Read fon Hwliti 4 Bible Online

Hwliti 4 - fon bible

Hwliti 4

¹Daxwi énɛ́ ɔ́ mɛ ɔ́, Bowozi yi toxo ɔ́ sín hɔntogbó jí fí e è nɔ kplé xó ɖɔ ɖe ɔ́, bó jínjɔ́n ayǐ. Fínɛ́ wɛ é ɖe bɔ nya e xó é ɖɔ nú Hwliti ɖɔ é sɛkpɔ́ ɛ hú émí ɔ́ wá xweyǐgbe, lobɔ é ylɔ́ ɛ, bó ɖɔ é ní wá jínjɔ́n ayǐ, bɔ nya ɔ́ wá jínjɔ́n ayǐ.

²Bowozi ylɔ́ tomɛxó wǒ, ɖɔ yě ní wá jínjɔ́n ayǐ. Ée yě wǎ jínjɔ́n ayǐ ɔ́,

³é ɖɔ nú mɛ e nyí Elimɛlɛ́ki sín mɛ hú i ɔ́ ɖɔ: “Nɔemíi lɛ́ kɔ sín Mɔwabu wá. É ɖo nɔví mǐtɔn Elimɛlɛ́ki sín ayǐkúngban ná sa wɛ.

⁴Un tunwun ɖɔ má ɖɔ nú we, bó ná byɔ́ we ɖɔ hwi ní yí ayǐkúngban ɔ́ ɖo tomɛxó lɛ́ɛ kpódó mɛ e jínjɔ́n ayǐ ɖo fí lɛ́ɛ kpó nukɔn. Ényí a jló ná wa tɛn e mɛ a ɖe ɔ́ sín azɔ̌ hǔn, wa. A ma ka jló ǎ hǔn ɖɔ nú mì, ɖó nyi jɛ́n bɔ dó wǔ we tlóló.” Nya ɔ́ yí gbe n'i ɖɔ émí ná yí ayǐkúngban ɔ́.

⁵Bowozi lɛ́ yí xó bó ɖɔ: “Gbe e gbe a nǎ yí ayǐkúngban ɔ́ ɖo Nɔemíi sí ɔ́, a ɖǒ nǎ lɛ́ yí Hwliti Mɔwabunu asúkúsi ɔ́ dó xɔ towe sá, bónú ayǐkúngban ɔ́ ná kpo ɖo asú tɔn e kú ɔ́ sín hɛ̌nnu tɔn nyí wɛ.”

⁶Bɔ nya ɔ́ ká yí gbe n'i ɖɔ: “Ényí mɔ̌ wɛ hǔn un sɔ́ ná yí ǎ, ɖó un táá wá gba dɔkun nyɛ ɖésúnɔ tɔn lɛ́ɛ dó. Azɔ̌ énɛ́ e nyí ce ɔ́, un jó nú we, ɖó nyɛ ɖésúnɔ sixú wa ǎ.”

⁷Đ'ayǐ xóxó ɖo Izlayɛ́li ɔ́, nú è xɔ nǔɖé abǐ è ɖyɔ̌ nǔɖé xá mɛɖé ɔ́, mɛ ɖokpó nɔ ɖe afɔkpa tɔn bo nɔ sɔ́ jó nú mɛ ɖě ɔ́ bó nɔ dó ɖó ata xó ɔ́ jí. Énɛ́ ɔ́ wɛ nɔ ɖe xlɛ́ ɖɔ è ko ɖɔ xó ɔ́ gbo.

⁸Énɛ́ ɔ́ wú wɛ, hwenu e nya ɔ́ ɖo ɖiɖɔ nú Bowozi wɛ ɖɔ é ní yí ayǐkúngban ɔ́ é ɔ́, é ɖe afɔkpa tɔn bó sɔ́ jó nú Bowozi.

⁹Bɔ Bowozi ɖɔ nú tomɛxó lɛ́ɛ kpódó mɛ e ɖo fínɛ́ lɛ́ɛ bǐ kpán ɖɔ: “Mi mɛ bǐ nukún mɛ wɛ un yí nǔ e nyí Elimɛlɛ́ki kpódó vǐ tɔn Kiliɔ́ni kpó Maxlɔ́ni kpán tɔn lɛ́ɛ bǐ ɖo Nɔemíi sí ɖe égbé din mɛ.

¹⁰ Mɔ̌ ɖokpó ɔ́, un sɔ́ Hwliti Mɔwabunu, Maxlɔ́ni e kú ɔ́ sín asi ɖó xɔ ce sá. Énɛ́ ɔ́, ayǐkúngban ɔ́ ná nɔ mɛ e kú ɔ́ sín hɛ̌nnu mɛ, vǐ tɔn lɛ́ɛ ná hɛn nyǐkɔ tɔn ɖó te ɖo hɛ̌nnumɔ tɔn lɛ́ɛ tɛ́ntin, bó ná hɛn ɖó te ɖo to tɔn mɛ. Mi bǐ nukún mɛ wɛ nǔ énɛ́ lɛ́ɛ bǐ jɛ ɖe.”

¹¹ Tomɛxó lɛ́ɛ kpódó mɛ e ɖo fínɛ́ lɛ́ɛ bǐ kpán yí gbe ɖɔ: “Ɛɛn nukún mǐtɔn mɛ wɛ nǔ énɛ́ lɛ́ɛ bǐ jɛ ɖe. Mawu Mavɔmavɔ ní xo ɖɛ dó nyɔ̌nu e byɔ́ xɔ towe sá ɔ́ jí, bónú é ní gba kún Jakɔ́bu sín asi Hlacɛ́li kpó Lěya kpó e dó Izlayɛ́li ví lɛ́ɛ sín kún é ɖɔhun. Dɔkun towe ní d'agba ɖo Efláta sín ayǐkúngban jí. Nyǐkɔ towe ní yi jǐ ɖo Bɛteleyɛ́mu to ɔ́ bǐ mɛ.

¹² Mawu Mavɔmavɔ ní bló bónú nyɔ̌nu énɛ́ ɔ́ ní ji vǐ gěgé nú we, bónú xwé towe ní gɔ́ Pɛlɛ́si e Judáa ji ɖo Tamáa xomɛ ɔ́ sín xwé ɖɔhun.”

¹³Énɛ́ ɔ́, Bowozi yí Hwliti dó xɔ tɔn sá, bɔ Mawu Mavɔmavɔ bló bɔ é mɔ xo bó ji vǐ súnnu ɖokpó.

¹⁴Nyɔ̌nu Bɛteleyɛ́munu lɛ́ɛ ɖɔ nú Nɔemíi ɖɔ: “Susu nú Mawu Mavɔmavɔ, ɖó é bló bɔ è ji mɛ e ná kpé nukún dó wǔ we é. Vǐvú towe ní nyí nǔsúɖaxó ɖo Izlayɛ́li.

¹⁵É ná ná ayi j'ayǐ we bó ná kpé nukún wǔ we ɖo kpikpoxɔmɛ. Vǐ towe si ɔ́ hú vǐ tɛ́nwe nú we, ɖó é yí wǎn nú we bó ji vǐ súnnu élɔ́ nú we.”

¹⁶Nɔemíi yí vǐ ɔ́ bó dɔn ɛ dó wǔ, bo zin alɔ dó akɔ́n ɖɔ émí ná tɔ́jú i.

¹⁷Nyɔ̌nu e ɖo xwé tɔn kpá lɛ́ɛ nɔ́ ɖɔ: “Nɔemíi ɖó vǐ súnnu ɖokpó!” Yě ylɔ́ vǐ ɔ́ ɖɔ Ovɛ́di. Ovɛ́di wɛ ji Jɛsée Davídi sín tɔ́.

¹⁸Davídi ɔ́, tɔ́gbó tɔn lɛ́ɛ ɖíe, bɛ́ sín Pɛlɛ́si jí: Pɛlɛ́si ji Ɛslɔ́ni.

¹⁹Ɛslɔ́ni ji Hlamu, Hlamu ji Aminadabu,

²⁰Aminadabu ji Naxicɔ́ni, Naxicɔ́ni ji Saluma,

²¹Saluma ji Bowozi, Bowozi ji Ovɛ́di,

²²Ovɛ́di ji Jɛsée, Jɛsée ji Davídi.