È wlǎn nyǐkɔ ɖé ɖó wǔ tɔn, bɔ mɛ ɖěbǔ tunwun nyǐkɔ ɔ́ zɛ é ɖésúnɔ wú ǎ.

¹³É dó awu gaga ɖé, bɔ awu ɔ́ cí hun mɛ wɛ è nylɔ̌ dó ɖɔhun; nyǐkɔ tɔn nɔ nyí “Mawuxó”.

¹⁴Ahwangɔnu jǐxwé tɔn lɛ́ɛ xwedó e; yě ɖo sɔ́ wěwé jí; yě dǒ akwɛ́núvɔ fɛ́ɖɛ́fɛ́ɖɛ́ wěwé mímɛ́ ɖagbe ɖagbe ɖé.

¹⁵ Hwǐ ɖíɖá ɖé nɔ tɔ́n sín nu tɔn mɛ; hwǐ ɔ́ wɛ é ná sɔ́ dó xo to lɛ́ɛ ná. É ná kpa acɛ dó yě nu, bɔ acɛkpikpa tɔn ná syɛ́n gankpo ɖɔhun; é ná li vǐwun sínsɛ́n ɔ́ ɖo xomɛsin ɖaxó Mawu Nǔbǐwúkpétɔ́ ɔ́ tɔn sín vǐwunto ɔ́ mɛ.

¹⁶È wlǎn nyǐkɔ ɖé dó awu tɔn kpó asá tɔn kpó wú; è wlǎn ɖɔ: “Axɔ́sú axɔ́sú lɛ́ɛ tɔn; Aklúnɔ aklúnɔ lɛ́ɛ tɔn.”

¹⁷ Énɛ́ ɔ́ gúdo ɔ́, un mɔ wɛnsagun ɖé ɖo te hwesivɔ́ mɛ. É sú xó gbe lélé sɛ́ dó xɛ e ɖo zinzɔn wɛ ɖo aga ɖéé lɛ́ɛ bǐ ɖɔ: “Mi wá; mi kplé miɖée nú nǔɖuɖu ɖaxó Mawu tɔn ɔ́!

¹⁸Mi wá ɖu axɔ́sú lɛ́ɛ sín lan; mi wá ɖu ahwangán lɛ́ɛ kpó asúká lɛ́ɛ kpó sín lan; mi wá ɖu sɔ́ lɛ́ɛ kpó sɔ́xátɔ́ lɛ́ɛ kpó sín lan; mi wá ɖu gbɛtɔ́ lɛ́ɛ bǐ sín lan; kannumɔ lɛ́ɛ kpó mɛ e ɖo yě ɖésúnɔ sí lɛ́ɛ kpó, mɛxó kpó yɔkpɔ́vú kpó sín lan.”

¹⁹Énɛ́ ɔ́ gúdo ɔ́, un mɔ kanlin ɔ́; un mɔ axɔ́sú ayǐkúngban jí tɔn lɛ́ɛ kpó ahwangɔnu yětɔn lɛ́ɛ kpó; yě kplé bó ná fun ahwan xá mɛ e ɖo sɔ́ ɔ́ jí ɔ́ kpó ahwangɔnu tɔn kpó.

²⁰ Ahwan wlí kanlin ɔ́ kpó gbeyíɖɔnyíjɛtɔ́ e jlɛ́ nǔ ɖo nukɔn tɔn ɔ́ kpó. Nǔjlɛ́jlɛ́ énɛ́ lɛ́ɛ wɛ é dó flú mɛ e wú kanlin ɔ́ sín wuntun ɖe, bɔ yě nɔ́ sɛn kanlin ɔ́ sín akpajlɛ́ lɛ́ɛ ná. È sɔ́ kanlin ɔ́ kpó gbeyíɖɔnyíjɛtɔ́ ɔ́ kpó gbɛɖe gbɛɖe nyi dó myɔ togotogo e mɛ hwemí ɖo jiji ɖe wɛ ɔ́ mɛ.

²¹È sɔ́ hwǐ e nɔ tɔ́n sín mɛ e ɖo sɔ́ jí ɔ́ sín nu mɛ ɔ́ dó hu mɛ e kpo lɛ́ɛ ná, bɔ xɛ lɛ́ɛ bǐ ɖu lan yětɔn gɔ́ xo.