Read fon Nǔɖexlɛ́mɛ 7 Bible Online

Nǔɖexlɛ́mɛ 7 - fon bible

Nǔɖexlɛ́mɛ 7

¹ Énɛ́ ɔ́ gúdo ɔ́, un mɔ wɛnsagun Mawu tɔn ɛnɛ ɖo te ɖo ayǐkúngban ɔ́ sín zo ɛnɛ lɛ́ɛ jí; yě hɛn jɔhɔn ayǐkúngban jí tɔn ɛnɛ lɛ́ɛ ɖó te, bónú jɔhɔn ɖěbǔ ma nyi dó ayǐkúngban ɔ́ ó, é ma nyi dó xu ó; é ma ka nyi dó atín ɖěbǔ ó.

²Un lɛ́ mɔ wɛnsagun Mawu tɔn ɖěvo tɔ́n sín zǎnzǎnhwe jí, bó hɛn wuntun Mawu gbɛɖe ɔ́ tɔn. É sú xó tlílí, bó ɖɔ sɛ́ dó wɛnsagun Mawu tɔn ɛnɛ e yí acɛ, bó ná wa nǔ nyanya dó ayǐkúngban kpódó xu kpán wú lɛ́ɛ ɖɔ:

³ “Mi ma to wa nǔ nyanya dó ayǐkúngban wú ó; mi ma wa dó xu wú ó; mi ma wa dó atín lɛ́ɛ wú káká jɛ hwenu e mǐ ná ɖó wuntun nukɔn nú mɛsɛntɔ́ Mawu mǐtɔn tɔn lɛ́ɛ dó é ó.”

⁴Hwenɛ́nu ɔ́, è ɖɔ mɛ nabí e è ko ɖó wuntun Mawu tɔn nukɔn ná lɛ́ɛ é nú mì: yě mɛ adɔ̌kpo tɛ́nwe děgba (144.000) wɛ è ɖǒ wuntun ɖo togun Izlayɛ́li tɔn sín akɔta lɛ́ɛ bǐ mɛ.

⁵È ɖǒ wuntun gbɛtɔ́ děgba atɔn (12.000) ɖo akɔta Judáa tɔn mɛ, děgba atɔn (12.000) ɖo akɔta Hwlibɛ́ni tɔn mɛ, děgba atɔn (12.000) ɖo akɔta Gadi tɔn mɛ;

⁶děgba atɔn (12.000) ɖo akɔta Acɛ́ɛ tɔn mɛ, děgba atɔn (12.000) ɖo akɔta Nɛfutali tɔn mɛ, děgba atɔn (12.000) ɖo akɔta Manasée tɔn mɛ, děgba atɔn (12.000) ɖo akɔta Sinmɛnyɔ́ɔ tɔn mɛ,

⁷děgba atɔn (12.000) ɖo akɔta Levíi tɔn mɛ, děgba atɔn (12.000) ɖo akɔta Isakáa tɔn mɛ;

⁸děgba atɔn (12.000) ɖo akɔta Zabulɔ́ɔn tɔn mɛ, děgba atɔn (12.000) ɖo akɔta Jozɛ́fu tɔn mɛ, děgba atɔn (12.000) ɖo akɔta Bɛnjamɛ́ɛ tɔn mɛ.

⁹Énɛ́ ɔ́ gúdo ɔ́, un lɛ́ kpɔ́n bó mɔ mɛ wɔ̌buwɔ́bú ɖé: mɛ ɖěbǔ sixú xa mɛ e ɖo ahwan ɔ́ mɛ lɛ́ɛ bǐ ǎ. Yě gosín to lɛ́ɛ bǐ mɛ, bó gosín akɔta lɛ́ɛ bǐ mɛ, bó gosín togun lɛ́ɛ bǐ mɛ, bó gosín gbe e è nɔ dó lɛ́ɛ bǐ mɛ; yě ɖo te ɖo axɔ́súzinkpo ɔ́ kpó Lɛ̌ngbɔ́ví ɔ́ kpán nukɔn; yě dó awu gaga wěwé, bó hɛn děma alɔ mɛ.

¹⁰Yě sú xó tlílí ɖɔ: “Hwlɛngán mǐtɔn gosín Mawu mǐtɔn e jínjɔ́n axɔ́súzinkpo jí ɔ́ gɔ́n, bó gosín Lɛ̌ngbɔ́ví ɔ́ gɔ́n!”

¹¹Wɛnsagun Mawu tɔn lɛ́ɛ bǐ ɖo te bó lɛ́ lɛ̌ dó axɔ́súzinkpo ɔ́ kpó mɛxó lɛ́ɛ kpó, kpódó nǔɖogbɛ ɛnɛ lɛ́ɛ kpó. Yě xwe agbɔ̌nnusú do ɖo axɔ́súzinkpo ɔ́ nukɔn, bó ɖe kɔ́ nú Mawu,

¹²bó nɔ ɖɔ: “Amǐ! Kpikpa, susu, nǔnywɛ́, kúdídó, yɛ̌yi, acɛ, kpódó hlɔ̌nhlɔ́n kpán ní nyí Mawu mǐtɔn tɔn káká sɔ́yi! Amǐ!”

¹³Mɛxó lɛ́ɛ ɖokpó kanbyɔ́ mì ɖɔ: “Mɛ̌ ka nyí mɛ énɛ́ lɛ́ɛ e dó awu gaga wěwé é? Fítɛ́ yě gosín?”

¹⁴ Un yí gbe n'i ɖɔ: “Aklúnɔ ce, un ma tunwun nɛ́, hwi wɛ tunwun.” Bɔ é ɖɔ nú mì ɖɔ: “Mɛ e è dǒ ya ɖaxó ɔ́ ná lɛ́ɛ é wɛ. Yě nya awu gaga yětɔn lɛ́ɛ, bó bɛ́ dó Lɛ̌ngbɔ́ví ɔ́ sín hun mɛ, bɔ awu lɛ́ɛ wé.

¹⁵Énɛ́ ɔ́ wú wɛ yě ɖo te ɖo axɔ́súzinkpo ɔ́ nukɔn, bó ɖo azɔ̌ wa nú Mawu wɛ zǎn kéze ɖo sinsɛnxɔ tɔn mɛ. Mɛ e ɖo ayǐjínjɔ́n ɖo axɔ́súzinkpo ɔ́ jí ɔ́ ná cyɔ́n alɔ yě jǐ.

¹⁶ Xovɛ́ sɔ́ ná sin yě gbeɖé ǎ; kɔ sɔ́ ná xú yě gbeɖé ǎ; hwesivɔ́ sɔ́ ná mɛ yě gbeɖé ǎ; yǒzo ɖěbǔ sɔ́ ná hɛn yě gbeɖé ǎ.

¹⁷Đó Lɛ̌ngbɔ́ví e ɖo axɔ́súzinkpo ɔ́ tɛ́ntin ɔ́ ná nyí Lɛ̌ngbɔ́nyitɔ́ yětɔn, bó ná kplá yě yi fí e sin ɖagbe e nɔ ná gbɛ mɛ ɔ́ nɔ tɔ́n sín lɛ́ɛ. Bɔ Mawu ná súnsún ɖasin bǐ sín nukún mɛ nú yě.”