Read fon Nǔɖexlɛ́mɛ 8 Bible Online

Nǔɖexlɛ́mɛ 8 - fon bible

Nǔɖexlɛ́mɛ 8

¹Ée Lɛ̌ngbɔ́ví ɔ́ gba wuntun tɛ́nwegɔ́ ɔ́ é ɔ́, jǐxwé cí tóó nú ganxixo ɖokpó sín vlɔ̌ mɔ̌,

²bɔ un mɔ wɛnsagun Mawu tɔn tɛ́nwe e ɖo te Mawu nukɔn lɛ́ɛ. È fɔ kpɛn ɖaxó tɛ́nwe nú yě.

³ Wɛnsagun ɖěvo wá cí vɔ̌sákpe ɔ́ kpá; é hɛn nǔ e mɛ è nɔ fyɔ́ zǎlínkpɔ́n ɖe ɔ́ ɖokpó; siká wɛ è dó bló ná. È nǎ ɛ zǎlínkpɔ́n gěgé, bɔ é ná zé kpó mɛɖeɖóvo Mawu tɔn lɛ́ɛ bǐ sín ɖɛ kpó xwlé Mawu ɖo vɔ̌sákpe e è sɔ́ siká dó bló ná ɔ́ jí.

⁴Zǎlínkpɔ́n ɔ́ sín azizɔ nɔ sí sín wɛnsagun ɔ́ sín alɔ mɛ, bɔ azizɔ ɔ́ kpó mɛɖeɖóvo Mawu tɔn lɛ́ɛ sín ɖɛ kpó nɔ yi jǐ ɖo Mawu nukɔn.

⁵ Bɔ wɛnsagun Mawu tɔn ɔ́ sɔ́ zǎlínkpɔ́nfyɔ́nú ɔ́, bó kɔn vɔ̌sákpe ɔ́ sín myɔkán ɔ́ d'é mɛ, bɔ é gɔ́, lobɔ é zé nyi dó ayǐkúngban jí, bɔ é se gbe ɖé lɛ́ɛ; so ny'áwǎn, jǐ kɛ wun, bɔ ayǐkúngban dán wǔ.

⁶Wɛnsagun Mawu tɔn tɛ́nwe e hɛn kpɛn ɖaxó tɛ́nwe lɛ́ɛ ɖo nǔ sɔ́ wɛ, bó ná jɛ kpɛn ɖaxó lɛ́ɛ kún jí.

⁷ Wɛnsagun nukɔntɔn ɔ́ kún kpɛn bɔ kɛ́njí kpó myɔ kpán cáká kpó kanjɔ kpó, bó kɔn nyi ayǐkúngban jí. Ayǐkúngban ɔ́ sín atɔnvlɔ́ɖó fyɔ́; atín lɛ́ɛ sín atɔnvlɔ́ɖó fyɔ́; gběhan mú lɛ́ɛ bǐ fyɔ́.

⁸Énɛ́ ɔ́ gúdo ɔ́, wɛnsagun wegɔ́ ɔ́ kún kpɛn, bɔ nǔ só ɖaxó ɖɔhun ɖé ɖo myɔ ji wɛ, bɔ è sɔ́ nyi xu mɛ, bɔ xu ɔ́ sín atɔnvlɔ́ɖó húzú kanjɔ.

⁹Nǔɖíɖó gbɛɖe e ɖo xu ɔ́ glɔ́ lɛ́ɛ bǐ sín atɔnvlɔ́ɖó kú, bɔ tɔjíhún lɛ́ɛ sín atɔnvlɔ́ɖó gblé.

¹⁰ Énɛ́ ɔ́ gúdo ɔ́, wɛnsagun atɔngɔ́ ɔ́ kún kpɛn bɔ sunví ɖaxó ɖé ɖo jiji wɛ zohwín ɖɔhun, bó jɛ ayǐ sín jǐxwé; é jɛ tɔ lɛ́ɛ kpódó tɔjɔtɛn lɛ́ɛ kpó sín atɔnvlɔ́ɖó jí.

¹¹ Sunví énɛ́ sín nyǐkɔ nɔ́ nyí vǐvɛ́, bɔ sin lɛ́ɛ sín atɔnvlɔ́ɖó vɛ́, bɔ mɛ e nu lɛ́ɛ gěgé kú, ɖó sin ɔ́ vɛ́ wútu.

¹² Énɛ́ ɔ́ gúdo ɔ́, wɛnsagun ɛnɛgɔ́ ɔ́ kún kpɛn, bɔ è dǒ nǔ hwe ɔ́ sín atɔnvlɔ́ɖó, bó dó nǔ sun sín atɔnvlɔ́ɖó, bó dó nǔ sunví lɛ́ɛ sín atɔnvlɔ́ɖó, bɔ kínkɔ́n yětɔn sín atɔnvlɔ́ɖó dó ablu; kéze sín atɔnvlɔ́ɖó sɔ́ nɔ ná wěziza ǎ; zǎn lɔ sín atɔnvlɔ́ɖó sɔ́ nɔ ná wěziza ǎ.

¹³Un lɛ́ kpɔ́n, bó mɔ gangan ɖokpó ɖo zinzɔn wɛ gbɔn jɔhɔn mɛ aga ɖéé; un se bɔ é ɖo xó sú wɛ tlílí ɖɔ: “Awo! Awo! Étɛ́ ɖíe ɖo mɛ e ɖo ayǐkúngban jí lɛ́ɛ ná gbo wɛ hwenu e wɛnsagun atɔn ɖě lɛ́ɛ ná kún kpɛn, bɔ è nǎ se ɔ́ e?”