Read fon Hwliti 1 Bible Online

Hwliti 1 - fon bible

Hwliti 1

¹Hwenu e hwɛɖɔtɔ́ lɛ́ɛ ɖo acɛ kpa wɛ ɖo Izlayɛ́li ɔ́, adɔ ɖé tɔ́n ɖo to ɔ́ mɛ. Nya ɖé ka tíin bó nɔ́ nɔ Bɛteleyɛ́mu ɖo Judáa yíkúngban jí; nya énɛ́ ɔ́ kplá asi tɔn kpó vǐ tɔn súnnu we lɛ́ɛ kpó, bɔ yě ná yi nɔ Mɔwabu, ɖó adɔ e tɔ́n é wú.

²Nya ɔ́ nɔ́ nyí Elimɛlɛ́ki; asi tɔn nɔ nyí Nɔemíi, bɔ vǐ tɔn we lɛ́ɛ ɖokpó nɔ́ nyí Maxlɔ́ni, bɔ ɖokpó nɔ́ nyí Kiliɔ́ni. Efláta nu wɛ nú yě. Ée yě wǎ Mɔwabu ɔ́, yě sá xwé nyi fínɛ́.

³Nɔemíi sín asú wá kú, bɔ é kpo é kpódó vǐ tɔn we lɛ́ɛ kpó.

⁴Vǐ lɛ́ɛ da Mɔwabunu; mɛ ɖokpó sín asi nɔ nyí Ɔpa, mɛ ɖě ɔ́ tɔn nɔ́ nyí Hwliti. Yě nɔ fínɛ́ xɔ xwe wǒ mɔ̌;

⁵bɔ Maxlɔ́ni kpó Kiliɔ́ni kpó lɔmɔ̌ wá kú, bɔ Nɔemíi sɔ́ ɖó asú ǎ, é ka sɔ́ ɖó vǐ ǎ.

⁶Mɔwabu fínɛ́ wɛ Nɔemíi ɖe, bó se ɖɔ Mawu Mavɔmavɔ jɔwǔ togun émítɔn, bɔ nǔɖuɖu tíin; énɛ́ ɔ́, é jɛ nǔ sɔ́ jí, é kpó vǐ tɔn sín asi we lɛ́ɛ kpó, bó ná lɛ́ kɔ yi Judáa.

⁷É kplá yě bɔ yě jɛ ali.

⁸Lo ɔ́, hwenu e yě ɖo yiyi wɛ ɔ́, é ɖɔ nú yě ɖɔ: “Din ɔ́, mi lɛ́ kɔ yi xwé, bónú mɛ ɖokpó ɖokpó ní yi nɔ tɔn gɔ́n! Mawu Mavɔmavɔ ní nyɔ́ xomɛ dó mi wú, lě e mi nyɔ́ xomɛ dó asú mitɔn e kú lɛ́ɛ kpó nyɛ kpó wú gbɔn é!

⁹Mawu Mavɔmavɔ ní bló bónú mi mɛ ɖokpó ɖokpó ní mɔ asú da, bónú asúxwé ní nyɔ́ nú mi.” Ée é ɖɔ mɔ̌ ɔ́, é kplá así kɔ nú yě, bó ná jó yě dó, bɔ yě bɛ́ avǐ, bó ya ɖésú,

¹⁰bó ɖɔ n'i ɖɔ: “Éeǒ! Mǐ ná xwedó we yi to towe mɛ.”

¹¹Nɔemíi lɛ́ ɖɔ nú yě ɖɔ: “Vǐ ce lɛ́ɛ mi, mi lɛ́ kɔ yi to mitɔn mɛ. Étɛ́wú wɛ mi jló ná xwedó mì? Un sɔ́ sixú ɖo vǐ ná ji wɛ bónú mi ná da ǎ.

¹²Mi lɛ́ kɔ yi to mitɔn mɛ bó jó mì dó; un ko kpo; un sɔ́ sixú vɔ́ asú da ǎ. Ényí un tlɛ ɖɔ: vǐ kpo ɖo wǔ ce, lobo yi xɔ nú súnnu zǎn mɛ din bó ji vǐ ɔ́,

¹³mi ná gbɛ́ súnnu ɖěvo da, bó ná nɔ te kpɔ́n yě káká bɔ yě ná su wɛ a? Vǐ ce lɛ́ɛ e mi, mi gbɔ, nyɛ wɛ Mawu Mavɔmavɔ húzú kpan nukɔn, bó ɖo nǔ wa xá wɛ.”

¹⁴Bɔ yě lɛ́ dó avǐ gbe, bó ya ɖésú. Ɔpa ka gbɔ bó kplá así kɔ nú asú tɔn nɔ, bó ná jó é dó; lo ɔ́, Hwliti tɛ́ dó asú tɔn nɔ wú, bó gbɛ́ ɖɔ émí kún ná jó e dó gbeɖé ó.

¹⁵Nɔemíi ɖɔ nú Hwliti ɖɔ: “Kpɔ́n, wegɔ́ towe nɛ́ lɛ́ kɔ xwe togun tɔn kpó vodún tɔn kpó kɔn nɛ́. Hwi lɔmɔ̌ ní lɛ́ kɔ yi éyɛ́ ɖɔhun.”

¹⁶Hwliti ka yí gbe n'i ɖɔ: “Ma dó tagba nú mì ɖɔ ma jó we dó bó lɛ́ kɔ yi nɔ zɔ nú we ó; a yi fí ɖěbǔ ɔ́, un ná yi; fí e a nɔ ɔ́ wɛ un ná nɔ. Togun towe wɛ ná nyí togun ce; Mawu e a nɔ sɛn ɔ́ wɛ un ná sɛn.

¹⁷Fí e a nǎ kú ɖe ɔ́ wɛ un ná kú ɖe, bɔ è na ɖi mì ɖó fínɛ́. Ényí kú ɖé má hu mì ǎ, bónú nyɛ ɖésúnɔ jló bó jɛ vo nú we hǔn, Mawu Mavɔmavɔ ní dɔn tó nú mì, bónú é syɛ́n hú tódɔnnúmɛ lɛ́ɛ bǐ!”

¹⁸Ée Nɔemíi mɔ ɖɔ Hwliti ɖɔ émí ná xwedó émí dandan jɛ́n wɛ ɔ́, é gbɔ bó xwɛ.

¹⁹Bɔ yě zɔn kpɔ́ káká yi Bɛteleyɛ́mu. Ée yě wǎ ɔ́, toxo ɔ́ bǐ xo zǐn bɔ nyɔ̌nu lɛ́ɛ nɔ́ kanbyɔ́ yěɖée ɖɔ: “Nɔemíi jɛ́n wɛ a?”

²⁰Nɔemíi ka yí gbe nú yě ɖɔ: “Mi ma sɔ́ ylɔ́ mì ɖɔ Nɔemíi ɖě ó, mi ylɔ́ mì ɖɔ Mala, ɖó Nǔbǐwúkpétɔ́ ɔ́ sɔ́ mì dó aluwɛ ɖaxó ɖé mɛ.

²¹Hwenu e un gosín fí ɔ́, nǔ ɖo así ce bó túnflá. Din ɔ́, Mawu Mavɔmavɔ ká kplá mì wá así gbá alɔ gbá. Hǔn mi ma sɔ́ ylɔ́ mì ɖɔ Nɔemíi ó, Nǔbǐwúkpétɔ́ ɔ́ húzú kpan nukɔn mì, é dó ya mì.”

²²Lě e Nɔemíi gosín Mɔwabu wá gbɔn ɔ́ nɛ́, é kpódó vǐ tɔn si Hwliti Mɔwabunu ɔ́ kpó. Hwenu e è jɛ nǔkún ya jí ɔ́ wɛ é wá Bɛteleyɛ́mu.