Read fon Nǔɖexlɛ́mɛ 21 Bible Online

Nǔɖexlɛ́mɛ 21 - fon bible

Nǔɖexlɛ́mɛ 21

¹ Énɛ́ ɔ́ gúdo ɔ́, un mɔ jǐnukúnsin yɔ̌yɔ́ ɔ́ kpó ayǐkúngban yɔ̌yɔ́ ɔ́ kpó. Jǐnukúnsin nukɔntɔn ɔ́ kpó ayǐkúngban nukɔntɔn ɔ́ kpó bú, bɔ xu sɔ́ tíin ǎ.

² Un mɔ toxo mímɛ́ e nyí Jeluzalɛ́mu yɔ̌yɔ́ ɔ́ é; Mawu sɛ́ ɛ dó, bɔ é ɖo te jɛ wɛ sín jǐnukúnsin. É ɖo gbesisɔ mɛ yawó yɔ̌yɔ́ e ba acɔ́, bó ná yi asúxwé ɔ́ ɖɔhun.

³ Un se gbe ɖaxó ɖé gosín axɔ́súzinkpo ɔ́ kɔn, bó ɖo ɖiɖɔ wɛ ɖɔ: “Din ɔ́, nɔtɛn Mawu tɔn ɖo gbɛtɔ́ lɛ́ɛ tɛ́ntin! É ná nɔ xá yě, bɔ yě ná nyí togun tɔn. Mawu ɖésúnɔ ná nɔ kpɔ́ xá yě, bó ná nyí Mawu yětɔn.

⁴ È nǎ súnsún ɖasin bǐ sín nukún yětɔn mɛ; kú sɔ́ ná tíin ǎ, aluwɛ sɔ́ ná tíin ǎ, alěníná sɔ́ ná tíin ǎ, wǔvɛ́ mimɔ sɔ́ ná tíin ǎ; nǔ xóxó lɛ́ɛ ko bú.”

⁵Hwenɛ́nu ɔ́, mɛ e ɖo ayǐjínjɔ́n ɖo axɔ́súzinkpo ɔ́ jí ɔ́ ɖɔ: “Din ɔ́, un ɖo nǔ lɛ́ɛ bǐ sɔ́ dó húzú nǔ yɔ̌yɔ́ wɛ.” É lɛ́ ɖɔ nú mì ɖɔ: “Wlǎn, ɖó xó nǔgbó wɛ nyí xó énɛ́ lɛ́ɛ, bó nyí xó e wú è nǎ ɖeji dó lɛ́ɛ.”

⁶ É lɛ́ ɖɔ: “É sɔgbe lo! Un nyí Alufa, bó nyí Omɛga; un nyí bǐbɛ́, bó nyí vivɔ. Un ná ná sin mɛ e sinnugblá sin é, bɔ é ná nu vɔ̌nu ɖo fí e sin e nɔ ná gbɛ mɛ ɔ́ nɔ tɔ́n sín é.

⁷ Mɛɖěbǔ ɖu ɖ'é jí ɔ́, un ná ná ɛ nǔníná énɛ́; un ná nyí Mawu tɔn, bɔ é ná nyí vǐ ce.

⁸Amɔ̌ nǔvɔ́nɔ lɛ́ɛ ɔ́, nǔmaɖitɔ́ lɛ́ɛ ɔ́, suɖutɔ́ lɛ́ɛ ɔ́, mɛhutɔ́ lɛ́ɛ ɔ́, agalɛtɔ́ lɛ́ɛ ɔ́, majíkiblótɔ́ lɛ́ɛ ɔ́, vodúnsɛntɔ́ lɛ́ɛ kpódó adingbannɔ lɛ́ɛ bǐ kpán ɔ́, tɛn yětɔn ná nɔ myɔ togotogo e mɛ hwemí ɖo jiji ɖe wɛ é mɛ; é wɛ nyí kú wegɔ́ ɔ́.”

⁹Wɛnsagun tɛ́nwe e hɛn sinnugannú tɛ́nwe e awě tɛ́nwe gǔdo gúdo tɔn lɛ́ɛ gɔ́ ɔ́ ɖokpó wá ɖɔ nú mì ɖɔ: “Wǎ! Un ná xlɛ́ yawó yɔ̌yɔ́ ɔ́ we, Lɛ̌ngbɔ́ví ɔ́ sín asi.”

¹⁰ Yɛsinsɛn ɔ́ wá bɔ wɛnsagun ɔ́ zé mì yi só ɖaxó ɖé ta; só ɔ́ yi jǐ ɖésú. É xlɛ́ toxo mímɛ́ Jeluzalɛ́mu e Mawu sɛ́ dó, bɔ é ɖo te jɛ sín jǐnukúnsin wɛ ɔ́ mì.

¹¹É ɖó susu Mawu tɔn, bó nɔ́ kán zo. Toxo ɔ́ nɔ kɔ́n awǐnnya xɔ akwɛ́ ɖaxó ɖé ɖɔhun; awǐnnya e è nɔ ylɔ́ ɖɔ jasipée é ɖɔhun; é nɔ za wě wěkpɛ́n e mɛ è nɔ mɔ nǔ gbɔn céɖécéɖé ɔ́ ɖɔhun.

¹² È mɛ dǒ ɖaxó ɖé lɛ́ lɛ̌ dó, dǒ ɔ́ yi jǐ ɖésú. Hɔntogbó wěwe wɛ é ɖó, bɔ wɛnsagun wěwe ɖo hɔn lɛ́ɛ cɔ́ wɛ. È wlǎn togun Izlayɛ́li tɔn sín akɔta wěwe lɛ́ɛ sín nyǐkɔ dó hɔn lɛ́ɛ wú.

¹³Hɔntogbó atɔn atɔn ɖo akpá ɖokpó ɖokpó xwé: atɔn ɖo zǎnzǎnhwe jí, atɔn ɖo totaligbé, atɔn ɖo tofɔligbé, bɔ atɔn ɖo gbadahwe jí.

¹⁴Dǒ ɖaxó e è mɛ lɛ́ lɛ̌ dó toxo ɔ́, awǐnnya wěwe jí wɛ è dǒ do ɖó, bó wlǎn Lɛ̌ngbɔ́ví ɔ́ sín mɛsɛ́dó wěwe lɛ́ɛ sín nyǐkɔ dó awǐnnya énɛ́ lɛ́ɛ wú.

¹⁵ Wɛnsagun e ɖo xó ɖɔ nú mì wɛ ɔ́ hɛn nǔjlɛ́kpo ɖokpó, bó ná dó jlɛ́ toxo ɔ́ kpó hɔn tɔn lɛ́ɛ kpó, kpó dǒ e è mɛ lɛ́ lɛ̌ dó é kpán. Nǔjlɛ́kpo énɛ́ ɔ́, fántín wɛ, bɔ è sɔ́ siká dó bló ná.

¹⁶Toxo ɔ́ sín akpáxwé ɛnɛ lɛ́ɛ ɖó ga ɖokpó ɔ́; zwe ɛnɛ lɛ́ɛ nyí ɖokpó ɔ́. Wɛnsagun ɔ́ sɔ́ fántín tɔn dó jlɛ́ toxo ɔ́ ná: ga tɔn nyí jlɛ̌nú děgba atɔn (12.000). Gblǒ tɔn kpó jǐ yiyi tɔn kpó nyí nǔ ɖokpó ɔ́ xá ga tɔn.

¹⁷Wɛnsagun ɔ́ jlɛ́ dǒ ɔ́ lɔmɔ̌, bɔ jǐ yiyi tɔn nyí alɔbá kantɔn ko-nukún-ɛnɛ (144); jlɛ̌nú énɛ́ e é dó jlɛ́ nǔ ná ɔ́ cí ée gbɛtɔ́ nɔ dó jlɛ́ nǔ ná ɔ́ ɖɔhun, bó nyí ɖokpó ɔ́ xá wɛnsagun ɔ́ tɔn.

¹⁸ Awǐnnya e è nɔ ylɔ́ ɖɔ jasipée ɔ́ wɛ è dó mɛ dǒ ɔ́ ná, bɔ toxo ɔ́ ɖésú nyí siká akú, bó za wě wěkpɛ́n e mɛ è nɔ mɔ nǔ gbɔn céɖécéɖé ɔ́ ɖɔhun.

¹⁹È sɔ́ awǐnnya xɔ akwɛ́ tɛnmɛ tɛnmɛ lɛ́ɛ dó ba acɔ́ nú awǐnnya dodó e jí è mɛ dǒ toxo ɔ́ tɔn ɖó lɛ́ɛ: awǐnnya e è nɔ ylɔ́ ɖɔ jasipée ɔ́ wɛ è dǒ ba acɔ́ nú awǐnnya dodó nukɔn nukɔntɔn ɔ́, bó sɔ́ safíi dó ba acɔ́ nú awǐnnya dodó wegɔ́ ɔ́, bó sɔ́ agáti dó ba acɔ́ nú awǐnnya dodó atɔngɔ́ ɔ́, bó sɔ́ emɛlodu dó ba acɔ́ nú awǐnnya dodó ɛnɛgɔ́ ɔ́.

²⁰É sɔ́ onísi dó ba acɔ́ nú awǐnnya dodó atɔ́ɔ́ngɔ́ ɔ́, bó sɔ́ sadwáni dó ba acɔ́ nú awǐnnya dodó ayizɛ́ngɔ́ ɔ́, bó sɔ́ klizolíti dó ba acɔ́ nú awǐnnya dodó tɛ́nwegɔ́ ɔ́, bó sɔ́ belilu dó ba acɔ́ nú awǐnnya dodó tántɔngɔ́ ɔ́, bó sɔ́ tokpázi dó ba acɔ́ nú awǐnnya dodó tɛ́nnɛgɔ́ ɔ́, bó sɔ́ klizoplazi dó ba acɔ́ nú awǐnnya dodó wǒgɔ́ ɔ́, bó sɔ́ yasɛnti dó ba acɔ́ nú awǐnnya dodó wǒ-ɖokpógɔ́ ɔ́, bó sɔ́ amɛtisi dó ba acɔ́ nú awǐnnya dodó wěwegɔ́ ɔ́.

²¹Hɔn wěwe lɛ́ɛ nyí jɛ̌ wěwe; jɛ̌ ɖokpó wɛ è dǒ bló hɔn ɖokpó ná. Ali toxo ɔ́ tɔn nyí siká akú, bó za wě wěkpɛ́n e mɛ è nɔ mɔ nǔ gbɔn céɖécéɖé ɔ́ ɖɔhun.

²²Un mɔ sinsɛnxɔ ɖo toxo énɛ́ ɔ́ mɛ ǎ, ɖó Aklúnɔ Mawu Nǔbǐwúkpétɔ́ ɔ́ wɛ nyí sinsɛnxɔ tɔn; mɔ̌ ɖokpó ɔ́, Lɛ̌ngbɔ́ví ɔ́ nyí sinsɛnxɔ tɔn.

²³ Toxo ɔ́ byɔ́ ɖɔ hwe ní ná émí wěziza ǎ; é ka byɔ́ ɖɔ sun ní ná émí wěziza ǎ, ɖó susu Mawu tɔn nɔ ná ɛ wěziza, bɔ Lɛ̌ngbɔ́ví ɔ́ nyí zogbɛ́n tɔn.

²⁴ Togun e ɖo gbɛ ɔ́ mɛ lɛ́ɛ ná ɖi zɔnlin gbɔn wěziza tɔn nú, bɔ axɔ́sú ayǐkúngban jí tɔn lɛ́ɛ ná hɛn dɔkun yětɔn lɛ́ɛ wá toxo ɔ́ mɛ.

²⁵ Toxo ɔ́ sín hɔntogbó lɛ́ɛ ná nɔ hunhun ɖo kéze ɔ́ bǐ mɛ; è nǎ sú gbeɖé ǎ, ɖó zǎn ná kú ɖo fínɛ́ ǎ.

²⁶È nǎ hɛn susu kpó dɔkun to lɛ́ɛ tɔn kpó wá toxo ɔ́ mɛ.

²⁷ Amɔ̌ nǔblíblí ɖěbǔ ná byɔ́ toxo énɛ́ mɛ ǎ; mɛ e nɔ jó éɖée dó nú suɖunú kpó adingban kpó ɔ́, ɖě ná byɔ́ toxo énɛ́ mɛ ǎ. Mɛ e sín nyǐkɔ e è nǎ wlán dó gbɛwéma e nyí Lɛ̌ngbɔ́ví ɔ́ tɔn ɔ́ mɛ lɛ́ɛ kɛ́ɖɛ́ wɛ ná byɔ́ toxo ɔ́ mɛ.