Read fon 1 Samuwɛ́li 1 Bible Online

1 Samuwɛ́li 1 - fon bible

1 Samuwɛ́li 1

¹Dǎwe ɖé tíin, bó nɔ́ nyí Ɛlukana, bó nɔ́ nɔ Hlamatayímu-Sofímu, ɖo sókan Eflayímu tɔn mɛ, ɖo tokpɔnla Súfu ví lɛ́ɛ tɔn mɛ. Ɛlukana ɔ́, Eflayímu ví wɛ, bó nyí Yeloxámu ví; Yeloxámu ká nyí Elihu ví, bɔ Elihu ká nyí Tohu ví, bɔ Tohu nyí Súfu ví.

²Asi we wɛ Ɛlukana ɖó; mɛ ɖokpó nyí Ana, bɔ mɛ wegɔ́ ɔ́ nyí Penína. Penína ɖó vǐ, Ana ká ɖó vǐ ɖě ǎ.

³Xwewú xwewú tɛgbɛ ɔ́, Ɛlukana nɔ gosín toxo tɔn mɛ, bó nɔ́ yi Silóo toxo mɛ, bó nɔ́ yi sɛn Mawu Mavɔmavɔ, Mawu Nǔbǐwúkpétɔ́ ɔ́, bó nɔ sá vɔ̌ n'i. Eli ví, Hofíni kpó Pínxási kpó wɛ nyí vɔ̌sánú-xwlémawutɔ́ ɖo Silóo fínɛ́.

⁴Ɛlukana sá vɔ̌ gbeɖé ɔ́, é nɔ́ ná lan asi tɔn Penína ɔ́, bó nɔ́ ná lan vǐ tɔn súnnu kpó nyɔ̌nu kpó.

⁵Lo ɔ́, lan e é nɔ́ ná mɛ ɖě lɛ́ɛ ɖokpó ɖokpó ɔ́, mɔ̌hunkɔtɔn donu we wɛ é nɔ ná Ana, ɖó é yí wǎn n'i ɖésú. Mawu Mavɔmavɔ ná ɛ vǐ ǎ có Ɛlukana yí wǎn n'i.

⁶Ana ɔ́, asísi tɔn nɔ ɖo nǔ ɖɔ ba ɛ wɛ, bó ná dó dó aɖi xomɛ n'i ɖó vǐ e Mawu Mavɔmavɔ ma ná ɛ ǎ é wú.

⁷Xwewú xwewú tɛgbɛ ɔ́, nú Ana ko yi Mawu Mavɔmavɔ xwé gbe ɔ́, nǔ ɖokpó ɔ́ jɛ́n nɔ́ jɛ. É ká wá jɛ xwe ɖokpó mɛ, bɔ Ana ko lɛ́ ɖo avǐ ya wɛ, bó gbɛ́ nǔ ɖu,

⁸bɔ asú tɔn kanbyɔ́ ɛ ɖɔ: “Ana, étɛ́wú a ka ɖo avǐ ya wɛ bó gbɛ́ nǔ ɖu? Étɛ́wú a ka ɖo aluwɛ mɛ? Nyɛ ma hú vǐ wǒ nú we ǎ cé?”

⁹Ée yě ɖu nǔ bó nu sin fó ɖo Silóo fínɛ́ ɔ́, Ana sí te, bó yi Mawu Mavɔmavɔ xwé ɔ́ sín hɔntogbó jí. Eli vɔ̌sánú-xwlémawutɔ́ ɔ́ ká ɖo ayǐjínjɔ́n ɖo hɔnkpo ɔ́ kpá.

¹⁰Akpɔ ɖó Ana ɖésú, bɔ é xo ɖɛ kpó avǐ kpó,

¹¹bó ɖɔ: “Mawu Mavɔmavɔ Nǔbǐwúkpétɔ́, ényí a kɛnklɛ́n bó nyi kɔ kpɔ́n wǔvɛ́ e mɔ wɛ nyɛ mɛsɛntɔ́ towe ɖe ɔ́, ényí a flín mì bó má wɔn mì ǎ, bó ná vǐ súnnu ɖokpó nyɛ mɛsɛntɔ́ towe ɔ́, un ná sɔ́ vǐ ɔ́ ɖó vo nú we, bɔ é ná nyí towe kúgbe gbɛgbe, bɔ è nǎ xwlɛ́ ta n'i gbeɖé ǎ; énɛ́ ɔ́ ná ɖe xlɛ́ ɖɔ è sɔ́ ɛ ɖó vo nú we.”

¹²Ée é ɖo ɖɛ xo wɛ bɔ é wá jɛ lǐnlín jí ɔ́, Eli jɛ nu tɔn kpɔ́n jí.

¹³Ana ɖo ɖɛ xo dó xomɛ wɛ, bɔ mɛɖé ɖo gbe tɔn se wɛ ǎ, nu tɔn kɛ́ɖɛ́ jɛ́n ɖo wǔ dán wɛ, bɔ Eli vɛdó ɖɔ ahan wɛ é nu mú sín,

¹⁴bó ɖɔ: “Káká hwetɛ́nu ahan ka ná nɔ jǐ we yi jɛ? Ahan ɔ́ ní hɔ́n nú we lo.”

¹⁵Ana ka yí gbe n'i ɖɔ: “Éeǒ aklúnɔ ce, nyɔ̌nu ɖé wɛ nú mì bɔ un ɖo wǔvɛ́ mɔ wɛ ɖo ayi mɛ. Un nu vɛ̌ɛn ǎ, un ka nu ahan syɛ́nsyɛ́n ɖěbǔ ǎ. Nǔ e ɖo xo ce mɛ ɔ́ ɖɔ nú Mawu Mavɔmavɔ wɛ un ɖe.

¹⁶Ma mɔ nyɛ mɛsɛntɔ́ towe dó mɔ nyɔ̌nu nǔvɔ́nɔ ó. Ɖó wǔvɛ́ e mɔ wɛ un ɖe din ɔ́ kpó aɖi e ɖó mì ɔ́ kpó wɛ zɔ́n bɔ un ɖo ɖɛ xo wɛ káká wá jɛ din.”

¹⁷Ée é ɖɔ mɔ̌ ɔ́, Eli ɖɔ: “Yi kpódó fífá kpó; Mawu Izlayɛ́li tɔn ní ná nǔ e a byɔ́ ɔ́ we.”

¹⁸Ana ka yí gbe n'i ɖɔ: “A nyɔ̌ xomɛ dó nyɛ mɛsɛntɔ́ towe wú mɛ nya!” Ée é ɖɔ mɔ̌ ɔ́, é yi bó ɖu nǔ, bɔ nukún tɔn mɛ jɛ ayǐ.

¹⁹Ɛlukana kpó mɛ tɔn lɛ́ɛ kpó fɔ́n zǎn, bó yi ɖe kɔ́ nú Mawu Mavɔmavɔ bó lɛ́ kɔ yi xwé ɖo Hlama. Ɛlukana ɖó xó xá asi tɔn Ana ɔ́, bɔ Mawu Mavɔmavɔ ná ɛ nǔ e Ana byɔ́ é.

²⁰Đo xwe nɛ́ xwe ɔ́, Ana mɔ xo bo ji vǐ súnnu ɖokpó, bó ɖɔ dó ayi mɛ ɖɔ émí ná sun nyǐ i ɖɔ Samuwɛ́li, ɖó Mawu Mavɔmavɔ wɛ émí byɔ́[1].

²¹Énɛ́ ɔ́ gúdo ɔ́, asú tɔn Ɛlukana lɛ́ yi Silóo, é kpódó xwédo tɔn bǐ kpó, bó wá yi sá xwetavɔ́ nú Mawu Mavɔmavɔ, bó lɛ́ sá vɔ̌ ɖokpó; vɔ̌ énɛ́ ɔ́, akpá tɔn wɛ é dó.

²²Amɔ̌, Ana yi ɖě xwe nɛ́ xwe ǎ. É ɖɔ nú asú tɔn ɖɔ: “Nú vǐ ɔ́ kó ɖe anɔ̌ ɔ́, un ná kplá ɛ yi, bó ná sɔ́ ɛ yi xwlé Mawu Mavɔmavɔ, bɔ é ná nɔ fínɛ́ káká sɔ́yi.”

²³Asú tɔn ká ɖɔ n'i ɖɔ: “Blǒ lě e a mɔ ɖɔ é ná nyɔ́ gbɔn é; nɔ te bónú vǐ ɔ́ ɖe anɔ̌. Mawu Mavɔmavɔ ní vɛ́ ɖe akpá e é dó é.” Nǔgbó ɔ́, Ana cí Hlama, bó ná anɔ̌ vǐ ɔ́ káká bɔ vǐ ɔ́ ɖe anɔ̌.

²⁴Ée vǐ ɔ́ ɖe anɔ̌ ɔ́, é kplá ɛ yi Mawu Mavɔmavɔ xwé ɖo Silóo. É kpó asú tɔn kpó hɛn nyibúsú e ɖó xwe atɔn ɔ́ ɖokpó, linfín ati ɖokpó, kpó vɛ̌ɛn anyǔglo ɖokpó kpó dó vǐ ɔ́ jí, bɔ yě yi Mawu Mavɔmavɔ xwé ɖo Silóo. Vǐ ɔ́ ká kpo ɖo kpɛví tawun.

²⁵Yě hu nyibúsú ɔ́ dó sá vɔ̌, bó kplá vǐ ɔ́ hɛn yi Eli gɔ́n.

²⁶Ana ɖɔ n'i ɖɔ: “Aklúnɔ ce, a flín nyɔ̌nu e wá fí gbe ɖokpó, bó wá sa vo nú Mawu Mavɔmavɔ é a? Un xwlé nǔ nú we; nyɔ̌nu ɔ́ jɛ́n ɖíe mɔ wɛ a ɖe e; ényí mɛ ɖěvo wɛ ǎ.

²⁷Vǐ e byɔ́ Mawu Mavɔmavɔ wɛ un ɖe, bó ɖo ɖɛ xo wɛ hwenɛ́nu é ɖíe Mawu Mavɔmavɔ se ɖɛ ce e.

²⁸Din ɔ́, nyɛ lɔ jló ná sɔ́ vǐ ɔ́ ná Mawu Mavɔmavɔ, bɔ é ná nyí étɔn káká sɔ́yi.” Bɔ yě ɖe kɔ́ nú Mawu Mavɔmavɔ.