Read fon Nǔɖexlɛ́mɛ 22 Bible Online

Nǔɖexlɛ́mɛ 22 - fon bible

Nǔɖexlɛ́mɛ 22

¹ Wɛnsagun ɔ́ lɛ́ xlɛ́ mì sin e nɔ ná gbɛ mɛ ɔ́ sín tɔsisa, bɔ é ɖo tíntɔ́n sín Mawu kpó Lɛ̌ngbɔ́ví ɔ́ kpó sín axɔ́súzinkpo mɛ wɛ, lobo za wě wěkpɛ́n e mɛ è nɔ mɔ nǔ gbɔn céɖécéɖé ɔ́ ɖɔhun.

² É nɔ ɖo sisa gbɔn toxo ɔ́ sín ali tɛ́ntin wɛ. Atín e nɔ ná gbɛ mɛ ɔ́ ɖo tɔsisa ɔ́ sín akpá ɖokpó ɖokpó xwé; é nɔ sɛ́n azɔn wěwe ɖo xwe ɖokpó mɛ; sun ɖokpó ɖokpó mɛ wɛ é nɔ sɛ́n; è nɔ zé ama tɔn lɛ́ɛ dó gbɔ azɔn nú to lɛ́ɛ.

³ Nǔ ɖěbǔ sɔ́ ɖo toxo ɔ́ mɛ bɔ Mawu donu ǎ. Axɔ́súzinkpo Mawu kpó Lɛ̌ngbɔ́ví ɔ́ kpó tɔn ná nɔ toxo ɔ́ mɛ, bɔ mɛsɛntɔ́ Mawu tɔn lɛ́ɛ ná nɔ sɛn Mawu.

⁴Yě ná mɔ nukún tɔn mɛ; è nǎ wlán nyǐkɔ tɔn dó nukɔn yětɔn.

⁵ Zǎn sɔ́ ná nɔ kú ǎ; yě sɔ́ ná ba wěziza zogbɛ́n tɔn ǎ; yě ka sɔ́ ná ba wěziza hwe tɔn ǎ, ɖó Aklúnɔ Mawu ná gba wěziza tɔn kɔn nyi yě jí, bɔ yě ná ɖu axɔ́sú káká sɔ́yi.

⁶Énɛ́ ɔ́ gúdo ɔ́, wɛnsagun ɔ́ ɖɔ nú mì ɖɔ: “Xó nǔgbó wɛ nyí xó élɔ́ lɛ́ɛ, bó nyí xó e wú è ná ɖeji dó lɛ́ɛ. Bɔ Aklúnɔ Mawu e nɔ sɔ́ xó e gbeyíɖɔ lɛ́ɛ ná ɖɔ ɔ́ dó ayi mɛ nú yě ɔ́ sɛ́ wɛnsagun tɔn dó, bɔ é ná xlɛ́ nǔ e ɖó ná jɛ ɖo malín málín mɛ din lɛ́ɛ mɛsɛntɔ́ tɔn lɛ́ɛ.”

⁷Jezu ɖɔ: “Đǒtó! Un ná wá ɖo malín málín mɛ din! Nǔ nyɔ́ nú mɛ e nɔ se tónú nú xóɖɔɖ'ayǐ e ɖo wěma élɔ́ mɛ lɛ́ɛ.”

⁸Nyɛ Jǎan ɔ́, un se xó lɛ́ɛ, bó mɔ nǔ énɛ́ lɛ́ɛ. Ée un se xó lɛ́ɛ bó mɔ nǔ énɛ́ lɛ́ɛ vɔ ɔ́, un jɛ kpo ɖo wɛnsagun e xlɛ́ nǔ lɛ́ɛ mì ɔ́ sín asá mɛ, bó ná ɖe kɔ́ n'i.

⁹É ka ɖɔ nú mì ɖɔ: “Gbɔ, ma bló mɔ̌ ó! Mɛsɛntɔ́ wɛ un nyí hwi kpó nɔví towe gbeyíɖɔ lɛ́ɛ kpán ɖɔhun; bó nyí mɛsɛntɔ́ mɛ e nɔ se tónú nú xó e è wlán dó wěma élɔ́ mɛ lɛ́ɛ é ɖɔhun. Mawu wɛ a ɖǒ ná ɖe kɔ́ ná.”

¹⁰Énɛ́ ɔ́ gúdo ɔ́, é ɖɔ nú mì ɖɔ: “Xó ɖɔ ɖ'ayǐ e è wlán dó wěma élɔ́ mɛ lɛ́ɛ ɔ́, ma hɛn xomɛ ó, ɖó hwenu e è ɖǒ, bɔ nǔ énɛ́ lɛ́ɛ bǐ ná jɛ ɔ́ ko sɛkpɔ́.

¹¹ Mɛ e nyí mɛdídá ɔ́ ní fɔ́n bó ɖo mɛdídá nyí wɛ; mɛ e nyí mɛ blíblí ɔ́ ní fɔ́n bó ɖo mɛ blíblí nyí wɛ; mɛ e nyí mɛ ɖagbe ɔ́ ní fɔ́n bó ɖo mɛ ɖagbe nyí wɛ; mɛ e nyí mɛ mímɛ́ ɔ́ ní fɔ́n bó ɖo mɛ mímɛ́ nyí wɛ.”

¹² Jezu ɖɔ: “Đǒtó! Un ná wá ɖo malín málín mɛ din! Un ná hɛn ajɔ ce lɛ́ɛ wá, bó ná ná mɛ ɖokpó ɖokpó, bɔ é ná sɔgbe xá nǔ e é wa é.

¹³ Un nyí Alufa, bó nyí Omɛga; mɛ nukɔn nukɔntɔn, bó nyí mɛ gǔdo gúdo tɔn; un nyí bǐbɛ́, bó nyí vivɔ.”

¹⁴ Nǔ nyɔ́ nú mɛ e nɔ nya awu gaga yětɔn lɛ́ɛ, bó ná dó ba acɛ e ná ɖu atín e nɔ ná gbɛ mɛ ɔ́ sín sínsɛ́n é; bó ná dó ba acɛ e ná gbɔn toxo ɔ́ sín hɔntogbó lɛ́ɛ nu byɔ́ toxo ɔ́ mɛ é.

¹⁵Amɔ̌, avǔn lɛ́ɛ, majíkiblótɔ́ lɛ́ɛ, agalɛtɔ́ lɛ́ɛ, mɛhutɔ́ lɛ́ɛ, vodúnsɛntɔ́ lɛ́ɛ, kpó mɛ e yí wǎn nú adingban, bó nɔ wa adingbanzɔ́ lɛ́ɛ bǐ kpó ná nɔ toxo ɔ́ gúdo!

¹⁶ “Nyɛ Jezu ɔ́, un sɛ́ wɛnsagun ce dó mi, nú é ná ɖɔ nǔ énɛ́ lɛ́ɛ bǐ nú mi ɖo agun lɛ́ɛ mɛ. Davídi sín hɛ̌nnu mɛ wɛ un jɔ ɖe; un nyí sunví zǎnzǎn tɔn e nɔ kɔ́n é.”

¹⁷ Yɛ ɔ́ kpó yawó yɔ̌yɔ́ ɔ́ kpó ɖo ɖiɖɔ wɛ ɖɔ: “Wǎ!” Mɛ e ɖo mɔ̌ se wɛ ɔ́ lɔ ní ɖɔ: “Wǎ!” Mɛ e sinnugblá sin ɔ́ ní wá; mɛ e ɖo sin e nɔ ná gbɛ mɛ ɔ́ ba wɛ ɔ́ ní yí vɔ̌nu.

¹⁸ Mɛ e ɖo xóɖɔɖ'ayǐ e ɖo wěma élɔ́ mɛ lɛ́ɛ se wɛ ɔ́, nyɛ Jǎan un ɖo ɖiɖɔ n'i wɛ ɖɔ: nú mɛɖé gɔ́ nǔɖé ná ɔ́, Mawu ná zé awě e sín xó è ɖɔ dó wěma élɔ́ mɛ lɛ́ɛ gɔ́ nú tó e è nǎ dɔn n'i lɛ́ɛ é.

¹⁹Ényí mɛɖé ka ɖe nǔɖé kpo sín xóɖɔɖ'ayǐ e ɖo wěma élɔ́ mɛ lɛ́ɛ mɛ ɔ́, atín e nɔ ná gbɛ mɛ, bɔ è ɖɔ xó tɔn dó wěma élɔ́ mɛ ɔ́, sínsɛ́n e nyí étɔn ɖo atín énɛ́ sín sínsɛ́n mɛ ɔ́, Mawu ná ɖe síin, bɔ toxo mímɛ́ e xó è ɖɔ dó wěma élɔ́ mɛ ɔ́, mǐmá e nyí étɔn ɖo toxo énɛ́ mɛ ɔ́, Mawu ná ɖe síin.

²⁰Mɛ e ɖe kúnnu ɖɔ nǔgbó wɛ nǔ énɛ́ lɛ́ɛ nyí ɔ́ ɖɔ: “Nǔgbó wɛ! Un ná wá ɖo malín málín mɛ din!” Amǐ! Aklúnɔ Jezu, wǎ!

²¹Fɛ́nú Aklúnɔ Jezu tɔn ní nɔ kpɔ́ xá mɛ bǐ.