Read fon Nǔɖexlɛ́mɛ 2 Bible Online

Nǔɖexlɛ́mɛ 2 - fon bible

Nǔɖexlɛ́mɛ 2

¹Wlǎn wěma sɛ́ dó agun Klísu tɔn e ɖo Efɛ́zi ɔ́ sín wɛnsagun, bó ɖɔ n'i ɖɔ: “Mɛ e hɛn sunví tɛ́nwe lɛ́ɛ dó alɔ tɔn ɖisí ɔ́ mɛ, bó ɖo zɔnlin ɖi wɛ ɖo sikázogbɛ́nhɛnnú tɛ́nwe lɛ́ɛ tɛ́ntin ɔ́, xó e ɖɔ wɛ é ɖe ɔ́ ɖíe:

²Un tunwun nǔ e a wa ɔ́ bǐ; un tunwun tagba e a jɛ é, bó tunwun ɖɔ a ɖǒ suúlu. Un tunwun ɖɔ a kún nɔ sixú mɔ mɛdídá lɛ́ɛ gbɔ ó; yě mɛ e nɔ ɖɔ émí nyí mɛsɛ́dó, bó ma ka nyí ǎ lɛ́ɛ ɔ́, a ba do nú yě, bó mɔ ɖɔ adingbannɔ wɛ nú yě.

³A ɖǒ suúlu; a mɔ wǔvɛ́ ɖó nyɛ wútu, bɔ awakanmɛ ka kú we ǎ.

⁴Lo ɔ́, nǔ towe e vɛ́ wǔ ce ɔ́ ɖíe: a sɔ́ ɖó wǎn yíyí lě e a ɖǒ gbɔn ɖo bǐbɛ́mɛ é ǎ.

⁵Hǔn, bó flín tɛn ɖagbe e mɛ a jɛ ayǐ sín é, bó lɛ́ kɔ sín hwɛ towe lɛ́ɛ gúdo, bó wa nǔ lě e a blǒ gbɔn ɖo bǐbɛ́mɛ é. Ényí a ma lɛ́ kɔ sín hwɛ towe lɛ́ɛ gúdo ǎ ɔ́, un ná wá mɔ we, bó na ɖe zogbɛ́nhɛnnú towe síin.

⁶É ka ɖo mɔ̌ có, nǔ élɔ́ e a nɔ bló ɔ́ nyɔ́ nú we: a gbɛ́ wǎn nú nǔ e Nikoláa gbɛ́ta lɛ́ɛ[2] nɔ wa lɛ́ɛ é, lě e un gbɛ́ wǎn ná gbɔn é.

⁷ “Mɛ e ɖó tó bó ná dó se nǔ ɔ́ ní se nǔ e ɖɔ nú agun lɛ́ɛ wɛ Yɛsinsɛn ɖe ɔ́ ganjí! “Mɛ e ná ɖu ɖ'é jí ɔ́, un ná ná ɛ gbe, bɔ é ná ɖu atín e nɔ ná gbɛ jɔ gbɛ mɛ, bó ɖo Mawu sín jikpá mɛ ɔ́ sín sínsɛ́n.”

⁸ Wlǎn wěma sɛ́ dó agun Klísu tɔn e ɖo Simíini ɔ́ sín wɛnsagun, bó ɖɔ n'i ɖɔ: “Mɛ e nyí mɛ e jɛ nukɔn, bó nyí mɛ e gbɔn gǔdo ɔ́, mɛ e ko kú, bó lɛ́ fɔ́n ɔ́, xó e é ɖɔ ɔ́ ɖíe:

⁹Un tunwun wǔvɛ́ e mɔ wɛ a ɖe lɛ́ɛ; un tunwun ɖɔ a kún ɖó nǔɖé ó; nú è ka ná ɖɔ nǔgbó ɔ́, dɔkunnɔ wɛ a nyǐ! Yě mɛ e ɖɔ émí nyí Jwifu, bó ma ka nyí ǎ lɛ́ɛ ɔ́, un tunwun nǔ nyanya e ɖɔ dó wǔ towe wɛ yě nɔ ɖe lɛ́ɛ: gbɛ̌ kplékplé Satáan tɔn wɛ yě nyí!

¹⁰Wǔvɛ́ e a nǎ mɔ ɔ́ ní ma dó xɛsi nú we ó. Đǒtó: Awǒvi ná bɛ́ mɛ gěgé ɖo mi mɛ dó gankpá mɛ, bó ná dó tɛ́n mi kpɔ́n; mi ná mɔ wǔvɛ́ xɔ azǎn wǒ. Nɔ gbejí káká yi kú; énɛ́ ɔ́, un ná ná we gbɛ bɔ é ná cí axɔ́súgbákún e nɔ́ ná gbɛ mɛ é ɖɔhun.

¹¹ “Mɛ e ɖó tó bó ná dó se nǔ ɔ́ ní se nǔ e ɖɔ nú agun lɛ́ɛ wɛ Yɛsinsɛn ɖe ɔ́ ganjí! “Mɛ e ná ɖu ɖ'é jí ɔ́ ná kú kú wegɔ́ ɔ́ ǎ.”

¹²Wlǎn wěma sɛ́ dó agun Klísu tɔn e ɖo Pɛɛgamu ɔ́ sín wɛnsagun, bó ɖɔ n'i ɖɔ: “Mɛ e ɖó hwǐ ɖíɖá nu we nɔ ɔ́, xó e é ɖɔ ɔ́ ɖíe:

¹³Un tunwun fí e a nɔ nɔ é: fí e Satáan ɖu axɔ́sú ɖe ɔ́ wɛ a nɔ nɔ. A nɔ gbejí nú mì; a jǒ nǔɖiɖi e a ɖǒ nú mì ɔ́ dó ǎ; hwenu e è hu kúnnuɖetɔ́ ce gbejínɔtɔ́ Antipasi ɖo mi gɔ́n ɖo fí e Satáan nɔ nɔ ɔ́, a jǒ mì dó ǎ.

¹⁴ É ka ɖo mɔ̌ có a wa nǔɖé lɛ́ɛ bɔ é vɛ́ wǔ ce: mɛ e tɛ́ dó nǔkplɔ́nmɛ Baláamu tɔn wú lɛ́ɛ ɖo mi mɛ[3]: Baláamu nɔ kplɔ́n nǔ Balaki ɖɔ ní dɔn Izlayɛ́li ví lɛ́ɛ, bónú yě ní ɖu kanlin e è xwlé vodún lɛ́ɛ sín lan, bó lɛ aga, bó ná dó hu hwɛ.

¹⁵Mɔ̌ ɖokpó ɔ́, mɛ e nɔ tɛ́ dó nǔkplɔ́nmɛ Nikoláa gbɛ́ta lɛ́ɛ tɔn wú lɛ́ɛ lɔ ɖo mi mɛ.

¹⁶Hǔn, bo lɛ́ kɔ sín hwɛ towe lɛ́ɛ gúdo; é ma nyí mɔ̌ ǎ ɔ́, un ná wá mɔ we ɖo malín málín mɛ din, bó ná zé hwǐ e nɔ tɔ́n sín nu ce mɛ ɔ́ dó fun ahwan xá mɛ énɛ́ lɛ́ɛ.

¹⁷ “Mɛ e ɖó tó bó ná dó se nǔ ɔ́ ní se nǔ e ɖɔ nú agun lɛ́ɛ wɛ Yɛsinsɛn ɖe ɔ́ ganjí! “Mɛ e ná ɖu ɖ'é jí ɔ́, un ná ná ɛ nǔɖuɖu e è nɔ ylɔ́ ɖɔ mǎna bɔ é ɖo hwlǎhwlá ɔ́. Un ná lɛ́ ná ɛ awǐnnya wěwé e jí è wlǎn nyǐkɔ yɔ̌yɔ́ ɖé dó ɔ́; mɛ ɖěbǔ tunwun nyǐkɔ énɛ́ zɛ mɛ e yí awǐnnya énɛ́ é wú ǎ.”

¹⁸Wlǎn wěma sɛ́ dó agun Klísu tɔn e ɖo Tiatíi ɔ́ sín wɛnsagun, bó ɖɔ n'i ɖɔ: “Mawu ví e nukún tɔn lɛ́ɛ nɔ kán zo myɔ ɖɔhun, bɔ afɔ tɔn lɛ́ɛ nɔ kɔ́n ganvɔ e è ɖiɖi wǔ ná ɔ́ ɖɔhun ɔ́, xó e é ɖɔ ɔ́ ɖíe:

¹⁹Un tunwun nǔ e wa wɛ a ɖe ɔ́ bǐ; un tunwun lě e a ɖo gbejí gbɔn é; un tunwun lě e a bǐ dó azɔ̌ wú gbɔn é, bó tunwun suúlu e a ɖǒ é. Un tunwun ɖɔ azɔ̌ e wa wɛ a ɖe din ɔ́ sukpɔ́ hú ée a wa ɖo bǐbɛ́mɛ é.

²⁰ Lo ɔ́, nǔ towe e vɛ́ wǔ ce ɔ́ ɖíe: nyɔ̌nu e nɔ nyí Jezabɛ́li[4] bó nɔ ylɔ́ éɖée ɖɔ gbeyíɖɔ Mawu tɔn ɔ́, a nɔ jó e dó bɔ é nɔ kplɔ́n nǔ mɛsɛntɔ́ ce lɛ́ɛ ɖɔ yě ní nɔ́ lɛ aga; yě ní nɔ́ ɖu kanlin e è xwlé vodún lɛ́ɛ sín lan; é nɔ́ kplɔ́n nǔ énɛ́ lɛ́ɛ yě dó flú yě.

²¹Un jó hwenu dó n'i, bónú é ná lɛ́ kɔ sín hwɛ tɔn lɛ́ɛ gúdo; lo ɔ́, é jló ná jó agalilɛ dó ǎ.

²²Énɛ́ ɔ́ wú wɛ un ná zé e nyi zan jí; un ná zɔ́n bɔ mɛ e nɔ lɛ aga xá ɛ lɛ́ɛ lɔ ná mɔ wǔvɛ́ ɖaxó, afi nú yě lɛ́ kɔ sín nǔ nyanya e wa wɛ é kpó yě kpó ɖe lɛ́ɛ gúdo.

²³ Un ná hu vǐ tɔn lɛ́ɛ; énɛ́ ɔ́, agun Klísu tɔn lɛ́ɛ bǐ ná tunwun ɖɔ nyɛ wɛ nyí mɛ e nɔ tunwun linlin kpódó jlǒ gbɛtɔ́ tɔn lɛ́ɛ kpán é. Un ná sú lě e mi mɛ ɖokpó ɖokpó wa nǔ gbɔn ɔ́ sín axɔ́ mi.

²⁴“Amɔ̌ midɛɛ lɛ́ɛ ɔ́, mi mɛ e ɖo agun Tiatíi tɔn ɔ́ mɛ, bó ma xwedó nǔkplɔ́nmɛ nyanya énɛ́ ɔ́ ǎ, bó ma ka mɔ nukúnnú jɛ nǔ e mɛ énɛ́ lɛ́ɛ nɔ ylɔ́ ɖɔ ‘do gɔngɔn Satáan tɔn’ ɔ́ wú ǎ lɛ́ɛ ɔ́, un ɖo ɖiɖɔ nú mi wɛ ɖɔ un kún sɔ́ ná ɖíɖá agban ɖěvo mi ó.

²⁵Lo ɔ́, mi hɛn nǔ e mi ɖó ɔ́ wú syɛ́nsyɛ́n káká bónú ma wá.

²⁶ “Mɛ e ná ɖu ɖ'é jí, bó ná wa nǔ e un jló ɔ́ káká yi vivɔnu ɔ́, un ná ná ɛ acɛ e nyɛ ɖésúnɔ un yí ɖo Tɔ́ ce sí é: un ná ná bɔ é ná kpa acɛ nú akɔta lɛ́ɛ. Acɛkpikpa tɔn ná syɛ́n gankpo ɖɔhun, bó ná gba yě hánnyá lě e è nɔ gba kozɛ́n hánnyá gbɔn é.

²⁸Un ná ná ɛ sunví zǎnzǎn tɔn lɔmɔ̌[5].

²⁹“Mɛ e ɖó tó, bó ná dó se nǔ ɔ́ ní se nǔ jɛ nǔ e ɖɔ nú agun lɛ́ɛ wɛ Yɛsinsɛn ɖe ɔ́ mɛ ganjí!”